Lalit Prabhakar: प्रत्येक कलाकाराची पडद्यामागची एक वेगळी दुनिया असते. एखाद्या गोष्टीकडे पाहण्याची नजर वेगळी असते. ही मंडळी सतत स्वतः चं कुतूहल जिवंत ठेवण्यासाठी, आतली प्रतिभा तपासून वेगवेगळ्या गोष्टी ट्राय करत असतात. त्यासाठी एखाद्या वस्तूची साथ मिळते तर कधी एखादा रंगाची. 'आनंदी गोपाळ', 'मिडीयम स्पायसी', 'आरपार' अशा गाजलेल्या चित्रपटांमधून प्रेक्षकांसमोर आलेला अभिनेता ललित प्रभाकर (Lalit Prabhakar) सध्या अशाच एका गोष्टीमुळे चर्चेत आलाय. एका मागोमाग एक दमदार प्रोजेक्ट करत चाललेल्या या अभिनेत्याचा 'सुपर डुपर' नावाचा चित्रपट प्रेक्षकांसमोर आलाय. या चित्रपटाच्या निमित्ताने तो अनेक ठिकाणी मुलाखती देताना दिसतोय. 'मित्र म्हणे लाईम लाईट ' वर बोलताना त्याने घरातील एका खोलीला काळा रंग दिल्याचे सांगितलं. यानंतर सोशल मीडियावर ही एकच चर्चा रंगली आहे.
खरंतर प्रत्येकाला आपलं घर आपल्या कंफर्टनुसार ठेवायचं असतं. अनेक जण त्यांच्या घराला फ्रेश, फिकट रंगाचे, घरात आणखी उजेड आणणारे रंग देणं पसंत करतात. पण, ललितने घरातील भिंतीला काळा दिलाय. पण त्याने असं का केलं याचं कारणही त्याने सांगितलं.
काय म्हणाला ललित ?
ललित म्हणाला ' अख्ख्या घराला काळा रंग नाही दिलाय. पण एक संपूर्ण खोली काळ्या रंगाची केली आहे .मी रंगकाम करायला ज्या माणसांना बोलावलं होतं त्यांना जेव्हा मी हे सांगितलं की काळा रंग द्यायचा आहे तेव्हा तेही हसले. त्यांना जोक वाटला. ते हसत म्हणाले, 'सांगा ना खरं सर कुठला रंग देऊ.' मी पुन्हा एकदा त्यांना सांगितलं की खरंच हा रंग द्यायचा आहे. भिंतींना पण काळाच रंग आणि सीलिंगलाही काळाच रंग . अभिनेत्री निर्मिती सावंत यांनी यामागे कारण काय? असं विचारतात तो आधी मजेने म्हणाला ' नजर लागते म्हणून ' . पण नंतर त्याने खरं कारण सांगितलं. तो म्हणाला ' याची बरीच कारणं आहेत. मला असं खूप एकटं वाटतं तिथे.मला छान वाटतं तिथे. मला असं वाटतं भिंतीमध्ये किंवा वेगळ्या वस्तूंमध्ये आपली नजर मरते. काळ्या रंगात आपली नजर मरत नाही.गावी गेल्यानंतर आपण जेव्हा गच्चीवर झोपतो तेव्हा आपली नजर अनंतापर्यंत जात असते. काळ्या रंगात नजर थांबत नाही. असं मला वाटतं या रंगामुळे छोटी वाटत नाही खोली. काळ्याला काही अंत नसतो. " असं ललित म्हणाला.