KGF Chapter 2 Released Date काही चित्रपट हे विविध निकषांवर लोकप्रियतेचं शिखर गाठतात. यामध्ये कलाकारांचा दमदार अभिनय, चित्रपटाचं दिग्दर्शन आणि इतरही अनेक गोष्टी लक्ष वेधून जातात. चित्रपट रसिकांचा या कलेप्रती असणारा कल पाहता आता यामध्ये कुठेही भाषेच्या मर्यादाही दिसून येत नाहीत. त्यामुळंच देशाच्या कानाकोपऱ्यातील कलाकार हे त्यांच्या कलेच्या बळावर प्रसिद्धीझोतात येत आहेत. अशाच कलाकारांपैकी एक नाव म्हणजे अभिनेता यश.
दाक्षिणात्य चित्रपटसृष्टीतील हे नाव आता सर्वभाषीय प्रेक्षकांना ठाऊक झालं आहे. 'केजीएफ' या चित्रपटाच्या निमित्तानं तो दक्षिण भारताव्यतिरिक्त इतरही प्रेक्षकांच्या मनाचा ठाव घेऊन गेला आणि पाहता पाहता त्याच्या चित्रपटानं, लोकप्रियतेनं सारे विक्रमच मोडले. अशा या अभिनेत्याच्या बहुप्रतिक्षित KGF Chapter 2 या चित्रपटाच्या प्रदर्शनाची तारीख अखेर जाहीर केली जाणार आहे.
काही दिवसांपूर्वी म्हणजेच यशच्या वाढदिवसाच्या निमित्तानं चित्रपटाचा टीझर प्रेक्षकांच्या भेटीला आला होता. ज्यानंतर आता अखेर या बहुचर्चिच चित्रपटाच्या प्रदर्शनाची तारीखही जाहीर होणार आहे. यश, संजय दत्त, रवीना टंडन हे कलाकार या चित्रपटातून झळकणार आहेत.
अभिनेता संजय दत्त यानं सोशल मीडियाच्या माध्यातून दिलेलं वचन पाळलं जाणार आहे... असं लिहित याबाबतची माहिती दिली. आज सायंकाळी 6 वाजून 32 मिनिटांनी ही तारीख जाहीर केली जाणार आहे. 2021 या वर्षाच्या सुरुवातीलाच रसिकांसाठी या चित्रपटाबाबतची अतिशय महत्त्वाची माहिती जाहीर केली जाणार आहे, त्यामुळं प्रेक्षकांची उत्सुकता शिगेला पोहोचली आहे. त्यामुळं आता हा चित्रपट नेमका केव्हा प्रदर्शित होतो आणि बॉक्स ऑफिसवरील कोणते नियम मोडतो हे पाहणं औत्सुक्याचं ठरणार आहे.