Sanjay Gaikwad : एकनाथ शिंदेंच्या आमदाराने अज्ञानाचे टोक गाठले, पानसरेंच्या शिवाजी कोण होता पुस्तकाच्या शीर्षकावर आक्षेप, शिवीगाळ आणि मारहाणीची भाषा

प्रकाशकाला केलेल्या शिवीगाळबद्दल दिलगिरी व्यक्त करतो पण...; संजय गायकवाडांना उपरती, भूमिकेवर ठाम

डॉ. संजय महाजन — Fri, 24 Apr 2026 17:30:33 +0530

बुलढाणा : शिवसेना आमदार संजय गायकवाड (Sanjay gaikwad) यांनी दिवंगत गोविंद पानसरे लिखीत शिवाजी कोण होता या पुस्तकाचे प्रकाशन करणाऱ्या प्रशांत आंबी यांना फोन करुन शिवागाळ केली होती, तसेच धमकी देत शिवाजी महाराजांचा एकेरी उल्लेख का करतो, असे म्हणत धमकीही दिली होती. मात्र, केवळ पुस्तकाचे कव्हर पेज पाहून संतापलेल्या संजय गायकवाड यांनी पुस्तक वाचले नसून त्यांना छत्रपती शिवराय कळालेच नाहीत, असे म्हणत समाज माध्यमांवरुन त्यांच्यावर टीकेची झोड उठली. राजकीय नेत्यांनी (Buldhana) देखील त्यांच्याबद्दल सावध भूमिका घेतल्यानंतर आता त्यांनी संबंधित प्रकाशक आंबी यांना केलेल्या शिवीगाळ प्रकरणाबद्दल दिलगीरी व्यक्त केली, पण छत्रपती शिवाजी महाराज (Shivaji maharaj) असा उल्लेख करण्याच्या मतावर आपण ठाम असल्याचंही त्यांनी म्हटलं.

शिवाजी कोण होता या पुस्तिकेचे प्रकाशक प्रशांत आंबी यांना आमदार संजय गायकवाड यांनी फोनवरुन अश्लील भाषेत शिवीगाळ केली होती. सोशल मीडियावर या घटनेवरुन संजय गायकवाड यांच्या भूमिकेवर अनेक प्रश्न विचारण्यात आले. तर, प्रकाशक प्रशांत आंबी यांनीही पोलिसात जाऊन तक्रार देण्याचा प्रयत्न केला. मात्र, त्यांची तक्रार घेण्यात आली नाही. तसेच, महायुतीमधील राजकीय नेत्यांनी देखील त्यांच्या फोनबद्दल सावध भूमिका घेतली होती. अखेर, शिवीगाळीच्या घडल्या प्रकाबद्दल त्यांनी आता दिलगिरी व्यक्त केलीय. मात्र, छत्रपती शिवाजी महाराजांचा उल्लेख नेहमी सन्मानपूर्वकच व्हावा, ही आपली ठाम भूमिका असल्याचेही संजय गायकवाड यांनी स्पष्ट केले आहे.

शिवीगाळ प्रकाराबद्दल दिलगिरी

शिवाजी कोण होता, या पुस्तकातील एकेरी उल्लेखांवर आक्षेप घेत त्यांनी हा विषय वादाचा नसून संस्कार आणि आदराचा असल्याचे मत व्यक्त केले. अलीकडील वादात आपल्या तोंडून काही अयोग्य शब्द गेले असल्याची जाणीव व्यक्त करत मनापासून दिलगिरीही व्यक्त करतो. तसेच, छत्रपती शिवरायांविषयी निष्ठा आणि सन्मान कायम ठेवत संबंधितांनी योग्य ती दुरुस्ती करावी. ज्यांना बुलढाण्यात येऊन हे पुस्तक वाचायचे आहे, त्यांनी ते वाचावे पण एकेरी उल्लेख न करता छत्रपती शिवाजी महाराज असाच उल्लेख करावा. महाराजांचा अपमान करुन करोडो हिंदूंचा अपमान करू नये अशी अपेक्षा सुद्धा त्यांनी व्यक्त केली.

मी संजय गायकवाड यांच्याशी बोलतो

संजय गायकवाड यांनी त्या पुस्तकासंदर्भात नेमकी कशाबाबत भूमिका मांडली, याबाबत त्यांच्याशी बोलावे लागेल. संजय गायकवाड यांनी ते पुस्तक वाचलं की नाही माहीत नाही. मी माहिती घेऊन त्यांना काय आक्षेपार्ह वाटलं ते विचारेल, मी देखील पुस्तक वाचतो असे उदय सामंत म्हणाले. शिवाजी कोण होता? हे पुस्तक मी देखील वाचलेले नाही, पुस्तक वाचलं की त्यांची भूमिका कशाबद्दल होती याबाबत चर्चा करेल, असे शिवसेना नेते तथा मत्री उदय सामंत यांनी म्हटले.

हेही वाचा

संजय गायकवाड यांना काय आक्षेपार्ह वाटलं ते विचारणार, मी देखील ते पुस्तक वाचलं नाही : उदय सामंत

Shahu Maharaj and Sanjay Gaikwad: आमदार संजय गायकवाडांवर छत्रपती शाहू महाराज संतापले, आमदारकी रद्द करण्याची मागणी, म्हणाले, सरकार....

रोहित धामणस्कर — Fri, 24 Apr 2026 13:36:36 +0530

Shahu Maharaj and Sanjay Gaikwad: शिवाजी कोण होता? या पुस्तकाच्या शीर्षकावरुन कोल्हापूरमधील प्रकाशक प्रशांत आंबी यांना शिवीगाळ करुन त्यांना जीवे मारण्याची धमकी देणारे आमदार संजय गायकवाड यांच्याविषयी खासदार शाहू महाराज छत्रपती यांनी संताप व्यक्त केला आहे. संजय गायकवाड यांनी केलेलं वक्तव्य जनता सहन करणार नाही. कोणाबद्दल काय बोलायचं हे त्यांना समजायला हवं, असे शाहू महाराज छत्रपती यांनी म्हटले. ते शुक्रवारी कोल्हापूरमध्ये प्रसारमाध्यमांशी बोलत होते. (Maharashtra Politics News)

यावेळी शाहू महाराज छत्रपती यांनी संजय गायकवाड यांच्याविरोधात कठोर कारवाईची गरज व्यक्त केली. यासंदर्भात सरकारला जी योग्य वाटले, ती कारवाई लवकर करावी. या सरकारमध्ये काही गोष्टी लगेच होत नाहीत. आमदारकी रद्द करण्यासंदर्भात काय नियम आहेत हे मला माहीत नाही. मात्र, संजय गायकवाड यांनी ज्या तऱ्हेने त्यांनी वक्तव्य केलं ते बिलकुल योग्य नाही. संजय गायकवाड यांच्या वक्तव्याकडे जनताच आता लक्ष देईल, अशी प्रतिक्रिया शाहू महाराज छत्रपती यांनी व्यक्त केली.

दरम्यान, 'शिवाजी कोण होता?' पुस्तकाचे प्रकाशक प्रशांत आंबी यांनी याप्रकरणी गुरुवारी कोल्हापूरच्या राजारामपुरी पोलीस ठाण्यात तक्रार दाखल केली होती. मात्र, पोलिसांनी तुर्तास संजय गायकवाड यांच्याविरोधात गुन्हा दाखल करुन घेण्यास नकार दिला. आम्ही आमच्या वकिलांशी बोलून तुम्हाला कळवतो, असे पोलिसांनी प्रशांत आंबी यांना सांगितले.

Sanjay Gaikwad on Shivaji Kon hota Book: नेमकं प्रकरण काय?

आमदार संजय गायकवाड यांनी 'शिवाजी कोण होता?'पुस्तकाचे प्रकाशक प्रशांत आंबी (Prashant Ambi) यांना फोन करुन शिवाजी महाराजांचा (Shivaji Maharaj) अनादर केल्याचे म्हणत शिवीगाळ केली होती. अरे गोविंद पानसरे (Govind Pansare) हा छत्रपती शिवाजी महाराजांना एकेरीत शिवाजी म्हणणारा कोण होता? मला हे पुस्तक वाचायची गरज नाही. तुमच्यासारखे नालायक लोक शिवाजी महाराजांना एकेरी भाषेत बोलतात. तुला माहितीये ना, त्या गोविंद पानसरेचं काय झालं, त्याची अवस्था काय झाली? मी तुलाही घरात घुसून मारेन, तुला चिरडून टाकेन, तुझी जीभ छाटेन, अशी धमकी संजय गायकवाड यांनी प्रशांत आंबी यांना दिली होती.

आणखी वाचा

Sanjay Gaikwad on Shivaji Kon hota Book: शैक्षणिक 'घोडदौड' इयत्ता नववीतच थांबली, बायकोला गिफ्ट मिळालेल्या पुस्तकाचं शीर्षक बघून संजय गायकवाडांनी मुक्ताफळं उधळली

Sanjay Gaikwad and Shivaji Maharaj: शिवाजी महाराजांना एकेरी बोलणारा गोविंद पानसरे कोण, त्याला भेटायला वर जायचंय का? आमदार संजय गायकवाडांची प्रकाशकाला धमकी

Sanjay Gaikwad and Prakash Mahajan: 'संजय गायकवाडांमुळे एकनाथ शिंदे साहेबांची बदनामी होते, आमचा त्यांच्या वक्तव्याशी संबंध नाही'; शिंदेंच्या शिवसेनेची पहिली प्रतिक्रिया

रोहित धामणस्कर — Fri, 24 Apr 2026 12:46:57 +0530

Sanjay Gaikwad on Shivaji Kon hota Book: कॉम्रेड गोविंद पानसरे यांच्या 'शिवाजी कोण होता' या पुस्तकाच्या शीर्षकावरुन प्रकाशक प्रशांत आंबी यांना शिवीगाळ करुन जीवे मारण्याची धमकी देणारे शिंदे गटाचे आमदार संजय गायकवाड (Sanjay Gaikwad) यांच्या अडचणी वाढण्याची शक्यता आहे. कारण, या प्रकरणात शिवसेनेची (Shivsena) पहिली प्रतिक्रिया आली असून पक्षाने संजय गायकवाड यांची पाठराखण करण्यास स्पष्ट नकार दिला आहे. संजय गायकवाड यांच्या अशा वक्तव्यांमुळे शिवसेना आणि एकनाथ शिंदे (Eknath Shinde) यांची बदनामी होते, असे वक्तव्य शिवसेनेचे प्रवक्ते प्रकाश महाजन यांनी केले आहे. (Maharashtra Politics news)

संजय गायकवाडची जी ऑडिओ क्लीप फिरतेय, त्याची सत्यता माहिती नाही. पण संजय गायकवाडांच्या वक्तव्याशी आणि विचाराशी पक्षाचा संबंध नाही, हे त्यांचं वैयक्तिक मत, पक्ष त्याचे समर्थन करत नाही, असे प्रकाश महाजन यांनी स्पष्टपणे सांगितले. त्यामुळे या प्रकरणात शिवसेना पक्ष आणि नेतृत्त्वाने हात वर केले असून यामुळे संजय गायकवाड यांच्या अडचणी वाढल्या आहेत. संजय गायकवाड हे आमदार आहेत, त्यांनी बोलताना संयम ठेवला पाहिजे. त्यांनी वापरलेली भाषा चूक आहे. या सगळ्यामुळे एकनाथ शिंदे आणि पक्षाची बदनामी होते, हे संजय गायकवाडच्या लक्षात येत नाही. मी प्रवक्ता म्हणून एवढेच सांगेन की, आम्ही त्यांच्या विचारांशी सहमत नाही. एका पुस्तकावरुन अशाप्रकारे शिवीगाळ करणे आणि पुस्तकाची सत्यता काय आहे, हे जाणून न घेता प्रतिक्रिया देणे संयम नसल्याचे द्योतक आहे. पण त्यांच्या अशा वागण्याने पक्ष नेतृत्त्वावर आक्षेप येईल, हे गायकवाडच्या लक्षात आलं नाही, असे प्रकाश महाजन यांनी म्हटले.

यावेळी प्रकाश महाजन यांनी संजय गायकवाड यांच्यावर पक्ष कारवाई करणार का, याबाबत स्पष्ट उत्तर देणे टाळले. संजय गायकवाड यांच्यावरील कारवाईबाबत एकनाथ शिंदे हेच निर्णय घेतील. प्रवक्ता म्हणून मी पक्ष त्यांच्या विचारांशी सहमत नाही, एवढेच सांगेन, असे महाजन यांनी स्पष्ट केले. संजय गायकवाड यांच्या वक्तव्यानंतर काल विधानपरिषदेच्या माजी उपसभापती नीलम गोऱ्हे यांनी गायकवाड यांचे तोकडे समर्थन करण्याचा प्रयत्न केला होता. संजय गायकवाड यांची भूमिका योग्य होती पण त्यांनी जी कृती केली ती योग्य नव्हती, असे नीलम गोऱ्हे यांनी म्हटले होते. मात्र, आता शिवसेनेचे प्रवक्ते प्रकाश महाजन यांनी या प्रकरणात पक्ष संजय गायकवाड यांच्यासोबत नसल्याचे सांगितले आहे. त्यामुळे आता भविष्यात या विषयात शिवसेनेतील इतर कोणताही नेता संजय गायकवाड यांच्या पाठीशी उभा राहण्याची शक्यता फार कमी आहे.

आणखी वाचा

शिंदे गटाचे आमदार संजय गायकवाडांविरोधात तक्रार दाखल करायला गेलेल्या प्रकाशकाला पोलिसांनी काय सांगितलं, गुन्हा दाखल करुन घेतला का?

Buldhana Water Crisis: बुलढाण्यात हंडाभर पाण्यासाठी वणवण; हंडे, ड्रम आणि कॅन घेऊन एका टँकरवर शेकडो नागरिकांची झुंबड, विदारक दृश्य समोर

डॉ. संजय महाजन — Fri, 24 Apr 2026 08:48:27 +0530

Buldhana Water Crisis: राज्यात उन्हाचा कडाका वाढत असतानाच बुलढाणा (Buldhana) जिल्ह्यात भीषण पाणीटंचाईने (Water Crisis) रौद्ररूप धारण केले आहे. अवघ्या एप्रिल महिन्यातच जिल्ह्यातील ग्रामीण आणि शहरी भागातील पाणीपुरवठ्याची स्थिती चिंताजनक बनली असून, नागरिकांना हंडाभर पाण्यासाठी मोठी कसरत करावी लागत आहे. सध्या जिल्ह्यातील पाच मोठ्या प्रकल्पांमधील जलसाठा केवळ 30 टक्क्यांवर आला असून, मे आणि जून महिन्यात ही परिस्थिती अधिकच विदारक होण्याची भीती व्यक्त होत आहे. सध्या 15 गावांमध्ये टँकरने पाणीपुरवठा सुरू आहे. तर 48 गावांत विहिरी अधिग्रहित करण्यात आल्या आहेत.

Buldhana Water Crisis: टँकरवर उडतेय झुंबड

बुलढाणा जिल्ह्यातील अनेक गावांमध्ये टँकर हेच तहाण भागवण्याचे एकमेव साधन उरले आहे. एका टँकरवर शेकडो नागरिकांची झुंबड उडत असल्याचे विदारक दृश्य समोर येत आहे. महिला, पुरुष आणि मुले रिकामे हंडे, ड्रम आणि कॅन घेऊन टँकरच्या प्रतीक्षेत तासनतास उभे राहत आहेत. अनेक ठिकाणी 10 ते 15 दिवसांआड पाणीपुरवठा होत असल्याने नागरिकांमध्ये संताप व्यक्त होत आहे.

Buldhana Water Crisis: प्रशासकीय उपाययोजना

वाढत्या टंचाईच्या पार्श्वभूमीवर प्रशासनाने पावले उचलण्यास सुरुवात केली आहे. सध्या 15 गावांना टँकरद्वारे पाणीपुरवठा केला जात आहे. 48 गावांमधील विहिरींचे अधिग्रहण करण्यात आले आहे. जिल्ह्याचे तापमान 42 ते 43 अंशांपर्यंत पोहोचल्याने प्रकल्पांमधील पाण्याचे मोठ्या प्रमाणावर बाष्पीभवन होत आहे.

Buldhana Water Crisis: मेहकर तालुक्यात सर्वाधिक झळा

बुलढाणा जिल्ह्यात मेहकर तालुक्याला पाणीटंचाईचा सर्वाधिक फटका बसला आहे. जिल्हाधिकारी प्रवीण देवरे यांनी दिलेल्या माहितीनुसार, पाणीटंचाई निवारणाचे सर्व अधिकार तहसीलदारांना देण्यात आले आहेत. "ज्या गावांतून मागणी येईल, तिथे तातडीने टँकर किंवा विहीर अधिग्रहणाचे प्रस्ताव मंजूर केले जात आहेत. मे-जूनमधील टंचाईचा सामना करण्यासाठी आढावा बैठका सुरू असून प्रशासन सज्ज आहे," असे त्यांनी स्पष्ट केले. येत्या काळात पावसाळा लांबणीवर पडल्यास जिल्ह्यावर मोठे जलसंकट ओढवू शकते, त्यामुळे पाण्याचा वापर जपून करण्याचे आवाहनही प्रशासनाकडून करण्यात येत आहे. आता पाणीटंचाईवर प्रशासन काय उपाययोजना करणार? हे पाहणे महत्त्वाचे ठरणार आहे.

इतर महत्त्वाच्या बातम्या

NCERT: हिंदीनंतर इंग्रजी पुस्तकातूनही मराठा साम्राज्याचा नकाशा हटवला; शिक्षण मंत्र्यांच्या आदेशाला एनसीईआरटीकडून वाटाण्याच्या अक्षता, साताऱ्यात शिवप्रेमींचा निषेधार्थ मोर्चा

BJP MLC Election Names : महाराष्ट्र भाजपकडून विधानपरिषदेसाठी 30 नावं केंद्रीय भाजपकडे, केशव उपाध्ये ते रवी अनासपुरेंच्या नावाचा समावेश, राष्ट्रवादीकडून लढलेल्या नेत्याचं नाव यादीत

BLOG : मराठा बंधू आणि भगिनींना खुले पत्र...

समीर गायकवाड — Thu, 23 Apr 2026 19:08:46 +0530

हे पत्र, मी मराठा (Maratha) आहे म्हणून लिहिलेलं नसून एक सच्चा शिवभक्त म्हणून लिहिलं आहे हे आधी स्पष्ट करू इच्छितो. या पत्राचे प्रयॊजन आमदार संजय गायकवाड (Sanjay Gaikwad) यांच्या वक्तव्याविषयीचे आहे.

बुलढाणा जिल्ह्यातले सिंदखेड राजा हे स्वराज्यप्रेरिका, राजमाता जिजाऊ मां साहेबांचे जन्मस्थान. रयतेच्या माता असणाऱ्या जिजाऊंच्या जन्माने पावन झालेल्या बुलढाणा जिल्ह्याचे मुख्य ठिकाण असणाऱ्या बुलढाणा शहरापासून, सिंदखेड राजा 80 किमी अंतरावर वसले आहे. जिजाऊंनी शिवबांच्या मनात स्वराज्याचे बीज रोवले, चारही पातशाहयांच्या विरोधात विद्रोह करण्याचे धडे दिले, अतुल्य पराक्रम, साहस, द्रष्टेपण, मुत्सद्दीपणा आणि रयतेच्या प्रेमाच्या बळावर मावळ्यांच्या मदतीने त्यांनी स्वराज्य उभे केले. जगाच्या पाठीवर शिवरायांसारखा राजा आढळत नाही. शिवबांच्या अंगी सदगुणांची खाण होती त्यातलाच एक मुख्य म्हणजे स्त्रियांचा आदर सन्मान होय! 'परस्त्री मातेसमान' हे पुस्तकी वाक्य त्यांच्या आयुष्यात प्रत्यक्षात उतरलं होतं!

ज्या बुलढाणा जिल्ह्यात जिजाऊ जन्मल्या त्याच बुलढाणा शहराचे आमदार संजय गायकवाड यांनी, पेशाने पुस्तक प्रकाशक असणाऱ्या प्रशांत आंबी यांना आई बहिणीवरून अर्वाच्च शिवीगाळ आणि दमदाटी केलीय! प्रशांत आंबी हा तरुण प्रकाशक आहे. गोविंद पानसरे यांनी लिहिलेल्या, 'शिवाजी कोण होता' हे अर्थपूर्ण आणि वाचनीय पुस्तक त्यांनी प्रकाशित केले आहे. हे पुस्तक प्रकाशित होऊन तीन दशके उलटून गेलीत. चिथावणीखोरांना अपेक्षित असणारे शिवाजी यात नसल्याने, अकरा वर्षांपूर्वीच पुरोगामी विचारांच्या पानसरे सरांची हत्या करण्यात आली. आजही त्या हत्येचे छुपे समर्थन करणारे नीच समाजात उजळ माथ्याने वावरताना दिसतात. हे कोण लोक आहेत हे वेगळे लिहिण्याची गरज नाही.

संजय गायकवाड प्रकरणाकडे गांभीर्याने पाहण्याची गरज आहे. 'शिवाजी कोण होता' या पुस्तकावरून त्यांनी प्रशांत आंबी यांना जीवे मारण्याची धमकी दिलीय. तुझ्या आईची गां*, तुझ्या बायकोचा टण्णा, तुझ्या मायचा फोद* अशा गलिच्छ शिव्या या इसमाने दिल्या आहेत. आईघा*, हरामखो*, माद**द या त्यांच्या आवडत्या शिव्याही दिल्या आहेत. घरात घुसून मारीन, चिरडुन टाकीन, शंभर पोरे तुझ्यावर सोडतो अशी कारंजी त्यांनी त्यांच्या तोंडामधून उडवली आहेत. इथे शिव्या लिहिण्याचा उद्देश हा की, यांची भाषा किती खालच्या दर्जाची आहे हे कळावे!

या महाशयांनी एकतर हे पुस्तक वाचलेले नाही. पुस्तक न वाचता त्यांना पुस्तकाचा विरोध करायचा आहे. त्यांच्या संवादात ते एके ठिकाणी म्हणतात की, 'मी मराठा आहे!'
इथे मोठा प्रॉब्लेम आहे. म्हणूनच हे पत्र लिहिले आहे! मराठा समाजातील प्रत्येक माणसाला शिवराय आपल्या जातीत जन्माला आले याचा विलक्षण अभिमान आहे, मला देखील आहे! इव्हन हरेक भारतीयास त्यांच्याविषयी आदरभाव आणि प्रेम आहे! शिवराय हे मराठ्यांचे काळीज आहे असं म्हणायचं आणि शिवबांच्या खऱ्या इतिहासापासून दूर जायचं, यात बदल घडायला हवा.

शिवाजी राजांचे नाव घेऊन हे आमदार म्हणतात की, तुझ्या आईच्या भो*त तलवार घालतो! यात आमदारांची अब्रू जात नाही. शिवबांचे नाव घेण्याचा अशांना हक्क नाही, हे मराठा समाजाने ठणकावून सांगितले पाहिजे. शिव्या देण्याचा यांना इतकाच कंड असेल तर आपल्या आईबापाचे, आवडत्या व्यक्तीचे नाव घेऊन, यांनी काय ती शिवीगाळ करावी! मात्र आपल्या घाणेरड्या मुखातून यांनी राजांचे नाव घेऊ नये हे यांना सांगितले पाहिजे.

या शिवीगाळीच्या संवादात ते एके ठिकाणी म्हणतात की, राजांच्या सेवेतली माझी ही आठवी पिढी आहे! कदाचित हे सत्य असेलही! मात्र त्यांच्या पहिल्या पिढीतले आज कुणी जिवंत असते तर त्यांनीच यांना अद्दल घडवली असती! कारण आपला राजा कसा होता आणि त्यांनी स्त्रियांना कसे सन्मानाने वाढवले होते हे त्या पहिल्या पिढीला नक्कीच ठाऊक असणार! शिवबा आवडतात म्हणायचे आणि घरात घुसून मारतो, चिरडून काढतो ही कसली भाषा!

हे गृहस्थ आमदार आहेत! थोडक्यात एका मतदारसंघाच्या रयतेचे प्रतिनिधी आहेत. त्यांना ही भाषा शोभत नाही. बुलढाणा भागातील लोकांनी या महोदयांना याची जाणीव करून दिली पाहिजे. प्रत्येक खेपेस लोकप्रतिनिधीलाच जबाबदार धरून भागणार नाही, आपल्या जातीचा माणूस म्हणून वा काही हजार रुपड्यांसाठी यांना मते देणाऱ्या प्रत्येक मराठा बांधवांनी आणि अन्य मतदारांनीही हा मुद्दा लक्षात ठेवला पाहिजे.

मुळात अलीकडील काळात, शिवाजी महाराज हा डोक्यावर घेऊन नाचण्याचा विषय झाला आहे याला मराठा समाजाचे जराही ऑब्जेक्शन नाही ही गोष्ट अतिशय शोकात्म आणि निंदनीय आहे!

मिरवणुकीत डीजे केव्हढा लावला, किती फुटांची मूर्ती बसवली, किती बाय कितीचा मंडप घातला, पोरांना ड्रेस किती दिले, केव्हढा मोठा फ्लेक्स लावला, घोषणाबाजी करत पुढे पुढे येत चमकोगिरी किती केली यावरून एखाद्याला शिवभक्त म्हणणे आधी बंद व्हायला पाहिजे.

शिवाजी राजे हा मस्तकात आणि हृदयात ठेवायचा अमूल्य ठेवा आहे, त्यांच्या विचारांवर चालणारा युवा घडवायचा असेल तर अभ्यासू आणि विचारी वृत्तीने शिवाजी अभ्यासले पाहिजेत, त्यांचे सखोल वाचन केले पाहिजे!

संजय गायकवाड यांच्यासारखं पुस्तक न वाचता केवळ शीर्षक एकेरी आहे म्हणून बाह्या सावरत येणाऱ्या गुंड प्रवृत्तीच्या लोकांना आवर घालण्याचे काम मराठा समाजाने प्रकर्षाने केले पाहिजे.

मराठा क्रांती मोर्चा, सकल मराठा समाज, छावा संघटना, मराठा महासंघ इत्यादी जितक्याही, सर्व काही मराठा संघटनांनी या संदर्भात एखादी आचारसंहिता जाहीर केली पाहिजे. अशी वक्तव्ये करून काळिमा फासणाऱ्या लोकांचा निषेध केला पाहिजे. दोन जातीत धर्मात तेढ माजवणाऱ्या प्रवृत्ती ओळखता आल्या पाहिजेत, त्यांचा बिमोड केला पाहिजे!

हे असेच चालू राहिले तर एके दिवशी आड रिकामे होतील आणि पोहऱ्यातही काहीच येणार नाही! मग मी मराठा आहे, माझी अमुक पिढी आहे, आम्ही शिवाजी राजांच्या जातीत जन्मलो आहोत या वल्गना पोकळ ठरतील कारण शिवाजी यांना कळालेच नाहीत! कळले असते तर अशा वांत्या करत गावभर फिरले नसते!

या संजय गायकवाड यांनी भूतकाळात काय दिवे लावले आहेत ते पाहण्यासारखे आहे - मुंबईतील आमदार निवासाच्या कॅन्टीनमध्ये निकृष्ट दर्जाचे जेवण दिल्याच्या रागातून त्यांनी एका कर्मचाऱ्याला मारहाण केली होती. मार्च 2024 मध्ये शिवजयंतीच्या मिरवणुकीत एका तरुणाला पोलिसांच्या लाठीने मारहाण करतानाचा त्यांचा व्हिडिओ व्हायरल झाला होता. सप्टेंबर 2024 मध्ये त्यांनी राहुल गांधी यांची जीभ छाटणाऱ्याला 11 लाख रुपयांचे बक्षीस जाहीर केले होते, ज्यामुळे त्यांच्यावर गुन्हाही दाखल झाला होता. जुलै 2025 मध्ये त्यांनी छत्रपती संभाजी महाराजांबद्दल केलेल्या एका विधानामुळे मराठा समाजात संताप व्यक्त झाला होता, ज्यावर नंतर त्यांनी माफी मागितली. 1987 मध्ये वाघाची शिकार केल्याचा दावा, पोलिसांना भ्रष्ट म्हणणे आणि मतदारांबद्दल "त्यांना फक्त दारू आणि मटण हवे असते" असे विधान करणे, अशा अनेक कारणांमुळे ते नेहमीच वादाच्या भोवऱ्यात राहिले आहेत. या तोंडाळ आणि चवचाल व्यक्तीचा निषेध केला पाहिजे असे मराठा समाजातील धुरिणांना वाटत नाही का?

केवळ निवडून येण्याचा निकष लावून आपल्या समाजात अशा जहरी वृत्ती वाढू दिल्या तर एक काळ असा येईल की सारा भोवतालच विखारी होऊन जाईल! शिवाजी राजांनी हेच स्वप्न पाहिले होते का? त्यांचे विचार असे होते का? रयतेतल्या प्रत्येक घटकाविषयी आपल्या राजांची भूमिका कशी होती हे आपण आपल्याच लोकप्रतिनिधींना सांगू शकत नसू तर आपल्याला तर काय अधिकार आहे राजांचे नाव घेण्याचा?

शिवाजी राजे हा डोक्यावर घेऊन नाचण्याचा विषय नसून डोक्यात आणि काळजात जतन करायचा अमूल्य ठेवा आहे आणि त्यांच्या विचारांवर आपल्याला चालायचे असेल तर त्यांचे चरित्र अभ्यासले पाहिजे, त्यांचे सर्वांगाने वाचन केले पाहिजे. त्यांची धोरणे, त्यांचे ध्येय, त्यांचे विचार यांनी झपाटले पाहिजे! हे आपण करत नसू आणि निव्वळ दिखाऊगिरी करत असू तर आपण खऱ्या अर्थाने गद्दार आहोत!

शेवटची नोंद - गोविंद पानसरे सरांची हत्या केल्याचा आरोप ज्याच्यावर होता त्याचे नावही समीर गायकवाड होते. तो आपल्याच समाजाचा भरकटलेला तरुण असावा! माझे नावही तेच आहे! एके काळी मी देखील अशाच विचारांनी भरकटलो होतो! पानसरेंची हत्या झाल्यानंतर आरोपी समीर गायकवाडला पकडल्याची बातमी प्रसिद्ध झाल्यानंतर अनेकांनी माझ्या घरी फोन करून यानेच तर हे केले नाही ना, अशी विचारणा केली होती! आजही या गोष्टींचा मला पश्चाताप होतो.

आपल्या समाजातील मुलांना भडकवले जाते, आपल्याला चिथावणी दिली जाते आणि आपला वापर होतो हे आपल्या समाजाला कळेनासे झालेय. हे छद्म ओळखायला शिकले पाहिजे, ही एक दुष्टनीती आहे आणि त्यात आपला समाज वाहवत चाललाय. बंधूंनो आणि भगिनींनो आपण यावर गाभार्याने आत्मपरीक्षण केले पाहिजे. मगच आपण संजय गायकवाड यांच्या सारख्या मुजोर आणि बेमुर्वत प्रवृत्तींना वेसण घालू शकू.

संजय गायकवाड यांच्या वर्तनात आणि शिवप्रेमात एक विलक्षण विसंगती आहे. छिंदम, भगतसिंग कोश्यारी, सोलापूरकर आणि कोरटकर इत्यादि लोकांनी शिवाजी राजांविषयी गरळ ओकली होती तेव्हा हेच गायकवाड आणि यांचे कर्ते धर्ते तोंड शिवून गप्प होते! मात्र ज्यांनी शिवाजी राजांवर एक अप्रतिम पुस्तक लिहिलं आहे त्यांच्यावरुन ते पुस्तक प्रकाशकाला तुला ही पानसरेकडे पाठवतो अशी भाषा करतात! यांना सत्तेत राहायचे असल्याने काहीनी शिवाजी राजांविषयी काहीही विखार वदला तरी हे मौन राहतील कारण यांचे शिवप्रेम खोटे आहे, शिवप्रेम दाखवून सत्तेत राहायचे हे यांचे मनसुबे आहेत! हे ओळखून समाजाने यांना जागेवर आणलं पाहिजे.

तुमचा,
समीर गायकवाड.

हे पत्र मराठा समाजातील बांधवांना उद्देशून लिहिले असले तरी अन्य शिवप्रेमी जनतेनेही यावर विचार केला पाहिजे! आपण हे किती काळ हे मुक्यागत बघत राहणार आहोत यावर कृती केली पाहिजे

शिवीगाळ करुन जीवे मारण्याची धमकी! आमदार संजय गायकवाड यांच्याविरोध कोल्हापुरात तक्रार दाखल

विजय केसरकर, एबीपी माझा — Thu, 23 Apr 2026 17:18:45 +0530

कोल्हापूर : दिवंगत लेखक गोविंद पानसरे यांच्या 38 वर्षापूर्वी प्रकाशीत झालेल्या शिवाजी कोण होता? या पुस्तकावरुन वादंग निर्माण झालं आहे. शिवसेना शिंदे गटाचे आमदार संजय गायकवाड आणि प्रकाशक प्रशांत आंबी यांच्यातील कथित दूरध्वनी संभाषणाची ध्वनिचित्रफीत व्हायरल झाल्यानंतर या प्रकरणाने राज्यभरात खळबळ उडवली आहे. प्रकाशक प्रशांत आंबी यांना फोनवर अर्वाच्य भाषेत शिवीगाळ करत जीवे मारण्याची धमकी दिल्याचे समोर आले आहे. आता या प्रकरणी शिवसेना आमदार संजय गायकवाड यांच्या विरोधात कोल्हापुरातील राजारामपुरी पोलिसात तक्रार दाखल करण्यासाठी प्रशांत आंबी राजारामपुरी पोलीस ठाण्यात तक्रार दाखल केली आहे.

कोल्हापुरातील राजारामपुरी पोलिसात तक्रार दाखल

आमदार संजय गायकवाड यांनी अश्लील शिवीगाळ करुन जीवे मारण्याची धमकी दिल्या प्रकरणी प्रशांत आंबी यांनी कोल्हापुरातील राजारामपुरी पोलिसात तक्रार दाखल केली आहे. प्रशांत आंबी याच्यासोबत त्याचे इतर सहकारी आणि गोविंदराव पानसरे यांचे कुटुंबीय देखील पोलीस स्टेशनमध्ये दाकल झाले आहेत. फोनवर अश्लील शिवीगाळ करणे, छत्रपती शिवाजी महाराजांचा अपमान करणे, जीभ कापण्याची आणि जीवे मारण्याची धमकी दिल्या बाबत फौजदारी गुन्हा दाखल करण्याची तक्रार केली आहे.

संजय गायकवाड यांच्यासह त्यांच्या गँगच्या लोकांकडून धोका, प्रशांत आंबी यांच्या तक्रारीत उल्लेख

आमदार संजय गायकवाड यांनी 26 एप्रिल 2026 रोजी मध्यरात्री 12:51 मिनिटांनी फोन करून धमकीत दिल्याचे तक्रार अर्जात उल्लेख करण्यात आला आहे. BNS च्या कलम 351, कलम 352, कलम 356, कलम 192 तसेच मानवी हक्क संरक्षण कायदा अंतर्गत गुन्हा नोंदवण्याची मागणी करण्यात आली आहे. मला व माझ्या कुटुंबीयाला आमदार संजय गायकवाड यांच्याकडून आणि त्यांच्या त्याच्या गँगच्या लोकांकडून धोका असल्याचे देखील तक्रारीत उल्लेख करण्यात आला आहे.

शिवसेनेचे आमदार संजय गायकवाड पुन्हा एकदा एका मोठ्या वादात सापडले असून, त्यांनी शिवाजी कोण होता? या पुस्तकाचे प्रकाशक प्रशांत आंबी यांना थेट जीवे मारण्याची धमकी दिल्याने खळबळ उडाली आहे. दिवंगत कॉम्रेड गोविंद पानसरे यांनी 38 वर्षांपूर्वी लिहिलेल्या 'शिवाजी कोण होता' या पुस्तकाच्या नावावरून गायकवाड यांचा संताप अनावर झाला. पुस्तकाचे शीर्षक छत्रपती शिवाजी महाराजांचा एकेरी उल्लेख करुन अनादर करणारे आहे, असा दावा करत गायकवाड यांनी प्रकाशक प्रशांत आंबी यांना फोनवरून अत्यंत खालच्या भाषेत शिवीगाळ केली. तसेच जीवे मारण्याची धमकी दिली आहे.

सोशल मीडियावर या संभाषणाची ऑडिओ क्लिप वेगाने व्हायरल होत असून यामध्ये आमदार गायकवाड यांनी आंबी यांना घरात घुसून मारण्याची आणि जीभ कापण्याची धमकी दिली आहे. विशेष म्हणजे, आंबी यांनी वारंवार "आधी पुस्तक वाचून घ्या" अशी विनंती करूनही गायकवाड यांनी "मला पुस्तक वाचायची गरज नाही" असे म्हणत शिवराळ भाषा वापरणे सुरूच ठेवले. या घटनेमुळे राजकीय वर्तुळात आणि सामाजिक क्षेत्रातून तीव्र प्रतिक्रिया उमटत आहेत.

Sanjay Gaikwad on Shivaji Kon hota Book: शैक्षणिक 'घोडदौड' इयत्ता नववीतच थांबली, बायकोला गिफ्ट मिळालेल्या पुस्तकाचं शीर्षक बघून संजय गायकवाडांनी मुक्ताफळं उधळली

रोहित धामणस्कर — Thu, 23 Apr 2026 14:45:33 +0530

Sanjay Gaikwad on Shivaji Kon hota Book: महाराष्ट्राच्या वैचारिक विश्वात आदराचे स्थान असणारे पुरोगामी चळवळीतील विचारवंत आणि कम्युनिस्ट कामगार नेते दिवंगत कॉम्रेड गोविंद पानसरे (Govind Pansare) यांच्या बहुचर्चित 'शिवाजी कोण होता' (Shivaji Kon Hota) या पुस्तकाच्या प्रकाशकांना धमकावल्यामुळे शिंदे गटाचे आमदार संजय गायकवाड (Sanjay Gaikwad) पुन्हा एकदा प्रसिद्धीच्या झोतात आले आहेत. संजय गायकवाड यांनी शिवाजी महाराजांचा (Chhatrapati Shivaji Maharaj) एकेरी उल्लेख असणारे पुस्तक तुम्ही प्रकाशितच कसे करु शकता, असा सवाल विचारत प्रकाशक प्रशांत आंबी यांना फोनवरुन शिवीगाळ आणि जीवे मारण्याची धमकी दिली. 'छत्रपती शिवाजी महाराजांचा एकेरी उल्लेख करणारा गोविंद पानसरे कोण', 'त्याची काय अवस्था झाली तुला माहितीये ना', 'तुला पण त्याला भेटायला वर जायचं आहे का?', अशी खालच्या दर्जाची भाषा संजय गायकवाड यांनी वापरली. प्रशांत आंबी यांनी संजय गायकवाडांना हे पुस्तक किमान वाचा, अशी विनंतीही करुन पाहिली. मात्र, 'मला हे पुस्तक वाचायची गरज नाही, तू हे पुस्तक छापायचं बंद कर नाहीतर मी तुला घरात घुसून मारेन, चिरडून टाकेन, तुझी जीभ कापेन', अशी भाषा संजय गायकवाड यांनी वापरली होती.

संजय गायकवाड यांची आजपर्यंतची कारकीर्द वादग्रस्त राहिली आहे. त्यांनी यापूर्वी आमदार निवासातील कँटिनमधील कर्मचाऱ्याला चांगले जेवण न मिळाल्यामुळे मारहाण केली होती. तर कोरोनाच्या काळात फडणवीसांच्या तोंडात कोरोनाचा विषाणू कोंबण्याची भाषाही संजय गायकवाड यांनी केली होती. कॉम्रेड गोविंद पानसरे यांच्यावर अद्वातद्वा बोलणाऱ्या संजय गायकवाड यांनी निवडणुकीत सादर केलेल्या प्रतिज्ञापत्रावर नजर टाकल्यास त्यांचे शिक्षण नववी पास इतके आहे. ते पेशाने शेतकरी आहेत. विशेष म्हणजे संजय गायकवाड यांनी बुलढाण्यातली ज्या शाळेत नववीपर्यंतचे शिक्षण घेतले, त्या शाळेचे नाव श्री शिवाजी स्कूल असे एकेरी उल्लेखाचे आहे.

संजय गायकवाड यांनी या पुस्तकावर टीका करताना म्हटले की, 21 तारखेला एका कार्यक्रमात हे पुस्तक माझ्या पत्नीला देण्यात आले. तिने हे पुस्तक घरी आणल्यावर मी ते वाचले. त्यामध्ये छत्रपती शिवरायांच्या गौरवशाली इतिहासाशी छेडछाड करण्यात आल्याचे दिसले. पुस्तकाच्या प्रत्येक पानावर शिवाजी महाराजांचा एकेरी उल्लेख आहे. तसेच शिवाजी महाराज क्षत्रिय होते की नाही, ते 96 कुळी होते की नाही, असे बेछूट प्रश्न विचारण्यात आल्याचे संजय गायकवाड यांनी म्हटले होते.

Shivaji Kon hota book: प्रकाशक प्रशांत आंबी पोलिसांत तक्रार करणार

आमदार संजय गायकवाड यांनी शिवीगाळ केलेले प्रकाशक प्रशांत आंबी हे पोलिसांत तक्रार दाखल करणार आहेत. आमदार संजय गायकवाड यांच्या विरोधातील तक्रारीचा ड्राफ्ट निश्चित करण्यासाठी वकील असीम सरोदे यांच्याकडे पाठवला आहे. तो निश्चित झाल्यानंतर कोल्हापूरच्या राजारामपुरी पोलीस ठाण्यामध्ये गुन्हा दाखल करण्यासाठी जाणार असल्याची माहिती प्रकाशक प्रशांत आंबी यांनी दिली आहे.

संजय गायकवाड कोण? (Sanjay Gaikwad Controversial Statements)

फडणवीसांच्या तोंडात कोरोनाचा विषाणू कोंबणार - 19 एप्रिल 2021

कोरोनाच्या काळात उद्धव ठाकरेंच्या शिवसेनेत असताना संजय गायकवाडांनी त्यावेळचे विरोधी पक्षनेते देवेंद्र फडणवीस राजकारण करत असल्याची टीका केली होती. त्यावरून त्यांनी एक वादग्रस्त वक्तव्यही केलं होतं. ते म्हणाले होते की, "सध्या राज्यासह देशभर कोरोनामुळे हाहाकार उडाला आहे. पण विरोधी पक्ष मदत करायचे सोडून राजकारण करत आहेत. मला जर कोरोनाचा विषाणू मिळाला तर देवेंद्र फडणवीसांच्या तोंडात कोंबेन."

शिवजयंती मिरवणुकीतील मारहाण - मार्च 2024

गेल्या वर्षी शिवजयंतीच्या मिरवणुकीत संजय गायकवाड यांनी एका तरुणाला काठीने मारहाण केली होती. त्याचा एक व्हिडीओ व्हायरल झाला होता.

राहुल गांधींची जीभ कापण्यासाठी 11 लाख रुपये बक्षीस - सप्टेंबर 2024

राहुल गांधी यांच्यावर बोलताना संजय गायकवाड म्हणाले होते की, राहुल गांधींची जो जिभ कापेल त्याला 11 लाख रुपये बक्षीस देणार. गायकवाडांनी लोकसभा विरोधी पक्षनेत्याच्याविरुद्ध हे वक्तव्य केलं आणि पोलिसांनी त्यांच्या विरोधात गुन्हा नोंदवला.

महाराष्ट्र पोलिस जगातील सर्वात अकार्यक्षम - एप्रिल 2025

महाराष्ट्र पोलिसांसारखं अकार्यक्षम डिपार्टमेंट जगात कुठेही नाही. पोलिसांनी जर 50 लाख पकडले तर ते 50 हजार दाखवतात. गुटखाबंदी केली की पोलिसांचा एक हप्ता वाढतो, दारूबंदी केली की पोलिसांचा एक हप्ता वाढतो, जर पोलिसांनी ठरवलं की, एक वर्ष मी हरामीपणा करणार नाही. तर सगळं सुतासारखं सरळ होईल.

मतदारांना फक्त दारू अन् मटण पाहिजे - जानेवारी 2025

विधानसभेच्या निवडणुकीत कमी मते पडल्यानंतर एका जाहीर सभेत संजय गायकवाडांनी मतदारांना शिव्या दिल्या. मतदारांना फक्त दारू आणि मटण पाहिजे. हे दोन हजारात विकले जातात. यांच्यापेक्षा वेश्या बऱ्या असं वक्तव्य संजय गायकवाड यांनी केलं होतं.

छत्रपती संभाजी महाराजांबद्दलचे वादग्रस्त वक्तव्य - 7 जुलै 2025

भाषेच्या मुद्द्यावर बोलताना संजय गायकवाडांची जीभ घसरली. छत्रपती संभाजी महाराजांनी 16 भाषा शिकल्या, ते काही मुर्ख होते का असं वाचाळवीरपणा गायकवाडांनी केला. तसेच त्यांनी छत्रपती शिवाजी महाराज आणि जिजामातांबद्दलही अपशब्द वापरले.

वाघाच्या शिकारीचा दावा - फेब्रुवारी 2024

सन 1987 साली आपण वाघ मारला होता आणि त्याचा दात गळ्यात घालून फिरतोय असा दावा संजय गायकवाड यांनी केला होता.

शेती बळकावल्याचा आरोप आणि अॅट्रॉसिटी प्रकरण (जुलै 2021 आणि फेब्रुवारी 2024)
2021 मध्ये गायकवाड यांच्यावर अॅट्रॉसिटी कायद्याचा गैरवापर केल्याचा आरोप झाला. त्यांनी एका गावात कायद्याचा दुरुपयोग होत असल्याचे वक्तव्य केले, ज्याचा व्हिडीओ व्हायरल झाला. दोन्ही प्रकरणांमध्ये गायकवाड यांच्याविरुद्ध गुन्हे दाखल झाले. शेती बळकावण्याच्या प्रकरणात न्यायालयाने कारवाईचे आदेश दिले.

शेतकऱ्याला अश्लील शिवीगाळ

संजय गायकवाड यांनी एका शेतकऱ्याला अश्लील शिवीगाळ केली होती. तसेच अॅट्रॉसिटी कायद्याचा गैरवापर केल्याचा आरोप त्यांच्यावर आहे.

आणखी वाचा

Medha Pansare and Sanjay Gaikwad: कॉम्रेड गोविंद पानसरेंच्या सूनेनं संजय गायकवाडांना सुनावलं, 'तुमच्यापाशी दुसरा तुल्यबळ विचारच नाही म्हणून....'

रोहित धामणस्कर — Thu, 23 Apr 2026 13:00:27 +0530

Medha Pansare and Sanjay Gaikwad: 'शिवाजी कोण होता' या पुस्तकाच्या शीर्षकावरुन अकलेचे तारे तोडणारे आणि प्रकाशकाला शिवराळ भाषेत धमकी देणारे शिंदे गटाचे आमदार संजय गायकवाड (MLA Sanjay Gaikwad) यांना कॉम्रेड गोविंद पानसरे यांची सून मेधा पानसरे (Medha Pansare) यांनी सौम्य पण सडेतोड भाषेत प्रत्युत्तर दिले आहे. कॉम्रेड गोविंद पानसरे (Govind Pansare) यांचे विचार महाराष्ट्राच्या कानाकोपऱ्यात पोहोचले आहेत. त्यांचा विचार तुम्हाला मारता येत नाही. त्यांच्या विचारसरणीचा प्रतिवाद करणारा दुसरा तुल्यबल विचारच तुमच्यापाशी नाही, असे खडे बोल मेधा पानसरे यांनी आमदार गायकवाड यांना सुनावले. त्या गुरुवारी कोल्हापूर येथे प्रसारमाध्यमांशी बोलत होत्या. (Maharashtra Politics news)

आमदार संजय गायकवाड यांनी कॉम्रेड गोविंद पानसरे यांच्याविषयी ज्या पद्धतीची भाषा वापरली आहे, त्याचा मी तीव्र निषेध करते. छत्रपती शिवाजी महाराज हे सौजन्यशील, न्यायप्रिय आणि गोरगरीबांचा, रयतेचा राजा म्हणून ओळखले जातात. त्यांचा वारसा सांगत आणि नाव घेत या पद्धतीची भाषा करणारे नक्की शिवरायांचा कोणता वारसा पुढे नेत आहेत? मी याचा निषेध करते, असे मेधा पानसरे यांनी म्हटले.

कॉम्रेड गोविंद पानसरे यांचे 'शिवाजी कोण होता', हे पुस्तक महाराष्ट्राच्या कानाकोपऱ्यात पोहोचले आहे. या पुस्तकाच्या लाखो प्रती छापल्या गेल्या आहेत, वाटल्या गेल्या आहेत. हे पुस्तक आजही वाचलं जातंय. कॉम्रेड पानसरे यांनी जो विचार सांगितला आहे तो मारता येत नाही, त्यावर दुसरा तुल्यबल विचार त्यांच्यापाशी नाही. त्यामुळे अशा पद्धतीचा विचार केला जात आहे. संजय गायकवाड यांनी हे पुस्तक वाचलंय, असे मला वाटत नाही. त्यांनी केवळ पुस्तकाचे शीर्षक बघून हे वक्तव्य केल्याचे दिसत आहे. त्यांनी हे पुस्तक वाचावे, हे आवाहन आहे. पुस्तकात कोणत्या प्रकारचे छत्रपती शिवाजी महाराज सांगितले आहेत, हे त्यांनी बघावे, तपासून घ्यावे, मग स्वत:चे वक्तव्य करावे, असे मेधा पानसरे यांनी म्हटले.

Govind Pansare news: कॉम्रेड गोविंद पानसरेंना अनेक धमक्या आल्या पण त्यांनी पुस्तकाचं शीर्षक बदललं नाही: मेधा पानसरे

कॉम्रेड गोविंद पानसरे यांचे 'शिवाजी कोण होता' हे पुस्तक ऐंशीच्या दशकात प्रकाशात झाले. त्यांच्या पुस्तकाच्या शीर्षकाबद्दलचा वाद नवीन नाही. कॉम्रेड पानसरे यांनी त्याला समर्पक उत्तर दिले आहे. त्यावेळी त्यांना अनेक धमक्या आल्या,पण त्यांनी पुस्तकाचे नाव मागे घेतले नाही. मात्र, शिवरायांच्या नावाने राजकारण करणाऱ्यांकडून अशी भाषा केली जाते. आम्ही कॉम्रेड पानसरे यांचे विचार इतरांना समजून घेता यावेत, यासाठी पुस्तकाच्या आणखी प्रती छापू. संजय गायकवाड यांच्यावर कायदेशीर कारवाई झाली पाहिजे, आम्ही वकिलांचा सल्ला घेत आहोत, असे मेधा पानसरे यांनी म्हटले.

आणखी वाचा

Sanjay Gaikwad Controversial Statements: कधी आमदार निवासात बॉक्सिंग, कधी आई-बहिणींवरुन शिव्या, आमदारकीला कलंक लावलेले संजय गायकवाड कोण?

विशाल देवकर — Thu, 23 Apr 2026 11:51:36 +0530

Sanjay Gaikwad Controversy : शिवसेना शिंदे गटाचे बुलढाण्याचे आमदार संजय गायकवाड हे कायम आपल्या रोखढोक आणि बेधडक वक्तव्यामुळे कायम चर्चेच्या केंद्रस्थानी राहिले आहे. मग ते अगदी आमदार निवासातील कॅन्टीन कर्मचाऱ्याला मारहाण प्रकरण असो किंवा शेतकऱ्यापासून ते पोलिसांबाबत केलेले आक्षेपार्ह वक्तव्य असो, आमदार गायकवाडांचा जवळचा संबंध राहिला आहे. आपल्या वादग्रस्त वक्तव्यामुळे किंवा वादग्रस्त कृतींमुळे नेहमीच चर्चेत असलेल्या बुलढाण्यातील (Buldhana) आमदार संजय गायकवाड हे पुन्हा एकदा नव्या वादामुळे चर्चेत आले आहे. छत्रपती शिवाजी महाराजांच्या (Shivaji Maharaj) अनेक पैलू उलगडणारं आणि कॉम्रेड गोविंद पानसरे (Govind Pansare) लिखित 'शिवाजी कोण होता' (Who was Shivaji? Book) या पुस्तकाच्या शीर्षकावर आक्षेप घेतला आहे. प्राध्यापक गोविंद पानसरे लिखित 'शिवाजी कोण होता...?' या पुस्तकाच्या प्रकाशक प्रशांत आंबी यांना फोनवर शिवीगाळ आणि धमकी दिल्याचं प्रकरण समोर आलं असून स्वात गायकवाड यांनी याबाबत स्पष्टीकरण देत या प्रकारची कबुली दिली आहे. मात्र आमदार संजय गायकवाड यांचे आजवर अनेक वादग्रस्त वक्तव्याने ते अडचणीत सापडले आहे.

आमदारकीला कलंक लावलेले संजय गायकवाड कोण? (Sanjay Gaikwad Controversial Statements)

फडणवीसांच्या तोंडात कोरोनाचा विषाणू कोंबणार - 19 एप्रिल 2021

शिवजयंती मिरवणुकीतील मारहाण - मार्च 2024

राहुल गांधींची जीभ कापण्यासाठी 11 लाख रुपये बक्षीस - सप्टेंबर 2024

महाराष्ट्र पोलिस जगातील सर्वात अकार्यक्षम - एप्रिल 2025

मतदारांना फक्त दारू अन् मटण पाहिजे - जानेवारी 2025

छत्रपती संभाजी महाराजांबद्दलचे वादग्रस्त वक्तव्य - 7 जुलै 2025

वाघाच्या शिकारीचा दावा - फेब्रुवारी 2024

शेतकऱ्याला अश्लील शिवीगाळ

एकंदरीत आमदार संजय गायकवाड हे हिंसात्मक वृत्तीचे, अतिशयोक्ती आणि बळाचा वापर करणारे असंच चित्र आहे. असं असलं तरी सत्ताधारी महायुती असो वा त्यांच्या पक्षाचे प्रमुख एकनाथ शिंदे असो, संजय गायकवाडांची प्रत्येक कृती पाठीशी घातली जाते असंच सध्याचं चित्र आहे.

इतर महत्वाच्या बातम्या

Sanjay Gaikwad and Shivaji Maharaj: शिवाजी महाराजांना एकेरी बोलणारा गोविंद पानसरे कोण, त्याला भेटायला वर जायचंय का? आमदार संजय गायकवाडांची प्रकाशकाला धमकी

Sanjay Gaikwad : एकनाथ शिंदेंच्या आमदाराने अज्ञानाचे टोक गाठले, पानसरेंच्या शिवाजी कोण होता पुस्तकाच्या शीर्षकावर आक्षेप, शिवीगाळ आणि मारहाणीची भाषा

विशाल देवकर — Thu, 23 Apr 2026 10:22:32 +0530

Sanjay Gaikwad Audio Clip on Shivaji Kon hota book: छत्रपती शिवाजी महाराजांच्या (Shivaji Maharaj) अनेक पैलू उलगडणारं आणि कॉम्रेड गोविंद पानसरे (Govind Pansare) लिखित 'शिवाजी कोण होता' (Who was Shivaji? Book) या पुस्तकावरून पुन्हा एका नव्या वादाला तोंड फुटलं आहे. प्राध्यापक गोविंद पानसरे लिखित 'शिवाजी कोण होता...?' या पुस्तकावर बुलढाण्याचे शिवसेनेचे आमदार संजय गायकवाड (MLA Sanjay Gaikwad) यांनी आक्षेप घेत थेट प्रकाशक प्रशांत आंबी यांना फोनवर शिवीगाळ आणि धमकी दिल्याचा प्रकार समोर आला आहे. छत्रपती शिवाजी महाराजांचं अनादर करणारे शीर्षक या पुस्तकाला दिलं असल्याचे म्हणत आमदार संजय गायकवाड यांनी प्रकाशक प्रशांत आंबी यांच्यावर रोष व्यक्त केलाय. या संदर्भात धमकीसह अश्लील शिवीगाळ करत असल्याची एक ऑडिओ क्लीप (Audio Clip) सध्या समाज माध्यमात व्हायरल झाली आहे. त्यामुळे अनेक चर्चांना उधाण आलं असताना याबाबत आमदार संजय गायकवाड यांना विचारणा केली असता त्यांनी यावर त्यांनी स्पष्टीकरण देत ही ऑडिओ क्लिप माझीच असल्याचे म्हटलं आहे.

Sanjay Gaikwad on Audio Clip : ....म्हणून मी शिवीगाळ केली, आमदार संजय गायकवाड यांचं स्पष्टीकरण

सोशल मीडियावर व्हायरल झालेल्या संभाषणाची ऑडिओ क्लीप हि मोडून-तोडून आणि काही शब्द वगळून प्रसारित करण्यात आली आहे. 21 तारखेला माझ्या पत्नीला एका कार्यक्रमात हे पुस्तक भेट म्हणून मिळालं. त्यांनतर हे पुस्तक घरी दिसल्यानंतर मी वाचलं. यात मराठ्यांचा गौरवशाली इतिहासाला छेडछाड करून एकेरी भाषेत उल्लेख केला आहे. प्रत्येक पानात शिवाजी कोण होता? मराठा, क्षत्रिय होता कि नव्हता, असा महाराजांचा एकेरी उल्लेख करण्यात आला आहे. त्यामुळे त्यांना मी फोन केला, सुरवातीला मी भाऊ म्हणून विचारणा केली, आणि हे पुस्तक तुम्ही प्रकाशित केलंय का म्हणून प्रश्न केला.

त्यानंतर शिवाजी महाराजांचा एकेरी उल्लेख का केला म्हणून जाब विचारला , त्यावर ते पुस्तक जुनं आहे, अमुक-अमुक व्यक्तीने लिहलंय, असं सांगितलं. मात्र प्रकाशन करताना तुम्ही एकेरी उल्लेख असलेलं पुस्तक का प्रकाशित केलं? महाराष्ट्रात वारंवार महाराजांची विटंबना का केली जाते? हे आपल्याला सहन होत नाही. त्यानंतर त्यांनी जातीचा उल्लेख करत मुजोरी केली. त्यामुळे मी शिवीगाळ केली. सारखा सारखा तो व्यक्ती डिवचत होता, म्हणून मी शिवीगाळ केली. असे स्पष्टीकरण देखील आमदार संजय गायकवाड यांनी यावेळी दिलं आहे.

इतर महत्वाच्या बातम्या

Sanjay Gaikwad and Shivaji Maharaj: शिवाजी महाराजांना एकेरी बोलणारा गोविंद पानसरे कोण, त्याला भेटायला वर जायचंय का? आमदार संजय गायकवाडांची प्रकाशकाला धमकी