पुणे: परभणीमध्ये संतोष देशमुखांच्या (Santosh Deshmukh) हत्येच्या निषेधार्थ काल(शनिवारी) सर्वपक्षीय नेत्यांचा मूकमोर्चा काढण्यात आला. त्यावेळी बोलताना, मनोज जरांगे (Manoj Jarange) यांनी धनंजय देशमुख (Dhananjay Deshmukh) किंवा त्यांच्या कुटुंबीयांना जर धक्का बसला तर घरात घुसून मारू असा इशारा दिला. आमचा एक संतोष देशमुख गेला, पण यापुढे आम्ही हे सहन करणार नाही. धनंजय देशमुख किंवा त्यांच्या कुटुंबीयांना जर धक्का लागला तर घरात घुसून मारू असा इशारा मनोज जरांगे पाटील (Manoj Jarange Patil) यांनी दिला. मी आतापर्यंत धनंजय मुंडे (Dhananjay Munde) यांचं नाव घेतलं नाही, देशमुख कुटुंबीयांना जर त्रास झाला तर त्यांना रस्त्यावर फिरू देणार नाही असाही इशारा त्यांनी यावेळी दिला. संतोष देशमुखांच्या हत्येकऱ्यांना शिक्षा व्हावी यासाठी परभणीत सर्वपक्षीय मोर्चा काढण्यात आला. त्यावेळी मनोज जरांगे बोलत होते. जरांगेंच्या या इशाऱ्यानंतर आता लक्ष्मण हाके यांनी मनोज जरांगे यांच्यावर टीका केली आहे.
नेमकं काय म्हमालेत लक्ष्मण हाके?
जरांगे घुसायची भाषा आम्हाला करू नका. तुमच्यात दम असेल तर कुठे घुसायचं ते सांगा, अशी चितवणीखोर वक्तव्य करणाऱ्या व्यक्तीचा मुख्यमंत्र्यांनी बंदोबस्त करावा. अन्यथा दोन समाजात अराजकता निर्माण होईल असंही लक्ष्मण हाके यांनी म्हटलं आहे.
लक्ष्मण हाके मनोज जरांगे यांच्या वक्तव्यावर प्रतिक्रिया देताना म्हणाले, हा काळ 200- 250 वर्षांपुर्वीचा नाही, मला वाटतं अशी चितावणीखोर वक्तव्य मनोज जरांगे करत असतील तर या महाराष्ट्राच्या मुख्यमंत्र्यांना आणि गृहमंत्र्यांना माझी विनंती आहे, अशा माणसांचा तात्काळ बंदोबस्त करावा. नाहीतर जातीय तेढ निर्माण होईल सामाजिक सुरक्षा धोक्यात येईल आणि दोन समाजामध्ये तेढ निर्माण होऊन या महाराष्ट्र मध्ये अराजकता निर्माण होईल. जरांगे घुसायची भाषा आम्हाला सांगायची नाही, तुमच्यात जर दम असेल कधी, कुठे, केव्हा, ते सांगा आणि जातीय तेढ निर्माण करून काय मिळणार आहे. तो काळ गेला महाराष्ट्रात काट्या कुऱ्हाड्यांचा, आताचा काळ हा कायद्याचा, संविधानाचा आणि इथल्या न्यायव्यवस्थेचा आहे, असंही पुढे ते म्हणालेत.
धनंजय मुंडे यांना रस्त्यावर फिरवून द्यायला कोण आहेत ते जरांगे? जरांगे गुंड आहेत? जरांगे कुणी एस पी आहेत? कोण आहेत जरांगे? कायदा यांच्या मालकीचा आहे का? त्यामुळे असल्या चितावणीखोर बोलणं तुमच्या तिकडे कोणालातरी ऐकवा, अशा धमक्या या महाराष्ट्रामध्ये खूप लोकांच्या बघितलेल्या आहेत, असंही लक्ष्मण हाके पुढे म्हणालेत.
अंजली दमानियांना देखील केलं लक्ष
अंजली दमानिया खूप चांगलं काम करतात. त्यांची तुलना इतर कोणाबरोबरच होऊ शकत नाही. त्यांना माझी एक विनंती आहे. आष्टी तालुक्यातील संजय उर्फ गुट्टा गायकवाड या पारधी समाजातील तरुणाची हत्या झालेली आहे. त्या हत्येची आमची तक्रार आम्ही अंजली दमानिया यांच्याकडे देतो. या प्रकरणाचा त्यांनी सोक्ष मोक्ष लावावा आणि त्या जशा इतर प्रकरणाची सुपारी घेतात तसंच आम्ही त्यांना या प्रकरणाची सुपारी द्यायला तयार आहोत, असंही पुढे लक्ष्मण हाके यांनी म्हटले आहे.
काय म्हणाले होते जरांगे?
"धनंजय देशमुखांना तुम्ही धमक्या देताय? त्याचा भाऊ गेला आणि तो न्यायासाठी लढतोय, वणवण फिरतोय. त्याला तुम्ही धमक्या देताय. संतोष भैयाचे भाऊ जेव्हा पोलिस ठाण्यात गेले तेव्हा त्यांना धमकावण्यात आले. यापुढे जर त्यांचे कुटुंब आणि कुणाला धक्का लागला तर धनंजय मुंडे यांना रस्त्यावर फिरू देणार नाही. देशमुख कुटुंबाला त्रास झाला तर लक्षात ठेवा. परळी असो की बीड, इथल्या समाजाला ही त्रास झाला तर घरात घुसून मारायचे. देशमुख कुटुंबीयांच्या मागे सगळा मराठा समाज आहे. आम्ही फक्त कायद्याला मानतोय, म्हणून आम्ही शांत आहोत. सगळे आरोपी पकडले जातील, फासावर जातील असा शब्द मुख्यमंत्र्यांनी दिला."