Bigg Boss Marathi 5 Grand Finale : छोट्या पडद्यावरील मनोरंजनाचा 'बॉस' म्हणजेच बिग बॉस मराठी शोचा यंदाचा सीझन प्रचंड गाजला 28 जुलै रोजी सुरु झालेला सदस्यांचा हा प्रवास 14 आठवडे म्हणजे 70 दिवसांनी आज 6 ऑक्टोबर रोजी संपणार आहे. आज बिग बॉस मराठीच्या ग्रँड फिनालेमध्ये ट्रॉफीवर कोण नाव कोरणार याकडे अवघ्या महाराष्ट्राचं लक्ष लागलं आहे. यंदाच्या सीझनला महाराष्ट्राने भरभरुन प्रेम दिलं. टीआरपीच्या बाबतीत बिग बॉस मराठीच्या पाचव्या सीझनने आधीच्या सीझनचे सर्व रेकॉर्ड्स मोडले आहेत.
बिग बॉस मराठी 5 चा विजेता कोण?
बिग बॉस मराठीच्या पाचव्या पर्वाच्या विजेत्याची आज घोषणा होईल. याकडे सर्वांच्या नजरा लागल्या आहे. गेल्या काही आठवड्यापासून शोपासून दूर असलेला महाराष्ट्राचा लाडका भाऊ रितेश देशमुख आज पुन्हा एकदा आपल्या लयभारी स्टाईलने ग्रँड फिनाले होस्ट करणार आहे. आपल्या आवडत्या सदस्याला जिंकवण्यासाठी बिग बॉसप्रेमींनी सदस्यांना भरभरून व्होटिंग केलं आहे. दरम्यान, बिग बॉस मराठी जिंकणाऱ्याला किती रुपये धनराशी मिळणार असा प्रश्न अनेकांना पडला आहे. बिग बॉस मराठी सीझन 5 जिंकल्यावर मिळणार बक्षिसाची रक्कम किती ते जाणून घ्या.
बिग बॉस मराठी 5 च्या विजेत्याला किती बक्षीस मिळणार?
बिग बॉस मराठी पाचव्या पर्वाच्या विजेत्यासाठी 25 लाख रुपये बक्षीस ठेवण्यात आलं होतं, पण घरातील सदस्यांनी वेगवेगळ्या टास्कमध्ये ही रक्कम जिंकावी लागणार होती. यानंतर बिग बॉसच्या घरातील सदस्यांनी चक्रव्यूह टास्कमध्ये 25 लाख रुपयांपैकी 8.6 लाख रुपये जिंकले होते. त्यानंतर पहिल्या तिकीट टू फिनालेच्या टास्कनंतर बिग बॉस मराठी सीझन 5 च्या विजेत्याला मिळणाऱ्या बक्षिसाच्या रक्कमेत वाढ झाली. या टास्कमध्ये स्पर्धकांना त्यांची किंमत ठरवायची होती. जो सदस्य टास्क जिंकेल त्याची किंमत बक्षिसाच्या रकमेत वाढवण्यात येणार होती. सूरजने हा टास्क जिंकल्यावर त्याची किंमत सहा लाख रुपये बक्षिसाच्या रकमेत जमा झाल्याने बिग बॉस मराठी विजेत्याच्या बक्षिसाठी रक्कम आता 14.6 लाख रुपये झाली आहे.
आज बिग बॉस मराठी 5 चा ग्रँड फिनाले
बिग बॉस मराठीच्या पाचव्या सीझनच्या टॉप 6 सदस्यांमध्ये आज ग्रँड फिनाले पार पडेल. सूरज चव्हाण, अभिजीत सावंत, अंकिता वालावलकर, धनंजय पोवार, निक्की तांबोळी आणि जान्हवी किल्लेकर यापैकी एका सदस्याचं नाव बिग बॉस मराठी सीझन 5 च्या ट्रॉफीवर कोरलं जाईल. आज बिग बॉस सीझन 5 चा विजेता मिळेल. त्याआधी बिग बॉस नवीन ट्विस्ट आणणार का आणि बक्षिसाच्या रकमेत वाढ करत स्पर्धकांना सुखद धक्का देणार का, हे आज ग्रँड फिनालेमध्ये पाहावं लागणार आहे.
महत्त्वाच्या इतर बातम्या :