भंडारा : भाजपमध्ये आपल्याला एकही बंडखोरी नको, एक जरी बंडखोरी झाली किंवा चुकीचं बटन दाबलं तर सत्यानाश होईल असं राज्याचे मंत्री चंद्रशेखर बावनकुळे (Chandrashekhar Bawankule) म्हणाले. जर कुणी बंडखोरी केलीच तर मोठ्या नेत्यांचे दरवाजे पाच वर्षांसाठी बंद होतील असा इशाराही त्यांनी दिला. तर भंडाऱ्यातील सर्वांचे मोबाईल आणि व्हॉट्सअप ग्रुप सर्व्हेलन्सवर टाकले आहेत असं खळबळजनक वक्तव्यही बावनकुळे यांनी केलं. भंडाऱ्यात कार्यकर्त्यांना संबोधित करताना बावनकुळेंनी हे वक्तव्य केलं.
Chandrashekhar Bawankule On WhatsApp : सर्वांवर करडी नजर
चंद्रशेखर बावनकुळे म्हणाले की, "आगामी नगरपालिका निवडणुकीच्या अनुषंगानं पक्षात कुणी बंडखोरी केल्यास त्याचा फटका पक्षाला बसतो. एक चुकीचं बटन दाबल्यास देवेंद्र फडणवीस सरकार आणि केंद्र सरकारच्या योजनांचा बट्ट्याबोळ होईल. त्यामुळं चुकीचं बटन दाबून भंडाऱ्याचा सत्यानाश करू नका. आता भंडाऱ्यातील सर्व मोबाईल आणि व्हाट्सअप ग्रुप सर्व्हेलन्सवर टाकले असून सर्वांवर बारीक करडी नजर राहणार आहे."
Chandrashekhar Bawankule Statement : तर पक्षाचे दरवाजे पाच वर्षांसाठी बंद
पक्षात बंडखोरी करणाऱ्यांना नेत्यांचे दरवाजे पाच वर्षासाठी बंद होईल असा इशारा बावनकुळे यांनी दिला. भंडारा भाजपच्या वतीने दिवाळी स्नेह मिलन सोहळ्याचा आयोजन करण्यात आलं होतं. यावेळी आगामी पालिका निवडणुकीच्या अनुषंगानं कार्यकर्ते आणि पदाधिकाऱ्यांना मार्गदर्शन करताना बावनकुळे बोलत होते.
चंद्रशेखर बावनकुळे म्हणाले की, "नेत्यांनी विचार करावा. आवेशात, तिकीट न मिळाल्याच्या रागात आपण खडा तमाशा करतो. एक चुकीची बटन, एक चुकीची बंडखोरी पक्षाला नुकसानकारक ठरेल. एक नगरपालिका कमी झाली तर काही फरक पडणार नाही. मात्र, देवेंद्र फडणवीस आणि केंद्र सरकारच्या योजनांचा यामुळे बट्ट्याबोळ होईल. आपल्या पक्षात एक जरी कार्यकर्त्यांनं बंडखोरी केली तरी, पक्षाच्या मोठ्या नेत्यांचे दरवाजे पाच वर्षासाठी बंद होईल, हे सर्वांनी लक्षात ठेवावं."
Chandrashekhar Bawankule Bhandara Speech : जेवढा पैसा लागेल तेवढा आणू
बावनकुळे पुढे म्हणाले की, "भंडारा, पवनी, तुमसर आणि साकोली या चारही जागा भाजपने लढवाव्यात. यासाठी 51 टक्क्यांची लढाई लढावी. भंडारा, पवनी, साकोली, तुमसरसाठी जेवढा पैसा लागेल तेवढा पैसा मी द्यायला तयार आहे. विधानसभेत आमदार निवडून आणण्यासाठी जेवढी ताकद लावली, त्यापेक्षा जास्त ताकद भंडारा जिल्ह्यातील चारही नगरपालिका निवडणुकीत कार्यकर्त्यांच्या निवडणुकीसाठी लावणार आहे."
ही बातमी वाचा: