Gokul Election: वार्षिक उलाढाल 4 हजार कोटींवर अन् आमदारकी नको, पण गोकुळचे संचालक करा म्हणणाऱ्या गोकुळ दूध संघाची निवडणूक नेमकी होते तरी कशी?

Nana Patole : राज्यात 2024मध्ये काँग्रेसच्या 75 आमदारांसह माविआचे 160 आमदार निवडून येण्याचा IBचा रिपोर्ट होता, पण....; बोगस मतदानावर बोट ठेवत नाना पटोलेंचा खळबळजनक दावा

उमेश अलोणे, एबीपी माझा — Sun, 25 Oct 2026 06:47:53 +0530

Nana Patole : राज्यातील 2024 च्या विधानसभा निवडणुकीत महाविकास आघाडीचं सरकार येणार होतं, असा दावा काँग्रेसचे ज्येष्ठ नेते आमदार नाना पटोले (Nana Patole) यांनी केलाय. यात काँग्रेसच्या 75 आमदारांसह महाविकास आघाडीचे (MVA) 160 आमदार निवडून येणार असल्याचं महत्वपूर्ण अहवाल सरकारी यंत्रणांनी दिला असल्याचं ते म्हणालेय. या संदर्भातील महत्त्वपूर्ण अहवाल 'इंटेलिजन्स ब्युरो'ने सरकार आणि विरोधी पक्षांना दिला होता, असा खळबळजनक दावाही त्यांनी केलाय. ते अकोला जिल्ह्यातील बाळापुर तालुक्यातल्या वाडेगाव येथे काँग्रेस (Congress) नेते प्रमोद डोंगरे यांनी आयोजित केलेल्या धम्मचक्र प्रवर्तन दिनाच्या सभेत बोलत होते.(Nana Patole on Bogus Voting)

दरम्यान, मतदानाच्या दिवशी संध्याकाळी पाचनंतर वाढवलेल्या मतदानाच्या बोगस आकडेवारीतून राज्यात महाविकास आघाडीचे सरकार येण्यापासून रोखण्याचा कट शिजल्याच ते म्हणालेय. यासोबतच पुढच्या काळात महागाईचा मोठा भडका होणार असल्याचंही ते म्हणालेत. पेट्रोलचे दर 400 रुपयांचा टप्पा ओलांडणार असल्याचा अंदाज आणि भिती त्यांनी व्यक्त केलीय.

Nana Patole on Ashok Chavan: अशोक चव्हाण यांच्या संदर्भात राज्यातील काँग्रेस कार्यकर्त्यांच्या मनात मोठा

काँग्रेस पक्ष सोडलेले पक्षाचे देशातील पाच माजी मुख्यमंत्री काँग्रेसमध्ये 'घरवापसी' करण्याची चर्चा सुरूये. त्यात महाराष्ट्राचे माजी मुख्यमंत्री अशोक चव्हाण यांच्या नावाचीही चर्चा सुरूये. यावर मोठं विधान करतांना नाना पटोले यांनी चव्हाण यांच्या संदर्भात राज्यातील काँग्रेस कार्यकर्त्यांच्या मनात मोठा राग असल्याचं म्हटलंय. देशातील वातावरण बदलायला सुरुवात झाल्याने अनेक जण आता काँग्रेसच्या मूळ प्रवाहात येण्यास उत्सुक असल्याचे ते म्हणालेत. अशोक चव्हाण आणि इतर नेत्यांच्या काँग्रेसमध्ये परतण्याच्या मुद्द्यावर 'हायकमांड'च निर्णय घेणार असल्याचं ते म्हणालेय.

Nana Patole : मोदी आणि फडणवीस सरकारला महाराष्ट्राचं वाळवंट करू देणार नाही

दरम्यान, रायगड जिल्ह्यातील कर्जत येथे प्रस्तावित असलेल्या 300 हजार मेगावॅट क्षमतेच्या जलविद्युत प्रकल्पासाठी सुरू असलेल्या जंगल कटाईवरून त्यांनी सरकारला गंभीर इशारा दिलाय. या प्रकल्पात 35 हजारांपेक्षा अधिक झाड कापली जाणार असल्याचा दावा केला जातोय. या प्रकल्पाचा कंत्राटदार असलेला 'टोरंट कंपनी'चा प्रमुख मेहता नावाचा व्यक्ती हा अमित शाहांच्या जवळचा असल्याचा दावा त्यांनी केलाय. दरम्यान, मोदी सरकार आणि फडणवीस सरकारला महाराष्ट्राचं वाळवंट करू देणार नसल्याचं ते म्हणालेय. कर्जत येथील वृक्षतोड थांबली नाही तर काँग्रेस तेथे मोठे आंदोलन उभारणार असल्याचा इशारा पटोलेंनी सरकारला दिलाय.

इतर महत्वाच्या बातम्या

प्रदीप पूर्णेकर मृत्यू प्रकरण! सत्तेचा खेळ मागे-पुढे होत राहतो, एवढी मस्ती बरी नाही, सपकाळांचा एकनाथ शिंदेंवर हल्लाबोल

अकोला शिक्षक मतदारसंघ निवडणूक! मतदानासाठी कुणाकडूनही पैसे घ्या, मतदान मात्र, आमच्या उमेदवाराला करा, ठाकरेंच्या आमदाराचं वादग्रस्त वक्तव्य

उमेश अलोणे, एबीपी माझा, अकोला — Sun, 18 Oct 2026 17:43:38 +0530

Nitin Deshmukh : अकोला (Akola) जिल्ह्यातील बाळापूर मतदारसंघाचे ठाकरेंच्या शिवसेनेचे आमदार नितीन देशमुख (Nitin Deshmukh) यांनी वादग्रस्त वक्तव्य केलं आहे. अकोला शिक्षक मतदारसंघात (Akola Teachers constituency ) मतदानासाठी कुणाकडूनही पैसे घ्या, मतदान मात्र, आमच्या उमेदवाराला करा, असं वक्तव्य आमदार नितीन देशमुख यांनी केलं आहे. त्यांच्या या वक्तव्याची सध्या जोरदार चर्चा सुरु आहे. दरम्यान, देशमुख यांच्या या वक्तव्यावर निवडणूक आयोग काय कारवाई करणार? याकडं सर्वांचं लक्ष लागलं आहे.

नितीन देशमुख यांच्या वक्तव्यावर निवडणूक आयोग काय कारवाई करणार?

अकोला जिल्ह्यातील शिवसेना ठाकरे गटाचे नितीन देशमुख यांनी वादग्रस्त वक्तव्य केलं आहे. अमरावती विभाग शिक्षक मतदार संघातील मतदार शिक्षकांनी पैसे कुणाकडूनही घ्यावेत, मतदान मात्र ठाकरेंच्या शिवसेनेचे उमेदवार दत्तात्रय लहाने यांना करावे असं तेम्हणाले. आमदार नितीन देशमुख यांच्या वक्तव्याचे पडसाद उमटण्याची शक्यता आहे. नितीन देशमुख यांच्या वक्तव्यावर निवडणूक आयोग काय कारवाई करणार? याकडे सर्वांचे लक्ष लागलं आहे. अकोल्यातील पक्षाच्या कार्यालयात घेतलेल्या पत्रकार परिषदेत बोलतांना नितीन देशमुख यांनीहे वादग्रस्त वक्तव्य केलं. अमरावती विभाग शिक्षक मतदारसंघात बहुरंगी लढत आहे.. शिंदेंच्या शिवसेनेकडून विद्यमान आमदार किरण सरनाईक तर काँग्रेसकडून प्रा. आदिती पोहरे उमेदवार आहेत. तर ठाकरेंच्या शिवसेनेची उमेदवारी दत्तात्रय लहाने यांच्याशिवाय शिंदेंच्या शिवसेनेचे माजी आमदार श्रीकांत देशपांडे, भाजपाच्या संगीता शिंदे आणि शेखर भोयर यांनी बंडखोरी केली आहे.

अमरावती शिक्षक मतदारसंघात महाविकास आघाडीत फूट

अमरावती शिक्षक मतदारसंघातील विधान परिषद निवडणुकीसाठी आता राजकीय चित्र स्पष्ट होताना दिसतं आहे. शिवसेना उद्धव बाळासाहेब ठाकरे पक्षाने दत्तात्रय लहाने यांना उमेदवारी जाहीर केली आहे. तर काँग्रेसने अदिती ऋषिकेश पोहरे यांना उमेदवारी दिली आहे. त्यामुळे अमरावती शिक्षक मतदारसंघात शिवसेना ठाकरे गट काँग्रेस आमने-सामने आहेत. दत्तात्रय लहाने हे बुलढाणा जिल्ह्यातील रहिवासी असून प्राध्यापक म्हणून त्यांनी काम केलंय. गेल्या अनेक वर्षांपासून ते शिक्षक संघटनेच्या माध्यमातून शिक्षकांच्या प्रश्नांसाठी काम करत आहेत. शिक्षकांच्या विविध समस्या त्यांनी आंदोलने आणि निवेदनांच्या माध्यमातून शासनासमोर मांडल्या आहेत. मुंबईत दत्तात्रय लहाने यांनी पक्षप्रमुख उद्धव ठाकरे यांची भेट घेतली होती. या भेटीनंतर उद्धव ठाकरे यांनी उमेदवारी देण्याबाबत लहाने यांना शब्द दिला होता. उमेदवारी जाहीर झाल्यानंतर लहाने यांनी उद्धव ठाकरे यांचे आभार मानले होते.

Maharashtra Drought: दुष्काळाची दाहकता, पाण्याच्या टंचाईमुळे बांधकाम क्षेत्राला मोठी झळ; लाखो कोटींची काम थांबण्याची शक्यता, बळीराजासह मजूरही दुबार संकटात!

उमेश अलोणे, एबीपी माझा — Sat, 17 Oct 2026 14:38:20 +0530

Maharashtra Drought News : दुष्काळाचे दशावतार आता केवळ शेतशिवारातच नाही, तर राज्याच्या अर्थव्यवस्थेतही दिसू लागलेत. पाण्याच्या टंचाईमुळे कुठे सिमेंट रस्त्यांची कामं थांबवली जात आहेत, तर कुठे बांधकामासाठी पिण्याच्या पाण्याच्या वापरावर बंदी घालण्यात आलीये. महाराष्ट्राच्या अर्थव्यवस्थेत महत्त्वाचं स्थान असलेल्या बांधकाम क्षेत्रापुढे (Construction Sector) आता नवं संकट उभं ठाकलंय. बांधकामांची कामं मंदावली, तर त्याचा थेट परिणाम मजूर, गवंडी, सेंट्रिंग कामगार, ट्रकचालक, सिमेंट विक्रेते आणि या व्यवसायावर अवलंबून असलेल्या हजारो छोट्या व्यावसायिकांवर होऊ शकतो. आधी शेतीने रोजगार हिरावला आणि आता बांधकाम क्षेत्रालाही दुष्काळाची झळ बसू लागली, तर या मजुरांनी जगायचं कसं? असा प्रश्न साऱ्यांना सतावतो आहे. दुष्काळाच्या या नव्या आर्थिक संकटानं चिंतेत भर घातल्याचे चित्र आहे. (Maharashtra Drought Effect)

शेती हा ग्रामीण अर्थव्यवस्थेचा कणा आणि बांधकाम हा रोजगाराचा मोठा आधार आहे. मात्र, यंदाच्या दुष्काळाने या दोन्ही क्षेत्रांसमोर संकट उभं केलंय. पावसाची तूट, खालावलेली भूजल पातळी आणि धरणांमधील मर्यादित पाणीसाठा यामुळे पिण्याच्या पाण्याला प्राधान्य देण्याची वेळ आलीये. त्याचाच परिणाम आता बांधकाम क्षेत्रावर होतोय.

Maharashtra Drought News : महाराष्ट्रातील दुष्काळाची तीव्रता

राज्यात 358 पैकी 305 तालुक्यांमध्ये दुष्काळ जाहीर झालाय. त्यात राज्यातील सुमारे 85 टक्के तालुके दुष्काळाच्या कक्षेत असून पावसाची तूट सुमारे 18 टक्के आहे. दुष्काळाची तीव्रता लक्षात घेता, राज्य सरकारने 16 ऑक्टोबरपासून शहरी आणि ग्रामीण स्थानिक स्वराज्य संस्थांना किमान दहा टक्के पाणी कपात लागू करण्याचे निर्देश दिलेत. पिण्याच्या पाण्याला प्राधान्य देण्यासोबतच बांधकामासाठी प्रक्रिया केलेल्या सांडपाण्याचा वापर करण्यावर भर देण्यात आलाय. पुण्यात पिण्याच्या पाण्याचा बांधकामासाठी वापर करण्यास बंदी घालण्यात आलीये. तर नागपुरात पाणीटंचाईमुळे सिमेंट रस्त्यांच्या पाचव्या टप्प्यातील काम थांबवण्यात आलंय. म्हणजेच दुष्काळाचा फटका आता प्रत्यक्ष बांधकामांच्या कामांपर्यंत पोहोचलाय. या दुष्काळाचा राज्यातील बांधकाम इंडस्ट्रीला देखील फटका बसला आहे.

Maharashtra Drought : बांधकाम क्षेत्रावर दुष्काळाची कात्री

दरम्यान, राज्यात 16 ऑक्टोबरपासून किमान १०% पाणी कपातीचे निर्देश देण्यात आले आहे. यात पुण्यात बांधकामासाठी पिण्याच्या पाण्याच्या वापरावर बंदी घालण्यात आली असून नागपूरमध्ये पाणीटंचाईमुळे सिमेंट रस्त्यांच्या कामाला ब्रेक लावला आहे. बांधकाम क्षेत्राचं महत्त्व केवळ इमारती उभ्या करण्यापुरतं मर्यादित नाही. सिमेंट, स्टील, वाळू, विटा, वाहतूक, हार्डवेअर आणि मजुरांची रोजीरोटी अशा अनेक व्यवसायांची अर्थव्यवस्था याच्याशी जोडलेली आहे. महाराष्ट्राच्या आर्थिक सर्वेक्षणानुसार, 2025-26 मध्ये राज्याच्या बांधकाम क्षेत्राची वास्तविक वाढ 7.8 टक्के राहण्याचा अंदाज व्यक्त करण्यात आलाय. राज्याच्या एकूण आर्थिक उत्पादनातही या क्षेत्राचं योगदान महत्त्वाचं आहे.

महाराष्ट्राचं बांधकाम क्षेत्र, आर्थिक महत्त्व

2025-26 मध्ये वास्तविक वाढीचा अंदाज : 7.8%

राज्याच्या GSVA मधील बांधकाम क्षेत्राचा वाटा : सुमारे 6%

बांधकामाशी संबंधित व्यवसाय : सिमेंट, स्टील, वाळू, विटा, वाहतूक आणि मजूर

इतर महत्वाच्या बातम्या

Chandrapur Tiger Attack: शेतात काम करत असताना दबा धरून बसलेल्या वाघाची झडप; पतीच्या डोळ्यादेखत पत्नीचा जागीच दुर्दैवी अंत; चंद्रपूरचं पळसगाव हादरलं!

Akola: दुष्काळातही शेतकऱ्यांच्या दारात फायनान्स कंपन्यांची दादागिरी? अकोल्यात कर्जवसुलीसाठी गेल्याचा पुरावा म्हणून शेतकऱ्याच्या पत्नीचे फोटो काढले अन्...

उमेश अलोणे, एबीपी माझा — Tue, 13 Oct 2026 07:01:32 +0530

Akola News: राज्यात एकीकडे दुष्काळाच्या पार्श्वभूमीवर शेतकऱ्यांची कर्जवसुली (Loan Recovery) थांबवण्याच्या सरकारकडून घोषणा होताहेत. खुद्द मुख्यमंत्री आणि बडे मंत्री शेतकऱ्यांना दिलासा देण्याची भाषा करताहेत. मात्र, ग्राउंड रियालिटी काही वेगळीच आहे! ग्रामीण भागात पतसंस्था, छोट्या बँका आणि मायक्रो फायनान्स कंपन्यांकडून कर्जवसुलीसाठी शेतकऱ्यांवर दबाव टाकला जात असल्याचे आरोप होताहेत. संतापजनक बाब म्हणजे, कर्जवसुलीसाठी घरी गेलेले प्रतिनिधी शेतकऱ्यांच्या पत्नींचे फोटो काढून ते वरिष्ठांना पाठवत असल्याचे पुरावे 'एबीपी माझा'च्या हाती लागलेत. अकोला (Akola News) जिल्ह्यातील डोंगरगावात हा धक्कादायक प्रकार समोर आलाय.

Loan Recovery: सरकारकडून घोषणांचा सुकाळ, पण अंमलबजावणीच्या नावानं मात्र पार दुष्काळच

राज्याचे महसूलमंत्री चंद्रशेखर बावनकुळे यांनी शेतकऱ्यांच्या बांधावरून सरकारी, सहकारी आणि खासगी बँका, पतसंस्था तसंच मायक्रो फायनान्स कंपन्यांना इशारा दिलेला आहे. मात्र, या इशाऱ्याला दहा दिवस उलटूनही ग्रामीण भागात कर्जवसुली सुरू असल्याचं वास्तव समोर आलं आहे. सरकारकडून घोषणांचा सुकाळ होतोय. पण अंमलबजावणीच्या नावानं मात्र पार दुष्काळच असल्याचे चित्र आहे एकीकडे निसर्गानं शेतकऱ्यांना उद्ध्वस्त केलंय, तर दुसरीकडे कर्जवसुलीच्या तगाद्यानं त्यांची चिंता वाढवलीय.

Akola Farmers: हातचं पीक गेलं, उत्पन्नाचा मार्ग बंद, कर्जाचे हप्ते भरायचे कुठून,

अशातच, ही कहाणी आहे अकोला जिल्ह्यातील डोंगरगावच्या योगेश नागापुरे या तरुण शेतकऱ्याची. वडिलोपार्जित दोन एकर आणि भाड्यानं केलेली दोन एकर, अशा चार एकरांत त्यांनी पीक उभं करण्याचं स्वप्न पाहिलं होतं. मात्र, पावसानं दगा दिला आणि चार एकरांत पेरलेल्या स्वप्नांचा चुराडा झालाय. पेरणीसाठी योगेश यांनी पत्नीच्या नावानं 'एलटी फायनान्स' आणि 'ग्रामीण कुटा' या दोन मायक्रो फायनान्स कंपन्यांकडून कर्ज घेतलंय. काही पैसे भरलेही. पण आता पीक हातचं गेलं, उत्पन्नाचा मार्ग बंद झालाय. संसार चालवायचा कसा आणि कर्जाचे हप्ते भरायचे कुठून, हा प्रश्न त्यांच्यासमोर उभा ठाकलाय.

Akola Farmers: कर्ज घेतलेल्या शेतकऱ्यांच्या पत्नींचे फोटो काढून ते वरिष्ठांना पाठवले

मात्र, या संकटात शेतकरी कुटुंबाला आधार देण्याऐवजी कर्जवसुलीसाठी कंपनीचे प्रतिनिधी घरी पोहोचत असल्याचा आरोप आहे. एवढंच नाही, तर कर्ज घेतलेल्या शेतकऱ्यांच्या पत्नींचे फोटो काढून ते वरिष्ठांना पाठवले जात असल्याचे पुरावे 'एबीपी माझा'च्या हाती लागलेत. 'एलटी फायनान्स कंपनी'च्या प्रतिनिधींनी असे फोटो काढल्याची कबुली 'एबीपी माझा'शी बोलताना दिलीय. वसुलीसाठी घरी गेल्याचा पुरावा म्हणून महिलांचे फोटो काढले जात असतील, तर हा प्रकार गंभीर प्रश्न उपस्थित करणारा आहेय.

Ravikant Tupkar: राज्यातील मायक्रो फायनान्स कंपन्या आणि पतसंस्थांनी कर्जवसुली थांबवावी

दरम्यान, या प्रकारावर शेतकरी नेते रविकांत तुपकर यांनीही आक्रमक भूमिका घेतलीय. राज्यातील मायक्रो फायनान्स कंपन्या आणि पतसंस्थांनी कर्जवसुली थांबवावी, असा सज्जड इशारा त्यांनी दिलाय.

एकीकडे सरकारकडून कर्जवसुलीबाबत बँक आणि मायक्रो फायनान्स कंपन्यांना दिलेले तथाकथित इशारे, तर दुसरीकडे दुष्काळात होरपळणाऱ्या शेतकऱ्यांच्या दारात वसुलीचा तगादा! अकोल्यातील डोंगरगावातून समोर आलेला हा प्रकार सरकारच्या घोषणांच्या अंमलबजावणीवर प्रश्नचिन्ह निर्माण करतोय. आता सरकार काय कारवाई करणार आणि संबंधित मायक्रो फायनान्स कंपन्या या गंभीर आरोपांवर काय स्पष्टीकरण देणार?, हे पाहणं महत्त्वाचं ठरणार आहे.

इतर महत्वाच्या बातम्या

Tukaram Mundhe : लोकांची दिवाळी 'गोड' होणार! FDA मधून बदली नाही, भेसळयुक्त अन्न, औषधांविरोधात लढाई सुरूच; MPSC मध्ये बदलीच्या चर्चेवर तुकाराम मुंढेंची पोस्ट

Akola News: अकोल्यात अवैध सावकारीविरोधात मोठी कारवाई, एपीएमसीसह 28 ठिकाणी छापे; संचालकही चाैकशीच्या फेऱ्यात, 11 जणांच्या तक्रारीनंतर सहकार विभागाच्या नेतृत्वात धाडसत्र

उमेश अलोने, एबीपी माझा — Sat, 10 Oct 2026 10:59:07 +0530

Akola News : अकोला शहरातून एक मोठी बातमी समोर आली आहे. अकोल्यात (Akola Crime News) अवैध सावकारप्रकरणी (Illegal Money Lending Case) एपीएमसीसह 28 ठिकाणी छापे टाकण्यात आले आहे. तर संचालकही चाैकशीच्या फेऱ्यात आल्याने शहारत मोठी खळबळ उडाली आहे. काेरे धनादेश, इसार पावती, डायऱ्या, खरेदी खतसह अन्य दस्तावेज जप्त करण्यात आल्याची माहिती आहे. तर सहकार विभागाच्या नेतृत्वात ही कार्यवाही केल्याची माहिती आहे.

दरम्यान, दुष्काळी परिस्थितीतही शेतकऱ्यांना लुबाडणाऱ्यांना सहकार विभागाने मोठा दणका दिला आहे. तर सखाेल चाैकशीनंतर या प्रकरणी कठोर कारवाई आणि नंतर फाैजदारी कारवाई होणार आहे. तर या प्रकरणी 11 जणांच्या तक्रारीनंतर हे धाडसत्र राबवले आहे. यात तब्बल 204 अधिकारी आणि कर्मचारी यांच्या उपस्थिती एकत्रित कार्यवाही झाल्याची माहिती आहे.

Akola News : अकोल्यात गैरअर्जदारांविरुद्ध 28 ठिकाणी धाडी

एकीकडे दुष्काळी परिस्थितीमुळे शेतकऱ्यांसह सामान्य नागरिकही चिंतेत असतानाच गरजूंना लुटणाऱ्या अवैध सावकारांच्या सहकार विभागाकडून मुसक्या आवळण्यात येत आहे. अकोल्यात गैरअर्जदारांविरुद्ध 28 ठिकाणी धाडी टाकण्यात आल्या आहेत. धाडीत इसारपावती, काेरे चेक, काेरे बाँडसह अन्य दस्तावेज जप्त करण्यात आले आहे. शेतकऱ्यांच्या हितासाठी स्थापन केलेल्या कृषी उत्पन्न बाजार समितीमध्येही (एपीएमसी) दाेन ठिकाणी धाडसत्र राबवण्यात आले. यात एका संचालकांसह एक अडत्याही चाैकशीच्या फेऱ्यात सापडला असल्याची माहिती आहे.

Co-operation Department Actions: 11 तक्रारकर्त्यांच्या तक्रारी, सहकार विभागाच्या नेतृत्वात 28 ठिकाणांवर छापेमारी

दरम्यान, महाराष्ट्र सावकारी अधिनियम या नवीन कायद्यानुसार जिल्हास्तरीय समितीची स्थापना करण्यात आली आहे. त्यानुसार धाडीसाठी सहकार विभाग, महसूल विभाग आणि पोलिस दलाचा समावेश असलेले संयुक्त पथक गठित करण्यात येते. दरम्यान सहकार विभागाच्या नेतृत्वात अवैध सावकारीवर छापेमारी करण्यात आली. 11 तक्रारकर्त्यांनी तक्रार केल्यानंतर 11 गैरअर्जदारांच्या 28 ठिकाणांवर छापेमारी करण्यात आली.

Co-operation Department Raid: असे राबवले धाडसत्र

धाडसत्रासाठी लेखा परिक्षण विभागातील 120 अधिकारी, 40 पंच, पाेलिस दलातील 22 अधिकारी, 44 कर्मचाऱ्यांची पथके तयार करण्यात आली होती.

Akola Co-operation Department Raid: धाडीदरम्यान 'हे' साहित्य केले जप्त

ईसार पावती काेरे चेक, काेरे बांॅड, मूळ-छायांकित खरेदी खत, विक्री पावती, डायऱ्या,करारनामा, गहाण खत- सातबारा, राेकड वही, खाता वही, राेख, आदीसह अन्य आक्षेपार्य दस्तऐवज जप्त करण्यात आल्या आहे. सूत्रांनी दिलेल्या माहितीनुसार एक गैरअर्जदार हा भाजपचा माजी पदाधिकारी आहे. एकाने अडत्यामार्फत शेतकऱ्याला पैसे देऊन त्याची जमीन ताब्यात घेतल्याचे सूत्रांचे म्हणणे आहे. त्यामुळे आता चाैकशीमध्ये काेणत्या बाबी स्पष्ट हाेतात, याकडे सर्वांचे लक्ष लागले आहे.

Akola : दरम्यान अकोला जिल्ह्यात परवानाधारक सावकारांची असलेली संख्या पुढील प्रमाणे.

तालुका - सावकार संख्या

अकोला - 114

बार्शीटाकळी - 13

पातूर - 08

बाळापूर - 27

तेल्हारा - 04

अकोट - 19

मूर्तिजापूर - 18

इतर महत्वाच्या बातम्या

Desaiganj Accident: सौर ऊर्जा झटका मशीन यंत्राच्या विजेच्या जबर धक्का; दोन सख्या भावांचा जागीच दुर्दैवी अंत; गडचिरोलीच्या देसाईगंजमध्ये खळबळ

चार भिंतीच्या आत राहणाऱ्यांना नानांचं काम खूपत होतं का? बॉलीवूडच्या लोकांनी मराठी माणसाचा तिरस्कार करणं बंद करावं, अमोल मिटकरींचा संताप

उमेश अलोणे, एबीपी माझा — Fri, 9 Oct 2026 18:36:14 +0530

Amol Mitkari on Nana Patekar Death news : मराठी आणि हिंदी चित्रपटसृष्टीवर आपल्या दमदार अभिनयाचा ठसा उमटवणारे ज्येष्ठ अभिनेते नाना पाटेकर (Marathi Actor Nana Patekar) यांचं काल निधन झालं. वयाच्या 75 व्या वर्षी गोव्यात हृदयविकाराच्या झटक्याने त्यांचं निधन झालं. त्यांच्या या अकस्मात जाण्याने मनोरंजन विश्वासह राजकीय वर्तुळात मोठी शोककळा पसरली आहे. काल रात्री उशीरा नाना पाटेकर यांच्यावर त्यांच्या डोणजे या गावी अंत्यसंस्कार झाले. यावेळी राजकीय, सामाजिक क्षेत्रातील मान्यवर मोठ्या संख्येनं उपस्थित होते. पण बॉलीवूड सेलिब्रिटींच्या अनुपस्थितीवरून माजी आमदार अमोल मिटकरी (Amol Mitkari) यांनी टीका केली आहे.

नेमकं काय म्हणाले अमोल मिटकरी?

ज्येष्ठ अभिनेते नाना पाटेकर यांचं काल निधन झालं. काल रात्री उशीरा पुण्यातील डोणजे गावात त्यांच्यावर अंत्यसंस्कार करण्यात आले. मात्र, अंत्यसंस्काराच्यावेळी हिंदी चित्रपटसृष्टी क्षेत्रातील अनेक मान्यवर उपस्थित नसल्याची खंत राष्ट्रवादीचे माजी आमदार अमोल मिटकरी यांनी व्यक्त केली. नाना पाटेकरांचा साधेपणा, मातीशी असलेली नाळ आणि शेतकऱ्यांसाठी केलेलं सहकार्यचं काम चित्रपटसृष्टी क्षेत्रातील 'चार भिंतीच्या आत राहणाऱ्या इतरांना खूपत होतं का? असं सवाल मिटकरी यांनी यावेळी केला आहे. काल असंवेदनशीलतेचा कळस बॉलीवूड'च्या लोकांमध्ये दिसला. हे अत्यंत निंदनीय आहे. मराठी माणसाचा तिरस्कार करणं बॉलीवूडच्या काही लोकांनी बंद करावं असेही मिटकरी म्हणाले. पुणे आणि मुंबईतील अभिनेत्यांनी आता हे लक्षात ठेवावं की, चार भिंतीच्या आत राहून ट्विटरच्या माध्यमातून श्रद्धांजली वाहत असतील तर त्यांनाही या वेळेतून जावं लागेल, असेही मिटकरी म्हणाले.

हृदयविकाराचा झटका आल्यानं गाव्यात नाना पाटेकरांचं निधन

नाना पाटेकर यांचा हृदयविकाराच्या झटक्याने मृत्यू झाला. गोव्यातील डोना पावलामधील घरी हृदयविकाराचा झटका आला होता. त्यानंतर त्यांना मणिपाल रूग्णालयात उपचारासाठी दाखल करण्यात आले. मात्र तिथेच उपचारादरम्यान नाना पाटेकर यांचं निधन झाल्याची माहिती समोर आली. मणिपाल रुग्णालयाचे कर्करोग विभाग प्रमुख डॉ. शेखर सालकर यांनी 45 मिनिटे सतत सीपीआर देऊनही नाना पाटेकर यांना वाचवता आले नाही. गोव्यातील मणिपाल रुग्णालयाच्या वैद्यकीय पथकाने नाना पाटेकर यांना पहाटे 5.20 वाजता मृत घोषित केले. छातीत तीव्र वेदना होत असल्याने एका फ्लॅटवर वैद्यकीय पथक पाठवण्यात आले होते; तिथे ते प्रतिसाद देत नव्हते. त्यांना 'कार्डियाक मसाज' देऊन रुग्णालयात आणले असता, तेथील वैद्यकीय पथकाने पहाटे 5.20 वाजता त्यांना मृत घोषित केले. त्यानंतर रात्री उशीरा नाना पाटेकर यांच्यावर पुण्यातील डोणजे या गाात अंत्यसंस्कार करण्यात आले.

Akola Drought News: भीषण दुष्काळाची झळ! पूर्णा, विद्रुपा आणि गौतमा त्रिवेणी संगम वाळवंटाच्या वाटेवर; अकोला जिल्ह्यातील दुष्काळाच्या दाहक परिस्थितीचं ड्रोणदृष्य

उमेश अलोणे, एबीपी माझा — Fri, 9 Oct 2026 12:43:03 +0530

Akola Drought News: भीषण दुष्काळाची झळ! पूर्णा, विद्रुपा आणि गौतमा त्रिवेणी संगम वाळवंटाच्या वाटेवर; अकोला जिल्ह्यातील दुष्काळाच्या दाहक परिस्थितीचं ड्रोणदृष्य

Vidarbha Drought: पश्चिम विदर्भात 'पाणीबाणी! अकोल्यात तब्बल दहा दिवसातून, तर वाशिम, बुलढाण्यात एकदा नळाला पाणी; काटेपूर्णा धरणात अवघा 18. 42 टक्के पाणीसाठा

उमेश अलोणे, एबीपी माझा — Tue, 6 Oct 2026 07:41:49 +0530

Western Vidarbha Drought: राज्यभरात सध्या दुष्काळाचं (Drought) भीषण वास्तव बघयला मिळत आहे. तर आगामी काळात या दुष्काळाची दाहकता अधिक वाढण्याची भीती देखील व्यक्त केली जात आहे. अशातच पश्चिम विदर्भात देखील दुष्काळाची (Drought)तीव्रता आता शेताच्या बांधापासून थेट घराच्या दारापर्यंत पोहोचलीये. पिकं करपली, चारा संपला आणि आता पिण्याच्या पाण्यासाठीही नागरिकांना ताटकळत बसावं लागतंय. कुठे आठवडाभराने, कुठे दहा दिवसांनी, तर अकोलेकरांना आता 10 दिवसांतून एकदाच पाणी मिळणारेय. धरणांमधला पाणीसाठा झपाट्याने घटतोय आणि पश्चिम विदर्भाच्या दुष्काळाची (Western Vidarbha Drought) भीषणता समोर येतीये. परिणामी, पिण्याच्या थेंबभर पाण्यासाठी सुरू झालेल्या संघर्षाच्या नांदीची चाहूल अकोलाकरांसह पश्चिम विदर्भातील नागरिकांना बघायला मिळते आहे.

एकीकडे शेतात उभं पीक पाण्याअभावी करपलं आणि आता घरातल्या नळालाही पाण्याची प्रतीक्षाच असल्याचे चित्र आहे. पश्चिम विदर्भात पावसाने पाठ फिरवल्यानंतर पिण्याच्या पाण्याचं संकट दिवसेंदिवस गडद होताना दिसतंय. अकोल्यात परिस्थिती किती गंभीर आहे, याचा अंदाज काटेपूर्णा धरणाच्या (Katepurna Dam) पाणीसाठ्यावरून येतोय. धरणात सध्या अवघा 18. 42 टक्के पाणीसाठा शिल्लक आहे. मागच्या वर्षी याच काळात हा साठा तब्बल 97.15 टक्के होता. त्यामुळे सध्या शहराला सात दिवसात एकदा मिळणारं पाणी आता तब्बल दहाव्या दिवशी मिळणारेय.

Katepurna Dam : दुष्काळाची झळ, काटेपूर्णा धरणात सध्या अवघा 18. 42 टक्के पाणीसाठा

मागील वर्षी — 97.15%

यंदा — 18.42%

पाणीपुरवठा प्रस्तावित अंतर : शहर — 10 दिवस

हद्दवाढ भाग — 11 दिवस

काटेपूर्णा धरणावर केवळ अकोला शहराचीच तहान अवलंबून नाहीय, तर अकोला, मूर्तिजापूर, एमआयडीसीसह जवळपास 60 गावांनाही याच जलस्रोताचा आधार आहे. म्हणून धरणातला प्रत्येक दिवसाचा घटणारा साठा, हा भविष्यातील पाण्याच्या संकटाची धोक्याची घंटा ठरतोय.

Akola Drought: पाणीबाणी! घरातील महिलाही घागर घेऊन नळाकडे डोळे लावून बसल्या

दरम्यान, पाणीबाणीचं संकट केवळ अकोल्यापुरतंच मर्यादित नाही. तर बुलढाणा, वाशिम, अमरावती आणि यवतमाळमध्येही पाणीटंचाईची तीव्रता वाढताना दिसतेय. कुठे आठवडाभराने नळाला पाणी येतंय, तर कुठे त्याहून अधिक प्रतीक्षा करावी लागतेय. गावानंतर आता शहरातही पिण्याच्या पाण्यासाठी टँकर, विहिरी आणि उपलब्ध जलस्रोतांवर अवलंबून राहण्याची वेळ आलीये. दुष्काळात शेतकरी पिकासाठी आभाळाकडे पाहतोय. पण आता घरातील महिलाही घागर घेऊन नळाकडे डोळे लावून बसल्या आहेत. पाण्याची एक घागर म्हणजे आता फक्त पाणी नाही, तर ती आहे घर चालवण्याची धडपड. मुलांची तहान भागवण्याची चिंता आणि उद्याच्या दिवसाची भीती.

Western Vidarbha Drought: पश्चिम विदर्भातील जिल्ह्याच्या ठिकाणी किती दिवसांनी पाणीपुरवठा होतो?

अमरावती : 1 दिवसाआड

अकोला : 10 दिवसांतून एकदा

बुलढाणा : 8 दिवसांतून एकदा

यवतमाळ : 3 दिवसांतून एकदा

वाशिम: 8 दिवसांतून एकदा

पश्चिम विदर्भातील धरणसाठा (%) (Dam Water Storage in Western Vidarbha)

- यवतमाळ — 65%

-बुलढाणा — 57%

-अमरावती — 52. 96%

-अकोला — 47.66%

-वाशिम — 39.88%

पश्चिम विदर्भात यंदा पावसाने दगा दिलाय, शेती गेली, चारा गेला आणि आता पाण्याचीही परीक्षा सुरू झालीये. शेतातला दुष्काळ आता घराघरात उतरतोय. आणि सर्वात मोठा सवाल हा आहे की, पावसाची प्रतीक्षा किती दिवस? आणि पाण्याची प्रतीक्षा किती दिवस? पश्चिम विदर्भाच्या तहानेचा हा आक्रोश प्रशासनाच्या नियोजनाची आता कसोटी पाहतोय.

इतर महत्वाच्या बातम्या

Buldhana Crime: बुलढाणा हादरलं! दोन गटातील किरकोळ वादानं संतापाचं टोक गाठलं; तुंबळ हाणामारीत शिंदेसेनेच्या विद्यमान नगरसेवकासह राष्ट्रवादीच्या कार्यकर्त्याचाही मृत्यू

तुकाराम मुंढेंचं FDA दिवाळीपूर्वी अ‍ॅक्शन मोडवर; अकोल्यात 1900 किलो मिठाईचा साठा जप्त, परवानेही निलंबित

उमेश अलोणे, एबीपी माझा — Mon, 5 Oct 2026 17:44:20 +0530

अकोला : गणेशोत्सवापूर्वी (Akola) आणि गणेशोत्सव सणाच्या काळातही राज्यात अन्न व औषध प्रशासन विभागाने (FDA) अनेक ठिकाणी धाडी टाकत कारवाई केली. भेसळयुक्त पदार्थ आणि भेसळ खवा, दुग्धजन्य पदार्थांच्या वापराला आळा घालण्यासाठी ही कारवाई करण्यात आली. त्यामध्ये, मिठाई दुकानांवरही कारवाई करण्यात आली होती. आता, दिवाळी (Diwali) सणाच्या पार्श्वभूमीवर देखील एफडीएकडून कारवाईला वेग आला आहे. त्याच पार्श्वभूमीवर अकोल्यात 1900 किलो मिठाईचा साठा जप्त करण्यात आल्याने शहरात खळबळ उडाली आहे.

दिवाळीच्या तोंडावर अकोल्यात अन्न आणि औषध प्रशासनाची मोठी कारवाई करण्यात आलीय. अहमदाबादहून अकोल्यात आणण्यात आलेला तब्बल 1900 किलो मिठाईचा साठा जप्त करण्यात आलाय. हा साठा अस्वच्छ आणि आरोग्यास घातक परिस्थितीत वाहतूक केल्याचं तपासणीत समोर आलं आहे. जप्त केलेल्या मिठाईची किंमत तब्बल 5 लाख 72 हजार रुपये आहे. गोपनीय माहितीच्या आधारे अन्न सुरक्षा अधिकाऱ्यांनी अकोल्यातील रायलीजिन परिसरातील Arco Transport येथे आज सकाळी साडेअकराच्या सुमारास तपासणी केलीय. अहमदाबाद, गुजरातहून दोन ट्रकमधून अकोल्यात आणलेला विविध ब्रँडच्या मिठाईचा मोठा साठा यावेळी आढळून आलाय. यामध्ये अंबिका स्वीट हलवा, GWAL ट्रॅडिशनल स्वीट, श्री ग्वाल हलवा, अंबिका रिच स्वीट, ब्रजनिधी स्वीट आणि मुरलीधर स्वीट यांचा समावेश आहे.

दरम्यान, हा खाद्यसाठा अस्वच्छ आणि अनारोग्यदायी परिस्थितीत वाहतूक केल्याचं तपासणीत आढळून आलंय. अन्न पदार्थांचे नियमित नमुने घेण्यात आले असून, उर्वरित 1900 किलो साठा जप्त करण्यात आलाय. जप्त केलेला साठा अकोला महापालिकेच्या भोड येथील बायोगॅस प्रकल्पातील SWM Processing Plant येथे नष्ट करण्यात येणार आहे. हा माल मागवणारे व्यापारी कमल शर्मा, वैभव पाटील आणि अशोक अहुजा यांचे परवाने निलंबित करण्यात आले आहेत. तर, दिवाळीच्या पार्श्वभूमीवर मिठाई आणि खाद्यपदार्थांच्या गुणवत्तेवर प्रशासनाची करडी नजर असल्याचं देखील या कारवाईतून स्पष्ट झालं आहे.

तुकाराम मुंढेंच्या धडाकेबाज कारवाई

अन्न व औषध प्रशासन विभागाच्या आयुक्तपदी तुकाराम मुंढे यांनी पदभार स्वीकारल्यानंतर राज्यभरात एफडीएने कारवाईचा धडाका लावला होता. त्यानंतर, ठिकठिकाणी एफडीएच्या धाडी पडल्या. त्यामध्ये, लाखो टन मालही जप्त करण्यात आला होता. विशेष म्हणजे, तुकाराम मुंढे यांनी अनेक बड्या आस्थापनांवर कारवाई केली होती. त्यामध्ये, पंचतारांकीत हॉटेलचाही समावेश होता. तर, मुंबई उच्च न्यायालयाच्या कँटीनची देखील तपासणी करण्यात आली होती.

हेही वाचा

देवेंद्र फडणवीस यांचं MPSC च्या अध्यक्षांसंदर्भात मोठं पाऊल, राज्यपालांना समिती स्थापन करण्याची विनंती

Gokul Election: वार्षिक उलाढाल 4 हजार कोटींवर अन् आमदारकी नको, पण गोकुळचे संचालक करा म्हणणाऱ्या गोकुळ दूध संघाची निवडणूक नेमकी होते तरी कशी?

परशराम पाटील, एबीपी माझा, कोल्हापूर — Mon, 5 Oct 2026 14:17:12 +0530

Gokul Election: "आमदारकी नको मात्र गोकुळचं संचालक करा," अशी एक म्हण कोल्हापूर जिल्हा सहकारी दूध उत्पादक संघ अर्थात गोकुळच्या संदर्भात प्रचलित आहे. गोकुळची वार्षिक उलाढाल 4 हजार कोटींवर असल्याने गोकुळवर नेहमीच राजकारणापलीकडे अभद्र आघाड्या करून सत्ता राखण्याचा प्रयत्न झाला आहे. मात्र यंदा गोकुळ पहिल्यांदाच पक्षीय राजकारणामध्ये अडकला आहे.

जो गोकुळ मल्टी-स्टेट होऊ नये, गोकुळ दूध संघ हा फक्त कोल्हापूर जिल्ह्यातील शेतकऱ्यांच्या मालकीचा राहावा यासाठी मागील पंचवार्षिक निवडणूक एकवटली होती आणि निकालसुद्धा तसाच लागला होता. आता तोच गोकुळ पुन्हा एकदा कोणाच्यातरी घशात घालण्यासाठी प्रयत्न सुरू झाले आहेत का? असा सुद्धा आरोप होत आहे.

गोकुळची स्पर्धा गेल्या काही दिवसांपासून प्रत्यक्ष आणि अप्रत्यक्षरीत्या अमूलशी सुरू आहे आणि त्यामुळेच की काय गोकुळ बदनाम करण्यासाठी प्रयत्न सुरू आहेत का? अशीसुद्धा चर्चा दूध उत्पादकांकडून सुरू आहे. या सर्व पार्श्वभूमीवर आता गोकुळची निवडणूक होऊ घातली आहे. गोकुळवर मालकी कोणाची असणार? याचे उत्तर अवघ्या काही दिवसांमध्ये मिळणार आहे.

गोकुळची निवडणूक नेमकी होते तरी कशी?

मात्र जागावाटपावरून अजूनही गोकुळमध्ये विशेष करून महायुतीमध्ये त्रांगडं सुटलेलं नाही. त्यामुळे हा वाद थेट मुख्यमंत्री देवेंद्र फडणवीस यांच्यापर्यंत गेला आणि मुख्यमंत्री देवेंद्र फडणवीस यांनीच जागावाटप निश्चित केलं असून त्यानुसार राष्ट्रवादी अजित पवार गटाला 9 जागा मिळाल्या आहेत, त्यामध्ये यड्रावकर गटाचा समावेश आहे. तर दुसरीकडे भाजपलासुद्धा 9 जागा मिळाल्या आहेत, यामध्ये जनसुराज्य शक्तीचा समावेश आहे. तर शिंदे गटाला 7 जागा मिळाल्या आहेत. त्यानुसार 25 जागांवरती महायुतीचे उमेदवार असतील अशी शक्यता आहे.

दुसरीकडे राजर्षी शाहू समविचारी आघाडीत सतेज पाटील यांनी एकट्याने शड्डू ठोकला असून त्यांनी गेल्या काही दिवसांपासून प्रचारही सुरू केला आहे. या सर्व पार्श्वभूमीवर गोकुळची निवडणूक नेमकी होते तरी कशी? हे आपण या माध्यमातून जाणून घेणार आहोत. गोकुळची निवडणूक ही इतर निवडणुकांप्रमाणे नसते. त्यामुळे संस्था पात्र होण्यापासून ते ठरावधारकांचा एक प्रतिनिधी इथपर्यंतची ही प्रक्रिया असते. यामध्ये विविध गटांमधून उमेदवार निवडून द्यायचे असतात आणि मतदानाची पद्धतसुद्धा वेगवेगळ्या पद्धतीने आहे. त्यामुळे क्रॉस व्होटिंगचीसुद्धा भीती या निवडणुकीमध्ये असते.

शेतकरी थेट मतदान करत नाहीत, संस्थेचा ठराव लागतो

गोकुळच्या निवडणुकीत दूध उत्पादक शेतकरी हे प्रत्यक्ष मतदान करत नाहीत. ते ज्या दूध संस्था किंवा डेअरीला दूध देतात त्या डेअरीचा एक ठराव दिला जातो. म्हणजे त्या दूध डेअरीतील सर्व संचालकांच्या एकमताने एका संचालकाच्या नावे तो ठराव दिला जातो. तो संचालक हा गोकुळसाठी मतदान करतो.

तसेच प्रत्येक डेअरीला ठराव देण्याचा अधिकार नसतो. ज्या डेअरीमधून नियमित 50 लिटरपेक्षा जास्त दूध संकलन होतं, त्याचे लेखापरीक्षण (ऑडिट) नियमित केलं जातं, तसचे त्या डेअरीची निवडणूक नियमानुसार पार पडते अशाच डेअरी गोकुळच्या मतदानासाठी पात्र ठरतात.

प्रतिनिधी निवड प्रक्रिया कशी असते?

गोकुळ दूध संघ पात्र संस्थांची यादी दुग्ध निबंधक प्रशासनाकडे पाठवतो
त्यानंतर प्रत्येक पात्र संस्था आपल्या एका प्रतिनिधीचे नाव ठराव करून पाठवते
या प्रतिनिधींच्या आधारे 'प्रारूप मतदार यादी' तयार केली जाते
थकबाकी किंवा पात्रतेबाबतच्या हरकतींची छाननी झाल्यानंतर पात्र प्रतिनिधींची अंतिम मतदार यादी जाहीर केली जाते

संचालक मंडळाच्या जागा व आरक्षण कसं असतं?

गोकुळच्या संचालक मंडळात एकूण 25 निर्वाचित संचालकांच्या जागा असतात

सामान्य प्रवर्ग : 20 जागा
महिला राखीव: 2 जागा
अनुसूचित जाती / जमाती (SC/ST): 1 जागा
इतर मागासवर्गीय (OBC): 1 जागा
भटक्या व विमुक्त जाती-जमाती (VJNT): 1 जागा
याशिवाय तज्ञ संचालक, शासन नियुक्त संचालक आणि कार्यकारी संचालक अशा 3 स्वीकृत जागांचाही यात समावेश असतो

उमेदवारासाठी पात्रता काय?

उमेदवार हा सक्रिय सभासद आणि संस्थेचा ठरावधारक प्रतिनिधी असणे आवश्यक असते
संस्थेच्या उपविधीनुसार आवश्यक सेवांचा वापर केलेला असावा व निर्धारित कालावधीत वार्षिक सर्वसाधारण सभेला उपस्थिती असावी.
उमेदवाराच्या संस्थेकडे कोणत्याही प्रकारचे मासिक शुल्क, कर्ज किंवा इतर देणी थकलेली नसलेले प्रमाणपत्र जोडावे लागते.
आरक्षित प्रवर्गातून निवडणूक लढवणाऱ्या उमेदवारांना संबंधित जात प्रमाणपत्र सादर करणे बंधनकारक असते

25 मतांचा अधिकार, क्रॉस व्होटिंगची शक्यता

अंतिम मतदार यादीतील प्रत्येक ठरावधारक प्रतिनिधीला संचालक मंडळातील 25 उमेदवारांना (विविध प्रवर्गातील पसंतीनुसार) मतदान करण्याचा अधिकार असतो
मतदाराला आपल्या पसंतीने उमेदवार निवडण्याची मुभा असल्यामुळे या निवडणुकीत 'क्रॉस व्होटिंग'ची भीती आणि निकालाबाबत अनिश्चितता असते
गोकुळचे कार्यक्षेत्र संपूर्ण कोल्हापूर जिल्हा असून मतदानासाठी एकच मतदान केंद्र असते
मतदान प्रक्रिया पूर्ण झाल्यानंतर एकाच टप्प्यात मतमोजणी पार पडते

मुद्दा	गोकुळची आकडेवारी
वार्षिक उलाढाल (2025-26)	₹4,185 कोटी
सरासरी दररोज दूध संकलन (2025-26)	16.24 लाख लिटर
पीक दूध संकलन	20 लाख लिटर/दिवसांपेक्षा जास्त
वार्षिक दूध हाताळणी (डेअरी प्लांट)	65.40 कोटी लिटर
दूध उत्पादक	सुमारे 4.91 लाख
गावपातळीवरील दूध संस्था	8,461
दूध संकलन मार्ग	548

कसा आहे गोकुळ निवडणुकीचा कार्यक्रम?

टप्पा	तारीख / वेळ
उमेदवारी अर्ज (नामनिर्देशन) दाखल करणे	15 ते 22 सप्टेंबर 2026
नामनिर्देशन पत्रांची छाननी	23 सप्टेंबर 2026
वैध अर्जांची यादी प्रसिद्ध करणे	24 सप्टेंबर 2026
उमेदवारी अर्ज मागे घेणे	24 सप्टेंबर ते 8 ऑक्टोबर 2026
अंतिम उमेदवार यादी व चिन्ह वाटप	9 ऑक्टोबर 2026
मतदानाचा दिवस	18 ऑक्टोबर 2026
मतमोजणी व निकाल	19 ऑक्टोबर 2026

इतर महत्वाच्या बातम्या

Gokul: गोकुळच्या 'किकवी' दूध पॅकेजिंग प्रकल्प व जमीन खरेदी व्यवहारात 13 कोटींचा हिशेब लागेना, ठाकरे गटाकडून ईडी चौकशी मागणी