Tiger Shroff Car Firing Marathi News: मुंबईत जुहू पोलीस स्टेशनपासून अवघ्या 100 मीटरवर अभिनेता टायगर श्रॉफ (Tiger Shroff) याच्या गाडीवर गोळीबार झाला. बाईकवरून आलेल्या तीन अज्ञात हल्लेखोरांनी टायगर श्रॉफच्या गाडीवर दहा गोळ्या ( (Tiger Shroff Car Firing) झाडल्या. या हल्ल्यात टायगर श्रॉफ सुखरूप असला तरी त्याचा कारचालक फिरदोस आणि एक रिक्षाचालक जखमी झाले. जखमींना रुग्णालयात नेण्यासाठी टायगरने स्वतः गाडी चालवल्याची माहिती आहे. विशेष म्हणजे घटनास्थळापासून दिग्दर्शक रोहित शेट्टीचे घर अवघे तीनशे मीटरवर आहे. याआधी सलमान खान, रोहित शेट्टी यांच्या घरांवरही गोळीबार झाला होता. या हल्ल्याची जबाबदारी बिश्नोई गँगने स्वीकारली असून मुख्यमंत्री देवेंद्र फडणवीसांनी पोलीस आयुक्तांना फोन करून कठोर कारवाईचे निर्देश दिलेत, तर मुंबई पोलिसांची आठ पथकं आरोपींच्या शोधासाठी रवाना करण्यात आली आहेत. (Tiger Shroff Car Firing Marathi News)
टायगर श्रॉफवर झालेल्या गोळीबारानंतर मुंबई पोलिसांनी एका संशयिताला ताब्यात घेतलं आहे. मुंबई पोलिसांची आठ पथकं आरोपींच्या शोधासाठी कुर्ला, वांद्रे, कल्याण आणि दादर रेल्वे स्थानक येथे रवाना झाली आहेत. घटनेनंतर टायगर श्रॉफकडेही पोलिसांनी जुजबी चौकशी केल्याची सूत्रांची माहिती आहे. तर सात गोळ्यांच्या पुंगळ्या पोलिसांनी घटनास्थळाहून ताब्यात घेतल्यात न्यायवैद्यक प्रयोगशाळेत या पुंगळ्या पाठवून तपासणी केली जाणार आहे. दरम्यान, बिश्नोई गँगने एक ऑडिओ क्लिप जारी करत टायगर श्रॉफवरील हल्ल्याची जबाबदारी घेतलीच, पण या ऑडिओ क्लिपमधून लॉरेन्स गँगने सलमान खानला धमकी दिली. लॉरेन्स गँगने याआधी सलमान खानच्या घरावरही गोळीबार केला होता. आता पुन्हा धमकी दिल्यानं खळबळ उडाली. अनिल पंडीत आणि हरमन संधू नावाच्या व्यक्तींनी या घटनेची जबाबदारी घेतली आहे. तर या ऑडिओ क्लिपची पुष्टी एबीपी माझा करत नाही.
टायगर प्लिज बाहेर ये..आम्ही कधीपासून थांबलोय, गोळीबार होण्याआधीचा थरकाप उडवणारा VIDEO:
टायगर श्रॉफवर गोळीबार होण्याआधीचा एक व्हिडीओ समोर आला आहे. या व्हिडीओमध्ये टायगर फुटबॉल खेळून आल्यानंतर कारमध्ये बसण्याआधी काही सेकंद उभे राहून पापाराझींना फोटो दिले. यावेळी टायगर मैदानाच्या गेटच्या आतमध्ये उभा होता. परंतु काहीजण टायगर प्लिज बाहेर ये..आम्ही कधीपासून थांबलो आहोत. मस्त दिसतोय..थोडं बाहेर ये...असं कुणीतही हिंदीत बोलत असल्याचं ऐकू येत आहे. मात्र टायगर गेटच्या बाहेर आला नाही. कारमध्ये बसला आणि कारमधूनच मैदानाबाहेर पडला आणि याचवेळी टायगरवर आरोपींकडून 10 राऊंड फायर झाले. त्यामुळे टायगर थोडक्यात बचावल्याचे सांगण्यात येत आहे. सदर घटनेचा थरकाप उडवणारा व्हिडीओही समोर आला आहे.
नेमकं काय घडलं? (Tiger Shroff Car Firing Marathi News)
- रविवार (18 ऑक्टोबर) संध्याकाळ सातची वेळ...अभिनेता टायगर श्रॉफ नेहमीप्रमाणे जुहूच्या पुष्पा पार्क येथील फुटबॉल मैदानावर आला होता टायगर श्रॉफ आल्यामुळे नेहमीप्रमाणे चहाते देखील होते.
- 7 वाजताच्या आसपास टायगर श्रॉफ आपल्या बीएमडब्ल्यू कारमध्ये बसून आपल्या चाहत्यांचा निरोप घेऊन मैदानावरून बाहेर पडलाच होता की चाहत्यांच्या गर्दीत मिसळलेल्या दोघांनी अचानक आपापल्या बंदुका बाहेर काढल्या आणि टायगरच्या दिशेने अंधाधुंद गोळीबार करण्यास सुरुवात केली.
- दहा राऊंड या दोघांनी फायर केल्याची माहिती आहे.
- गोळीबार करताना एकाची बंदूक अडकली तर दुसरा मात्र गोळीबार करतच राहिला.
- गोळीबारानंतर दोघेही बाईकवर बसून फरार झाले.
- या गोळीबारात टायगर श्रॉफला गोळी लागली नसली तरी गाडीच्या फुटलेल्या काचांमुळे तो जखमी झाल्याची माहिती आहे. त्याच्या छातीवर तसेच हाताला जखम झाल्याची माहिती आहे.
- टायगरच्या गाडीचा चालक फिरदौस हा गोळीबारात जखमी झाला असून उमेश चरण हा त्याचा फॅन देखील जखमी झाला आहे.
- चाहत्याच्या थेट छातीत गोळी लागली असून त्याला सध्या Kem रुग्णालयात उपचार सुरू आहेत.
- तर फिरदौसवर नानावटी रुग्णालयात उपचार सुरू आहेत.
- गोळीबाराच्या अल्पावधीतच बिश्नोई टोळीच्या अनिल पंडित आणि हरमन संधू यांनी एक कथित ऑडिओ क्लिप आणि फेसबुक पोस्ट काढत या हल्ल्याची जबाबदारी स्वीकारली.
- दरम्यान गोळीबार केल्यानंतर तिघेही अज्ञात हल्लेखोर आपल्या दुचाकी वरून अंधेरीच्या दिशेने फरार झाल्याची माहिती आहे.
- तसेच हल्ल्यापूर्वी त्यांनी रेकी देखील केली असून घटनास्थळावर सीसीटीव्ही कॅमेरात त्यांच्या हालचाली चित्रित झाल्याची माहिती आहे.
- जुहू पोलीस ठाण्यात टायगर श्रॉफच्या चालकाच्या तक्रारीवर गुन्हा दाखल करण्याची प्रक्रिया सध्या सुरू आहे.
- पोलिसांनी या घटनेचा छडा लावण्यासाठी तब्बल 15 पथक तयार केली असून मुंबई गुन्हे शाखेने देखील समांतर तपास सुरू केला आहे.