Thane Crime: चित्रपट आणि वेब मनोरंजन क्षेत्रातील चकाकीच्या आड दडलेला धक्कादायक प्रकार ठाण्यात उघडकीस आला आहे. अभिनयाच्या संधीचे आमिष दाखवून महिलांना देहव्यापाराच्या जाळ्यात अडकवण्याचा प्रकार सुरू असल्याचे पोलिस तपासातून समोर आले आहे. या प्रकरणी ठाणे पोलिसांनी हिंदी वेब सिरीजमध्ये काम केलेल्या 26 वर्षीय तरुणीला अटक केली आहे. विशेष बाब म्हणजे हीच अभिनेत्री मुलींना ग्राहकांपर्यंत पोहोचवण्याचे काम करत असल्याचे तपासात स्पष्ट झाले. पोलिसांच्या कारवाईत दोन महिलांची सुटका करण्यात आली असून त्यापैकी एक हिंदी मालिकांमध्ये काम करणारी अभिनेत्री असल्याची माहिती अधिकाऱ्यांनी दिली.
नेमकं प्रकरण काय?
या प्रकरणाचा उलगडा अनैतिक मानवी वाहतूक प्रतिबंध विभागाला मिळालेल्या गुप्त माहितीमुळे झाला. संबंधित तरुणी मोठ्या पैशांचे आमिष दाखवून तरुणींना ग्राहकांकडे पाठवत असल्याचा संशय व्यक्त करण्यात आला होता. खात्री करण्यासाठी पोलिसांनी बनावट ग्राहकाच्या माध्यमातून तिच्याशी संपर्क साधला. संवादादरम्यान आरोपीने वेब सिरीज आणि टीव्ही मालिकांमध्ये काम करणाऱ्या मुली उपलब्ध करून देऊ शकते, असे सांगत काही फोटोही पाठवले.
व्यवहार ठरल्यानंतर आरोपी दोन महिलांसह ठाण्यातील वागळे इस्टेट परिसरातील एका हॉटेलमध्ये आली. मात्र, पोलिसांनी आधीच सापळा रचून ठेवला होता. योग्य क्षणी छापा टाकत तिला ताब्यात घेण्यात आले.
वेबसिरीजमध्ये लहानसहान भूमिका पडद्याच्या मागे काळे बेरे
चौकशीत समोर आलेल्या माहितीनुसार, आरोपी तरुणी मुंबईत भाड्याच्या घरात राहत होती आणि वेब सिरीजमध्ये लहान भूमिका करत होती. नियमित उत्पन्न अपुरे पडत असल्याने तिने हा बेकायदेशीर मार्ग स्वीकारल्याचे सांगितले जात आहे. घरखर्च, बहिणीचे शिक्षण, तसेच आई-वडिलांना आर्थिक मदत करण्याच्या कारणामुळे ती या रॅकेटमध्ये सक्रिय झाल्याची माहिती तपासातून पुढे आली. या कारवाईत 40 आणि 48 वर्षांच्या दोन महिलांची सुटका करण्यात आली आहे. आरोपीला न्यायालयाने 26 फेब्रुवारीपर्यंत पोलीस कोठडी सुनावली असून वागळे इस्टेट पोलीस ठाण्यात गुन्हा दाखल करण्यात आला आहे. या प्रकरणात आणखी कोणाचा सहभाग आहे का, याचा पोलिसांकडून पुढील तपास सुरू आहे.