Beed News: कमरेला बिसलरीची रिकामी बाटली; सांडव्याच्या बाजूला एक मृतदेह तरंगताना दिसला अन्...; बीडमधील वैद्यकीय महाविद्यालयाच्या भुलतज्ञ विभाग प्रमुखांचा तलावात बुडून मृत्यू

Beed News: बीडच्या अंबाजोगाई येथील स्वामी रामानंद तीर्थ वैद्यकीय महाविद्यालयाचे भुलतज्ञ विभागाचे प्रमुख डॉक्टर अभिमन्यू तरकसे यांचा तलावात पोहताना बुडून मृत्यू झाल्याची घटना घडली आहे.

Beed News

Source : ABP Majha

Beed News: बीड जिल्ह्यातील अंबाजोगाई येथून एक अत्यंत धक्कादायक बातमी समोर आली आहे. येथील स्वामी रामानंद तीर्थ ग्रामीण शासकीय वैद्यकीय महाविद्यालयाचे भुलतज्ज्ञ विभागाचे प्रमुख डॉक्टर अभिमन्यू तरकसे (Dr Abhimanyu Tarkase) यांचा आज सकाळी तलावात पोहताना बुडून दुर्दैवी मृत्यू झाला. अंबाजोगाई शहरालगत असलेल्या 'काळवीट साठवण तलावात' सकाळी 6:30 वाजताच्या सुमारास ही घटना घडली. एका वरिष्ठ डॉक्टरांच्या अशा अचानक जाण्याने संपूर्ण अंबाजोगाई शहर आणि वैद्यकीय क्षेत्रावर शोककळा पसरली आहे.

मिळालेल्या माहितीनुसार, डॉ. अभिमन्यू तरकसे हे गेल्या अनेक वर्षांपासून नित्यनेमाने अंबाजोगाई शहरालगत असलेल्या काळवीट साठवण तलावात पोहण्यासाठी जात असत. ते एक उत्तम पोहणारे म्हणूनही परिचित होते. आज सकाळी नेहमीप्रमाणे ते एकटेच तलावावर पोहण्यासाठी गेले. पाण्यात उतरण्यापूर्वी त्यांनी सुरक्षिततेचा उपाय म्हणून आपल्या कमरेला रिकाम्या प्लास्टिकच्या बाटल्या (बिसलरी बाटल्या) देखील बांधल्या होत्या, जेणेकरून पाण्यात समतोल राखता येईल. मात्र, पाण्यात उतरल्यानंतर नेमके काय घडले, हे अद्याप स्पष्ट होऊ शकलेले नाही.

Beed News: सांडव्याजवळ तरंगताना आढळला मृतदेह

डॉ. तरकसे पाण्यात उतरल्यानंतर काही वेळातच, तलावाच्या सांडव्याच्या बाजूला एक मृतदेह पाण्यावर तरंगत असल्याचे तिथे आलेल्या काही नागरिकांच्या निदर्शनास आले. नागरिकांनी जवळ जाऊन पाहिले आणि खात्री केली असता, हा मृतदेह डॉक्टर तरकसे यांचाच असल्याचे स्पष्ट झाले. ही बातमी वाऱ्यासारखी संपूर्ण अंबाजोगाई परिसरात पसरली आणि घटनास्थळी नागरिकांची मोठी गर्दी जमली.

Beed News: शवविच्छेदन अहवालाकडे सर्वांचे लक्ष

घटनेची माहिती मिळताच स्थानिक प्रशासन आणि पोलीस पथक तातडीने घटनास्थळी दाखल झाले. पोलिसांनी घटनास्थळाचा पंचनामा करून स्थानिक नागरिकांच्या मदतीने डॉ. तरकसे यांचा मृतदेह पाण्यातून बाहेर काढला. त्यानंतर त्यांचा मृतदेह शवविच्छेदनासाठी स्वामी रामानंद तीर्थ रुग्णालयात पाठवण्यात आला आहे. आता या शभविच्छेदनाच्या अहवालानंतर डॉक्टर तरकसे यांच्या मृत्यूचे कारण स्पष्ट होणार आहे. डॉक्टर तरकसे यांच्या निधनानंतर अंबाजोगाई परिसरात हळहळ व्यक्त केली जात आहे. पोलीस या प्रकरणाचा पुढील तपास करत आहेत.

इतर महत्त्वाच्या बातम्या