Sangram Chougule : बिग बॉसच्या (Bigg Boss Marathi New Season) घरात वाईल्ड कार्ड म्हणून संग्राम चौघुलेने (Sangram Chougule) एन्ट्री घेतली. त्याच्या येण्याने खेळ पूर्ण बदलून जाईल अशी अपेक्षा प्रेक्षकांना होती. पण असं काहीही झाल्याचं पाहायला मिळत नाहीये. इतकच नव्हे तर संग्रामच्या खेळावर सध्या प्रेक्षकांची बरीच नाराजी असल्याचंही पाहायला मिळतंय. त्यातच अरबाजसोबतच्या लढतीमध्ये संग्रामच्या हाताला गंभीर दुखापत झाली. त्यामुळे संग्रामला सध्या कोणताच टास्क खेळण्याची परवानगी नाही.
संग्रामचा खेळ सुरुवातीपासूनच प्रत्येकला वीक वाटतोय. भाऊच्या धक्क्यावरही रितेश भाऊंनी संग्रामला त्याच्या खेळाविषयी कानउघडणी केली. त्यातच आता संग्रामला दुखापत झाल्याने त्याला वैद्यकीय कारणास्तव घराबाहेरही पडावे लागण्याची शक्यता असल्याचं म्हटलं जातंय. बिग बॉस लवकरच संग्रामला याबाबत निर्णय कळवणार आहेत.
संग्रामच्या डाव्या हाताला दुखापत
संग्रामला अंड घरट्यात ठेवण्याच्या टास्कमध्ये डाव्या हाताला दुखापत झाली. डॉक्टरांच्या सल्ल्यानुसार संग्रामच्या काही वैद्यकीय चाचण्याही करण्यात आल्या आहेत. त्या चाचण्यांचे रिपोर्ट्स येईपर्यंत संग्रामला डाव्या हाताला जास्त ताण न देण्याचा सल्ला देण्यात आला होता. त्यानंतर पुन्हा एकदा बिग बॉसने त्याला बोलावून त्याच्या हाताची स्थिती सांगितली. त्यामुळे संग्रामला कॅप्टन्सीच्या टास्कमध्येही सहभाग घेता आला नाही.
बिग बॉस लवकरच कळवणार निर्णय
पुन्हा एकदा संग्रामने त्याच्या हाताच्या परिस्थितीविषयी कल्पना दिली. संग्रामच्या ज्या चाचण्या करण्यात आल्या त्यामध्ये त्याला फ्रॅक्चर झाल्याचं आढळून आलं. यावर नक्की काय उपचार करावेत याविषयी सध्या डॉक्टरांची चर्चा सुरु असल्याचीही माहिती त्यांनी दिली. संग्रामला झालेली दुखापत गंभीर असल्याचंही यावेळी बिग बॉसने सांगितलं. बिग बॉसने म्हटलं की, तुम्हाला सध्या किती दुखापत होत आहे,याची बिग बॉसला जाणीव आहे. त्यामुळे डॉक्टरांशी बोलून योग्य निर्णय घेतला जाईल. तोपर्यंत संग्रामला बिग बॉसने काळजी घेण्याचाही सल्ला दिला आहे.