मुंबई : थंडीच्या दिवसांत खोकला किंवा घशात खवखव झाली की अनेक जण ब्रँडी (Brandy) किंवा रम (Rum) पिण्याचा सल्ला देतात. यामुळे घसा मोकळा होतो आणि सर्दीत आराम मिळतो, अशी समजूत आहे. मात्र डॉक्टरांच्या मते हा उपाय पूर्णपणे योग्य नाही. तज्ज्ञ स्पष्ट सांगतात की, खोकला किंवा घशात खवखव यांसारख्या व्हायरल इन्फेक्शनवर (Viral Infection) दारू पिणे हा उपचार नाही, तर एक गैरसमज आहे.
ब्रँडी हा उपचार नाही (Brandy is Not a Treatment)
डॉक्टरांच्या मते, कोमट पाण्यात रम किंवा ब्रँडी घेतल्यास शरीरात थोड्या वेळासाठी उब जाणवते. अल्कोहोलमुळे रक्तवाहिन्या (Blood Vessels) प्रसरण पावतात, त्यामुळे उष्णता जाणवते आणि घशातील वेदना थोड्या वेळासाठी कमी झाल्यासारख्या वाटतात.
काहीजण मध, लिंबू किंवा खडे मसाल्यांसोबत ब्रँडी घेतात, त्यामुळे तात्पुरता आराम मिळू शकतो. पण हा फक्त वरवरचा परिणाम असतो. व्हायरल संसर्गावर त्याचा कोणताही उपचारात्मक परिणाम होत नाही. उलट, नियमित मद्यपानामुळे रोगप्रतिकारक शक्ती (Immunity) कमी होऊ शकते.
तज्ज्ञांचे काय मत आहे? (Expert Opinion)
काही ठिकाणी लहान मुलांनाही सर्दीपासून बचावासाठी एक चमचा ब्रँडी देण्याची चुकीची पद्धत अवलंबली जाते. डॉक्टरांच्या मते, हा प्रकार धोकादायक ठरू शकतो. अल्कोहोलमुळे रक्तातील साखरेची पातळी (Blood Glucose Level) झपाट्याने घसरू शकते, ज्यामुळे झटके (Seizures) येण्याचा धोका वाढतो. तसेच श्वसनासंबंधी अडचणी निर्माण होऊ शकतात आणि मेंदूच्या विकासावरही विपरीत परिणाम होऊ शकतो. त्यामुळे मुलांना कोणत्याही परिस्थितीत अल्कोहोल देणे टाळावे.
मग काय करावे? (Safe Remedies for Cold and Cough)
डॉक्टरांच्या सल्ल्यानुसार, खोकला आणि घशात खवखव झाल्यास गरम हर्बल चहा (Herbal Tea), कोमट पाणी, सूप यांसारखे द्रवपदार्थ अधिक फायदेशीर ठरतात. काही संशोधनानुसार, गरम पेय घेतल्याने खोकला, शिंक, सर्दी यांसारख्या लक्षणांमध्ये तात्काळ आराम मिळू शकतो. शरीर हायड्रेट ठेवणे, पुरेशी विश्रांती घेणे, वाफ घेणे आणि संतुलित आहार घेणे हे उपाय अधिक सुरक्षित आणि परिणामकारक मानले जातात.
एकंदरीत, सर्दी-खोकल्यावर ब्रँडी किंवा रम हा इलाज नसून ते एक मिथक आहे. योग्य उपचार आणि डॉक्टरांचा सल्ला हाच सर्वोत्तम पर्याय आहे.
ही बातमी वाचा: