Rakhi Sawant confession room controversy in BB Marathi: बिग बॉसच्या सहाव्या सिझनला प्रेक्षकांकडून भरभरून प्रतिसाद मिळत आहे. या रिअॅलिटी शोमधील स्पर्धकांची आणि त्यांच्या खेळाची प्रचंड चर्चा होत आहे. या शोमध्ये चौथ्या आठवड्यात राखी सावंतने वाइल्ड कार्ड एन्ट्री म्हणून घेतली. एन्ट्री घेताच तिनं आपल्या कॉमेडीचा तडका लावलाच. जेव्हापासून तिनं बिग बॉसच्या सहाव्या सिझनमध्ये एन्ट्री घेतली, तेव्हापासून या शोची अधिक रंगत वाढली. काही स्पर्धकांसोबत तिनं पंगा घेतला. तर, काही स्पर्धकांसोबत तिची चांगली गट्टी जमली. तिची एन्ट्रीच लक्षवेधी ठरली. तिनं नागीन लूक करुन बिग बॉसच्या घरात एन्ट्री केली होती. दरम्यान, राखी सावंतचा एक नवा प्रोमो समोर आला आहे. या प्रोमोतून तिचा प्रवास इथेच संपला का? असा प्रश्न उपस्थित होत आहे.
कलर्स मराठीने एक प्रोमो सोशल मीडियात शेअर केला आहे. या प्रोमोमध्ये बिग बॉस राखी सावंतवर नाराज असल्याचं दिसून येत आहे. काही दिवसांपासून राखी सावंत आपला राग, संताप बिग बॉसच्या घरातील वस्तूंवर काढत आहे. तिनं घरातील वस्तूंची तोडफोड केली आहे. बिग बॉसच्या घरात सागर आणि राखीचं भांडण झालं होतं. तेव्हा तिनं घरातील वस्तूची तोडफोड केली होती. तिनं काही वस्तूंची नासाडीही केली. यामुळे बिग बॉसनं कन्फेशन रुममध्ये बोलावून घेतलं. ती कन्फेशन रुममध्ये जाते. 'आम्ही तुमच्या विरोधात कठोर पावलं उचलणार आहोत', असं बिग बॉस राखीला म्हणतात.
मग राखी दचकते. ती घाबरते. नंतर कन्फेशन रुममध्ये काही माणसं येतात आणि तिला जबरदस्ती बाहेर काढतात. बिग बॉसच्या घरातून जायचं नाही, असं ती म्हणते. तरी देखील तिला खेचून बाहेर नेले जात आहे, असं प्रोमोच्या व्हिडिओतून दिसत आहे. या प्रोमोवरुन, काहींनी राखीचा प्रवास इथेच थांबला, असं तर्क लावला. की आणखी काही ट्विस्ट घडणार? हे लवकरच उघड होईल. सध्या या एपिसोडचा प्रोमो सोशल मीडियात व्हायरल होत आहे.
काल भाऊचा धक्का हा एपिसोड झाला. या एपिसोडमध्ये एक नसून दोन स्पर्धक एलिमिनेट झाले. करण सोनावणे आणि आयुष संजीव या दोन स्पर्धकांना घर सोडावं लागलं. अनपेक्षित निकाल पाहून प्रेक्षकांना धक्का बसला.