Inflation : महागाईचा फटका! केस कटिंग, दाढी करण्यासाठी अधिक पैसे मोजावे लागणार, सलून सेवा 20 टक्क्यांनी महागली, 'असे' असतील नवे दर

Salon Rate Hike : सलून सेवांच्या दरात झालेल्या या 20 टक्के वाढीचा थेट परिणाम आता सर्वसामान्य नागरिक आणि ग्राहकांच्या मासिक बजेटवर होणार आहे.

Salon Rate Hike

Source : abp majha

छत्रपती संभाजीनगर : देशातील वाढत्या महागाईचा मोठा फटका आता थेट सलून व्यवसायालाही बसला आहे. वाढते इंधनाचे दर, महाग झालेली आंतरराष्ट्रीय व स्थानिक सौंदर्यप्रसाधने आणि वाढलेला दैनंदिन व्यवसाय खर्च यामुळे 'महाराष्ट्र नाभिक महामंडळाने' सलून सेवांच्या दरात तब्बल 20 टक्के वाढ करण्याचा मोठा निर्णय घेतला आहे. नाभिक महामंडळाने घेतलेल्या या निर्णयानुसार, ही नवीन दरवाढ 6 जूनपासून संपूर्ण राज्यभरात अधिकृतपणे लागू करण्यात आली आहे. 

वाढत्या महागाईत आपला व्यवसाय टिकवून ठेवण्यासाठी आणि कारागिरांचा उदरनिर्वाह चालवण्यासाठी हा दरवाढ करण्याचा निर्णय घेणे अत्यंत आवश्यक होतं, असं स्पष्टीकरण नाभिक महामंडळाकडून देण्यात आलं आहे.

या दरवाढीमुळे आता केस कापणे, दाढी करणे, हेअर कलर, फेशियल आणि इतर सर्व प्रकारच्या अत्याधुनिक सलून सेवांसाठी ग्राहकांना आपल्या खिशातील अधिक पैसे मोजावे लागणार आहेत. शॅम्पू, हेअर कलर, जेल, वॅक्स यांसारख्या दैनंदिन लागणाऱ्या वस्तूंच्या किमतीत मोठी वाढ झाल्याने सलून व्यावसायिकांवरील आर्थिक ताण कमालीचा वाढला होता.

Salon Operational Cost : दुकानभाडे, वीजबिले आणि वाढत्या खर्चामुळे व्यावसायिक अडचणीत

नाभिक महामंडळाने दिलेल्या माहितीनुसार, अनेक वर्षांपासून सलून व्यावसायिक अतिशय कमी नफा ठेवून ग्राहकांना सेवा देत होते. मात्र, आताच्या परिस्थितीत जुने दर कायम ठेवून व्यवसाय चालवणे आणि दुकानाचा खर्च भागवणे पूर्णपणे कठीण झालं आहे.

गेल्या काही महिन्यांत दुकानांची वाढलेली व्यावसायिक वीजबिले, वाढते दुकानभाडे, स्थानिक कर आणि व्यवसायासाठी घेतलेल्या कर्जाचे हप्ते यामुळे ग्रामीण आणि शहरी दोन्ही भागांतील सलून व्यावसायिक मोठ्या आर्थिक अडचणीत सापडले आहेत. त्यामुळेच ही दरवाढ लागू करण्यात आली आहे. सलून सेवांच्या दरात झालेल्या या 20 टक्के वाढीचा थेट परिणाम आता सर्वसामान्य नागरिक आणि ग्राहकांच्या मासिक बजेटवर होणार आहे.

Current Salon Rates : सलूनचे नवीन दर

वाढलेल्या 20 टक्के दरापूर्वी सध्या बाजारात प्रीमियम, एसी आणि ग्रामीण भागातील सलूनमध्ये खालीलप्रमाणे दर आकारले जात आहेत, ज्याचा सविस्तर तक्ता मध्ये देण्यात आला आहे:

सेवा प्रकार	प्रिमियम सलून दुकान	एसी सलून दुकान	ग्रामीण भागातील सलून
दाढी	200 ते 500 रुपये	100 ते 200 रुपये	50 ते 70 रुपये
कटिंग	500 ते 1000 रुपये	150 ते 350 रुपये	80 ते 100 रुपये
हेअर कलर	700 ते 1000 रुपये	300 ते 500 रुपये	100 ते 200 रुपये
फेशियल	2000 ते 3000 रुपये	500 ते 1500 रुपये	200 ते 500 रुपये
हेअर ट्रिटमेंट	3000 ते 5000 रुपये	1500 ते 3000 रुपये	-----
मेकअप (ब्रायडल)	7000 ते 10000 रुपये	3000 ते 7000 रुपये	1500 ते 3000 रुपये
मेकअप (ग्रुम)	2000 ते 4000 रुपये	1000 ते 3000 रुपये	500 ते 1500 रुपये

वाढत्या महागाईच्या अस्मानी संकटामध्ये सलून व्यवसाय जिवंत ठेवण्यासाठी आणि दुकानदारांना आर्थिक स्थैर्य देण्यासाठी दरांमध्ये ही 20 टक्के वाढ करणे अपरिहार्य (Compulsory) होते. ग्राहकांनी या परिस्थितीचा विचार करून सहकार्य करावं, असं आवाहन महामंडळानं केलं आहे.

ही बातमी वाचा: