Eetha Release Date Update: सुपरस्टार यशच्या 'टॉक्सिक: अ फेरीटेल फॉर ग्रोन-अप्स' (Toxic) या बहुप्रतिक्षित चित्रपटाची प्रेक्षक आतुरतेने वाट पाहत आहेत. चित्रपटाच्या टीझरला मिळालेल्या जबरदस्त प्रतिसादामुळे 'टॉक्सिक' बॉक्स ऑफिसवर मोठा धमाका करेल, अशी चर्चा आहे. अशातच आता श्रद्धा कपूरच्या 'ईठा' (Eetha) या चित्रपटाच्या प्रदर्शनाबाबत मोठी माहिती समोर आली आहे. मिळालेल्या वृत्तानुसार,'टॉक्सिक'सोबत होणारा बॉक्स ऑफिस क्लॅश टाळण्यासाठी 'ईठा'ची रिलीज डेट बदलण्याचा विचार सुरू आहे. हा चित्रपट यापूर्वी 28 ऑगस्ट 2026 रोजी प्रदर्शित होणार होता.
'ईठा' आणि 'टॉक्सिक'मध्ये होणार होती टक्कर
महाराष्ट्रातील प्रसिद्ध तमाशा आणि लावणी सम्राज्ञी विठाबाई भाऊ मांग नारायणगावकर यांच्या जीवनावर आधारित 'ईठा' या चित्रपटात श्रद्धा कपूर प्रमुख भूमिकेत दिसणार आहे. मराठी लोककलेतील एका दिग्गज कलाकाराचा प्रेरणादायी प्रवास या चित्रपटातून मांडण्यात येणार आहे. दुसरीकडे, यशचा 'टॉक्सिक: अ फेरीटेल फॉर ग्रोन-अप्स' हा चित्रपट 26 ऑगस्ट 2026 रोजी जगभरातील चित्रपटगृहांमध्ये प्रदर्शित होणार आहे. त्यामुळे अवघ्या दोन दिवसांच्या अंतराने दोन्ही चित्रपट प्रदर्शित होणार असल्याने बॉक्स ऑफिसवर मोठी टक्कर होण्याची शक्यता होती.
रिलीज डेट बदलण्याची तयारी?
बॉलिवूड हंगामाच्या अहवालानुसार,'ईठा'चे निर्माते मॅडॉक फिल्म्स चित्रपटाची रिलीज डेट बदलण्याच्या विचारात आहेत.चित्रपट नियोजित तारखेपूर्वी प्रदर्शित करायचा की काही दिवस पुढे ढकलायचा, याबाबत सध्या चर्चा सुरू आहे. मात्र,28 ऑगस्टलाच 'ईठा' प्रदर्शित होण्याची शक्यता अत्यंत कमी असल्याचं अहवालात नमूद करण्यात आलं आहे. निर्माते लवकरच नव्या प्रदर्शन तारखेची अधिकृत घोषणा करू शकतात.
क्लॅश टाळण्यामागचं कारण काय?
ट्रेड विश्लेषकांच्या मते,'टॉक्सिक' आणि 'ईठा' या दोन्ही चित्रपटांमध्ये बॉक्स ऑफिसवर चांगली कमाई करण्याची क्षमता आहे.अशा परिस्थितीत दोन्ही चित्रपट एकाच काळात प्रदर्शित झाल्यास प्रेक्षक विभागले जाऊ शकतात आणि दोन्ही चित्रपटांच्या कमाईवर परिणाम होण्याची शक्यता आहे. विशेषतः 'ईठा'ला महाराष्ट्रात सांस्कृतिक विषयामुळे मोठा प्रतिसाद मिळू शकतो.त्यामुळे अनावश्यक स्पर्धा टाळण्यासाठीच निर्माते रिलीज डेट बदलण्याचा विचार करत असल्याची चर्चा रंगली आहे.