Kranti Redkar and Bharat Jadhav : मराठी चित्रपटसृष्टीतील विनोदी आणि ग्रामीण भागातील आधारित "जत्रा: ह्यालागाड रे त्यालागाड" हा चित्रपट 2005 मध्ये प्रेक्षकांच्या भेटीला आला होता. झी टॉकीजच्या बॅनरखाली प्रदर्शित झाला आणि अल्पावधीतच प्रेक्षकांच्या मनावर गारुड निर्माण केलं. हा चित्रपट खऱ्या अर्थाने विनोदी, सामाजिक आणि ग्रामीण जीवनाचे चित्रण करणारा होता. या सिनेमातील 'कोंबडी पळाली' हे गाणं महाराष्ट्रात तुफान गाजलं होतं. अभिनेता भरत जाधव आणि अभिनेत्री क्रांती रेडकर हिने या गाण्यावर जबरदस्त डान्स केला होता.
दरम्यान या सिनेमानंतर 2014 साली फिल्मफेअरच्या एका कार्यक्रमात क्रांती रेडकर आणि भरत जाधव पुन्हा एकदा एकत्र आलेले पाहायला मिळाले होते. दोघांनी या गाण्यावर स्टेजवर भन्नाट डान्स केला होता. हा 2014 चा व्हिडीओ फिल्मफेअरने पुन्हा एकदा शेअर केला आहे. लोकांनी या व्हिडीओवर लाईक आणि कमेंट्सचा पाऊस पाडलाय.
"जत्रा: ह्यालागाड रे त्यालागाड" या चित्रपटाची कथा दोन गावांभोवती फिरते. ह्यालागाड आणि त्यालागाड या दोन गावांमध्ये वारंवार होणाऱ्या वादांमुळे आणि एका जत्रेमुळे निर्माण झालेली स्पर्धा हे कथानकाचे मुख्य केंद्रबिंदू आहे. गावकऱ्यांमध्ये असलेला हुशारीचा अभाव, त्यांचं अंधश्रद्धाळूपण, राजकारण आणि गावगुंडांची फसवणूक या सगळ्या गोष्टी विनोदी पद्धतीने मांडल्या आहेत.
चित्रपटामध्ये भारत जाधव, सिद्धार्थ जाधव, विकास समर्थ, प्रियदर्शन जाधव, विजय चव्हाण, संजय खापरे यांसारख्या उत्कृष्ट हास्यकलाकारांचा समावेश आहे. विशेषतः सिद्धार्थ जाधव आणि भारत जाधव यांची टायमिंग, हावभाव, आणि संवादफेक प्रेक्षकांना खळखळून हसवते. "ह्यालागाड - त्यालागाड" हे संवाद तर प्रेक्षकांच्या ओठांवर अजूनही आहेत.
दिग्दर्शक केदार शिंदे यांनी ग्रामीण संस्कृती आणि हास्याची उत्तम सांगड घालून हा चित्रपट प्रभावीपणे सादर केला आहे. चित्रपट विनोदी असला तरी त्यामागे ग्रामीण समाजातील काही महत्त्वाचे मुद्दे खूप सहजपणे अधोरेखित होतात — जसे की गावोगावी चालणारे वाद, राजकारण्यांची फसवणूक, गावकऱ्यांमध्ये असलेला अंधानुकरणाचा प्रभाव इत्यादी. जत्रा हा चित्रपट आजही विनोदप्रिय प्रेक्षकांमध्ये तितकाच लोकप्रिय आहे. त्यातील संवाद, प्रसंग आणि पात्रं ही मराठी विनोदी सिनेमाची खरी शान आहेत. अनेक मीम्स, सोशल मीडियावरील रील्समध्येही या चित्रपटाचे संदर्भ अजूनही वापरले जातात.
इतर महत्त्वाच्या बातम्या
भारतातील सर्वात महागडा सिनेमा, 1600 कोटींचं बजेट; रणबीर कपूर की यश कोणाचं मानधन जास्त?