Anti Naxal Operation In Chhattisgarh : भारतीय सैन्य आणि सुरक्षा दलांसाठी आजचा दिवस ऐतिहासिक दिवस आहे. कारण एका बाजूला सैन्यानं अचूक रित्या हल्ला करत पाकिस्तान पुरस्कृत दहशतवादाला धडा शिकवला आहे. भारताने पाकव्याप्त काश्मीरसह पाकिस्तानातल्या दहशतवाद्यांच्या नऊ तळांवर मध्यरात्री जोरदार आक्रमण करत 'ऑपरेशन सिंदूर' (Operation Sindoor) ही मोहीम फत्ते केली आहे. तर दुसऱ्या बाजूला छत्तीसगडमधील बिजापूर जिल्ह्यातील करेगुट्टा टेकड्यांवर (Karregutta hills) सुरक्षा दलांच्या गेल्या अनेक दिवसांपासून सुरू असलेल्या ऑपरेशनला (Anti Naxal Operation In Chhattisgarh) यश मिळू लागले आहे. आज (7 मे 2025) पहाटेपासून करेगुट्टाच्या टेकड्यांवर सुरक्षा दलांनी सुमारे 20 नक्षलवाद्यांना कंठस्थान घातल्याची माहिती समोर आली आहे.
मृतांचा आकडा वाढण्याचीही शक्यता
पुढे आलेल्या माहितीनुसार, अद्याप छत्तीसगड सरकार, छत्तीसगड पोलीस, किंवा सीआरपीएफने या माहितीला दुजोरा दिलेला नाही. मात्र बिजापूर मधून मिळत असलेल्या माहितीप्रमाणे सकाळपासून सुरू असलेल्या चकमकीत मोठ्या प्रमाणावर नक्षलवादी मारले गेले आहे. ही संख्या 20च्या जवळपास असल्याचे ही सांगितले जात आहे. दरम्यान अजूनही चकमक सुरू असून मृतांचा आकडा वाढण्याचीही शक्यता बळावली आहे.
नक्षल्यांच्या मुळावर अखेरचा घाव?
करेगुट्टाच्या डोंगराच्या या ऑपरेशनमध्ये सुरक्षा दलांना अद्याप फारसं यश मिळालं नसलं, तरी या ठिकाणी सुरक्षा दलाने 500 पेक्षा जास्त नक्षलवाद्यांसह त्यांच्या सर्व मोठ्या कमांडर्सला घेरले आहे. या घेराबंदीचा काय महत्व आहे हे ओळखूनच सुरक्षा दल गेले पाच दिवस 44 - 45 अंश सेल्सिअस तापमानामध्ये सातत्याने धैर्य ठेवून करेगुट्टाच्या डोंगराला घेरा घालून थांबले आहे. अधून-मधून गोळीबार सुरू आहे. जर या ऑपरेशनच्या माध्यमातून सुरक्षा दल हिडमा आणि देवाला नामोहरम करण्यात किंवा अटक करण्यात यशस्वी ठरले, तर फक्त छत्तीसगडच नाही तर भारतातील नक्षलवादावर सुरक्षा दलांचे हे आजवरचा सर्वात मोठा आघात मानला जाईल.
नक्षलवाद्यांच्या विरोधातल्या सर्वात मोठं ऑपरेशन
दरम्यान, एबीपी माझाला मिळालेल्या एक्सक्लुझिव्ह माहितीप्रमाणे, या ठिकाणी सर्वात जास्त धोकादायक मानला जाणारा आणि सहा कोटी रुपयांचे बक्षीस असलेला नक्षल कमांडर 'माडवी हिडमा' नक्षलवाद्यांच्या बटालियन 1 सह घेरला गेला आहे. त्याच्यासोबत बटालियन 1 चा कमांडर 'देवा बरसे सुक्का' आणि नक्षलवाद्यांसाठी शस्त्रांसह सर्व आवश्यक वस्तूंची सप्लाय चेन सतत कायम ठेवणारा 'दामोदर' ही सुरक्षा दलांच्या चक्रव्यूहात अडकला आहे. त्यामुळे नक्षलवाद्यांच्या विरोधातल्या देशातील आजवरच्या सर्वात मोठ्या ऑपरेशनमध्ये सुरक्षा दल यशस्वी ठरले, तर नक्षलवादावर हा देशातील सर्वात मोठा आघात ठरणार आहे.
हे ही वाचा