वाल्मिक कराड ऑडिओ क्लिप प्रकरणी बजरंग सोनवणेंचे कारागृह महानिरीक्षकांना पत्र, जेलमधील कैद्यांकडे मोबाईल, बाहेरील व्यक्तींशी संपर्क?

विलास घुले प्रकरणात नवा ट्विस्ट! आरोपी मंगेश कदमला रुग्णालयात बेदम मारहाण; CCTV व्हिडिओ समोर येताच पत्नी थेट पोलीस अधीक्षकांकडे

स्वानंद पाटील — Wed, 7 Oct 2026 12:16:06 +0530

Beed:बीडच्या केज तालुक्यातील टाकळी येथील विलास घुले हत्या प्रकरणाला आता नवं वळण मिळालं आहे. या हत्या प्रकरणातील आरोपी मंगेश कदम याला उपचारासाठी रुग्णालयात दाखल करण्यात आलं होतं. याच रुग्णालयात मंगेश कदम याला मारहाण करण्यात आल्याचा आरोप त्याच्या पत्नीने केला आहे. या घटनेचा सीसीटीव्ही व्हिडिओही समोर आला असून, मंगेश कदमची पत्नी छाया कदम यांनी या प्रकरणात कारवाईची मागणी करत बीडच्या पोलीस अधीक्षकांकडे तक्रार दिली आहे. (Beed Crime)

नेमकं काय घडलं?

केज तालुक्यातील टाकळी फाटा येथे 21 जून रोजी विलास घुले आणि त्यांच्या मित्रावर आठ ते दहा जणांनी हल्ला केल्याचं समोर आलं होतं. यावेळी झालेल्या मारहाणीत चाकूचे वार झाल्याने विलास घुले यांचा मृत्यू झाला होता. या हल्ल्यात मंगेश कदम हादेखील जखमी झाला होता. विलास घुले हत्या प्रकरणात मंगेश कदम हा आरोपी आहे. मंगेश कदम याला उपचारासाठी अंबाजोगाई येथील रुग्णालयात दाखल करण्यात आलं होतं. मात्र, याच ठिकाणी विलास घुले यांचे भाऊ रमेश घुले आणि त्यांच्यासोबत असलेल्या काही नातेवाईकांनी मंगेश कदम आणि इतर काही जणांना मारहाण केल्याचा आरोप करण्यात आला आहे.

रुग्णालयातील या कथित मारहाणीचा सीसीटीव्ही व्हिडिओ आता समोर आला आहे. या व्हिडिओच्या आधारे संबंधितांवर कारवाई करण्याची मागणी मंगेश कदम यांची पत्नी छाया कदम यांनी केली आहे. त्यांनी बीडच्या पोलीस अधीक्षकांकडे याबाबत अर्ज दिला आहे.दरम्यान, विलास घुले हत्या प्रकरणात मंगेश कदम आरोपी असल्याने त्याच्यावर आधीच कायदेशीर कारवाई सुरू आहे. आता रुग्णालयात झालेल्या कथित मारहाणीच्या आरोपामुळे या प्रकरणाला आणखी एक वळण मिळालं आहे. या तक्रारीनंतर पोलीस काय कारवाई करतात, हे पाहणं महत्त्वाचं ठरणार आहे. दरम्यान, खासदार बजरंग सोनवणे यांनी अलीकडेच विलास घुले खून प्रकरणात त्यांच्या मुलाला अडकवण्याचा कट बीड कारागृहातून सुरु असल्याचा आरोप केलं होता त्यानंतर हे प्रकरण पुन्हा एकदा चर्चेत आलं आहे. आता या प्रकरणातील आरोपी मंगेश कदमला रुग्णालयात जाऊन मारहाण करण्यात आल्याची तक्रार त्याच्या पत्नीमुळे केल्याने खळबळ उडाली आहे.

Beed: बीडकरांनो, पाणी जपून वापरा! वाण धरणात फक्त 18% साठा; पाणीटंचाईच्या पार्श्वभूमीवर नगरपरिषद प्रशासनाचा मोठा निर्णय

स्वानंद पाटील — Wed, 7 Oct 2026 11:02:36 +0530

Beed: बीड जिल्ह्यात दुष्काळाची तीव्रता दिवसेंदिवस वाढताना दिसत आहे. पावसाअभावी शेतीची अवस्था बिकट झाली असतानाच आता पिण्याच्या पाण्याचा प्रश्नही गंभीर बनला आहे. परळी शहराला पाणीपुरवठा करणाऱ्या वाण धरणात केवळ 18 टक्के पाणीसाठा शिल्लक राहिल्याने नगरपरिषद प्रशासनाने मोठा निर्णय घेतला आहे. आता परळी शहरात 10 दिवसाआड पाणीपुरवठा केला जाणार आहे. पुढील वर्षी ऑगस्टपर्यंत उपलब्ध पाण्याचे नियोजन करायचे असल्याने हा निर्णय घेण्यात आला आहे.

वाण धरणात केवळ 18 टक्के पाणीसाठा

परळी शहराच्या पाणीपुरवठ्याचा मुख्य स्रोत असलेल्या वाण धरणात सध्या केवळ 18 टक्के पाणीसाठा शिल्लक आहे. यंदाच्या पावसाळ्यात धरणाच्या पाणलोट क्षेत्रात अपेक्षित पाऊस झाला नाही. त्यामुळे धरणात म्हणावी तशी पाण्याची आवक झाली नाही. उपलब्ध पाणीसाठा पुढील वर्षी ऑगस्ट महिन्यापर्यंत पुरवण्याचे मोठे आव्हान नगरपरिषद प्रशासनासमोर आहे. यापूर्वी परळी शहराला आठवड्यातून दोन वेळा पाणीपुरवठा केला जात होता. त्यासाठी वाण धरणातील पंप नियमितपणे सुरू ठेवावे लागत होते. मात्र, आता पाणीसाठा अत्यल्प असल्याने पाणी वापरावर नियंत्रण आणण्याचा निर्णय घेण्यात आला आहे.

पंप आठवड्यात तीन दिवस बंद; पाणी बचतीवर भर

नव्या नियोजनानुसार आता परळी शहराला 10 दिवसाआड पाणीपुरवठा केला जाणार आहे. यामुळे वाण धरणातून होणारा पाण्याचा उपसा कमी होणार असून उपलब्ध साठा अधिक काळ टिकवण्याचा प्रशासनाचा प्रयत्न आहे. पाण्याचे पंप आठवड्यातील तीन दिवस बंद ठेवले जाणार असल्याने मोठ्या प्रमाणात पाण्याची बचत होण्याची अपेक्षा आहे. दरम्यान, बीड जिल्ह्यात पावसाअभावी शेतीचे मोठे नुकसान झाले आहे. अनेक भागांमध्ये पिके करपून गेली असून शेतकरी आर्थिक संकटात सापडले आहेत. सरकारकडून दुष्काळ जाहीर करण्यात आला असला तरी नुकसानभरपाईसाठी शेतकऱ्यांना अद्याप प्रतीक्षा करावी लागत आहे.

मराठवाड्यात सध्या दुष्काळाची दाहकता अंगावर काटा आणणारी आहे. हा दुष्काळ 1972 च्या दुष्काळापेक्षा भीषण असल्याचे बोलले जात आहे. बीडमध्ये आता धरणातील पाणीसाठा झपाट्याने खालावत चाललेला आहे. नद्या, ओढे, तलाव कोरडेठाक पडू लागले आहेत. पावसाभावी पिके करपून गेली आहेत. त्यात पंचनामे करणाऱ्या अधिकाऱ्यांना शेताच्या बांधावर जाण्यास उशीर लागत असल्यामुळे शेतकरी हवालदिल झाला आहे. पिण्यासाठी आणि जनावरांसाठी कुठून पाणी आणायचे असा प्रश्न शेतकऱ्यांसमोर आ वासून उभारलाय.

वाल्मिक कराड अन् सुग्रीव कराडच्या 'त्या' रेकॉर्डिंगनंतर कारागृह प्रशासनाविरुद्ध तात्काळ गुन्हा दाखल करा, बजरंग सोनवणेंची पोलीस अधीक्षकांकडे मागणी

स्वानंद पाटील — Tue, 6 Oct 2026 12:33:38 +0530

Beed: विलास घुले खून प्रकरणात (Vilas Ghule Case) सौरव सोनवणेंना अडकवण्याचा पूर्वनियोजित कट बीड जिल्हा कारागृहातुन रचल्याची वाल्मिक कराड आणि त्याचा साथीदार सुग्रीव कराडची कॉल रेकॉर्डिंग खासदार बजरंग सोनवणे (Bajrang Sonawne) यांनी समोर आणली होती. बीड जिल्हा कारागृहात मोबाईल उपलब्ध करून देण्यात प्रशासनातील काही घटकांचा सहभाग असल्याचा दावा करत खा.सोनवणे यांनी बीड पोलीस अधीक्षकांना पत्र दिलंय.

दरम्यान, गेल्या जवळपास वर्षभरापासून बीड जिल्हा कारागृह चर्चेत आहे. सरपंच संतोष देशमुख हत्या प्रकरणातील आरोपी वाल्मिक कराडसह अन्य आरोपी या कारागृहात बंदिस्त आहेत. त्यामुळे हे कारागृह अतिसंवेदनशील आहे. दिवंगत सरपंच संतोष देशमुख यांचे बंधू धनंजय देशमुख यांनी यापूर्वी कारागृहातील कैद्यांना व्हीआयपी ट्रीटमेंट मिळत असल्याची तक्रार केली होती. दरम्यान खा. सोनावणेंच्या ऑडीओ क्लिप प्रकरणानंतर पुन्हा एकदा बीड कारागृहातील सुरक्षेविषयी प्रश्नचिन्ह उपस्थित होत आहेत.

सुग्रीव कराडसह कारागृह प्रशासनावर गुन्हा दाखल करण्याची मागणी

दोन समाजात जाणीवपूर्वक तेढ निर्माण करून बीड जिल्हा प्रशासन व पोलिसांना वेठीस धरण्याचा हा सुनियोजित कट असल्याचा पत्रात उल्लेख आहे. या प्रकरणाचे गांभीर्य लक्षात घेऊन वाल्मीक कराड, सुग्रीव कराड, रमेश घुले आणि कारागृह प्रशासनाविरुद्ध तात्काळ गुन्हा दाखल करण्याची मागणी त्यांनी केली आहे.खासदार सोनवणे यांनी पोलीस अधीक्षकांना दिलेल्या पत्रावर काय कारवाई केली जाते हे पाहणे महत्त्वाचे असणार आहे.

जिल्हा कारागृहात कैद्याकडून बेकायदेशीर मोबाईल संपर्काचा वापर, बाहेरील व्यक्तींशी संपर्क तसेच कारागृह प्रशासनाच्या कार्यपद्धतीबाबत प्राप्त झालेल्या गंभीर तक्रारींची स्वतंत्र, निष्पक्ष व उच्चस्तरीय चौकशी करून दोषींवर कठोर कारवाई करण्याची मागणी यापूर्वीही खासदार बजरंग सोनवणे यांनी केली होती. मात्र या पत्रावर आजपर्यंत नेमकी कोणती कारवाई करण्यात आली, चौकशी कोणी केली, त्याचा अहवाल काय आहे आणि दोषी अधिकारी व कर्मचारी यांच्यावर कोणती कारवाई करण्यात आली, याबाबत मला कोणतीही माहिती देण्यात आलेली नाही, असं खा. सोनवणे म्हणाले होते.

बीड जिल्हा कारागृहाची सात तास झडती, कसून चौकशी

Dhananjay Munde: धनंजय मुंडेंच्या पत्नी राजश्री मुंडेंबाबत आक्षेपार्ह पोस्ट; सायबर पोलिसांत गुन्हा, नेमकं कारण काय?

स्वानंद पाटील — Tue, 6 Oct 2026 10:47:40 +0530

Beed: माजी मंत्री आणि आमदार धनंजय मुंडे (Dhananjay Munde) यांच्या पत्नी राजश्री मुंडे (Rajashree Munde) यांच्याबाबत सोशल मीडियावर आक्षेपार्ह पोस्ट केल्याप्रकरणी अज्ञात व्यक्तीविरोधात बीड सायबर पोलीस ठाण्यात गुन्हा दाखल करण्यात आला आहे. (Beed crime) एका सोशल मीडिया पेजवर राजश्री मुंडे यांचा फोटो वापरून आक्षेपार्ह पोस्ट करण्यात आली होती.

नेमकं प्रकरण काय?

मिळालेल्या माहितीनुसार, विवाहविषयक नाव असलेल्या एका सोशल मीडिया पेजवर राजश्री मुंडे यांचा फोटो वापरून आक्षेपार्ह मजकूर पोस्ट करण्यात आला होता. ही बाब निदर्शनास आल्यानंतर मुंडे यांच्या कार्यालयाकडून याप्रकरणी पोलिसांत तक्रार दाखल करण्यात आली.

मुंडे यांच्या कार्यालयातील सुधीर सांगळे यांच्या तक्रारीवरून अज्ञात व्यक्तीविरोधात माहिती तंत्रज्ञान कायद्यांतर्गत गुन्हा दाखल करण्यात आला आहे. दरम्यान, सोशल मीडियावर आक्षेपार्ह मजकूर पोस्ट करणारी व्यक्ती कोण आहे, याचा शोध बीड सायबर पोलीस घेत आहेत. या प्रकरणाचा पुढील तपास बीड सायबर पोलिसांकडून सुरू आहे.

परळीत आठवडी बाजारात मोबाईल चोरट्यांचा सुळसुळाट

बीडच्या परळीत दर सोमवारी आठवडी बाजार भरत असतो आणि याच आठवडी बाजारात मोबाईल चोरांचा सुळसुळाट असल्याचे समोर आले आहे.

शहरातील हाडबे रोडवर आठवडी बाजार भरत असतो.याच आठवडी बाजारात गर्दीचा फायदा घेत मोबाईल चोरट्यांनी अक्षरशः धुमाकूळ घालत अनेक नागरिकांच्या मोबाईलवर डल्ला मारत लंपास केलेत.या घटनेमुळे आठवडी बाजारातील सुरक्षा व्यवस्थेवर प्रश्नचिन्ह निर्माण झाले आहे.

आठवडी बाजारात ज्येष्ठ नागरिकांना तसेच गर्दीत सहज लक्ष्य करता येणाऱ्या नागरिकांच्या खिशातील मोबाईल चोरले जात असल्याच्या पाच ते सहा तक्रारी शहर पोलीस ठाण्यात नोंदवण्यात आल्यात.दरम्यान या मोबाईल चोरीच्या घटनांबाबत बीड पोलीस अधीक्षक नवनीत कॉवत यांनी लक्ष घालून या चोरट्यांचा पक्का बंदोबस्त करावा अशी चर्चा नागरिकांतून केली जात आहे.

Beed: हातातोंडाशी आलेलं पीक पाण्याअभावी करपलं ! पंचनाम्यासाठी फोन करूनही अधिकारी फिरकेनात; बीडमध्ये शेतकरी हवालदिल

स्वानंद पाटील — Mon, 5 Oct 2026 11:05:12 +0530

Beed: बीडमध्ये पावसाअभावी पिके करपून गेली. दुष्काळ जाहीर झाल्यानंतरही शेतकऱ्यांना प्रतीक्षा आहे, ती नुकसान भरपाईची; मात्र दुष्काळ जाहीर होऊन सात दिवस होत आले तरी अद्यापही प्रशासन शेतीच्या बांधावर पंचनाम्यासाठी न आल्याने शेतकरी हवालदिल झाले आहेत. बीडच्या खळेगावात शेतकऱ्याने कापूस, तूर, मूग, सोयाबीन असे पीक घेतली. मात्र दीड ते दोन महिने पावसाचा खंड पडल्यामुळे हाती काहीच राहिले नसल्याचे शेतकऱ्यांनी सांगितले. (Beed Drought)

"आम्ही शेतात दोन दोन लाख रुपये खर्च केलाय. मात्र, नुकसान होऊनही अद्याप आम्हाला काहीच मदत मिळाली नाही. आम्हाला आणि जनावराला प्यायला पाणी नाही. पाण्यासाठी टँकर द्यावं. नुकसान भरपाई द्यावी. आमच्या कुटुंबाची व्यवस्था सरकारने करावी. आम्ही पंचनाम्यासाठी तहसीलला फोन केल्याचे शेतकऱ्यांनी सांगितले तरीही अद्याप कुणीही फिरकले नाही आम्ही घरातील सोनं नाणं विकून बी भरणा आणि खत खरेदी केली होती, आता हे नुकसान झाल्याने शेतकरी हतबल झाले आहेत. बीडमधील गेवराई तालुक्यातील खळेगावमधील शेतकऱ्यांनी सांगितले.

दुष्काळाचा दाह वाढला

आता शेतकऱ्याची दिवाळीही गोड करू; पंकजा मुंडेंचा शब्द

इतिहासात पहिल्यांदाच केंद्र आणि राज्याचे सर्व निकष बाजूला ठेवून आमच्या सरकारने दुष्काळ जाहीर केला, असं पंकजा मुंडे म्हणाल्या. शेतकऱ्यांबाबत सरकार संवेदनशील असून तोंडावर आलेली दिवाळीही सरकार शेतकऱ्याची गोड करण्यासाठी कटिबद्ध असल्याचा मंत्री पंकजा मुंडे यांनी शब्द दिला.. त्यामुळे आता मदतीच्या आशेने शेतकऱ्यांच्या नजरा सरकारकडे लागल्या आहेत.. दुष्काळ जाहीर केल्यावर काही प्रोसिजर असतात. लोकशाही अशी चालत नाही आज बोललो की लगेच उद्या होणार. जाहीर केले की लगेच मदत असं कुठेही घडत नाही. 32 हजार कोटींची कर्जमाफी दिली आहे. राज्य आणि केंद्र शासनातील इतिहासातले निकष पाहिलेत तरी कळेल एवढ्या लवकर दुष्काळ कधीच जाहीर झाला नाही. त्यामुळे ही सरकारची संवेदनशीलता आहे. शेतकऱ्यांची दिवाळी गोड करण्यासाठी मुख्यमंत्री कटिबद्ध असतील. असेही त्या म्हणाल्या. बीडमध्ये दुष्काळ पाहणीसाठी त्या आल्या होत्या.

Pankaja Munde: केंद्राचे निकष बाजूला सारत दुष्काळ जाहीर केला,आता शेतकऱ्याची दिवाळीही गोड करू; पंकजा मुंडेंचा शब्द

स्वानंद पाटील — Sun, 4 Oct 2026 21:28:20 +0530

Beed:बीड जिल्ह्यातील अकराही तालुके दुष्काळाच्या छायेत आहेत. पावसाने पाठ फिरवल्याने शेतकऱ्यांच्या डोळ्यांसमोर उभं पीक करपलं आणि हातातोंडाशी आलेला घास हिरावला गेला. अशा संकटाच्या काळात मंत्री पंकजा मुंडे बीडच्या काकडहिरा येथील शेतकऱ्यांच्या बांधावर पोहोचल्या. त्यांनी पिकांची पाहणी करत शेतकऱ्यांशी संवाद साधला आणि संकटात सरकार त्यांच्या पाठीशी असल्याचा विश्वास दिला.केंद्र राज्याचे निकष बाजूला सारून सरकारने दुष्काळ जाहीर केल्याचं त्या म्हणाल्या.शेतकऱ्यांची दिवाळी गोड करण्यासाठी सरकार कटीबद्ध असल्याचा शब्द मंत्री पंकजा मुंडे यांनी दिला.बीडच्या काकड हिरा येथील दुष्काळग्रस्त भागाची पाहणी करण्यासाठी त्या आल्या होत्या.

काय म्हणाल्या पंकजा मुंडे?

बीडमध्ये दुष्काळाचा दाह वाढला

दुष्काळाची दाहकता बीड जिल्ह्यात आता शेतकऱ्यांना जाणवू लागली आहे. हातात तोंडाशी आलेला घास दुष्काळाने हिरावून घेतला आहे. विहिरी, नाले, तलाव आटू लागले आहेत. बीडमधील वाण नदी कोरडी ठाक पडली आहे. गावागावातून आता बोरवेल आणि टँकरचे आवाज येऊ लागले आहेत. पाण्याचं दुर्भिक्ष जाणवू लागलं आहे.

लेकीच्या लग्नासाठी पैशांची जुळवाजुवळ होईना, बीडमध्ये शेतकऱ्यांच्या आत्महत्या

बीड जिल्ह्यातील पिंपरनई गावात एका शेतकऱ्याने आपल्या शेतातील लिंबाच्या झाडाला गळफास घेऊन आत्महत्या केल्याची घटना रविवारी सकाळी समोर आली आहे. विक्रम बाबासाहेब दाभाडे असे आत्महत्या केलेल्या शेतकऱ्याचे नाव असून, मुलीच्या लग्नासाठी आर्थिक जुळवाजुळव होत नसल्याच्या ताणात ते होते, अशी माहिती त्यांच्या नातेवाईकांनी दिली आहे. रोज दुध वाटून घरी येणारे वडील सकाळी परतलेच नसल्याचं लक्षात आल्यावर मुलगी शेताकडे गेली, त्यावेळी शेतातल्या झाडाला वडिलांचं मृत शरीर दिसलं. या घटनेने बीडमध्ये खळबळ उडाली आहे.सुन्न करून टाकणारी ही घटना बीडच्या पिंपरनई गावातून समोर आलीय.

दिवंगत खा. केशर काकू यांच्या पुण्यतिथीवरून बीडमध्ये राजकीय वाद उफाळला, 'एका' व्यक्तीला दिलेल्या निमंत्रणामुळे नातू संदीप क्षीरसागरांचा मोठा निर्णय

स्वानंद पाटील — Sun, 4 Oct 2026 15:07:26 +0530

Sandeep Kshirsagar: दिवंगत माजी खासदार केशर काकू (Keshar Kaku Death Anniversary) याच्या पुण्यतिथीवरून बीडमध्ये सध्या राजकीय वाद (Beed Politics) उफाळला आहे. दिवंगत केशर काकू यांचे नातू आणि राष्ट्रवादी कॉंग्रेस शरद पवार पक्षाचे आमदार संदीप क्षीरसागर यांनी या कार्यक्रमाला न जाण्याचा निर्णय घेतला आहे. पुण्यतिथीच्या कार्यक्रम पत्रिकेत सामाजिक एकोपा बिघडवणाऱ्या एका व्यक्तीचे नाव असल्याचे कारण देत त्यांनी त्यांच्याच आजीच्या पुण्यतिथीला जाणार नसल्याचं सांगितलं आहे. त्यांनी या सर्व कार्यक्रमावरूनच नाराजी व्यक्त केली असून आमदार क्षीरसागर यांनी 'काकु मला माफ करा!'म्हणत केलेल्या फेसबुक पोस्टमुळे चर्चेला उधाण आले आहे.

नेमकं प्रकारण काय?

बीडच्या माजी खासदार स्वर्गीय केशर काकू यांची पुण्यतिथी उद्या साजरी केली जाणार आहे.यानिमित्त कार्यक्रमाचे आयोजन करण्यात आले असून यामध्ये विविध मान्यवरांना निमंत्रित करण्यात आले आहे. परंतु आता या सर्व कार्यक्रमावर स्वर्गीय केशर काकू यांचे नातू संदीप क्षीरसागर यांनी नाराजी व्यक्त करत या कार्यक्रमाला न जाण्याचा निर्णय घेतला आहे. यासंदर्भात आमदार संदीप क्षीरसागर यांनी समाज माध्यमात एक पोस्ट केली असून यामध्ये सामाजिक एकोपा बिघडवणाऱ्या 'एका व्यक्तीचे' नाव या कार्यक्रम पत्रिकेत असल्याने मी जाणार नसल्याचे म्हटले आहे. यामुळे आता तो व्यक्ती कोण आणि संदीप क्षीरसागर यांचे त्या व्यक्तीशी काय वाद आहेत असे प्रश्न उपस्थित केले जात आहेत.

पोस्टमध्ये त्यांनी काय म्हटलं?

काकु मला माफ करा ! स्वर्गीय काकुंच्या पुण्यतिथीनिमित राजकारण विरहित कुटुंब एकत्र येणार म्हणून आनंद होताच, सामाजिक एकोपा बिघडणाऱ्या एका व्यक्तीचे नाव कार्यक्रम पत्रिकेत वाचले आणि कार्यक्रमाला न जाण्याचा निर्णय घेतला. नेहमीप्रमाणे स्व.काकुंना अभिवादन करण्यासाठी तर जाणारच पण लोकभावना पायदळी तुडवून कार्यक्रमास मात्र येऊ शकत नाही. काकु मला माफ करा !

Beed News: दुष्काळ, मुलीच्या लग्नासाठी पैशांची जुळवाजुळव होईना, दुध वाटून वडील घरी आले नाहीत समजताच मुलगी शेतात गेली अन्..; बीड हादरलं!

स्वानंद पाटील — Sun, 4 Oct 2026 12:02:31 +0530

Beed Farmer Ends Life:बीड जिल्ह्यातील पिंपरनई गावात एका शेतकऱ्याने आपल्या शेतातील लिंबाच्या झाडाला गळफास घेऊन आत्महत्या केल्याची घटना रविवारी सकाळी समोर आली आहे. विक्रम बाबासाहेब दाभाडे असे आत्महत्या केलेल्या शेतकऱ्याचे नाव असून, मुलीच्या लग्नासाठी आर्थिक जुळवाजुळव होत नसल्याच्या ताणात ते होते, अशी माहिती त्यांच्या नातेवाईकांनी दिली आहे. रोज दुध वाटून घरी येणारे वडील सकाळी परतलेच नसल्याचं लक्षात आल्यावर मुलगी शेताकडे गेली, त्यावेळी शेतातल्या झाडाला वडिलांचं मृत शरीर दिसलं. या घटनेने बीडमध्ये खळबळ उडाली आहे.सुन्न करून टाकणारी ही घटना बीडच्या पिंपरनई गावातून समोर आलीय.

बीड जिल्ह्यात सध्या भीषण दुष्काळाच्या झळा शेतकऱ्यांना बसताहेत. डोळ्यासमोर पिकांवरून रोटावेटर फिरवण्याची वेळ शेतकऱ्यांवर आलीय. नद्यांचे पात्र कोरडे पडले आहे.एकीकडे दुष्काळाचा दाह, दुसरीकडे कर्जाचा बोजा अशा दुहेरी संकटात शेतकरी सापडला आहे. अशातच मुलीच्या लग्नाची जबाबदारीही समोर असल्याने दाभाडे यांच्यावर ताण होता, अशी माहिती समोर आली आहे.काही दिवसांपूर्वीच बीडमध्ये पीक हातातून गेल्याने आणि कर्जाची रक्कम फेडता न आल्याने अंबाजोगाईतील शेतकऱ्याने आत्महत्या केल्याची घटना उघडकीस आली होती.गेल्यावर्षी अवकाळी पाऊस आणि यावर्षी दुष्काळ, सलग दोन वर्षांपासून आस्मानी संकट आहे.

मुलीच्या लग्नासाठी आर्थिक जुळवाजुळव होईना, दुध वाटायला गेले अन्..

विक्रम दाभाडे यांच्या मुलीच्या लग्नासंदर्भात घरात हालचाली सुरू होत्या. मात्र, लग्नासाठी आवश्यक असलेल्या खर्चाची आर्थिक जुळवाजुळव होत नसल्याने ते चिंतेत होते. एकीकडे दुष्काळामुळे शेतीचे नुकसान आणि दुसरीकडे मुलीच्या लग्नासाठी लागणारा खर्च, अशा दुहेरी संकटामुळे तणावाखाली होते.

विक्रम दाभाडे हे दररोज सकाळी दूध विक्री करून घरी परतत असत. मात्र, रविवारी सकाळी बराच वेळ झाला तरी ते घरी परतले नाहीत. त्यामुळे त्यांची मुलगी साक्षी ही वडिलांचा शोध घेण्यासाठी शेतात गेली.यावेळी विक्रम दाभाडे यांनी शेतातील लिंबाच्या झाडाला गळफास घेतल्याचे समोर आले. घटनेची माहिती मिळताच परिसरात खळबळ उडाली. दुष्काळी परिस्थितीमुळे पिकांचे झालेले नुकसान आणि मुलीच्या लग्नासाठी आर्थिक जुळवाजुळव होत नसल्याच्या विवंचनेतून त्यांनी हे टोकाचे पाऊल उचलले. या घटनेनंतर कुटुंबावर दु:खाचा डोंगर कोसळला आहे. शेताक्याच्या नातेवाईकांचा आक्रोश अंगावर काटा आणणारा आहे.

1 तासामध्ये माणसासकट सगळं जाळेन, वाल्मिक कराडचा फोन गेलेल्या सुग्रीव कराडची मस्साजोगच्या तरुणाला धमकी, नेमकं काय घडलं?

स्वानंद पाटील — Sat, 3 Oct 2026 15:04:11 +0530

Beed Sugriv Karad Viral Video: सध्या बीडमध्ये संतोष देशमुख हत्या प्रकरणाचा आरोपी वाल्मिक कराडचा सुग्रीव कराडला कॉल गेल्याच्या खासदार बजरंग सोनवणे यांच्या आरोपानंतर बीडमध्ये मोठी खळबळ उडाली आहे. खा. सोनवणे यांच्या मुलाला विलास घुले प्रकरणात अडकवण्याचा कट रचल्याचा आरोप केल्यानंतर उमरी टोल नाक्यावर मस्साजोगच्या देशमुख नामक तरुणाला सुग्रीव कराडने एका तासात सगळं जाळण्याची धमकी दिल्याचा व्हिडिओ व्हायरल होतोय. या व्हिडिओमुळे पुन्हा एकदा उलट सुलट चर्चा सुरू झाल्या आहेत. दरम्यान, टोल न भरल्यानेहा वाद झाल्याची माहिती समोर येत आहे. हा व्हिडिओ काही दिवसांपूर्वीचा असल्याचही समोर येतंय.

नेमकं प्रकरण काय?

वाल्मिक कराडने सुग्रीव कराडला केलेल्या कथित कॉल रेकॉर्डिंग प्रकरण तापताना दिसत आहे. दरम्यान, सुग्रीव कराडचा एक व्हिडिओ सध्या व्हायरल होतोय. मस्साजोगच्या देशमुख नामक तरुणाला उमरी टोल नाक्यावर माणसासकट एका तासात सगळं जळण्याची धमकी सुग्रीव कराडने दिल्याचं समोर येतंय. सुग्रीव कराड ने टोल न भरल्याने वाद झाल्याचा प्रकार टिपणारा हा व्हिडिओ समोर आला आहे. हा व्हिडिओ काही दिवसांपूर्वीचा असल्याची माहिती आहे. या व्हिडिओमध्ये सुग्रीव कराड उमरी टोलनाक्यावर धमकी देत असल्याचा सांगण्यात येतंय. सुग्रीव आणि वाल्मिक कराडची तीन दिवसांपूर्वी एकत्रित कॉल रेकॉर्डिंग खासदार सोनवणे यांनी ऐकवली होती. खासदार सोनवणे यांचा मुलगा सौरव सोनवणेला खूनाच्या गुन्ह्यात अडकवण्याचा कट रचल्याचा आरोप करण्यात आला होता.

एकीकडे बीड जिल्हा कारागृह गेल्या वर्षभरापासून चर्चेत आहे. सरपंच संतोष देशमुख हत्या प्रकरणातील आरोपी वाल्मिक कराडसह अन्य आरोपी या कारागृहात बंदिस्त आहेत. अलीकडेच खासदार बजरंग सोनवणे यांनी पत्रकार परिषदेत वाल्मिक कराड आणि सुग्रीव कराड यांची कथित ऑडिओ क्लिप ऐकवली होती. यात खासदार सोनवणे यांच्या मुलाला विलास घुले हत्या प्रकरणात अडकवण्याचा कट वाल्मीक कराडने कारागृहातून रचल्याचा आरोप त्यांनी केला होता. या सर्व प्रकारानंतर छत्रपती संभाजी नगर विभागाचे कारागृह उपमहानिरीक्षक योगेश देसाई यांच्या पथकाने बीड कारागृहाची सात तास झडती घेतलेली. डीआयजी योगेश देसाई यांनी चौकशी करताना कारागृहातील अधिकाऱ्यांना आणि कर्मचाऱ्यांना बाजूला ठेवल्याची ही माहिती आहे. सरपंच संतोष देशमुख हत्या प्रकरणानंतर संतोष देशमुख यांचे बंधू धनंजय देशमुख यांनी कारागृहातील कैद्यांना व्हीआयपी ट्रीटमेंट मिळत असल्याची तक्रारही केली होती. त्यामुळे हा सगळाच प्रकार अति संवेदनशील झाला आहे.

वाल्मिक कराड ऑडिओ क्लिप प्रकरणी बजरंग सोनवणेंचे कारागृह महानिरीक्षकांना पत्र, जेलमधील कैद्यांकडे मोबाईल, बाहेरील व्यक्तींशी संपर्क?

स्वानंद पाटील — Sat, 3 Oct 2026 12:57:53 +0530

Beed: विलास घुले खून प्रकरणात माझ्या मुलाला अडकवण्याचा कट वाल्मिक कराड याने कारागृहातून रचल्याचा आरोप खासदार बजरंग सोनवणे यांनी पत्रकार परिषद घेत केला होता. एक ऑडिओ क्लिप पत्रकार परिषदेत ऐकवल्यानंतर खळबळ उडाली होती. यानंतर खासदार बजरंग सोनवणे यांनी कारागृह महानिरीक्षकांना पत्र देत बीड कारागृह अधिक्षकांसह इतर संबंधित अधिकारी कर्मचाऱ्यांच्या निलंबनासह वाल्मिक कराडवर तात्काळ कारवाई करण्याची मागणी केली आहे. कारागृह महानिरीक्षकांना खासदार बजरंग सोनवणे यांनी कारवाईचे पत्र दिले.

उच्चस्तरीय चौकशी अन् कारवाईची मागणी

जिल्हा कारागृहात कैद्याकडून बेकायदेशीर मोबाईल संपर्काचा वापर, बाहेरील व्यक्तींशी संपर्क तसेच कारागृह प्रशासनाच्या कार्यपद्धतीबाबत प्राप्त झालेल्या गंभीर तक्रारींची स्वतंत्र, निष्पक्ष व उच्चस्तरीय चौकशी करून दोषींवर कठोर कारवाई करण्याची मागणी मी यापूर्वीच पत्राव्दारे केली होती. मात्र या पत्रावर आजपर्यंत नेमकी कोणती कारवाई करण्यात आली, चौकशी कोणी केली, त्याचा अहवाल काय आहे आणि दोषी अधिकारी व कर्मचारी यांच्यावर कोणती कारवाई करण्यात आली, याबाबत मला कोणतीही माहिती देण्यात आलेली नाही, असं खासदार बजरंग सोनवणे यांनी म्हटलंय.

जिल्हा कारागृहाच्या सुरक्षा व्यवस्थेचा, कैद्यांच्या संपर्क व्यवस्थेचा आणि संबंधित अधिकाऱ्यांच्या कर्तव्यपालनाचा हा अत्यंत गंभीर भंग ठरतो. तसेच अशा प्रकारे कारागृहातून बाहेरील गुन्हेगारी करावयाचे नियोजन होत असेल, तर त्याचा थेट परिणाम कायदा व सुव्यवस्था, सामाजिक सलोखा आणि नागरिकांच्या सुरक्षिततेवर होऊ शकतो. असे बजरंग सोनवणे यांनी दिलेल्या पत्रात म्हटलंय.आता या पत्रानंतर कारागृह महानिरीक्षकांकडून काय कारवाई केली जाते हे पाहणे महत्त्वाचे असणार आहे.

बीड जिल्हा कारागृहाची सात तास झडती, कसून चौकशी

विलास घुले खून प्रकरणात माझ्या मुलाला अडकवण्याचा कट वाल्मिक कराड याने कारागृहातून रचल्याचा आरोप खासदार बजरंग सोनवणे यांनी पत्रकार परिषद घेत केला.इतकंच नाहीतर एक ऑडिओ क्लिप पत्रकार परिषदेत ऐकवल्यानंतर खळबळ उडाली. या सर्व प्रकारानंतर छत्रपती संभाजीनगर विभागाचे कारागृह उप महानिरीक्षक योगेश देसाई यांच्या पथकाने बीड कारागृहाची सात तास झडती घेतलीय. विशेष बाब म्हणजे, डीआयजी योगेश देसाई यांनी चौकशी करताना कारागृहातील अधिकाऱ्यांनी कर्मचाऱ्यांना बाजूला ठेवल्याची माहिती आहे. त्यांनी ही स्वतः बराकमध्ये जात कैद्यांची चौकशी केली. कारागृहात व्हीआयपी ट्रीटमेंट तसेच फोन कॉलच्या आरोपाबाबत त्यांनी स्वतःच कायद्याकडून माहिती घेतलीय. दरम्यान या आधीच कारागृहातील गैरप्रकार बाबत दोन कर्मचाऱ्यांवर नुकतीच कारवाई करण्यात आली. आता डीआयजींच्या चौकशीत धक्कादायक बाबी समोर येण्याची शक्यता असून यानंतर कारागृहातील आणखी अधिकारी व कर्मचाऱ्यांवर कारवाईची टांगती तलवार आहे.