Chandrapur Crime : प्रेमविवाहाला विरोध करणाऱ्या बापाचा लेकीनंच काढला काटा, लग्नानंतर संसारातील वाद विकोपाला, जावयानं सासऱ्याच्या हत्येचा 3 वर्षांनंतर कट उलगडला

Pratibha Dhanorkar: सुधीर मुनगंटीवार भाषणाला उभे राहताच..., प्रतिभा धानोरकरांचं थेट स्टेजवरून 'वॉक आऊट'; चंद्रपुरात 'राजशिष्टाचारा'वरून ठिणगी, नेमकं काय घडलं?

सारंग पांडे, एबीपी माझा — Tue, 21 Apr 2026 09:22:23 +0530

Pratibha Dhanorkar: चंद्रपूर (Chandrapur) महानगरपालिकेच्या वतीने आयोजित 'हिराई महोत्सवा'च्या उद्घाटन सोहळ्यात राजशिष्टाचाराच्या (प्रोटोकॉल) मुद्द्यावरून मोठे नाराजीनाट्य पाहायला मिळाले. शासकीय कार्यक्रमात नियमांचे उल्लंघन होत असल्याचा आरोप करत काँग्रेस (Congress) खासदार प्रतिभा धानोरकर (Pratibha Dhanorkar) यांनी थेट मंचावरूनच जिल्हा प्रशासन आणि मनपावर ताशेरे ओढले आणि कार्यक्रमातून 'वॉक आऊट' केले. याप्रकरणी आता त्यांनी लोकसभा अध्यक्षांकडे धाव घेत विशेषाधिकार भंगाची मागणी केली आहे.

Pratibha Dhanorkar: नेमकी घटना काय?

चंद्रपूरच्या हिराई महोत्सवाचे उद्घाटन पालकमंत्री डॉ. अशोक उईके (Ashok Uike) यांच्या उपस्थितीत पार पडले. या कार्यक्रमाला जिल्हाधिकारी, आमदार सुधीर मुनगंटीवार (Sudhir Mungantiwar) आणि इतर लोकप्रतिनिधी उपस्थित होते. मात्र, हा कार्यक्रम शासकीय असतानाही मंचावर भाजप कार्यकर्त्यांचे सत्कार सोहळे सुरू असल्याने खासदार धानोरकर यांनी तीव्र आक्षेप घेतला.

Pratibha Dhanorkar: मुनगंटीवार भाषणाला उभे राहिले आणि पारा चढला...

खरा वाद तेव्हा रंगला जेव्हा खासदार प्रतिभा धानोरकर यांचे भाषण संपल्यानंतर आमदार सुधीर मुनगंटीवार भाषणासाठी उभे राहिले. राजशिष्टाचारानुसार, खासदारांच्या भाषणानंतर केवळ कॅबिनेट मंत्रीच भाषण करू शकतात, असे सांगत धानोरकर यांनी प्रशासनाला खडे बोल सुनावले. आमदारांना खासदारांच्या नंतर बोलू देणे हा प्रोटोकॉलचा भंग असल्याचे त्यांचे म्हणणे होते. संतापलेल्या खासदारांनी मुनगंटीवार भाषणाला उभे राहताच कार्यक्रमातून बाहेर पडणे पसंत केले.

Pratibha Dhanorkar: लोकसभा अध्यक्षांकडे तक्रार

हे प्रकरण केवळ व्यासपीठापुरते मर्यादित राहिले नाही. खासदार प्रतिभा धानोरकर यांनी काल रात्री उशिरा लोकसभा अध्यक्षांना पत्र पाठवून या घटनेची अधिकृत तक्रार केली आहे. "चंद्रपूर जिल्हा प्रशासनाने एका महिला खासदाराचा जाणीवपूर्वक अपमान केला आहे," असा गंभीर आरोप त्यांनी पत्रात केला आहे. तसेच हे प्रकरण संसदेच्या विशेषाधिकार समितीकडे (Privilege Committee) सोपवावे, अशी मागणीही त्यांनी केली आहे. आता यावर भाजपचे नेते काय बोलणार? हे पाहणे महत्त्वाचे ठरणार आहे.

इतर महत्त्वाच्या बातम्या

Sudhir Mungantiwar vs Kishor Jorgewar: 'हा वाद माझ्या आटोक्याबाहेर'; चंद्रपुरातील मुनगंटीवार-जोरगेवार वादासमोर भाजप प्रदेशाध्यक्षांनी टेकले हात, आता थेट दिल्लीतून होणार फैसला, नेमकं काय घडलं?

Chandrapur : भाजपमधील अंतर्गत वादाचा नगरसेवकांना फटका; बहुमत असतानाही चंद्रपूर झोन सभापती पदावर सोडावं लागलं पाणी, काँग्रेसचा आश्चर्यकारक विजय

Sudhir Mungantiwar vs Kishor Jorgewar: 'हा वाद माझ्या आटोक्याबाहेर'; चंद्रपुरातील मुनगंटीवार-जोरगेवार वादासमोर भाजप प्रदेशाध्यक्षांनी टेकले हात, आता थेट दिल्लीतून होणार फैसला, नेमकं काय घडलं?

सारंग पांडे, एबीपी माझा — Mon, 20 Apr 2026 09:20:05 +0530

Sudhir Mungantiwar vs Kishor Jorgewar: चंद्रपूर भाजपमधील गटबाजी आणि अंतर्गत वाद आता शिगेला पोहोचला असून, दिग्गज नेते सुधीर मुनगंटीवार (Sudhir Mungantiwar) आणि किशोर जोरगेवार (Kishor Jorgewar) यांच्यातील संघर्ष सोडवण्यात प्रदेशाध्यक्ष रवींद्र चव्हाण (Ravindra Chavan) यांनीही आपली हतबलता व्यक्त केल्याची माहिती विश्वसनीय सूत्रांकडून मिळत आहे. "चंद्रपुरातील वाद माझ्या आटोक्याबाहेर असून, आता याचा निर्णय थेट दिल्लीतूनच घेतला जाईल," असे संकेत चव्हाणांनी नागपुरातील भेटीत दिल्याने राजकीय वर्तुळात खळबळ उडाली आहे.

Sudhir Mungantiwar vs Kishor Jorgewar: चंद्रपूर महानगरपालिकेतील पराभवाचे पडसाद

नुकत्याच पार पडलेल्या चंद्रपूर शहर महानगरपालिकेच्या झोन समिती आणि महिला बालकल्याण समितीच्या निवडणुकांमध्ये भाजपला मोठा धक्का बसला. संख्याबळ अनुकूल असतानाही मुनगंटीवार-जोरगेवार वादामुळे भाजपला पराभवाचा सामना करावा लागला. या पार्श्वभूमीवर आमदार किशोर जोरगेवार यांनी शुक्रवारी संध्याकाळी नागपूर गाठून 17 समर्थक नगरसेवकांसह प्रदेशाध्यक्ष रवींद्र चव्हाण यांची भेट घेतली.

Ravindra Chavan: प्रदेशाध्यक्षांची हतबलता

या भेटीदरम्यान रवींद्र चव्हाण यांनी चंद्रपुरातील घडामोडींवर स्पष्ट नाराजी व्यक्त केली. यावेळी रवींद्र चव्हाण यांनी चंद्रपुरातील वाद हा माझ्या आटोक्याबाहेर आहे. चंद्रपुरात कोणताही नेता निरीक्षक म्हणून जाण्यास तयार नाही. त्यामुळे आता चंद्रपुरातील निर्णय हे दिल्लीतच घेतले जातील. आमच्याकडे आलेले प्रत्येक विषय आम्ही दिल्लीला पाठवू आणि तिथूनच यावर निर्णय घेतल्या जाईल, असं सांगत आपली हतबलता दर्शवल्याची माहिती सूत्रांकडून मिळत आहे.

Sudhir Mungantiwar vs Kishor Jorgewar: निरीक्षकांचा राजीनामा

दरम्यान, काही दिवसांपूर्वीच माजी राज्यमंत्री मदन येरावार यांची चंद्रपूर भाजपच्या निरीक्षक पदी नियुक्ती करण्यात आली होती. मात्र, मुनगंटीवार आणि जोरगेवार यांच्यातील टोकाच्या संघर्षामुळे त्यांनी चंद्रपुरात येण्याऐवजी आपल्या पदाचा राजीनामा देणे पसंत केल्याची माहिती समोर आली आहे. सुधीर मुनगंटीवार हे पक्षातील अत्यंत ज्येष्ठ नेते आहेत. खुद्द रवींद्र चव्हाण यांच्यासह अनेक नेत्यांनी मुनगंटीवार यांच्या नेतृत्वात काम केले आहे. त्यामुळे मुनगंटीवार यांच्या विरोधात किंवा त्यांच्याशी संबंधित वादात पडायला राज्यातील कोणताही नेता तयार नसल्याचे चित्र सध्या भाजपमध्ये पाहायला मिळत आहे. या सर्व प्रकारामुळे चंद्रपूर भाजपमधील पेच अधिकच वाढला आहे.

इतर महत्त्वाच्या बातम्या

Chandrapur : भाजपमधील अंतर्गत वादाचा नगरसेवकांना फटका; बहुमत असतानाही चंद्रपूर झोन सभापती पदावर सोडावं लागलं पाणी, काँग्रेसचा आश्चर्यकारक विजय

सारंग पांडे, एबीपी माझा — Fri, 17 Apr 2026 14:42:46 +0530

Chandrapur BJP News :

Chandrapur News चंद्रपूर : चंद्रपूर महानगरपालिकेच्या झोन क्रमांक 2 आणि झोन क्रमांक तीनच्या निवडणुकीत भाजपने आश्चर्यकारक माघार घेतल्याचे समोर आला आहे. झोन क्रमांक 2 च्या निवडणुकीत भाजप उमेदवार ज्योती जीवने आणि झोन क्रमांक 3 च्या निवडणुकीत भाजप उमेदवार जितेश कुळमेथे यांनी आपला उमेदवारी अर्ज अचानक मागे घेतला आहे. या कृतीमुळे भाजप नेते सुधीर मुनगंटीवार (Sudhir Mungantiwar) आणि भाजप आमदार किशोर जोरगेवार (Kishor Jorgewar) यांच्यात असलेल्या वादाचा भाजप नगरसेवकांनाच जोरदार फटका बसल्याचे दिसून आलंय. (Chandrapur politics News)

Kishor Jorgewar vs Sudhir Mungantiwar : बहुमत असताना देखील झोन सभापती पदावर सोडावं लागलं भाजपला पाणी

दरम्यान, बहुमत असताना देखील भाजपला झोन सभापती पदावर पाणी सोडावं लागलंय. भाजप प्रदेश कार्यालयाकडून झोन क्रमांक 1 साठी रवी लोणकर आणि महिला व बालकल्याण सभापती पदासाठी सुनिता जयस्वाल यांचं नाव पाठवण्यात आलं होतं. तर ही दोन्ही नावं मुनगंटीवार समर्थक नगरसेवकांची असल्याने आणि जोरगेवार गटाच्या एकाही नगरसेवकाचं नाव प्रदेश कार्यालयाकडून पाठवण्यात न आल्यामुळे किशोर जोरगेवार गटाच्या नगरसेवकांनी ऐनवेळी उमेदवारी मागे घेण्याचा निर्णय घेतलाय. ज्योती जीवने यांनी उमेदवारी अर्ज मागे घेतल्याने झोन क्रमांक दोन मधून काँग्रेसच्या वैशाली चंदनखेडे यांचा बिनविरोध विजय झाला आहे. तर झोन क्रमांक 3 मधून जितेश कुलमेथे यांनी उमेदवारी अर्ज वापस घेतल्याने काँग्रेसचे रामनरेश यादव यांचा विजय झाला आहे.

विशेष म्हणजे झोन क्रमांक तीनमध्ये भाजपकडे 13 विरुद्ध 10 इतकं विजयी बहुमत असताना देखील भाजपने अचानक घेतलेल्या या माघारीमुळे भाजपमधील जोरगेवार विरुद्ध मुनगंटीवार संघर्ष पुन्हा एकदा उघड झाला आहे.

इतर महत्वाच्या बातम्या

Vidhan Parishad Election 2026 : विधानपरिषदेसाठी काँग्रेसनेही पत्ता उघडला, ठाकरेंच्या जागेवर काँग्रेसमधून थोरात, हर्षवर्धन सकपाळांसह 6 नावं चर्चेत

Pankaja Munde: प्रदूषणाची पाहणी करण्यासाठी चंद्रपुरात आलेल्या पर्यावरण मंत्री पंकजा मुंडेंचींच गाडी काळवंडली; गाडीवर कोळशाची प्रचंड धूळ

सारंग पांडे, एबीपी माझा — Thu, 16 Apr 2026 14:50:10 +0530

Pankaja Munde Chandrapur चंद्रपूर : प्रदूषणाची पाहणी करण्यासाठी चंद्रपुरात (Chandrapur) आलेल्या पर्यावरण मंत्री पंकजा मुंडे(Pankaja Munde) यांची गाडीच प्रदूषणामुळे काळी झाल्याचं बघायला मिळालंय. पंकजा मुंडे यांनी घुग्गुस परिसरातल्या 2 कोल वॉशरिंची पाहणी केली, या दोन कोल वॉशरीमधून जाताना त्यांच्या गाडीवर कोळशाची प्रचंड धूळ बसली. विशेष म्हणजे मंत्री महोदयांचा दौरा असल्यामुळे या कोल वॉशरीची पूर्णपणे स्वच्छता करण्यात आली होती. मात्र, स्वच्छतेनंतरही पंकजा मुंडे यांच्या गाडीचा रंग खऱ्या अर्थाने चंद्रपूरच्या प्रदूषणाची पातळी सांगतोय. मंत्र्यांच्या गाडीची अवस्था पाहून आता तरी प्रशासन चंद्रपूरच्या प्रदूषणावर लगाम लावणार का? हाच खरा प्रश्न आता पडतोय. (Pankaja Munde in Chandrapur)

Pankaja Munde: पर्यावरण मंत्री पंकजा मुंडे 3 दिवसाच्या चंद्रपूर दौऱ्यावर, कोळसा हाताळणी प्रकल्पाला भेट

दरम्यान, पर्यावरण मंत्री पंकजा मुंडे 3 दिवसाच्या आपल्या नियोजित दौऱ्यावर आज चंद्रपुरात पोचल्या. यावेळी भाजप नेते आमदार सुधीर मुनगंटीवार यांच्यासह त्यांनी दुर्गापूर भागातील चंद्रपूर थर्मल पावर स्टेशनच्या कोळसा हाताळणी प्रकल्पाला भेट देत पाहणी केली. नंतर या भागातील नागरिकांशी संवाद साधताना त्यांनी प्रदूषण कमी करण्यासाठी कार्यरत राहील, असे आश्वासन दिले. मंत्री येणार म्हणून प्रदूषण नियंत्रण विषयक उपाययोजना राबविल्या जात आहेत, हे मला माहित आहे, असा टोला ही त्यांनी प्रशासनाला यावेळी लगावला.

Pankaja Munde in Chandrapur: पंकजा मुंडे यांच्या चंद्रपूर भेटीचे कारण काय?

राज्याच्या पर्यावरण मंत्री पंकजा मुंडे आजपासून तीन दिवसाच्या चंद्रपूर दौऱ्यावर आहेत. पंकजा मुंडे यांच्या चंद्रपूर भेटीचे कारण हे चंद्रपूर जिल्ह्यातील वाढतं प्रदूषण असलं तरी सर्वांच्या नजरा या भाजप नेते सुधीर मुनगंटीवार आणि पंकजा मुंडे यांच्या भेटीवरच असणार आहेत. पंकजा मुंडे यांनी नेहमीच मुख्यमंत्री देवेंद्र फडणवीस आणि स्वतः च्या भाजप सरकारला लक्ष्य केलं होतं. तर दुसरीकडे भाजप नेते सुधीर मुनगंटीवार देखील आपल्याच सरकारचे सर्वात मोठे टीकाकार म्हणून गेल्या काही महिन्यात समोर आले आहेत. भाजपमधले अतिशय ज्येष्ठ आणि जुने असलेले हे दोन्ही नेते आपल्याच सरकार विरोधात अनेक वेळा टीका करताना पाहायला मिळाले आहेत आणि आज हे दोन नेते सोबत असल्याने राजकीय जाणकारांच्या भुवया उंचावल्या आहेत.

विशेष म्हणजे राज्यात आणि केंद्रात भाजपचे सरकार असताना भाजप नेते सुधीर मुनगंटीवार यांनी चंद्रपूर जिल्ह्यातील प्रदूषणाचा मुद्दा विधानसभेत मोठ्या हिरीरीने मांडला होता. आणि यावर उत्तर देताना पर्यावरण मंत्री पंकजा मुंडे यांनी विधानसभेचे अधिवेशन संपताच आठ दिवसात मी चंद्रपूर जिल्ह्याचा दौरा करणार, अशी घोषणा केली होती. त्याप्रमाणे पंकजा मुंडे दिवसभर चंद्रपूर जिल्ह्यातील अनेक उद्योगांचा प्रदूषणाच्या दृष्टीने दौरा करणार आहेत. मात्र, त्यांचा हा दौरा फक्त प्रदूषणाची पाहणी करण्यासाठी आहे की भविष्यातील राजकीय समीकरणांचा देखील यामध्ये काही उहापोह होतो हीच चर्चा आता राजकीय जाणकारांमध्ये रंगणार आहे.

इतर महत्वाच्या बातम्या

घरी बायकोला काय सांगू? गॅस सिलेंडर मिळत नसल्याने संताप, एजन्सीबाहेर ग्राहकाने स्वत:चं डोकं फोडलं

Chandrapur Crime: डीजेमध्ये नाचण्याच्या वाद विकोपाला, पाच युवकांनी एकाला भोसकलं; डॉ. बाबासाहेब आंबेडकर जयंती उत्सवाला गालबोट; चंद्रपूर हादरलं!

सारंग पांडे, एबीपी माझा — Wed, 15 Apr 2026 10:48:51 +0530

Chandrapur Crime News: चंद्रपूर शहरातून एक अतिशय खळबळजनक बातमी समोर आली आहे. चंद्रपूर शहरातील गांधी चौकात डॉ. बाबासाहेब आंबेडकर जयंती उत्सवाला गालबोट (Crime News) लागल्याची घटना घडलीय. मध्यरात्री डीजेमध्ये (DJ) नाचण्याच्या वादातून पाच युवकांनी एकाला भोसकलंय (Chandrapur Crime News). रविकांत टेंभूरकर (36) असं या तरुणाचं नाव असून त्याचा रुग्णालयात नेत असतानाच वाटेत मृत्यू झालाय. किरकोळ वादावरून झालेल्या या हत्येच्या घटनेने चंद्रपूर शहरात (Chandrapur Crime) एकच खळबळ उडाली असून डॉ. बाबासाहेब आंबेडकर जयंती उत्सवाच्या दिवशीच या घटनेनं शहर हादरले आहे. सध्या पोलीस या प्रकरणाचा तपास करत असून पुढील कारवाई सुरु आहे.

Chandrapur Crime News: डीजेमध्ये नाचताना धक्का लागला, पाच युवकांनी एकाला भोसकलं

मिळालेल्या माहितीनुसार, पोलिसांनी एका अल्पवयीन आरोपीसह पाच युवकांना हत्येप्रकरणी अटक केली आहे. डीजे दरम्यान नाचताना लागलेला धक्का हे भांडणाचे कारण ठरले असून हा रक्तरंजित प्रकार घडलाय. सध्या पोलीस या घटनेचा अधिक तपास करत आहेत. मात्र भीम जयंतीच्या मिरवणुकीत शस्त्र घेऊन युवक फिरत असल्याच्या घटनेने शहरात खळबळ उडाली आहे. ही डीजे मिरवणूक शहरातील सीमावर्ती भागातल्या इंदिरानगर येथील भीम रत्न बहूउद्देशीय अनुयायी मंडळाची होती.

Yavatmal : पांढरकवडा घाटंजी मार्गांवरील साखरा जवळ अपघात; बाप-लेकीचा जागीच मृत्यू, आई गंभीर जखमी

यवतमाळच्या पांढरकवडा-घाटंजी मार्गावरील साखरा गावालगत रात्रीच्या सुमारास भीषण अपघात घडून कुटुंबावर दु:खाचा डोंगर कोसळला. ट्रक आणि चारचाकी वाहनामध्ये झालेल्या या धडक अपघातात बाप आणि सहा महिन्यांच्या चिमुकलीचा जागीच मृत्यू झाला, तर एक महिला गंभीर जखमी झाली आहे.
साईकिरण गुरगुल्ला आणि त्यांची सहा महिन्यांची मुलगी हंसिका साईकिरण गुरगुल्ला यांचा जागीच मृत्यू झाला. तर अनुष्का साईकिरण गुरगुल्ला या गंभीर जखमी झाल्या.

पांढरकवडा येथून घाटंजीकडे जाणाऱ्या ट्रकची आणि साखरा गावाकडून येणाऱ्या चारचाकी स्विफ्ट डिझायर वाहनाची समोरासमोर जोरदार धडक झाली. या अपघातात चारचाकी वाहन पूर्णपणे चकनाचूर झाले. जखमीला तातडीने यवतमाळ येथील रुग्णालयात उपचारासाठी हलविण्यात आले आहे. हा परिवार साखरा येथील माहेरी डॉ. बाबासाहेब आंबेडकर जयंती निमित्त आला होता. कार्यक्रम आटोपून ते परत आदिलाबादकडे चारचाकी वाहनाने जात असताना नियतीने हा घात केला. या घटनेमुळे परिसरात हळहळ व्यक्त होत असून, सणाच्या दिवशीच घडलेल्या या दुर्दैवी अपघाताने सर्वत्र शोककळा पसरली आहे.

इतर महत्वाच्या बातम्या

Jalgaon Crime News : 600 बनावट शिक्षकांची भरती अन् कोट्यवधींचा पगार लाटला; शालार्थ घोटाळ्यात 48 अधिकाऱ्यांना एसआयटीची नोटीस

Chandrapur News :मित्राच्या वरातीत नाचत असताना अल्पेश अचानक खाली कोसळला; चंद्रपुरात हृदयविकाराच्या झटक्याने तरुणाचा मृत्यू, लग्नाचा आनंद क्षणात शोकसागरात बुडाला

सारंग पांडे, एबीपी माझा — Wed, 8 Apr 2026 10:07:23 +0530

Chandrapur Accident News : चंद्रपूर शहरातून एक अतिशय धक्कादायक बातमी समोर आली आहे. मित्राच्या लग्नात डीजेच्या तालावर नाचताना एका तरुणाचा हृदयविकाराच्या झटक्याने अचानक मृत्यू झाल्याची दुर्दैवी घटना घडली आहे. चंद्रपूर (Chandrapur News) जिल्ह्यातील अल्पेश दहागावकर असं या 25 वर्षीय मृत्यू झालेल्या तरुणाचं नाव आहे. अल्पेश लग्नाच्या कार्यक्रमात डीजेच्या तालावर नाचतांना अचानक खाली कोसळला. सुरुवातीला उपस्थितांना हा प्रकार लक्षात आला नाही. मात्र काही वेळातच तो प्रतिसाद देत नसल्याचे पाहून त्याला गोंडपिपरी येथील सामान्य रुग्णालयात दाखल करण्यात आले. मात्र, डॉक्टरांनी तपासणी करून त्याला मृत घोषित केले.

प्राथमिक माहितीनुसार हृदयविकाराच्या झटक्यामुळे त्याचा मृत्यू झाल्याची शक्यता व्यक्त केली जात आहे. या घटनेमुळे लग्न समारंभात एकच खळबळ उडाली असून आनंदाचे वातावरण क्षणात शोकमय झाले. अल्पेश दहागावकर याच्या अकाली निधनामुळे परिसरात हळहळ व्यक्त केली जात आहे.

Gadchiroli Accident News : ट्रक-कार अपघातात गडचिरोली मेडिकल कॉलेजचे अधीक्षक ठार

अशीच एक हृदयद्रावक घटना गडचिरोलीच्या चामोर्शी-आष्टी मार्गावरील जामगिरी फाट्याजवळ घडली आहे. यात ट्रक आणि कारमध्ये झालेल्या भीषण अपघातात गडचिरोलीच्या शासकीय वैद्यकीय महाविद्यालयाचे कार्यालय अधीक्षक विनोद कुमरे (57) यांचा मृत्यू झाला. ही घटना मंगळवारी दुपारीच्या सुमारास घडली. या अपघातात कारमधील अन्य तीन कर्मचारी किरकोळ जखमी झाले आहेत. विनोद कुमरे हे आपल्या सहकाऱ्यांसोबत अंत्यविधीचा कार्यक्रम आटोपून आष्टीकडून चामोर्शीच्या दिशेने येत होते. दरम्यान, जामगिरी फाट्याजवळ समोरून येणाऱ्या ट्रकने कारला जोरदार धडक दिली. धडक इतकी भीषण होती की, कार एका झाडावर जाऊन आदळली. या अपघातात कारच्या मागील सीटवर बसलेल्या कुमरे यांच्या डोक्याला गंभीर इजा झाली. त्यांना तातडीने चामोर्शी येथील ग्रामीण रुग्णालयात दाखल करण्यात आले, मात्र उपचारादरम्यान त्यांची प्राणज्योत मालवली.

इतर महत्वाच्या बातम्या

Ashok Kharat: आधी 12 गुन्हे; आता आणखी 11 तक्रारी, घरात मृत्यू होईल अशी भीती घालायचा अन् 'ऊर्जा, विशेष पूजा, शरीरशांती'च्या नावाखाली अशोक खरात नको ते करायचा

Chandrapur Farmer: अवैध सावकारीच्या तगाद्यामुळे शेतकऱ्याला किडनी विकायला लावली; आता न्यायासाठी बळीराजाची सरकारकडे इच्छा मरणाच्या परवानगीची मागणी

सारंग पांडे, एबीपी माझा — Fri, 3 Apr 2026 13:43:11 +0530

Chandrapur Farmer : चंद्रपूर जिल्ह्याच्या मिंथूर येथील रोशन कुडे यांनी सावकाराच्या जाचामुळे आपली किडनी कंबोडिया येथे विकल्याचे धक्कादायक प्रकरण चंद्रपूर जिल्ह्यात उघडकीस आले होते. त्यानंतर आता रोशन कुडे यांनी सावकाराच्या जाचाला कंटाळून किडनी विकणारे नागभीड तालुक्यातील शेतकरी कुडे यांनी सरकारकडे चक्क इच्छामरणाची परवानगी मागितली आहे. अर्थसंकल्पीय अधिवेशनात मुख्यमंत्र्यांनी अवैध सावकारांची संपत्ती गोठवण्याचे आदेश दिले होते, मात्र दीड महिना उलटूनही कोणतीही ठोस कारवाई झाली नाही, असा आरोप रोशन कुडे यांनी केलाय. त्यांच्या या मागणीने जिल्ह्यात एकच खळबळ उडाली आहे.

Chandrapur Farmer : मुख्यमंत्र्यांनी आदेश दिले, दीड महिना उलटूनही कोणतीही ठोस कारवाई नाही

देशाच्या न्यायव्यवस्थेत अत्यंत संवेदनशील आणि ऐतिहासिक ठरणारा निर्णय नुकताच सर्वोच्च न्यायालयाने दिला आहे. 13 वर्षांपासून कोमात असलेल्या 32 वर्षीय हरीश राणा (Harish Rana) यांना ‘निष्क्रिय इच्छामरण’ (Passive Euthanasia) देण्याची परवानगी सर्वोच्च न्यायालयाने दिली आहे. त्यांनतर या घटनेचे देशभरात पडसाद उमटले आहे. अशातच आता अवैध सावकारांच्या कर्जाच्या विळख्यात अडकून स्वतःची किडनी विकण्याची वेळ आलेल्या रोशन कुडे या शेतकऱ्यानेही अशीच मागणी केली आहे. आजही न्यायासाठी प्रशासनाच्या दारात चकरा माराव्या लागत आहेत. अर्थसंकल्पीय अधिवेशनात मुख्यमंत्र्यांनी अवैध सावकारांची संपत्ती गोठवण्याचे आदेश दिले होते, मात्र दीड महिना उलटूनही कोणतीही ठोस कारवाई झाली नाही, असा आरोप रोशन कुडे यांनी केलाय.

Chandrapur Farmer News : मला लवकरात लवकर मदत करावी अन्यथा मला इच्छा मरणाची परवानगी द्यावी

माझी शेती मला परत मिळालेली नाही, माझं संपूर्ण आयुष्य शेतीवर अवलंबून आहे. चार महिन्यांपासून मी न्यायासाठी फिरतोय, पण कुठेही दखल घेतली जात नाही. त्यामुळे मला लवकरात लवकर मदत करावी अन्यथा मला इच्छामरणाची परवानगी द्यावी, अशी आर्त मागणी त्यांनी जिल्हाधिकाऱ्याला निवेदनं देऊन शासनाकडे केली आहे.

Chandrapur Farmer Sold Kidney : रोशन कुडे यांच्या वडिलांनी सांगितली आपबिती

सावकाराच्या जाचाला कंटाळून किडनी विकणाऱ्या शेतकरी रोशन कुडे यांच्या वडिलांनी त्यांचा मुलगा सावकारी पाशात कसा फसत गेला आणि अखेर त्याला आपली किडनी का विकावी लागली, याची विस्तृत हृदयद्रावक व्यथा एबीपी माझाच्या कॅमेरासमोर मांडली आहे. कोरोना काळात डबघाईला आलेला दुधाचा व्यवसाय आणि त्यानंतर आलेल्या लंपी आजारामुळे रोशन कुडे सावकाराकडून घेतलेले अवघे एक लाख रुपयांचे कर्ज फेडू शकले नाही. मात्र दुसरीकडे सावकार त्याला पद्धतशीर आपल्या जाळ्यात अडकवत राहिले. व्याजावर व्याज चढवत लाखो रुपयांची रक्कम त्याच्याकडून लाटली आणि अखेर त्याला किडनी विकण्यास भाग पाडलं, अशी व्यथा शिवदास कुडे यांनी मांडली आहे. (Chandrapur Farmer Sold kidney for loan repayment)

इतर महत्वाच्या बातम्या

Satish Bhosle Khokya : घरातील सापडलेलं मांस आणि हेलिकॉप्टरमधील एन्ट्रीबाबत सतीश भोसलेने सगळं सांगितलं; खोक्याने सुरेध धस यांचंही नाव घेतलं, VIDEO

Chandrapur BJP Crisis : चंद्रपूरमध्ये भाजप नगरसेवकांनीच भाजपच्या महापौरांचा निषेध, सुधीर मुनगंटीवार-किशोर जोरगेवार गटातील वाद टोकाला

सारंग पांडे, एबीपी माझा — Wed, 1 Apr 2026 19:13:40 +0530

चंद्रपूर : भाजपनं (BJP) शिवसेना उद्धव बाळासाहेब ठाकरे (Shiv Sena UBT) पक्षाच्या नगरसेवकांना सोबत घेत चंद्रपूर महापालिकेत (Chandrapur Municipal Corporation) काँग्रेसला विरोधात बसवत सत्ता स्थापन केली. भाजपनं चंद्रपूर महापालिकेत सत्ता स्थापन केली खरी मात्र त्यानंतर भाजपमधील सुधीर मुनगंटीवार आणि किशोर जोरगेवार यांच्या गटातील वाद काही केल्या थांबत नसल्याचं पाहायला मिळालं. या वादाचा नवा अंक चंद्रपूर महापालिकेत सभागृह नेता निवडीवरुन पाहायला मिळाला.

चंद्रपूर भाजपमध्ये वादाचा भडका (Chandrapur BJP Crisis)

चंद्रपूर महानगरपालिकेतील सुधीर मुनगंटीवार आणि किशोर जोरगेवार गटाच्या नगरसेवकांमध्ये असलेल्या संघर्षाच्या नव्या अध्यायाला सुरुवात झाली आहे. जोरगेवार गटाच्या 17 नगरसेवकांनी आपल्याच पक्षाच्या महापौरांवर बेईमानीचा आरोप करत त्यांचा केला निषेध, सोबतच महापौरांच्या यापुढे होणाऱ्या सर्व बैठकींवर बहिष्कार टाकण्याचा दिला इशारा आहे.

चंद्रपूर शहर महानगरपालिकेत सभागृह नेते पदावरून भाजपमधील अंतर्गत संघर्ष अधिक तीव्र झाला आहे. महानगरपालिकेच्या अर्थसंकल्पीय सभेत महापौर संगीता खांडेकर यांनी नगरसेविका जयश्री जुमडे यांचे नाव सभागृह नेतेपदासाठी जाहीर केले होते. मात्र, जोरगेवार गटाचे 17 नगरसेवक आणि शिवसेना उद्धव बाळासाहेब ठाकरे पक्ष आणि त्यांचे समर्थक अशा दहा नगरसेवकांनी भाजप गटनेते शेखर शेट्टी यांनाच सभागृह नेता करण्याची केली होती मागणी, मात्र महापौरांनी नगरसेवकांच्या या मागणीला न जुमानता सुधीर मुनगंटीवार गटाच्या नगरसेविका जयश्री जुमडे यांचे नाव जाहीर केले.

महापौरी संगीता खांडेकर यांच्या निर्णयाच्या निषेधार्थ जोरगेवार गटाच्या 17 नगरसेवकांनी आज महापौरांच्या कार्यालयात जाऊन तीव्र निषेध नोंदवला. महापौर संगीता खांडेकर या बेईमानीने काम करत असल्याची टीका करत पुढील काळात महापौरांच्या कोणत्याही बैठकीला उपस्थित राहणार नसून त्यांच्यावर बहिष्कार टाकण्याचा इशाराही यावेळी देण्यात आला. या घडामोडींमुळे स्वपक्षीय महापौरांविरोधातच भाजप नगरसेवक आक्रमक झाल्याने महानगरपालिकेतील भाजपचे अंतर्गत राजकारण आणखी तीव्र होण्याची शक्यता वर्तवली जात आहे.

दरम्यान, चंद्रपूर महानगरपालिकेत काँग्रेसला सत्तेबाहेर ठेवत भाजपनं मोठी खेळी केली होती. चंद्रपूरमध्ये सत्ता स्थापन झाल्यानंतर भाजपमधील किशोर जोरगेवार आणि सुधीर मुनगंटीवार गटातील नगरसेवकांमधील वादाचे नवे अंक पाहायला मिळत आहेत.

धावत्या टँकरखाली उडी घेत मजुरानं संपवलं जीवन, चंद्रपूरमधील धक्कादायक घटना CCTV मध्ये कैद

सारंग पांडे, एबीपी माझा — Mon, 30 Mar 2026 17:05:15 +0530

चंद्रपूर : चंद्रपूर (Chandrapur) जिल्ह्यात धक्कादायक घटना घडली आहे. रस्त्यावर धावणाऱ्या डिझेलच्या टँकरखाली झोकून देत एका मजुराने आत्महत्या केली आहे. बल्लारपूर शहरात ही धक्कादायक घटना घडली आहे. आत्महत्येची घटना सीसीटीव्हीत (CCTV) कैद झाली आहे. मृताची ओळख भैरव खेडू ठाकूर (40) अशी पटली आहे. आत्महत्येचं कारण अद्याप समजलेलं नाही.

घाबरलेल्या टँकर चालकाने घटनास्थळावरुन काढला पळ

मिळालेल्या माहितीनुसार, मृत मजूर बिहारचा रहिवासी असून तो बांधकामावर मजूर म्हणून काम करत होता. काल दुपारी एक डिझेल टँकर राजुरा शहराच्या दिशेने जात होता, तेव्हा रस्त्याच्या कडेला झाडाखाली बसलेल्यांपैकी एकाने उठून थेट टँकरच्या पुढच्या चाकासमोर स्वतःला झोकून दिले. टँकरचे पुढचे चाक त्याच्या अंगावरुन गेल्यानं त्या तरुणाचा जागीच मृत्यू झाला आहे. अचानक घडलेल्या या घटनेमुळं घाबरलेल्या टँकर चालकाने तात्काळ टँकर थांबवला आणि तो घटनास्थळावरुन पळून गेला. आत्महत्येमागील कारण अज्ञात असून पोलीस तपास करत आहेत.

भंडाऱ्याच्या साकोली न्यायालयात सहाय्यक पोलीस उपनिरीक्षकाचा हार्ट अटॅकनं मृत्यू

एका आरोपीला न्यायालयात पेशीवर नेलं असता सहाय्यक पोलीस उपनिरीक्षकाला हृदयविकाराचा तीव्र झटका आला आणि त्यातच त्यांचा दुर्दैवी मृत्यू झाला. ही घटना भंडाऱ्याच्या साकोली न्यायालयात आज दुपारी घडली. किशोर शेळके (५५) असं मृत सहाय्यक पोलीस उपनिरीक्षकांचं नावं आहे. किशोर शेळके हे भंडारा पोलीस मुख्यालयाच्या बँड पथकात कर्तव्यावर असून आज साकोली पोलीस ठाणे अंतर्गत एका गुन्ह्यातील आरोपीला त्यांनी भंडारा जिल्हा कारागृहातून साकोली न्यायालयात पेशीवर नेलं होतं. शेळके यांना यावेळी हृदयविकाराचा तीव्र झटका आला आणि उपचारापूर्वीचं त्यांचा मृत्यू झाला.

रेती माफीयाने शेतकऱ्यावर उगारली कुऱ्हाड

बुलढाणा जिल्ह्यात रेती माफीयांची मुजोरी दिवसेंदिवस वाढत जात असल्याचे चित्र आहे. जिल्ह्यातील वडनेर भोलजी येथील शेतकरी शेर खान आमिर खान हे त्यांच्या शेतात गेले असता परिसरातील वाळूमाफिया असलेला एजाजखान मिलखान व जावेद खान मिल खान यांनी शेतकरी शेरखान यांना कुराडीचा धाक दाखवून जीवे मारण्याची धमकी दिली आहे. घटनास्थळी दोघांमध्ये वाद होऊन एजाज खान यांनी शेतकऱ्यावर चक्क कुऱ्हाड उगारली आहे. याप्रकरणी नांदुरा पोलीस स्टेशनमध्ये एजाज खान व जावेद खान याच्याविरुद्ध गुन्हा दाखल करण्यात आला आहे.

महत्वाच्या बातम्या:

धक्कादायक! छातीत गोळी लागून तरुणाचा मृत्यू; हत्या की आत्महत्या गूढ कायम, बीडमध्ये खळबळ

Chandrapur Crime : प्रेमविवाहाला विरोध करणाऱ्या बापाचा लेकीनंच काढला काटा, लग्नानंतर संसारातील वाद विकोपाला, जावयानं सासऱ्याच्या हत्येचा 3 वर्षांनंतर कट उलगडला

सारंग पांडे, एबीपी माझा — Fri, 27 Mar 2026 10:12:15 +0530

Chandrapur Crime News : चंद्रपूर शहरातून एक अतिशय धक्कादायक प्रकार समोर आला आहे. यात पोलीस कर्मचाऱ्याचा मुलीने विष देऊन खून (Crime News) केल्याची धक्कादायक घटना उघडकीस आली आहे. पोलीस कर्मचाऱ्याच्या मृत्यूनंतर तब्बल 3 वर्षांनी या प्रकरणाचा खुलासा झाला आहे. यातील आरोपी मुलीनेच वडिलांच्या हत्येचा कट रचत विष (Crime) देऊन हत्या केली आहे. यातील मयत पोलीस कर्मचाऱ्याची मुलगी देखील चंद्रपूर पोलीस विभागात पोलीस कर्मचारी म्हणून कार्यातरत आहे. या घटनेनं पोलीस विभागासह चंद्रपूर जिल्ह्यात मोठी खळबळ उडाली असून पोलीस सध्या पुढील कारवाई करत आहे.

Chandrapur Crime News : मुलीच्या प्रेमप्रकरणाला वडिलांचा विरोध, 3 वर्षांनी अखेर सत्य आलं बाहेर

मिळालेल्या माहितीनुसार, घटनेतील आरोपी जावयाला पोलीस ट्रेनिंग दरम्यान सेवेतून बडतर्फ करण्यात आले होते. सोबतच मयत पोलीस कर्मचाऱ्याचा मुलीच्या प्रेमप्रकरणाला विरोध होता. याच कारणातून मुलीने विष देऊन केली पित्याची हत्या केल्याचं पोलीस तपासात उघड झालं आहे. 25 एप्रिल 2023 ला जयंत बाल्लावार (45) यांचा ड्युटीवर असतांना जिल्हाधीकारी कार्यालयातील प्रशासकीय भवनात चक्कर येऊन पडल्याने मृत्यू झाला होता. मात्र तेव्हा मृत्यूचं कारण स्पष्ट होऊ शकलं नव्हतं. मात्र 3 दिवसांपूर्वी मृतकाचा जावई आशिष शेडमाके याने पोलीसात आपल्या सर्व गुन्ह्याची कबुली देत आपली पत्नी आर्या बाल्लावार हिने वडिलांना विष देऊन मारल्याची माहिती दिली. परिणामी या हादरवणाऱ्या हत्येचा कट अखेर 3 वर्षांनी का होईना उघड झाला आहे.

Chandrapur Crime : ड्युटीवर जाण्यापूर्वी आर्याने वडिलांना मिल्कशेकमध्ये दिलं विष

पोलिसांनी दिलेल्या माहितीनुसार, जयंत बाल्लावार यांना ड्युटीवर जाण्यापूर्वी आर्याने मिल्कशेकमध्ये विष टाकून पिण्यासाठी दिले. मिल्कशेक पिल्यावर जयंत बाल्लावार हे ड्युटीवर प्रशासकीय भवनमध्ये गेले असता त्यांचा मृत्यू झाला. 2022 पासून प्रेमसंबंधात असलेल्या आर्या आणि आशिष यांच्या प्रेमाला जयंत बाल्लावार यांचा विरोध होता. त्यामुळे आर्याने आपला मावसभाऊ चैतन्य गेडाम (22) याच्याकडून 2 हजार रुपयांना विष विकत घेतले.

Chandrapur Crime : वडिलांच्या मृत्यूनंतर दोघांनी लग्न केलं, मात्र संसारात वाद विकोपाला गेला अन्....

दरम्यान, वडिलांच्या मृत्यूनंतर दोघांनी लग्न केलं. मात्र लग्नानंतर त्यांच्यात खटके उडू लागले, त्यातच बेशिस्त वर्तनामुळे आशिष शेडमाकेला ट्रेनिंग दरम्यान पोलीस सेवेतून बडतर्फ करण्यात आलं, तर ट्रेनिंगनंतर आर्या बाल्लावार सासरी न येता माहेरी गेल्याने संतापलेल्या आशिष शेडमाकेने हे संपूर्ण प्रकरण उघडकीस आणलं. या प्रकरणी रामनगर पोलिसांनी महिला पोलीस अंमलदार आर्या बाल्लावारसह आशिष शेडमाके, चैतन्य गेडाम आणि विष विकत देणाऱ्या एका आरोपीला अटक केली आहे.

इतर महत्वाच्या बातम्या

Ashok Kharat Case Nashik Crime News: 150 हून अधिक महिलांचे लैंगिक शोषण करणाऱ्या अशोक खरातची केली HIV टेस्ट; पॉझिटिव्ह की निगेटिव्ह?, रिपोर्ट समोर