Zapuk Zupuk Box Office Collection Day 3: वाटलं एक अन् घडलं भलतंच, सूरज चव्हाणची क्रेझ असूनही फिका पडला 'झापुक झुपूक'; किती कमावले?
Zapuk Zupuk Box Office Collection day 3: बिग बॉस मराठीमुळे सूरजचा मिळालेली प्रसिद्ध आणि अवघ्या महाराष्ट्रानं त्याच्यावर केलेला प्रेमाचा वर्षाव पाहिला तर, सूरज चव्हाणचा 'झापुक झुपूक' चित्रपट रिलीज होताच, बॉक्स ऑफिसवर धुवांधार कमाई करेल असंच एकंदरीत चित्र होतं. पण, घडलं उलटच.
Zapuk Zupuk Box Office Collection day 3: 'बिग बॉस मराठी'च्या (Bigg Boss Marathi) पाचव्या पर्वाचा विजेता गोलिगत स्टार सूरज चव्हाण (Suraj Chavhan) सध्या त्याच्या नव्या सिनेमामुळे चर्चेत आहे. गेल्या आठवड्यातल्या शुक्रवारी सूरजचा सिनेमा 'झापुक झुपूक' (Zapuk Zupuk) रिलीज झाला. जिओ स्टुडिओजनं या सिनेमाची निर्मिती केली आहे. तर, केदार शिंदे दिग्दर्शित या सिनेमात मराठी इंडस्ट्रीतील अनेक दिग्गज कलाकार झळकले आहेत. सूरजनं ज्यावेळी 'बिग बॉस मराठी'ची ट्रॉफी उंचावली, त्याचवेळी दिग्दर्शक केदार शिंदेंनी, त्याच मंचावर सूरजच्या आगामी सिनेमाची घोषणा केली होती. आता तब्बल वर्षभराच्या आतच सूरजचा सिनेमा थिएटरमध्ये रिलीज करण्यात आला आहे. 'झापुक झुपूक' सिनेमाचा (Zapuk Zupuk Movie) टीझर आणि ट्रेलर आल्यानंतर प्रेक्षकांनी लाईक्स आणि कमेंट्सचा पाऊस पाडला होता. पण, प्रत्यक्षता सिनेमा रिलीज झाल्यानंतर मात्र, चित्र काहीसं वेगळंच पाहायला मिळत आहे.
बिग बॉस मराठीमुळे सूरजचा मिळालेली प्रसिद्ध आणि अवघ्या महाराष्ट्रानं त्याच्यावर केलेला प्रेमाचा वर्षाव पाहिला तर, सूरज चव्हाणचा 'झापुक झुपूक' चित्रपट रिलीज होताच, बॉक्स ऑफिसवर धुवांधार कमाई करेल असंच एकंदरीत चित्र होतं. मात्र, चित्रपट रिलीज झाला आणि अगदी उलट चित्र पाहायला मिळालं. आपल्या प्रेमाचा वर्षाव करून सूरज चव्हाणला बिग बॉस मराठीची ट्रॉफी मिळवून देणाऱ्या महाराष्ट्रातील त्याच्या फॅन्सनी सिनेमाकडे मात्र पाठ फिरवल्याचं पाहायला मिळतंय. सूरजचा सिनेमाचं पहिल्या तीन दिवसांचं कलेक्शन पाहून तरी असंच दिसतंय.
'झापुक झुपूक'चं पहिल्या तीन दिवसांचं कलेक्शन किती?
केदार शिंदे दिग्दर्शित आणि सूरज चव्हाण अभिनीत 'झापुक झुपूक' सिनेमा गेल्या आठवड्यातल्या शुक्रवारी रिलीज करण्यात आला खरा, मात्र बंपर ओपनिंग करणार असं वाटणाऱ्या 'झापुक झुपूक'ची ओपनिंग फारच संथ झाली. त्यानंतर वीकेंडला या सिनेमाच्या कमाईत वाढ होईल, असं वाटलं होतं. पण, एकंदरीत कलेक्शनवरुन मात्र तसं दिसत नाही. चित्रपटाची तीन दिवसांची कमाई एक कोटींहूनही कमीच आहे. 'झापुक झुपूक'चं पहिल्या तीन दिवसांचं कलेक्शन फक्त आणि फक्त काही लाखांमध्येच आहे.
| दिवस | कलेक्शन |
| पहिला दिवस | 24 लाख |
| दुसरा दिवस | 24 लाख |
| तिसरा दिवस | 19 लाख |
| एकूण | 67 लाख |
इंडस्ट्रीतील सिनेमांच्या बॉक्स ऑफिस कलेक्शन ट्रॅक करणाऱ्या सॅकनिल्कनं दिलेल्या आकडेवारीनुसार, 'झापुक झुपूक'नं भारतात पहिल्या दिवशी 24 लाख रुपयांचं कलेक्शन केलं. दुसऱ्या दिवशीसुद्धा 24 लाखांचीच कमाई केली. तर, रविवारी म्हणजेच, सिनेमा प्रदर्शित झाल्यानंतरच्या पहिल्या विकेंडला फक्त आणि फक्त 19 लाखांची कमाई केली.
'झापुक झुपूक'च्या पहिल्या तीन दिवसांच्या कमाईबाबत बोलायचं झालं तर, आधीच्या दोन्ही दिवसांपेक्षा तिसऱ्या दिवशी 'झापुक झुपूक'च्या कमाईत कमालीची घट झाली. सिनेमाची पहिल्या तीन दिवसांची कमाई फक्त 67 लाख रुपयेच आहे. दरम्यान, वरील आकडेवारी सॅकनिल्कनं दिलेल्या आकडेवारीवरुन देत आहोत. या आकड्यांमध्ये बदल होऊ शकतात. 'झापुक झुपूक' सिनेमाच्या टीमनं अद्याप सिनेमाच्या कलेक्शनची अधिकृत आकडेवारी जाहीर केलेली नाही.
महत्त्वाच्या इतर बातम्या :
महत्त्वाच्या बातम्या
