HSC Exam : 12 वी इंग्रजी पेपरमध्ये मोठा गैरप्रकार उघड; 19 पर्यवेक्षकांवर कारवाई, CCTVमुळे फसवणूक उघड
HSC Exam : दक्षता समितीच्या आदेशानुसार जिल्ह्यातील सर्वात मोठी कारवाई करण्यात आली आहे. गैरप्रकाराची गंभीरता लक्षात घेता परीक्षा केंद्रावरील संपूर्ण स्टाफ बदलण्यात आला आहे.
छत्रपती संभाजीनगर : जिल्ह्यातील राष्ट्रीय उच्च माध्यमिक विद्यालय, जैतापूर (ता. कन्नड) येथे इयत्ता 12 वीच्या इंग्रजी पेपरदरम्यान मोठा गैरप्रकार उघडकीस आला आहे. परीक्षा केंद्रावरील CCTV फुटेज आणि उत्तरपत्रिकांच्या झेरॉक्स प्रतींच्या आधारे तब्बल 19 पर्यवेक्षक आणि केंद्रसंचालकांवर कठोर कारवाई प्रस्तावित करण्यात आली आहे. या घटनेमुळे शिक्षण क्षेत्रात एकच खळबळ उडाली आहे.
दक्षता समितीचे अध्यक्ष तथा छत्रपती संभाजीनगरचे जिल्हाधिकारी दिलीप स्वामी, मुख्य कार्यकारी अधिकारी अंकित आणि विभागीय बोर्डाचे अध्यक्ष अनिल साबळे यांच्या आदेशानुसार ही कारवाई करण्यात आली. शिक्षणाधिकारी (माध्यमिक) श्रीमती अश्विनी लाठकर यांच्या नेतृत्वाखाली भरारी पथकाने संपूर्ण तपास पूर्ण केला.
CCTV फुटेजमधून गैरप्रकार उघड (CCTV Exam Malpractice Case)
दिनांक 10 फेब्रुवारी 2026 रोजी झालेल्या इंग्रजी परीक्षेदरम्यान काही विद्यार्थी एकमेकांच्या उत्तरपत्रिकांकडे पाहून नक्कल करत असल्याचे निदर्शनास आले. त्यानंतर परीक्षा केंद्रावरील CCTV फुटेजची सखोल तपासणी करण्यात आली. फुटेजमध्ये विद्यार्थ्यांच्या हालचाली स्पष्ट दिसून आल्या असून, गैरप्रकार सिद्ध झाल्याने प्रशासनाने तात्काळ कारवाई केली.
19 जणांविरुद्ध कठोर कारवाई प्रस्तावित (Action Against 19 Supervisors)
या प्रकरणात परीक्षा केंद्र संचालकासह एकूण 19 जणांविरुद्ध कारवाई प्रस्तावित करण्यात आली आहे. जिल्हा परिषद कर्मचारी असलेल्या पर्यवेक्षक शिक्षक आणि तिथल्या पथकातील अधिकाऱ्यांविरुद्ध निलंबनाचे प्रस्ताव दाखल करण्यात आले आहेत. इतर संस्थांशी संबंधित कर्मचाऱ्यांवर संस्थांतर्गत शिस्तभंगात्मक तसेच कायदेशीर कारवाई करण्याचे निर्देश देण्यात आले आहेत.
परीक्षा केंद्राचा संपूर्ण स्टाफ बदलला (Exam Center Staff Replaced)
गैरप्रकाराची गंभीरता लक्षात घेता परीक्षा केंद्रावरील संपूर्ण स्टाफ बदलण्यात आला आहे. पुढील सर्व परीक्षा शिस्तबद्ध आणि नियमानुसार पार पडाव्यात यासाठी नव्याने नियुक्त कर्मचाऱ्यांना स्पष्ट सूचना देण्यात आल्या आहेत. “उपरवाला सब देख रहा है” या म्हणीचा प्रत्यय देणारी ही कारवाई असल्याची चर्चा जिल्ह्यात रंगली आहे.
प्रशासनाचा स्पष्ट संदेश (Strict Action Against Copying)
शिक्षणाधिकारी (माध्यमिक) अश्विनी लाठकर आणि विस्तार अधिकारी सिताराम पवार यांच्या नेतृत्वाखाली झालेल्या या कारवाईतून परीक्षा प्रक्रियेत कोणतीही तडजोड सहन केली जाणार नाही, असा स्पष्ट संदेश देण्यात आला आहे. CCTV यंत्रणेमुळे प्रत्येक हालचालीवर लक्ष ठेवले जात असून, भविष्यात अशा प्रकारांना आळा बसणार असल्याचे प्रशासनाने स्पष्ट केले आहे.
ही बातमी वाचा:
महत्त्वाच्या बातम्या
