Eknath Shinde : तुम्ही सगळी माझी माणसं आहात. आपलं कुटुंब एक आहे.  तुमची बदनामी म्हणजे माझी बदनामी आहे. चुकीच्या गोष्टींवर एनर्जी वाया घालवू नका. कमी बोला जास्त काम करा असा सल्ला उपमुख्यमंत्री एकनाथ शिंदे यांनी आमदारांना दिला. गेल्या काही दिवसात काही गोष्टी घडल्या. तुमच्याकडे दाखवलेलं बोट माझ्याकडे असतं, असे म्हणत शिवसेनेच्या वादग्रस्त मंत्री आणि आमदारांना एकनाथ शिंदे यांनी कानपिचक्या दिल्या. तुमचे आमदार काय करतात असा प्रश्न मला विचारतात ? असेही शिंदे म्हणाले. 

बदनामीमुळे काही मंत्र्यांना घरी जावं लागलं

बदनामीमुळे काही मंत्र्यांना घरी जावं लागलं, असं सांगत एकनाथ शिंदे यांनी आमदारांना अप्रत्यक्ष इशाराही दिला. आपल्या परिवारावर कारवाईचा बडगा उगारायला मला अजिबात आवडणार नाही. परंतु, मला कारवाई करायला भाग पडणार नाही तसंच काम तुमच्याकडून अपेक्षित आहे असे एकनाथ शिंदे म्हणाले. मी रागावत नाही. मी प्रमुखासारखं वागत नाही. कार्यकर्त्यासारखं वागतो. तुम्हीही तसंच वागा. आपल्या डोक्यात हवा जाऊ देता कामा नये. कितीही पदं मिळाली तरी कार्यकर्ता आहे असंच समजून कामं करा . 

बदनामीचा डाव रचला जात आहे

कमी वेळात जास्त यश मिळालं आहे. लोकं आपल्या पाठीशी आहे . त्यामुळे बदनामीचा डाव रचला जात आहे. त्यामुळे प्रत्येक गोष्टीची काळजी घ्या.  यापुढील काळ कसोटीचा आहे. सामाजिक जीवनात पथ्य पाळावी लागतात. ती काळजी घ्या असे एकनाथ शिंदे म्हणाले. 

गेल्या काही दिवसांमध्ये  शिवसेनेच्या काही नेत्यांचे वादग्रस्त व्हिडीओ समाज माध्यमांवर चांगलेच व्हायरल झाले आहेत. शिवसेनेचे नेते संजय गायकवाड यांनी जेवण खराब दिल्याचा आरोप करत आकाशवाणी आमदार निवास येथील कॅन्टीनमधल्या कर्मचाऱ्याला मारहाण केली होती, त्यांचा व्हिडीओ समोर आल्यानंतर विरोधकांनी टीकेची झोड उठवली,  हे प्रकरण ताजं असतानाच शिवसेनेचे मंत्री संजय शिरसाट यांचा बॅगेसोबतचा एक व्हिडीओ समोर आला, त्या बॅगेमध्ये रोकड असल्याचा आरोप सुरू आहे. दरम्यान या सर्व घटनांनंतर आता उपमुख्यमंत्री  एकनाथ शिंदे हे अ‍ॅक्शनमोडमध्ये आल्याचं पाहायला मिळत आहे. आज त्यांनी सर्व आमदारांची बैठक घेतली. या बैठकीमध्ये एकनाथ शिंदे यांनी मंत्र्यांसह सर्व आमदारांनी सूचना केल्या आहेत. 

महत्वाच्या बातम्या:

Arjun Khotkar on Sanjay Raut : संजय राऊतांनी वायफळ बडबड बंद करावी, नाहीतर...; शिवसेना शिंदे गटाच्या आमदाराचा थेट इशारा