Bollywood Salman VS Shahrukh Khan Networth: बॉलीवूडमध्ये स्टारडम, चाहतावर्ग आणि लक्झरी लाईफस्टाईल म्हटलं की दोन नावं हमखास समोर येतात... शाहरुख खान आणि सलमान खान. एकीकडे ‘किंग खान’ म्हणून जगभर प्रसिद्ध असलेला शाहरुख, तर दुसरीकडे चाहत्यांच्या गळ्यातला ताईत ठरलेला ‘भाईजान’ सलमान. दोघांनीही आपल्या अभिनयाने, ब्लॉकबस्टर चित्रपटांनी आणि दमदार व्यक्तिमत्त्वाने इंडस्ट्रीवर अनेक वर्षं राज्य केलं आहे. मन्नतपासून प्रायव्हेट जेटपर्यंत, आलिशान गाड्यांपासून कोट्यवधींच्या ब्रँड डील्सपर्यंत या दोघांची लाईफस्टाईल नेहमीच चर्चेत असते. पण चाहत्यांच्या मनात कायम एक प्रश्न असतो... या दोघांमध्ये सर्वात श्रीमंत कोण? ‘किंग’चं पारडं जड की ‘सुलतान’चं?
किती आहे शाहरुखकडे संपत्ती ?
हुरुन ग्लोबल रिच लिस्ट 2026 नुसार, शाहरुख खानची एकूण संपत्ती तब्बल 1.3 अब्ज डॉलर म्हणजेच जवळपास 10 हजार 800 कोटी रुपये इतकी आहे. अभिनयासोबतच रेड चिलीज एंटरटेनमेंट, IPL टीम कोलकाता नाईट रायडर्स आणि अनेक ब्रँड एंडोर्समेंटमधून शाहरुख मोठी कमाई करतो. दिल्लीतून मुंबईत आलेल्या या अभिनेत्याने स्वतःच्या मेहनतीच्या जोरावर उभं केलेलं साम्राज्य आज जगभर चर्चेत आहे.
किती आहे सलमानकडे संपत्ती?
दुसरीकडे सलमान खानची लोकप्रियता आणि कमाईदेखील कमी नाही. ‘सियासत डेली’च्या रिपोर्टनुसार, 2026 मध्ये सलमानची संपत्ती अंदाजे 3,225 कोटी रुपये इतकी आहे. सलमान एका चित्रपटासाठी 100 कोटींहून अधिक मानधन घेतो. शिवाय ‘बिग बॉस’ या लोकप्रिय रिअॅलिटी शोमधूनही तो कोट्यवधींची कमाई करतो.मिळालेल्या माहितीनुसार, सलमान खान ब्रँड एंडोर्समेंटसाठी 7-10 कोटी रुपये घेतो. अनेक करारांमधूनच त्याचे वार्षिक उत्पन्न अंदाजे 150-300 कोटी रुपयांपर्यंत पोहोचते. रिपोर्टनुसार, एका सीझनसाठी सलमानला 150 ते 200 कोटी रुपये मिळतात. याशिवाय ‘Being Human’ या ब्रँडमधून आणि ‘Salman Khan Films’ या निर्मिती संस्थेमधूनही त्याचं मोठं उत्पन्न होतं. आकडेवारी पाहिली तर संपत्तीच्या बाबतीत शाहरुख खान सध्या सलमान खानपेक्षा खूप पुढे असल्याचं दिसतं. मात्र लोकप्रियता, फॅन फॉलोइंग आणि बॉक्स ऑफिसवरील दबदबा या बाबतीत दोघांचाही चाहता वर्ग तितकाच वेडा आहे.