'आई कुठे काय करते'नं निरोप घेतल्यानंतर प्रेक्षकांच्या भेटीला नवी कोरी मालिका, 'आई आणि बाबा रिटायर होत आहेत'

New Serial Aai Aani Baba Retire Hot Aahet: 'आई कुठे काय करते'नं निरोप घेतल्यानंतर प्रेक्षकांच्या भेटीला नवी कोरी मालिका, 'आई आणि बाबा रिटायर होत आहेत' येत आहे.

Upcoming Marathi Serial Ai Aani Baba Retired Hot Aahet

Source : ABP Majha

Upcoming Serial Aai Aani Baba Retire Hot Aahet: नुकत्याच स्टार प्रवाहावरची लोकप्रिय मालिका 'आई कुठे काय करते'नं (Ai Kuthe Kay Karte) प्रेक्षकांचा निरोप घेतला. आवडत्या मालिकेचा शेवटचा भाग पाहून अनेक प्रेक्षक भावूक झाले. तसेच, मालिकेतील कलाकारही भावूक झाल्याचं पाहायला मिळालं. अशातच आता स्टार प्रवाहवर (Star Pravah) एक नवी मालिका प्रेक्षकांच्या भेटीला येत आहे. 'आई आणि बाबा रिटायर होत आहेत' (Aai Aani Baba Retire Hot Aahet), असं प्रेक्षकांच्या भेटीला येत असलेल्या नव्या मालिकेचं नाव आहे. मालिकेचं शीर्षक ऐकताक्षणीच आपल्या डोळ्यासमोर रिटायर्ड झालेले आपले आई-बाबा येतात आणि आपोआप डोळे पाणावतात. 

प्रत्येकाच्या आयुष्यातली अत्यंत महत्त्वाची मात्र तितकीच गृहित धरली जाणारी ही दोन हक्काची माणसं. आयुष्यभर खस्ता खाऊन आईवडील आपल्या मुलांना लहानाचं मोठं करतात. त्यांना नाऊ-माखू घालण्यापासून शिकून सवरुन स्वतःच्या पायावर उभं करण्यापर्यंत सगळं अगदी काटोकोरपणे या दोन व्यक्ती करतात. पण, मुलं शिकून स्वत:च्या पायावर उभी राहिली की, त्यांच्या संसारात रमूनही जातात. आई-वडील मात्र घरच्या जबाबदारीतून कधीही रिटायर होत नाहीत. मुलं, त्यांचं शिक्षण, त्यांची नोकरी, त्यांचं लग्न आणि नंतर नातवंडं एकामागोमाग येणाऱ्या या जबाबदारीच्या चक्रात ते नकळतपणे अडकून जातात. आई आणि बाबा रिटायर होत आहेत, ही मालिका देखील अशाच एका जोडप्याभोवती फिरते, ज्यांना खरंतर घरच्या जबाबदाऱ्यांमधून निवृत्त तर व्हायचं आहे, मात्र न संपणाऱ्या जबाबदाऱ्यांमध्ये ते अडकले जातात. दिग्गज कलावंत निवेदिता सराफ आणि मंगेश कदम या नव्या मालिकेतून भेटीला येणार आहेत.

या मालिकेतल्या व्यक्तिरेखेविषयी सांगताना निवेदिता सराफ म्हणाल्या, आमच्या वयाच्या नटांची नेहमी एक खंत असते की, आता आपल्यापाशी अनुभवाची शिदोरी आहे. मात्र तरीही आई-वडिलांच्या भूमिकांमध्ये न अडकता आपल्यासाठीही मध्यवर्ती भूमिका लिहिली जावी. टीव्ही माध्यमाची मी आभारी आहे की, आम्हाला मध्यवर्ती घेऊन भूमिका लिहिल्या जात आहेत. या मालिकेतलं सुधा हे पात्र मला खूपच भावलं. 'माझ्यासोबत आता तू देखील  संसारातून रिटायर हो' हे नवऱ्याचं म्हणणं तिला पटतं, मात्र तिचं मन मात्र हे मानायला तयार नसतं. घर-संसारात तिचा जीव अडकला आहे. प्रत्येक गृहिणीला आपलसं वाटेल असं हे पात्र आहे."

अभिनेते मंगेश कदम नव्या मालिकेतील आपल्या भूमिकेबाबत सांगताना म्हणाले की, "मालिकेचा विषय आपल्या खूप जवळचा आहे. रिटायरमेंट नंतर काय करायचं हे प्रत्येकानं ठरवलेलं असतं. यशवंतचं देखील असंच एक स्वप्न आहे. कोकणातल्या घरी आपल्या पत्नीसोबत निवांत आयुष्य जगायचं, असं त्यानं मनाशी ठरवलेलं आहे. यशवंतप्रमाणे जवळपास प्रत्येकाचंच हे स्वप्न असतं. मात्र आई-बाबा आपल्या जबाबदारीमधून कधीही रिटायर होत नाहीत. नात्यांची उत्तम गुंफण असणारी हृदयस्पर्शी कथा घेऊन येतोय याचा खूप आनंद आहे."

स्टार प्रवाहच्या या नव्या मालिकेविषयी सांगताना स्टार प्रवाहचे बिझनेस हेड सतीश राजवाडे म्हणाले, "आई आणि वडील हे आपले दैवत असतात आणि ही मालिका त्यांना आणि त्यांच्या निःस्वार्थपणाला अर्पण आहे. जे बोट धरून आपण चालतो, जी पावलं आपल्याला बळ देतात ती सुद्धा कधीतरी थकतील, त्यांना सुद्धा त्यांच्या जबाबदारीतून कधी तरी मुक्तता मिळायला हवी. त्यांना सुद्धा जाणीव करून देणं फार महत्वाचं असतं की आता आराम करा. मुलं, सुना, जावई, नातवंडं अशी अनेक नाती उलगडत जाणारी गोष्ट आणि आई-वडील त्यांची भूमिका कशी शेवटपर्यंत ठामपणे आणि प्रामाणिकपणे बजावतात हे अधोरेखित करणारी ही मालिका आहे. ही मालिका सर्वांच्या घरात आणि मनात स्थान मिळवेल यात शंका नाही. तेव्हा पाहायला विसरु नका नवी मालिका आई आणि बाबा रिटायर होत आहेत 2 डिसेंबरपासून दुपारी 2.30 वाजता फक्त स्टार प्रवाहवर."

महत्त्वाच्या इतर बातम्या :