Health Care : कोणतीही जखम वा दुखापत नाही, पण पाय अचानक दुखतोय? 'या' जीवनसत्त्वांची कमतरता; जाणून घ्या कारणे आणि उपाय

Sudden Leg Pain Deficiency : विना दुखापत अचानक पाय दुखणे, पेटके येणे किंवा मुंग्या येणे हे शरीरात पोषक तत्वांच्या कमतरतेचे लक्षण असू शकते. जाणून घ्या सविस्तर.

Sudden Leg Pain Deficiency

Source : abp majha

Leg Pain Health News : आपल्या दैनंदिन जीवनात पायात वेदना किंवा त्रास होणे ही एक सामान्य समस्या वाटू शकते. अनेकदा जास्त वेळ उभे राहिल्याने किंवा एकाच जागी बसून राहिल्याने पायात वेदना होणे, पेटके (Cramps) येणे किंवा मुंग्या येणे अशा समस्या जाणवतात. साधारणपणे ही समस्या थोड्या वेळात विश्रांती घेतल्यानंतर आपोआप दूर होते.

मात्र, जर कोणत्याही मेहनतीशिवाय किंवा दुखापतीशिवाय तुमच्या पायात वारंवार अचानक वेदना होत असतील आणि हा त्रास दीर्घकाळ टिकून राहत असेल, तर ते तुमच्या शरीरात काही महत्त्वाच्या पोषक तत्वांची (Nutrients) कमतरता असल्याचे गंभीर संकेत असू शकतात.

Vitamin D Deficiency : व्हिटॅमिन डी कमतरता

आपल्या शरीरातील स्नायू, हाडे आणि मज्जासंस्था (Nerves) सुखरूप कार्य करण्यासाठी व्हिटॅमिन डीची अत्यंत गरज असते. शरीरात व्हिटॅमिन डीची कमतरता निर्माण झाल्यास सतत थकवा, अशक्तपणा आणि शरीरात वेदना जाणवू लागतात. अनेक लोकांना व्हिटॅमिन डीच्या अभावामुळे पाठीत, कंबरेत आणि पायात तीव्र वेदनांचा सामना करावा लागतो. सूर्यप्रकाश हा व्हिटॅमिन डीचा मुख्य स्त्रोत आहे, मात्र गरज भासल्यास डॉक्टरांच्या सल्ल्याने सप्लिमेंट्स घेता येतात.

Calcium Deficiency : कॅल्शियमची कमतरता

अनेकदा लोकांना वाटते की कॅल्शियम फक्त हाडांच्या बळकटीसाठीच आवश्यक असते. मात्र, कॅल्शियमच्या कमतरतेचा थेट परिणाम हाडांसोबतच शरीराच्या स्नायूंवरही (Muscles) होतो. शरीरात कॅल्शियम कमी झाल्यास स्नायूंमध्ये तणाव, खिंचाव आणि अचानक पेटके येण्याचा त्रास सुरू होतो. कॅल्शियमची कमतरता भरून काढण्यासाठी आहारात दूध, दही, पनीर, ताक आणि तिळाचा समावेश करणे फायदेशीर ठरते.

Vitamin B12 Deficiency : व्हिटॅमिन बी 12 मुळे पाय सुन्न पडणे

व्हिटॅमिन बी१२ च्या कमतरतेमुळे नसा आणि स्नायूंमध्ये सुन्नपणा (Numbness), ताण आणि मुंग्या येण्याची समस्या निर्माण होते. अनेक लोकांना रात्री झोपताना पायात गोळा येणे किंवा पेटके येण्याची तक्रार असते, याचे मुख्य कारण व्हिटॅमिन बी 12 ची कमतरता हेच असू शकते. व्हिटॅमिन बी 12 थेट चेतासंस्थेवर परिणाम करते, ज्यामुळे पायात अचानक वेदना सुरू होतात.

Health Tips Leg Pain : संतुलित आहाराने करा कमतरता पूर्ण

शरीरातील पोषक तत्वांची कमतरता भरून काढण्यासाठी दैनंदिन आहारात काही महत्त्वाचे बदल करणे गरजेचे आहे. संतुलित आणि पौष्टिक आहार तुमच्या शरीराला आवश्यक असलेले सर्व व्हिटॅमिन्स आणि मिनरल्स पुरवतो:

हिरव्या भाज्या आणि फळे: आहारात पालेभाज्या, हिरव्या भाज्या आणि हंगामी फळांचा समावेश करा.

दुग्धजन्य पदार्थ व अंडी: दूध, अंडी आणि दुग्धजन्य पदार्थ शरीराला आवश्यक पोषण देतात.

सक्रिय जीवनशैली: नियमित हलका व्यायाम आणि सक्रिय जीवनशैली (Active Lifestyle) तुम्हाला तंदुरुस्त ठेवण्यास मदत करते.

जर पायातील वेदनांची समस्या वारंवार होत असेल आणि आराम पडत नसेल, तर घरगुती उपायांवर अवलंबून न राहता तात्काळ तज्ज्ञ डॉक्टरांचा सल्ला घेणे योग्य ठरेल.

ही बातमी वाचा: