Ma Behen: माधुरी दीक्षित, तृप्ती डीमरी आणि रवीकिशन प्रमुख भूमिकेत असलेल्या क्राइम कॉमेडी ड्रामाचा (Crime Comedy Movie) ट्रेलर रिलीज झाला असून सोशल मीडियावर त्याची जोरदार चर्चा सुरू आहे. या चित्रपटात खतरनाक सस्पेन्ससोबत भरपूर कॉमेडीचा तडका पाहायला मिळणार आहे. काही दिवसांपूर्वीच या OTT चित्रपटाची घोषणा करण्यात आली होती. आता ट्रेलर समोर आल्यानंतर प्रेक्षकांची उत्सुकता आणखी वाढली आहे. ‘धक-धक गर्ल’ माधुरी दीक्षित नुकतीच ‘देशपांडे’ या वेबसीरिजमध्ये सिरीयल किलरच्या भूमिकेत दिसली होती. आता ती पुन्हा एकदा क्राइमच्या दुनियेत परतली आहे. मात्र, यावेळी क्राइमसोबत जबरदस्त कॉमेडीही पाहायला मिळणार आहे. (OTT Release)
‘मां बहन’चा ट्रेलर चर्चेत
‘मां बहन’च्या ट्रेलरमध्ये अनेक ट्विस्ट आणि सस्पेन्स दाखवण्यात आले आहेत. आई आणि तिच्या दोन मुलींच्या आयुष्यात प्रचंड खळबळ उडते, जेव्हा त्यांच्या घरात शेजारी राहणाऱ्या व्यक्तीचा मृतदेह सापडतो. तो लपवण्यासाठी या तिघींची चांगलीच धावपळ उडते. ट्रेलरची सुरुवात रेखा (माधुरी दीक्षित) आणि तिच्या दोन मुली जया (तृप्ती डिमरी) व सुषमा (धरना दुर्गा) यांच्या सततच्या भांडणांनी होते. दरम्यान, शेजारी राहणारे गुप्ताजी (रवि किशन) हे रेखावर फिदा असतात. पण एक दिवस अचानक गुप्ताजींचा मृतदेह त्यांच्या घरात आढळतो आणि तिथून कथेला मोठं वळण मिळतं. यानंतर हे गुपित लपवण्याच्या प्रयत्नात तिघींच्या आयुष्यात नवनवीन अडचणी निर्माण होतात. 2 मिनिटे 46 सेकंदांचा हा ट्रेलर सस्पेन्स, क्राइम आणि कॉमेडीने भरलेला आहे.
कधी आणि कुठे रिलीज होणार?
सुरेश त्रिवेणी यांच्या दिग्दर्शनाखाली तयार झालेला ‘मां बहन’ हा चित्रपट थिएटरमध्ये नव्हे तर थेट नेटफ्लिक्सवर रिलीज होणार आहे. 4 जून 2026 पासून हा चित्रपट OTT वर स्ट्रीम होणार आहे.चित्रपटात माधुरी दीक्षित, तृप्ती डिमरी, धरना दुर्गा आणि रवि किशन यांच्यासोबत अरुणोदय सिंह आणि गीतांजली कुलकर्णी यांच्याही महत्त्वाच्या भूमिका आहेत.