भंडाऱ्यात हिट अँड रनची घटना, अज्ञात वाहनाच्या धडकेत दोघांचा जागीच मृत्यू, तर कल्याणमध्ये सुप्रसिद्ध रिलस्टारचा अपघाती मृत्यू

देवेंद्र फडणवीस हेच 2034 पर्यंत मुख्यमंत्री राहतील, मंत्री चंद्रशेखर बावनकुळेंचा दावा, संजय राऊतांना लगावला टोला

प्रशांत देसाई — Sat, 11 Jul 2026 19:34:41 +0530

Chandrashekhar Bawankule : ज्येष्ठ मंत्री म्हणून जर देवेंद्र फडणवीस (Devendra Fadnavis) केंद्रात गेले, चंद्रशेखर बावनकुळे हे मुख्यमंत्री होऊ शकतील, असं मला 100 टक्के वाटत असल्याचं वक्तव्य शिवसेना ठाकरे गटाचे खासदार संजय राऊत (Sanjay Raut) यांनी केलं आहे. फडणवीसांनी 2029 पूर्वी पंतप्रधान व्हावं अशीही टिप्पणी देखील त्यांनी केली आहे. त्यांच्या या वक्तव्यावर मंत्री चंद्रशेखर बावनकुळे (Chandrashekhar Bawankule) यांनी प्रतिक्रिया दिली आहे. महाराष्ट्रात 2034 पर्यंत देवेंद्र फडणवीस हेच मुख्यमंत्री राहतील, असा मोठा दावा बावनकुळेंनी केला आहे.

नेमकं काय म्हणाले चंद्रशेखर बावनकुळे?

शिवसेना (ठाकरे गट) खासदार संजय राऊत यांनी राज्यातील मुख्यमंत्रीपदाबाबत केलेल्या विधानावर भाजपचे नेते महसूलमंत्री चंद्रशेखर बावनकुळे यांनी जोरदार प्रत्युत्तर देताना, महाराष्ट्रात 2034 पर्यंत देवेंद्र फडणवीस हेच मुख्यमंत्री राहतील, असा मोठा दावा केला आहे. राज्यामध्ये आमचे अष्टपैलू कर्तृत्वाचे नेते देवेंद्र फडणवीस हे मुख्यमंत्री आहेत. राज्याला देवेंद्र फडणवीस हेच मुख्यमंत्री म्हणून लाभावे, ही महाराष्ट्रातील 14 कोटी जनतेची भावना आहे. बावनकुळे यांच्या या विधानामुळे राजकीय वर्तुळात आता नव्या चर्चांना उधाण आले असून, महायुतीमधील आगामी समीकरणांबाबत विरोधकांकडून काय प्रतिक्रिया येते, हे पाहणे महत्त्वाचे ठरेल.

मदतकार्यात राजकारण नको! विरोधकांच्या आरोपांवर चंद्रशेखर बावनकुळे यांचं उत्तर

राज्यात घडलेल्या मोशी दुर्घटनेनंतर विरोधकांकडून होत असलेल्या आरोपांना भाजपचे नेते चंद्रशेखर बावनकुळे यांनी चोख प्रत्युत्तर दिले आहे. विरोधी पक्षाचे कामच केवळ आरोप करणे आहे, मात्र, सरकार संपूर्ण क्षमतेने मदत आणि बचावकार्यात व्यस्त आहे, असे बावनकुळे यांनी स्पष्ट केले आहे. घडलेल्या दुर्घटनेवर बोलताना विरोधकांनी मदत आणि शोधकार्य संथगतीने सुरू असल्याचा आरोप केला होता. या आरोपांवर माध्यमांशी संवाद साधताना बावनकुळे म्हणाले, आरोप करणे हे विरोधकांचे कामच आहे. पण ही एक खूप मोठी घटना असून यामध्ये सर्वांना वाचवण्याचे व मदत पोहोचवण्याचे काम युद्धपातळीवर सुरू आहे. महाराष्ट्र सरकार, जिल्हाधिकारी, आमची संपूर्ण टीम, आपत्ती व्यवस्थापन टीम आणि महानगरपालिकेची यंत्रणा अशा सर्वच यंत्रणा घटनास्थळी पूर्णपणे सक्रिय आहेत आणि मदतकार्य करत आहेत. विरोधकांनी काहीही दावे केले असले, तरी सरकार आणि संबंधित सर्व प्रशासकीय यंत्रणा लोकांना वाचवण्यासाठी आणि त्यांना तात्काळ मदत देण्यासाठी कटिबद्ध असून संपूर्णपणे कार्यरत आहेत, असा ठाम विश्वास बावनकुळे यांनी यावेळी व्यक्त केला.

Vidarbha Rain Deficit : मुंबई-पुण्यात पुरेपूर; मात्र नागपूरसह विदर्भातील 11 पैकी 8 जिल्ह्यांमध्ये पावसाची मोठी तूट; मराठवाड्यातील धाराशिवही तहानलेलाच!

रजत वशिष्ठ, एबीपी माझा — Tue, 7 Jul 2026 09:27:26 +0530

Vidarbha Rain Deficit : राज्याच्या पश्चिमी टोकावर दमदार पाऊस होत असताना राज्याच्या पूर्वी टोकावर म्हणजेच विदर्भात बहुतांशी (Vidarbha Rain) जिल्ह्यात मात्र पावसाची कमालीची तूट (Rain Deficit) दिसून येत आहे. संपूर्ण जून महिन्यात दडी मारलेल्या पावसाने जुलै महिन्याच्या सुरुवातीच्या दोन दिवसात दमदार पुनरागमन केले होते. मात्र त्यानंतर विदर्भात गोंदिया आणि वर्धा वगळता इतरत्र दमदार पाऊस झालेला नाही. त्यामुळे विदर्भातील 11 पैकी तब्बल 8 जिल्ह्यांमध्ये पावसाची तूट (Vidarbha Rain Deficit) दिसून येत आहे. अशातच सर्वाधिक 43% तूट जंगलांचा जिल्हा मानल्या जाणाऱ्या गडचिरोलीत आहे. त्यानंतर भंडारामध्ये सरासरीचे तुलनेत 33 % तर वाशिममध्ये 21% कमी पाऊस पडला आहे.

Vidarbha Rain : विदर्भात सरासरीच्या तुलनेत कुठे किती टक्के पाऊस?

सरासरीपेक्षा कमी पाऊस पडलेले जिल्हे (Below Average Rainfall)

गडचिरोली : ५७ % ( -४३ )

भंडारा : ७६ % ( -३३ )

वाशीम : ७९ % ( -२१ )

चंद्रपूर : ८५ % ( -१५ )

अकोला : ८७ % ( -१३ )

नागपूर : ९४ % ( -०६ )

बुलढाणा : १५ % ( -०५ )

सरासरीपेक्षा जास्त पाऊस पडलेले जिल्हे (Above-average rainfall)

गोंदिया : १४८ % ( +४८ )

वर्धा : १०८ % ( +०८ )

यवतमाळ : १०२% ( +०२ )

Dharashiv : मुंबई पुण्यात पावसाचा धुमाकूळ, धाराशिव तहानलेलाच, पावसाने दडी मारल्याने 70% पेरण्या खोळंबल्या

एकीकडे पुणे-मुंबईत पावसाचा अक्षरशः धुमाकूळ पाहायला मिळत आहे. मात्र दुसरीकडे धाराशिव तहानलेलाच आहे. धाराशिव मध्ये जुलै महिन्याच्या पहिल्या पाच दिवसात सर्वात कमी पावसाची नोंद झाली आहे. पहिल्या पाच दिवसात अवघा सतरा मिमी पाऊस झाला आहे. तर गेल्या वर्षीच्या तुलनेने देखील पावसाचे प्रमाण कमी आहे. जून जुलै महिन्याचा विचार केला तर गेल्या वर्षी आतापर्यंत 259 मिमी पाऊस झाला होता. तर यंदा फक्त 150 मिमी पाऊस झाला असून दमदार पावसाची प्रतीक्षा आहे. पाऊस दडी मारल्याने पेरण्या देखील खुळमले असून 70 टक्के क्षेत्रावरील अजून पेरणी झाली नाही. त्यामुळे शेतकरी पावसाच्या प्रतीक्षेत आहेत.

Gondia Rain: गोंदियाच्या पिपरिया-रिसेवाडा मार्गावरील नदीच्या पुरात टिप्परसह अनेक वाहने अडकली

गोंदिया जिल्ह्यात सुरू असलेल्या मुसळधार पावसामुळे सालेकसा, आमगाव व देवरी या तालुक्यांमध्ये सर्वाधिक पावसाची नोंद झाली आहे. विशेषतः सालेकसा तालुक्यातील विविध नदी-नाल्यांच्या पाणीपातळीत मोठी वाढ झाल्याने जनजीवन विस्कळीत झाले आहे. सालेकसा तालुक्यातील पिपरिया–रिसेवाडा मार्गावरील नदीमध्ये सुरू असलेल्या पुलाच्या कामादरम्यान एक टिप्पर तसेच काही इतर वाहने अचानक वाढलेल्या पाण्यामुळे नदीपात्रात अडकून पडली. सुदैवाने कोणतीही जीवितहानी झाली नाही. मात्र, नदी नाले हे दुथळी भरून वाहत असून प्रशासनाच्या वतीने नदी काठावरील गावांना सतर्क राहण्याचे आवाहन करण्यात आले आहे.

Heavy Rain Maharashtra: मोठी बातमी: मुसळधार पावसाने राज्यातील 11 धरणं तुडुंब भरली, हातनूर, गोसेखुर्द धरणांचे दरवाजे उघडले, रायगडमधील 7 धरणांमध्ये 100 टक्के पाणीसाठा

एबीपी माझा वेब टीम — Sat, 4 Jul 2026 10:27:36 +0530

Heavy Rain Maharashtra: राज्यभरात पावसाचा जोर कायम असून सर्वत्र पावसाने जोरदार (Heavy Rain Maharashtra) हजेरी लावली आहे. राज्यातील बहुतांश भागात आजही मुसळधार ते अतिमुसळधार पावसाचा (Maharashtra Rain) अंदाज आहे. परिणामी कोरडा गेलेल्या जूननंतर जुलैच्या पहिल्याच आढवाड्यात दमदार पावसामुळे बळीराजा सुखावला आहे. तर दुसरीकडे राज्यातील अनेक धारणक्षेत्र आणि नदी नाल्यांच्या जलसाठ्यात कमालीची वाढ झाली आहे. विदर्भातील भंडाऱ्याच्या गोसेखुर्द धरणाच्या (Bhandara Gosikhurd Dam) पाण्याच्या विसर्गात मोठी वाढ करण्यात आली असून 33 दरवाजे अर्धा मीटरनं सुरू करण्यात आले आहे. यातून 1 लाख 30 हजार क्युसेक वेगानं पाण्याचा विसर्ग सुरु आहे. तर रायगड (Raigad Rain) जिल्ह्यात मुसळधार पावसामुळे जिल्ह्यातील 28 धरणांच्या पाणी पातळीत मोठी वाढ झाली असून 7 धरणे 100 टक्के भरली आहे.

Bhandara Gosikhurd Dam : गोसेखुर्द धरणाचे सर्व 33 दरवाजे अर्धा मीटरनं उघडले; 1 लाख 30 हजार 888 क्युसेक वेगानं पाण्याचा विसर्ग

गोसेखुर्द धरणाच्या पाणलोट क्षेत्रात मोठ्या प्रमाणात पाऊस पडतोय आणि सोबतच पुजारीटोला, धापेवाडा धरणातून पाणी सोडण्यात येत आहे. त्यामुळे गोसेखुर्द धरणाच्या पाण्याच्या जलसाठ्यात मोठी वाढ झाली आहे. संभाव्य पूरपरिस्थितीचा धोका आणि गोसेखुर्द धरणाचा जलसाठा नियंत्रित ठेवण्यासाठी गोसेखुर्द धरण प्रशासनानं धरणाचे सर्वच्या सर्व 33 दरवाजे अर्धा मीटरनं सुरू केले आहेत. सध्या धरणातून आता १ लाख ३० हजार ८८८ क्युसेक वेगानं पाण्याचा विसर्ग करण्यात येत आहे. गोसेखुर्द धरणाचा जलसाठा नियंत्रित ठेवण्यासाठी धरणातून आणखी मोठ्या प्रमाणात पाण्याचा विसर्ग करण्यात येणार असल्यानं नदी काठावरील ग्रामस्थांनी सतर्क राहावं असं आव्हान भंडारा जिल्हा प्रशासनाच्या वतीनं करण्यात आलं आहे.

Raigad Rain: मुसळधार पावसामुळे रायगड जिल्ह्यातील 28 धरणांच्या पाणी पातळीत मोठी वाढ; 7 धरणे 100 टक्के भरली

रायगड जिल्ह्यात मागील चार दिवसांपासून पावसाचा जोर कायम असून नद्यांसह धरणांच्या पाणी पातळीत मोठी वाढ झालीय. जिल्ह्यातील प्रमुख 28 धरणांतील पाणी साठा सद्यस्थिती मध्ये 53.68 टक्क्यांवर पोहोचला असून सुतार वाडी, कोंडगाव, उन्हेरे,पाभरे, संदेरी, कोथुर्डे,आणि खैरे हे 7 धरण 100 टक्के भरली आहेत. त्यामुळे रायगडकरांची पाण्याची चिंता मिटली आहे. शिवाय वावा, कुडकी, कुथुर्डे, भिलवली धरणात 50 टक्क्यांहून अधिक पाणी साठा जमा झालाय. जिल्ह्यात पावसाचा जोर कायम राहिल्यास आणखी उर्वरित धरणांमध्ये देखील पाण्याची मोठी वाढ होण्याची शक्यता आहे. दरम्यान हवामान खात्याने रायगड जिल्ह्यात आज रेड अलर्ट दिला असून नागरिकांना प्रशासनाने सतर्क राहण्याचे आवाहन केलं आहे.

Hatnur Dam : हतनूर धरणाचे दरवाजे उघडले, नागरिकांनी नदी पात्र परिसरापासून दूर राहण्याचे आवाहन

जळगाव जिल्ह्यासह मध्यप्रदेश परिसरात झालेल्या पावसाने तापी नदी क्षेत्रात मोठ्या प्रमाणात पाण्याची आवक वाढल्याचे चित्र आहे. अशातच भुसावळच्या तापी नदीवर असलेल्या हतनूर धरणाचे दहा दरवाजे उघडण्यात आले असून, त्यातून 22248 कुसेक्स पाण्याचा विसर्ग नदी पात्रात केला जात आहे. अजूनही पावसाचा अंदाज पाहता, नदी पात्रात पाण्याची वाढ होऊन, धरणाचे जास्तीचे दरवाजे उघडले जाण्याचा अंदाज असल्याने नागरिकांनी नदी पात्र परिसरापासून दूर राहण्याचे आवाहन करण्यात आले आहे.

Vidarbha Rain : विदर्भात कुठे पावसाचा कहर, तर कुठे दमदार पावसाची प्रतीक्षाच! बुलढाण्यात बानगंगा नदीला मोठा पूर, तर भंडाऱ्यात पावसाअभावी भात शेती धोक्यात

एबीपी माझा वेब टीम — Wed, 1 Jul 2026 11:31:08 +0530

Maharashtra Rain Updates: राज्यभरात पुन्हा पावसाचा (Rain Alert) जोर वाढला आहे. बहुतांश ठकाणी दमदार पावसाने हजेरी लावली असली तरी काही ठिकाणी अद्यापही समाधानकारक पावसाची प्रतीक्षा आहे. तर राज्यातील पुढील पाच दिवस कोकण, विदर्भ (Vidarbha Rain) आणि मध्य महाराष्ट्रात जोरदार पावसाचा अंदाज भारतीय हवामान विभागाने (Maharashtra Weather Updates) वर्तविला आहे. असे असताना विदर्भात मात्र काहीसे वेगळं चित्र पाहायला मिळत आहे. एकीकडे भंडारा (Bhandara Rain) जिल्ह्यात पावसाने हुलकावणी देण्यात आल्याने भात उत्पादक शेतकरी अडचणीत येण्याची शक्यता आहे. एल निनोच्या सावटामुळं भात उत्पादक शेतकरी चिंतेत सापडला आहे. तर दुसरीकडे बुलढाण्यातील मेहकर तालुक्यात तीन दिवसांपासून सुरू असलेल्या मुसळधार पावसामुळे नदी नाल्यांना पूर आल्याचे चित्र आहे.

Bhandara Rain: 'एल निनो'च्या प्रभावामुळं जिल्ह्यात सरासरीपेक्षा अत्यंत कमी पाऊस

दरम्यान, जून महिना पूर्णपणे संपला असून राज्यातील अनेक जिल्ह्यांमध्ये पावसानं जोरदार हजेरी लावली आहे. मात्र, भंडारा जिल्ह्यात परिस्थिती चिंताजनक आहे. यावर्षी 'एल निनो'च्या सावटामुळं पाहिजे त्या प्रमाणात पाऊस नं पडल्यानं भंडारा जिल्ह्यातील मुख्य पीक असलेला भात उत्पादक शेतकरी मोठ्या अडचणीत सापडला आहे. 'एल निनो'च्या प्रभावामुळं जिल्ह्यात सरासरीपेक्षा अत्यंत कमी पाऊस झाला आहे. यामुळं भात रोवणीची कामं रखडली असून शेतकरी चिंतेत सापडला आहे.

El Nino Effect:'एल निनो'च्या प्रभावामुळं भात शेती धोक्यात येण्याची दाट शक्यता

ज्या शेतकऱ्यांकडं विहीर, कूपनलिका (बोअरवेल) किंवा इतर सिंचनाची शाश्वत सुविधा उपलब्ध आहे, अशा शेतकऱ्यांनी कशीबशी हिंमत करून भात पिकाची लागवड (रोवणी) सुरू केली आहे. मात्र, हे प्रमाण अत्यंत कमी असून, निसर्गाच्या भरवशावर असणारा बहुतांश गरीब शेतकरी अजूनही मोठ्या पावसाच्या प्रतीक्षेत चातकासारखी वाट पाहत आहे. पुढील काही दिवसांत पाऊस नं आल्यास भंडारा जिल्ह्यातील भात शेती धोक्यात येण्याची दाट शक्यता वर्तवली जात आहे.

Buldhana: बुलढाण्यात मुसळधार पावसाच्या सरी; पाणी साचल्याने पेरणीचे कामे खोळंबली

दुसरीकडे बुलढाण्यातील मेहकर तालुक्यात तीन दिवसांपासून सुरू असलेल्या मुसळधार पावसामुळे नदी नाल्यांना पूर आल्याची परिस्थिती निर्माण झाली आहे. बुलढाणा जिल्ह्यातील मेहकर तालुक्यांमध्ये गेल्या तीन ते चार दिवसांपासून मुसळधार पाऊस होत असल्याने शेतात मोठ्या प्रमाणात पाणी साचल्याने पेरणीचे कामे खोळंबली आहे. त्याचबरोबर काही नदी नाल्यांना पूर देखील आल्याचे चित्र दिसत आहे. तर काही ठिकाणी सुरू असलेल्या रस्त्या संदर्भातील कामावर असलेल्या कच्चा फुल वाहून गेल्याचे ही दिसून आले आहे. यामध्ये ब्रह्मपुरी, दुधा, रायपुर या परिसरामध्ये मोठ्या प्रमाणात पाऊस झाल्याने अनेक शेतात पाणी साचल्याचे चित्र आहे. तर काही ठिकाणी रस्ता वाहून गेल्याचे ही घटना घडली आहे.

Buldhana Rain: बुलढाण्यात धाड परिसरात मुसळधार पाऊस; बानगंगा नदीला आला मोठा पूर

बुलढाण्यात काल दुपारनंतर अनेक भागात जोरदार पाऊस कोसळला. बुलढाणा तालुक्यातील धाड, जामठी,वरुड, सोयगाव या भागात दोन तास झालेल्या मुसळधार पावसाने बाणगंगा नदीला मोठा पूर आला. परिसरात सलग चौथ्या दिवशी पाऊस आल्याने शेतकऱ्यात आनंदाचे वातावरण असून पेरणीच्या कामांना वेग आला आहे.

केळीच्या ट्रकमधून गांजांची तस्करी! मुंबईच्या नार्कोटिक्स विभागाची भंडाऱ्यात मोठी कारवाई, 2 कोटी 35 लाखांचा मुद्देमाल जप्त

प्रशांत देसाई — Tue, 30 Jun 2026 21:25:38 +0530

Bhandara Crime News : मुंबईच्या नार्कोटिक्स विभागानं आज भंडाऱ्यात गांजा तस्करांवर मोठी कारवाई केली आहे. तब्बल 2.5 कोटींच्या गांजासह 30 लाखांचा ट्रॅक असा 2.35 कोटींचा मुद्देमाल जप्त केला आहे. ओडिशातून मुंबईच्या दिशेनं जाणाऱ्या केळीच्या आयशर ट्रकमधून गांजाची तस्करी केली जात होती. अखेर या गांजा तस्करांवर मुंबईच्या नार्कोटिक्स विभागानं मोठी कारवाई केली आहे.

केळीच्या कॅरेटमध्ये लपवून एका आयशर ट्रकमधून गांजाची तस्करी

केळीच्या कॅरेटमध्ये लपवून एका आयशर ट्रकमधून गांजाची तस्करी होत होती. मुंबईच्या दिशेनं जाणाऱ्या या ट्रकवर नार्कोटिक्स विभागानं भंडाऱ्यात मोठी कारवाई केली आहे. या प्रकरणी दोघांना अटक केली आहे. ओडिशा येथून मुंबईच्या दिशेने या आयशर ट्रक मधील कॅरेटमध्ये लपवून सुमारे 245 किलो गांजाची वाहतूक करण्यात येत असल्याची गुप्त माहिती मुंबईच्या नार्कोटिक्स विभागाला मिळाली होती. या माहितीवरुन या विभागाच्या अधिकाऱ्यांनी मुंबईच्या दिशेनं जाणाऱ्या या आयशर ट्रकचा पाठलाग केला.

सेंदूरवाफा येथील टोल नाक्यावर या आयशर ट्रकला सापळा रचून थांबवण्यात आलं

भंडाऱ्याच्या साकोली तालुक्यातील सेंदूरवाफा येथील टोल नाक्यावर या आयशर ट्रकला सापळा रचून थांबवण्यात आलं. ट्रकची झडती घेतली असता कॅरेटमध्ये लपवून गांजाची वाहतूक करण्यात येत असल्याचं तपासात समोर आलं आहे. याप्रकरणी नार्कोटिक्स विभागाच्या पथकानं ट्रक चालक आणि क्लीनरला ताब्यात घेऊन त्यांच्याकडून सुमारे 2.5 कोटींचा 245 किलोग्रॅम वजनाचा गांजा जप्त केला आहे. या कारवाईत ट्रक चालक कमलेश बघेल (42 ) नागपूर आणि क्लिनर प्रशांत दुर्बे (22) अमरावती या दोघांना अटक केली असून ज्या आयशर ट्रकमधून ही वाहतूक करण्यात येत होती तोही आता पोलिसांनी ताब्यात घेतला आहे. या कारवाईत गांजा आणि आयशर ट्रक असा 2.35 कोटींचा मुद्देमाल जप्त करण्यात आला आहे. मुंबईच्या नार्कोटिक्स विभागाच्या पथकानं भंडाऱ्यात ही कारवाई केल्यानं पोलीस प्रशासनात मोठी खळबळ उडाली आहे.

अहिल्यानगरच्या श्रीगोंदा तालुक्यामध्ये अलिशान कारमधुन गुटखा वाहतुक करणा-याविरुध्द अहिल्यानगर स्थानिक गुन्हे शाखेची मोठी कारवाई केली आहे. आरोपीकडून 28,88,330/-रुपये किंमतीचा मुद्देमाल जप्त केला आहे. स्थानिक गुन्हे शाखेचे पथक श्रीगोंदा पोलीस स्टेशन हद्दीमध्ये पेट्रोलींग करुन अवैध धंद्याची माहिती काढत असताना पथकास गुप्त बातमीदारामार्फत मुंढेकरवाडी येथे अमोल जाधव याने प्रतिबंधित आणि शरिरास अपायकारक होईल असा गुटखा आणि सुगंधीत तंबाखु विक्री करणे करीता खरेदी केलेला असून तो त्याची विक्री करणार असल्याची माहिती मिळाली. त्यानंतर पथकाने अमोल जाधवच्या राहत्या घराजवळ जावुन खात्री केली. तेथे तीन जण पांढरे रंगाचे कारमधून काही गोण्या स्विप्ट कारमध्ये भरतांना दिसले. तेव्हा पथकाने सदर ठिकाणी छापा टाकुन तिघांना ताब्यात घेतले आहे.

धक्कादायक! टोचून बोलणाऱ्या घर मालकाला भाडेकरुनं निर्जनस्थळी नेलं, डोक्यात दगड घालून संपवलं, भंडारा हादरलं

प्रशांत देसाई — Thu, 25 Jun 2026 23:22:47 +0530

Bhandara Crime News : भंडारा जिल्ह्यातील पवनी तालुक्यात धक्कादायक घटना घडली आहे. घरमालक नेहमी टोचून बोलतो, याचा राग मनात धरुन भाडेकरुनं आपल्या घरमालकाची निर्जनस्थळी नेत दगडानं ठेचून हत्या केली आहे. ही घटना भंडारा जिल्ह्याच्या निष्टी ते भुयार या जंगल परिसरातील मार्गावरील ठाणेगाव येथील तलावाच्या निर्जनस्थळी उघडकीस आली. याप्रकरणी पवनी पोलिसांनी आरोपीला अटक केली आहे.

आरोपीला अटक, पोलिसांकडून चौकशी सुरु

लीलाधर मोहरकर 60 वर्षीय मृत सेवानिवृत्त शिक्षकाचं नावं आहे. तर, महेश विश्वकर्मा (32) असं पोलिसांनी अटक केलेल्या आरोप भाडेकरूचं नावं आहे. मृतक हे पवनी तालुक्यातील कोसरा येथील असून भाडेकरू असलेल्या महेश विश्वकर्मा याचं मिठाईचं दुकान आहे. आरोपी महेशनं घरमालक लिलाधर यांना दुचाकीनं प्रथम पवनी इथं आणलं. त्यानंतर दोघेही निष्टी या जंगल परिसरातून भुयार गावाकडं निघाले. मात्र, जंगलातील निर्जनस्थळ बघून आरोपी महेशनं दुचाकी ठाणेगाव येथील तलाव परिसरात नेत तिथं त्यांचा प्रथम दुपट्ट्यानं गळा आवळला. त्यानंतर दगडानं ठेचून चेहरा विद्रूप करून हत्या केली. रक्ताच्या थरोड्यातील मृतदेह बघून गुराख्यानं घटनेची माहिती पोलिसांना दिली. पवनी पोलिसांनी तपासाची चक्र वेगानं फिरवीत आरोपी महेशला ताब्यात घेत चौकशी केली असता त्यानं घटनेची कबुली दिली. या प्रकरणी पवनी पोलिसांनी गुन्हा दाखल करून आरोपीला अटक केली आहे.

बदलापुरात पत्नीची नाक-तोंड दाबून हत्या

बदलापुरात पत्नीची नाक-तोंड दाबून हत्या करत हार्ट अटॅकने मृत्यू झाल्याचा बनाव पतीनं केल्याची धक्कादायक घटना उघडकीस आली आहे. पोस्टमॉर्टमचा रिपोर्टने आल्यानंतर या प्रकरणाचे बिंग फुटलं आहे. पोलिसांनी हत्येचा गुन्हा दाखल करत पती आणि सासूला बेड्या ठोकल्या आहेत. पतीचे एका अन्य महिलेसोबत प्रेमसंबंध होते. तो पत्नीवर घटस्फोटासाठी दबाव टाकत होता. मात्र पत्नीने घटस्फोटाला नकार दिल्यानं पतीनं तिचा काटा काढल्याचं पोलीस तपासात निष्पन्न झालं आहे.

मृत्यू हार्ट अटॅकने झालेला नसून नाक तोंड दाबून खून करण्यात आल्याचं निष्प

प्राजक्ता मेहेर असं मृत पत्नीचं नाव होतं. तिचं 2010 साली बदलापूरच्या एरंजाड गावात राहणाऱ्या योगेश मेहेर सोबत लग्न झालं. त्यांना 15 आणि 11 वर्षांची दोन मुलंही आहेत. मात्र काही काळापासून योगेशचे गावातच राहणाऱ्या एका महिलेसोबत प्रेमसंबंध जुळले. यातूनच योगेशने पत्नी प्राजक्ताला घटस्फोटासाठी त्रास द्यायला सुरुवात केली. 14 मार्च 2026 रोजी प्राजक्ताच्या माहेरच्यांना बोलावून हवे तितके पैसे घ्या आणि मुलीला घेऊन जा, अशी ऑफर योगेशने दिल्याचा आरोप प्राजक्ताच्या वडिलांनी केलाय. यानंतर 8 एप्रिल रोजी योगेश आणि प्राजक्तामध्ये पुन्हा भांडण झालं. 9 एप्रिल रोजी योगेशने प्राजक्ताच्या माहेरच्यांना तिचा हार्ट अटॅकने मृत्यू झाल्याची माहिती दिली. त्यानुसार पोलिसांनी अकस्मात मृत्यूची नोंदही केली. मात्र प्राजक्ताच्या माहेरच्यांनी संशय व्यक्त केल्यानं मुंबईच्या जेजे हॉस्पिटलमध्ये तिचं पोस्टमॉर्टम करण्यात आलं आणि व्हिसेरा सांभाळून ठेवण्यात आला. याचाच रिपोर्ट 23 जून रोजी आला, ज्यात प्राजक्ताचा मृत्यू हार्ट अटॅकने झालेला नसून नाक तोंड दाबून खून करण्यात आल्याचं निष्पन्न झालं.

Onion Farmers: नाफेड अन् एनसीसीएफ खरेदी केंद्राकडे शेतकऱ्यांची पाठ कायम; 18 खरेदी केंद्रांवर शुकशुकाट; तर भंडाऱ्यात कृषी वीज महिनाभरापासून बंद, शेतकऱ्यांचा निर्वाणीचा इशारा

एबीपी माझा वेब टीम — Thu, 25 Jun 2026 07:13:40 +0530

Onion Farmers: नाफेड आणि एन.सी.सी.एफ.खरेदी केंद्राकडे शेतकऱ्यांची पाठ कायम असल्याचे चित्र आहे. किंमत स्थिरीकरण योजनेअंतर्गत आतापर्यंत नाफेड व एन.सी.सी.एफ (NAFED) कडून कांदा खरेदीचे उद्दिष्ट्य 2 लाख मेट्रिक टन होते. मात्र प्रत्यक्षात आतापर्यंत कांदा खरेदी केवळ 2746.96 मेट्रिक टन इतकेच खरेदी करण्यात आला आहे. तर नाफेड व एन.सी.सी.एफ.चे प्रत्येक 18 खरेदी केंद्र असून देखील कांदा खरेदी अवघी 2746.96 मेट्रिक टन झाली आहे. नाफेड व एन.सी.सी.एफ.ने किमान 3000 रुपये प्रति क्विंटल भाव देण्याची मागणी शेतकऱ्यांकडून (Onion Farmers) करण्यात आली असून हि मागणी कायम आहे.

तर दुसरीकडे, भंडाऱ्यात कृषी वीज महिनाभरापासून बंद असून त्याचा फटका शेतकऱ्यांना बसतोय. परिणामी बागायती पीक करपली असून भंडाऱ्यात शेतकरी आता आक्रमक झाले आहे. चार दिवसांत वीज द्या, नाहीतर आत्महत्येचा इशारा! शेतकऱ्यांनी दिला आहे.

Nashik Farmer Issue : बाजार समित्यांतील कांदा खरेदीचा फज्जा

केंद्र सरकारच्या किंमत स्थिरीकरण योजनेअंतर्गत शेतकऱ्यांना दिलासा देण्यासाठी केंद्राने नाफेड व एन.सी.सी.एफ मार्फत कांदा खरेदी सुरू केली. मात्र केंद्राने ठरवून दिलेला भाव हा शेतकऱ्यांच्या उत्पादन खर्चापेक्षाही कमी असल्याने व कांदा खरेदी करतांना लावून दिलेल्या जाचक अटींमुळे शेतकऱ्यांनी नाशिक जिल्ह्यातील या खरेदी केंद्राकडे पाठ फिरवली आहे. विशेष म्हणजे महिनाभरात 1250 रुपये प्रति क्विंटल भावापासून ते 1730 रुपये प्रति क्विंटलपर्यंत भाव केंद्राने दिला खरा, पण सद्य स्थितीत नाशिक जिल्ह्यातील बाजार समित्यांमध्ये 1800 ते 2000 रुपयांपर्यंत भाव मिळत असल्याने नाफेड खरेदी केंद्रांना अत्यल्प प्रतिसाद मिळत असून शेतकरी खुल्या बाजारात कांदा विक्री करणे पसंत करत आहे. केंद्र सरकारने ठरवून दिलेल्या 2 लाख मेट्रिक टन उद्दिष्टांपैकी नाशिक जिल्ह्यातील नाफेडच्या खरेदी केंद्रावर आतापर्यंत ( दि.23 जून ) अत्यल्प असा 1083.46 मेट्रिक टन तर एन.सी.सी.एफ च्या खरेदी केंद्रावर 1663.56 मेट्रिक टन कांदा खरेदी करण्यात आला आहे.

दरम्यान, केंद्र व राज्य सरकारतर्फे कांदा खरेदी न होण्याची काही कारणमीमांसा शोधणे गरजेचे आहे. पण यात कुठेही ठोस उपाय योजना होतांना दिसत नसल्याने नाफेड व एन.सी.सी.एफ.खरेदी केंद्राचा ' फ्लॉप शो ' होतांना दिसत आहे. नाफेड व एन.सी.सी.एफ.ने किमान 3000 रुपये प्रति क्विंटल भाव देण्याची मागणी शेतकऱ्यांनी कायम केली आहे.

Bhandara: बागायती पीक करपली; भंडाऱ्यात शेतकरी आक्रमक, चार दिवसांत वीज द्या, नाहीतर आत्महत्येचा इशारा!

राज्यात एकीकडं मान्सूनच्या पावसानं जोरदार हजेरी लावलेली असताना भंडाऱ्यात पाहिजे त्या प्रमाणात पावसानं हजेरी लावलेली नाही. राज्य सरकार एकीकडं शेतकऱ्यांना कृषी पंपांसाठी मोफत वीज देण्याच्या मोठ्या-मोठ्या घोषणा करतंय. पण, दुसरीकडं महावितरणच्या ढिसाळ कारभारामुळं शेतकऱ्यांच्या हातात आलेलं पीक डोळ्यांदेखत अक्षरशः करपून गेलंय. भंडारा तालुक्यातून साहुली आणि जुनी पिंपरी गावात महिनाभरापूर्वी आलेल्या वादळात तुटलेल्या वीज तारा आणि पडलेले खांब महावितरणला अजूनही उभे करता आलेलं नाही. परिणामी, कडक उन्हात पाणी नं मिळाल्यानं लाखो रुपयांचा भाजीपाला झाडालाचं करपून काळेकुट्ट झालाय.

महावितरणच्या या मनमानी कारभाराला कंटाळून, "४ दिवसांत वीज दिली नाही तर, आत्महत्या करेन", असा उद्विग्न इशारा साहुली येथील एका शेतकऱ्यानं दिला आहे. सरकार कागदावर मोफत विजेच्या घोषणा करत असताना, जमिनीवर मात्र महावितरणच्या सुस्त कारभारामुळं बळीराजाचा जीव टांगणीला लागलाय. आता या वैफल्यग्रस्त शेतकऱ्याचा इशारा ऐकल्यानंतर तरी महावितरणच्या अधिकाऱ्यांना जाग येणार का? की एखाद्या शेतकऱ्याचा बळी जाण्याची वाट हे अधिकारी पाहत आहेत? असा संतप्त सवाल आता विचारला जातोय.

Bhandara News : रविवारपर्यंत पोल उभ करण्याचं काम युद्धस्तरावर करू : कनिष्ठ अभियंता

याबाबत महावितरणचे कनिष्ठ अभियंता गजानन देव्हारे यांना विचारणा केली असता त्यांनी. चक्रीवादळात उच्चदाब वाहिनीचे 47 पोल तर लघुदाब वाहिनीचे 91 पोल कोलमडून पडलेत. चार एजन्सीच्या माध्यमातून काम करण्यात येत आहे. रविवारपर्यंत पोल उभ करण्याचं काम युद्धस्तरावर करू. असे भंडारा ग्रामीण महावितरणचे कनिष्ठ अभियंता गजानन देव्हारे म्हणाले.

धावत्या ट्रेनच्या खिडकीला आढळला लटकलेला मृतदेह, भंडाऱ्याच्या तुमसर रोड रेल्वे स्टेशनवर खळबळजनक घटना

प्रशांत देसाई — Fri, 19 Jun 2026 23:39:14 +0530

Bhandara News : भंडारा जिल्ह्यातील तुमसर रोड रेल्वे स्टेशनवरर खळबळजनक घटना घडली आहे. धावत्या ट्रेनच्या खिडकीला लटकलेला मृतदेह आढळल्यानं खळबळ उडाली आहे. या मृतदेहाचे दोन्ही पायही तुटलेले होते. घटनेची माहिती मिळताच गोंदिया रेल्वे पोलिसांनी तातडीनं घटनास्थळी धाव घेत मृतदेह ताब्यात घेतला आणि पंचनामा केला आहे. अद्याप या मृतदेहाची ओळख पटलेली नाही.

या घटनेमुळे रेल्वे वर्तुळात आणि प्रवाशांमध्ये प्रचंड खळबळ

नागपूरच्या इतवारी इथून टाटानगरकडे जाणाऱ्या एका धावत्या ट्रेनच्या खिडकीला बाहेरच्या बाजूनं एका इसमाचा मृतदेह गळफास घेतलेल्या अवस्थेत लटकताना आढळून आला आहे. भंडाऱ्याच्या तुमसर रोड रेल्वे स्थानकावर हा प्रकार उघडकीस आला आहे. या घटनेमुळे रेल्वे वर्तुळात आणि प्रवाशांमध्ये प्रचंड खळबळ उडाली आहे. नागपूरच्या इतवारी रेल्वे स्थानकावरून टाटानगरकडं जाणाऱ्या ट्रेनच्या एका डब्याला बाहेरच्या बाजूनं एका 40 ते 45 वर्षीय इसमाचा मृतदेह लटकत होता. ट्रेन जेव्हा तुमसर रोड स्टेशनवर पोहोचली, तेव्हा ही खळबळजनक घटना प्रवाशांच्या लक्षात आली. विशेष म्हणजे, या इसमाचे पाय प्रवासादरम्यान पूर्णपणे तुटलेल्या अवस्थेत आढळून आले आहेत.

रेल्वे स्थानकांवरील सीसीटीव्हीची तपासणी सुरु

दरम्यान, या घटनेची माहिती मिळताच गोंदिया रेल्वे पोलिसांनी तातडीनं घटनास्थळी धाव घेत मृतदेह ताब्यात घेतला आणि पंचनामा केला. मात्र, या मृत व्यक्तीची ओळख पटवणं आता रेल्वे पोलिसांसमोर सर्वात मोठं आव्हान ठरलं आहे. हा इसम नेमका कुठून ट्रेनमध्ये चढला किंवा लटकला, याचा शोध घेण्यासाठी आता रेल्वे पोलीस इतवारी ते तुमसर रोड दरम्यानच्या सर्व रेल्वे स्थानकांवरील सीसीटीव्ही (CCTV) फुटेजची कसून तपासणी करत आहेत.

चंद्रपूर जिल्ह्यात शेळी शोधण्याकरिता जंगलात गेलेल्या एका मेंढपाळाचा वाघाच्या हल्ल्यात मृत्यू

चंद्रपूर जिल्ह्यात शेळी शोधण्याकरिता जंगलात गेलेल्या एका मेंढपाळाचा वाघाच्या हल्ल्यात मृत्यू झालाय आहे. नागभीड तालुक्यातील गिरगांव जंगलातली ही घटना असून आत्माराम दसरू बोरकर (52) असे मृत मेंढपाळाचे नाव आहे. शेळया चराई करीता काल तो गिरगांव जगलात गेला होता. सर्व शेळया चराई करुन घराकडे परतल्या. मात्र कळपात एक शेळी कमी आढळल्याने शेळी शोधण्याकरिता गुराखी जंगलात गेला. तो परत न आल्यामुळे कुटुंबीय आणि गावकऱ्यांनी जंगल परिसरात रात्रभर शोधाशोध केली. मात्र पत्ता लागला नाही. घटनेची माहिती वन विभागाला देण्यात आली. वन विभाग व पोलिसांनी आज सकाळी शोधमोहीम राबविली. अखेर आज सकाळी त्याचे शव आढळून आले.

EVM मधील गडबड सुप्रीम कोर्टात पोहोचताचं भाजपनं मशिन्स जाळल्या, नाना पटोलेंचा खळबळजनक आरोप

प्रशांत देसाई — Sun, 14 Jun 2026 17:07:39 +0530

Nana Patole : ना रहेगा बास ना बजेगी बासरी याच म्हणीचा वापर करत भाजप आणि मोदी सरकार देशात कारभार करत असल्याचा घणाघाती आरोप काँग्रेसचे माजी प्रदेशाध्यक्ष नाना पटोले (Nana Patole ) यांनी केली. पश्चिम बंगालमधील निवडणूक प्रक्रियेवर आणि ईव्हीएम मशीनच्या सुरक्षेवर त्यांनी गंभीर प्रश्नचिन्ह उपस्थित केले आहेत. ईव्हीएममधील गडबड सुप्रीम कोर्टात पोहोचताच भाजपनं मशिन्स जाळल्याचा खळबळजनक आरोप नाना पटोले यांनी केला आहे. भाजप सरकारने पश्चिम बंगालमध्ये लोकशाहीचा गळा घोटल्याचे पटोले म्हणाले.

ईव्हीएम मशीनमध्ये मोठ्या प्रमाणावर फेरफार आणि गडबड करण्यात आल्याचा आरोप

पश्चिम बंगालमध्ये निवडणूक आयोगापासून ते संपूर्ण निवडणूक मॅनेजमेंट आणि 'मॅच फिक्सिंग' हे भाजपच्या बाजूनं करण्याचा प्रयत्न झाला. हे चित्र संपूर्ण देश आणि पश्चिम बंगालची जनता उघड्या डोळ्यांनी पाहत होती. हे संपूर्ण प्रकरण आता सुप्रीम कोर्टापर्यंत पोहोचले आहे. ईव्हीएम मशीनमध्ये मोठ्या प्रमाणावर फेरफार आणि गडबड करण्यात आल्याचा आरोप पटोले यांनी केला. ही बाब आता लोकांसमोर उघड होत आहे, हे समजताच पश्चिम बंगालमधील पराभवाच्या छायेखाली असलेल्या भाजप सरकारनं ईव्हीएम मशिन्सच जाळून टाकल्याचा दावा त्यांनी केला आहे. हा घातपात मुद्दाम घडवून आणला गेल्याचे त्यांनी म्हटलं आहे.

रोहित पवारांच्या आंदोलनाला काँग्रेसचा पाठिंबा

भाजपच्या 2014 ते 2019 या काळातील फडणवीस सरकारनं 2016 मध्ये जाहीर केलेली कर्जमाफी ही निव्वळ फसवणूक होती, असा घणाघाती आरोप काँग्रेसचे माजी प्रदेशाध्यक्ष नाना पटोले यांनी केलाय. सरकार बदलले तरी अजूनही शेतकऱ्यांची कर्जमाफी पूर्ण झालेली नाही, असे सांगत त्यांनी सध्याच्या सरकारच्या धोरणांवरही कडाडून टीका केली. शेतकऱ्यांच्या विविध मागण्यांना घेऊन रोहित पवार यांचं पंढरपूरमध्ये सुरू असलेल्या आंदोलनाला काँग्रेसचा पाठिंबा असल्याची माहिती नाना पटोलेंनी दिली. शेतकऱ्यांकडून जबरदस्तीनं आधी एवढे पैसे भरा, मगच तुमची कर्जमाफी होईल अशा अटी घातल्या जात आहेत. यामुळे प्रत्यक्ष कर्जमाफ होण्याऐवजी शेतकऱ्यांच्या खिशातूनच पैसे काढून घेतले जात आहेत. ही अत्यंत क्लेशदायक बाब असून प्रत्यक्षात बँकांचे कर्ज माफ होताना कुठेही दिसत नसल्याचा आरोप नाना पटोले यांनी केला. राष्ट्रवादी काँग्रेस शरद पवार पक्षाचे आमदार रोहित पवार यांचे गेल्या तीन दिवसांपासून पंढरपुरात अन्नत्याग आंदोलन सुरु आहे. राज्यातील शेतकऱ्यांना कोणत्याही अटी शर्ती शिवाय सरकारनं कर्जमाफी करावी, या मागणीसाठी आहे आंदोलन सुरु आहे. या आंदोलनाला काँग्रेसनं पाठिंबा दिला आहे.

भंडाऱ्यात हिट अँड रनची घटना, अज्ञात वाहनाच्या धडकेत दोघांचा जागीच मृत्यू, तर कल्याणमध्ये सुप्रसिद्ध रिलस्टारचा अपघाती मृत्यू

प्रशांत देसाई — Sat, 13 Jun 2026 19:56:53 +0530

Bhandara Accident News : भंडाऱ्यात "हिट अँड रन"ची घटना घडली आहे. या भीषण अपघातात दोघांचा मृत्यू झाला आहे. राष्ट्रीय महामार्गावरून पायी जाणाऱ्या दोघांना भरधाव अज्ञात वाहनाने भीषण धडक दिली. या अपघातात दोघेही गंभीर जखमी होऊन त्यांचा घटनास्थळीचं मृत्यू झाला. या भीषण अपघातानंतर अपघातास कारणीभूत असलेला अज्ञात वाहनचालक पळून गेला आहे. हा अपघात भंडारा - साकोली या राष्ट्रीय महामार्गावरील धारगाव इथं पेट्रोलपंप समोर घडला आहे.

राष्ट्रीय महामार्गाच्या एका बाजूनं ते फिरायला निघाले असताना हा अपघात घडला

मिळालेल्या माहितीनुसार, कुंडलिक वालदे (63) आणि भिवा बोंदले (70) यांचा अपघातात मृत्यू झाला आहे. हे दोघेही भंडाऱ्याच्या धारगाव येथील रहिवाशी आहेत. राष्ट्रीय महामार्गाच्या एका बाजूनं ते फिरायला निघाले असताना हा अपघात घडला. याप्रकरणी कारधा पोलिसांनी अज्ञात वाहन चालका विरोधात गुन्हा दाखल केला असून पुढील तपास सुरू आहे.

कल्याणमध्ये सुप्रसिद्ध रिलस्टार प्रेम भाटी यांचा अपघाती मृत्यू

कल्याणमध्ये एका दुर्दैवी अपघाताची घटना घडली आहे. सुप्रसिद्ध रिलस्टर, प्रेम भाटी यांचा मृत्यू झाल्याची घटना समोर आली आहे. शनिवारी पहाटे तीन वाजण्याच्या सुमारास मोहने परिसरात घरी जात असताना हा अपघात घडला. रस्त्यावर पडलेल्या खडीमुळे त्यांची गाडी घसरली आणि ते खाली पडले. या अपघातात त्यांच्या डोक्याला गंभीर दुखापत झाली. त्यानंतर त्यांचा मृत्यू झाल्याचे आरोप रिक्षा असोसिएशनचे अध्यक्ष शिवाजी पाटील यांनी केला आहे. यासाठी जबाबदार अधिकाऱ्यांवर कारवाई करण्याची मागणी केली आहे. या घटनेमुळे कल्याण परिसरात हळहळ व्यक्त केली जात आहे. अपघाताबाबत अधिक तपास सुरू आहे.

धुळे जिल्ह्यात देखील भीषण अपघाताची घटना, तीन जणांचा मृत्यू

धुळे जिल्ह्यात देखील भीषण अपघाताची घटना घडली आहे. धुळे शहरा जवळील पारोळा रोडवरील नक्षत्र लॉन्स परिसरात भरधाव वेगाने आलेल्या ट्रॅव्हल्स ने तीन जणांना उडवल्याची घटना घडली आहे. ही घटना मध्यरात्रीच्या सुमारास घडली आहे. या अपघातात वरखेडी येथील तीन जणांचा मृत्यू झाल्याची धक्कादायक माहिती मिळाली आहे. याप्रकरणी आझाद नगर पोलीस ठाण्यात ट्रॅव्हल्स चालका विरोधात गुन्हा दाखल करण्यात आला आहे. वरखेडी गावातील तीन जणांचा मृत्यू झाल्याने गावावर शोककळा पसरली आहे. मात्र हा अपघात नेमका कसा झाला? हे अद्याप समजू शकलेलं नाही. या अपघातात वरखेडे येथील सुभाष धनगर, नंदू पाटील, सिंधुबाई पाटील यांचे निधन झालं आहे.