मराठवाड्यात दुष्काळाचं सावट अधिक गडद! उभ्या पिकात जनावरे सोडण्याची वेळ, स्वतंत्र पॅकेज जाहीर करण्याची मागणी 

Beed Agriculture News : सध्या राज्यातील शेतकरी (Farmers)  मोठ्या संकटात सापडला आहे. कारण शेतकऱ्यांची उभी पिकं पाण्यावाचून करपू लागली आहेत.

Beed Agriculture News rain Crops

Source : Getty Images

Beed Agriculture News : सध्या राज्यातील शेतकरी (Farmers)  मोठ्या संकटात सापडला आहे. कारण शेतकऱ्यांची उभी पिकं पाण्यावाचून करपू लागली आहेत. पावसाळा सुरु होऊन तीन महिन्याचा कालावधी लोटला तरीदेखील चांगला पाऊस पडला नाही. त्यामुळं शेतकरी चिंतेत आहेत. अशीच परिस्थिती बीड जिल्ह्यातील आष्टी तालुक्यात देखील आहे. पाऊस नसल्यामुळं उभ्या पिकात जनावरे सोडण्याची वेळ शेतकऱ्यांवर आली आहे. दुष्काळाचे सावट गडद होताना दिसत आहे. 

दुष्काळसदृश परिस्थितीमुळे शेतकरी हतबल, चाऱ्याची तीव्र टंचाई 

बीड जिल्ह्यात दुष्काळसदृश परिस्थितीमुळे शेतकरी हतबल झाले आहे. चाऱ्याची तीव्र टंचाई निर्माण झाली आहे. आष्टी तालुक्यात काही शेतकऱ्यांनी उभ्या पिकातच जनावरे सोडल्याचे चित्र आहे. पावसाअभावी शेतकऱ्यांची अवस्था दिवसेंदिवस बिकट होत आहे. उभी पिके वाया गेल्याने आणि जनावरांसाठी चाऱ्याची तीव्र टंचाई निर्माण झाल्याने काही शेतकऱ्यांनी उभ्या पिकातच आपली जनावरे सोडली आहेत. यावेळी एका हताश महिला शेतकऱ्याने जनावरांना चारा आणि पाणी कसे द्यायचे, असा प्रश्न उपस्थित करत सरकारपर्यंत आपल्या व्यथा पोहोचवाव्यात अशी मागणी केली.

मराठवाड्यात दुष्काळ जाहीर करा, स्वतंत्र पॅकेज जाहीर करा : माजी आमदार भीमराव धोंडे

या पार्श्वभूमीवर राष्ट्रवादी काँग्रेस अजित पवार गटाचे नेते तथा माजी आमदार भीमराव धोंडे यांनी शेतकऱ्यांच्या बांधावर जाऊन शेतीची पाहणी केली. शेतकऱ्यांशी संवाद साधत त्यांच्या व्यथा जाणून घेतल्या. 17 सप्टेंबर, मराठवाडा मुक्ती संग्राम दिनी छत्रपती संभाजीनगर येथे होणाऱ्या मंत्रिमंडळ बैठकीत मराठवाड्यात दुष्काळ जाहीर करून स्वतंत्र दुष्काळी पॅकेज जाहीर करण्याची मागणी केली आहे. जनावरांसाठी तातडीने चारा आणि पाण्याची व्यवस्था करावी, तसेच शेतकऱ्यांना सरसकट पीकविमा मिळावा, अशीही त्यांनी मागणी केली आहे.

पाऊस नाही पाणी नाही, हाता- तोंडाशी आलेला घास हिरावला

गेल्या तीन महिन्यांपासून अहिल्यावगर जिल्ह्यातील शेवगाव तालुक्यात पावसाने दडी मारल्यामुळे परिसरात अत्यंत भीषण पाणीटंचाई आणि दुष्काळ सदृश्य परिस्थिती निर्माण झाली आहे. पावसाअभावी शेतातील उभी पिके करपून गेल्याने शेतकरी वर्ग मोठ्या संकटात सापडला आहे. तालुक्यातील सोयाबीन, बाजरी, कपाशी, तूर, मूग, उडीद आणि ऊस ही मुख्य पिके पाण्याअभावी पूर्णपणे धोक्यात आली आहेत. हाता- तोंडाशी आलेला घास हिरावला गेल्याने बळीराजा आर्थिक संकटात सापडला आहे. प्रशासनाने या गंभीर परिस्थितीची तात्काळ दखल घेऊन पंचनामे करावेत आणि मदत जाहीर करावी, अन्यथा तीव्र आंदोलन छेडण्याचा इशारा स्वाभिमानी शेतकरी संघटनेच्या वतीने देण्यात आला आहे. शेवगाव तालुक्यातील ही बिकट परिस्थिती पाहता, राज्य सरकारने तातडीने दुष्काळ जाहीर करून शेतकऱ्यांना आर्थिक मदत आणि जनावरांसाठी छावण्यांची सोय करावी, अशी मागणी जोर धरत आहे.