Buldhana News: पहिले केस गळती, मग नख गळती अन् आता...; बुलढाण्यात पुन्हा एकदा भीतीचं वातावरण, नेमकं काय घडतंय?
Buldhana News: बुलढाण्यात पुन्हा एकदा भीतीचं वातावरण, नेमकं काय घडतंय?
Buldhana News: बुलढाणा जिल्ह्यातील शेगाव, नांदुरा, खामगाव या तालुक्यात गेल्या डिसेंबर महिन्यापासून नागरिकांना अचानक केस गळतीचा त्रास सुरू झाला होता व अनेकांना टक्कल पडलं होतं. त्यानंतर दोन ते तीन महिन्यानंतर याच रुग्णांचे नख विदृप होऊन नखं गळण्याचे प्रमाणही वाढलं होतं. आता याच रुग्णांना थकवा व चिडखोरपणा जाणवत असल्यामुळे परिसरात चिंता वाढली आहे. ज्या केस गळती व नख गळती झालेल्या रुग्णांच्या रक्तांच्या नमुना सेलेनियमचे प्रमाण वाढलं होतं अशाच रुग्णांना आता चिडखोरपणा व थकवा येणे अशा तक्रारी समोर आल्याने परिसरात नागरिकांमध्ये पुन्हा एकदा भीतीचं वातावरण पसरलं आहे.
केस गळतीचा प्रकार समोर आल्यानंतर देशाच्या सर्वोच्च संशोधन संस्थेच्या पथकाने अर्थात आयसीएमआरच्या पथकाने या भागाचा दौरा करून अनेक नमुनेही तपासणीसाठी घेतले होते. मात्र चार महिने उलटूनही अद्याप या पथकाने अहवाल सादर केला नाही त्यानंतर नखं गळती सुरू झाली व नखं गळतीनंतरही केंद्राच्या विशेष पथकाने या परिसराचा दौरा केला. मात्र काही दिवसातच या नागरिकांना आता थकवा व चिडखोरपणा जास्त प्रमाणात जाणवू लागल्याने प्रशासनाने या परिसरातील नागरिकांना वाऱ्यावर सोडल्याची भावना नागरिकांमध्ये दिसून येत आहे.
बुलढाण्यात पुन्हा भीतीचे वातावरण-
गेल्या डिसेंबर महिन्यापासून बुलढाणा जिल्ह्यातील शेगाव, नांदुरा, खामगाव तालुक्यातील अनेक गावात अचानक केस गळतीने नागरिक हैराण झाले होते. केस गळतीनंतर रुग्णांची नखे अचानक विद्रूप होऊन नखे कमजोर होऊ लागली होती. अनेकांची नखे गळून पडली असल्याचं धक्कादायक वास्तव समोर आलं होतं. त्यानंतर आता रुग्णांना प्रचंड थकवा व चिडखोरपणा जाणवू लागल्याने बुलढाण्यात पुन्हा भीतीचे वातावरण निर्माण झाले आहे.
नक्की कुठला आजार? नागरिक साशंक
गेल्या डिसेंबर महिन्यापासून नागरिकांची फक्त तपासणी झाली. ICMR चे पथक आले. अनेक वेळी रक्ताचे नमुने घेतल्या गेलेत. मात्र, औषध उपचाराच्या नावावर रुग्णांना काहीच दिले नसल्याचा आरोप करत आरोग्य व जिल्हा प्रशासनाने रुग्णांना वाऱ्यावर सोडल्याचा आरोप नागरिक करत आहेत. अद्यापही ICMR चा अहवाल जाहीर करण्यात आलेला नसल्याने सरकार नेमक काय लपवू पाहत आहे? यावर नागरिकांना शंका येत आहे. या परिसरात अतिशय धक्कादायक चित्र असून नक्की हा कुठला आजार आहे? या बद्दल नागरिक साशंक आहेत.
राज्यासह देश-विदेशातील महत्वाच्या घडामोडी, VIDEO:
संबंधित बातमी:
महत्त्वाच्या बातम्या
