Sarja Marathi Movie : 'सर्जा' (Sarja) या मराठी सिनेमाची घोषणा झाल्यापासून हा सिनेमा चर्चेत आहे. या सिनेमातील गाणी काही दिवसांपूर्वीच संगीतप्रेमींच्या भेटीला आली आहेत. 'जीव तुझा झाला माझा', 'धड धड...' आणि 'संगतीनं तुझ्या' ही सिनेमातील गाणी प्रेक्षकांच्या पसंतीस उतरली आहेत. आता या सिनेमाचा उत्कंठावर्धक ट्रेलर रिलीज झाला आहे.
'सर्जा' सिनेमाची झलक दाखवणाऱ्या ट्रेलरने सर्वांचं लक्ष वेधून घेतलं आहे. सोशल मीडियावरदेखील या सिनेमाचा ट्रेलर चर्चेत आहे. 'सर्जा' या सिनेमाच्या दिग्दर्शनाची धुरा धनंजय खंडाळे यांनी सांभाळली आहे. या सिनेमातील नायक-नायिकेच्या जोडीची अनोखी केमिस्ट्री रसिकांना आकर्षित करणारी ठरणार आहे. या सिनेमाच्या माध्यमातून रोहित चव्हान आणि ऐश्वर्या भालेराव ही नवी कोरी जोडी प्रेक्षकांच्या भेटीला येणार आहे.
'सर्जा' या सिनेमाचं वैशिष्ट्य काय आहे?
'सर्जा' ही रोमॅंटिक लव्हस्टोरी असली तरी यात समाजातील विविध घटक आणि त्यांच्याशी निगडीत असलेल्या मुद्द्यांचा उहापोह करण्याचा प्रयत्न केल्याचं पहायला मिळणार आहे. प्रेमाचे विविध पैलू, प्रेमाचे बदलत रंग, प्रेमाच्या नाना छटा आणि कठीण प्रसंगांमध्येही खुलून येणारं खरं प्रेम हे 'सर्जा' या सिनेमाचं वैशिष्ट्य आहे.
'सर्जा'बद्दल दिग्दर्शक धनंजय खंडाळे म्हणाले...
'सर्जा' सिनेमाबद्दल बोलताना दिग्दर्शक धनंजय खंडाळे म्हणाले की,"आजवर बऱ्याच प्रेमकथा मोठ्या पडद्यावर आल्या असल्या तरी 'सर्जा'ची कथा खऱ्या अर्थाने अनोखी वाटावी अशी आहे. प्रेम ही एक अशी भावना आहे जी कोणत्याही बंधनात बांधता येऊ शकत नाही. कितीही संकटं आली तरी त्यावर मात करण्याची शक्ती प्रेमात असते". 'सर्जा' सिनेमाची कथा प्रेमाची नवी व्याख्या मांडणारी असून, संगीताच्या माध्यमातून रसिकांच्या मनात घर करणारी ठरेल अशी आशा खंडाळे यांनी व्यक्त केली".
'सर्जा' या सिनेमाच्या दिग्दर्शनाची धुरा सांभाळण्यासोबत धनंजय यांनी या सिनेमाची कथा, पटकथा, संवादलेखन आणि गीतलेखनही केलं आहे. मराठीतील आघाडीच्या कलाकारांसह नवोदित कलाकारांची निवड केली जाणं हे 'सर्जा' या सिनेमाचं मुख्य वैशिष्ट्य आहे. या सिनेमाद्वारे जुन्या आणि नव्या कलाकारांच्या अभिनयाचा सुरेख संगम घडवण्यात आला आहे.
14 एप्रिलला 'सर्जा' येणार प्रेक्षकांच्या भेटीला!
अनिल नगरकर, तुषार नागरगोजे, आकाश पेटकर, ज्योती शेतसंधी, जगन्नाथ घाडगे, विष्णू केदार, प्रशांत पिसे, बालकलाकार गौरी खंडाळे, कुणाल गायकवाड, सानिया मुलानी हे कलाकार 'सर्जा' या सिनेमात महत्त्वाच्या भूमिकेत झळकणार आहेत. हा सिनेमा येत्या 14 एप्रिलला प्रेक्षकांच्या भेटीला येणार आहे. 'सर्जा' नावाचा सिनेमा याआधीदेखील प्रेक्षकांच्या भेटीला आला होता. या सिनेमात अजिंक्य देव मुख्य भूमिकेत होते. त्यावेळी हा सिनेमा चांगलाच गाजला. आजही सिनेरसिक आवडीने तो सिनेमा पाहतात.
ट्रेलर पाहा :
संबंधित बातम्या