Kapil Sharma and Lawrence Bishnoi gang : कॉमेडियन कपिल शर्माच्या नेटफ्लिक्सवरील शोच्या उद्घाटनाला अभिनेता सलमान खानला बोलावल्यामुळे कपिल शर्माच्या कॅफेवर गोळीबार करण्यात आलाय. "सलमान खानसोबत जो कोणी काम करेल, त्याला मारुन टाकू", अशी धमकी लॉरेन्स बिश्नोई टोळीचा गँगस्टर हॅरी बॉक्सर याने दिली आहे. याची एक ऑडिओ क्लीप देखील समोर आलीये. यापूढे धमकी देणार नाहीत, तर थेट छातीत गोळ्या घालू, असंही त्याने म्हटलं आहे. सलमान खानसोबत काम करणारी व्यक्ती स्वत:च्या मृत्यूला जबाबदार असेल, असंही हॅरी बॉक्सर बोलतोय. मात्र, या ऑडिओची पुष्टी एबीपी माझा करत नाही.
प्रसिद्ध कॉमेडियन कपिल शर्मा यांच्या कॅनडामधील कॅफेवर पुन्हा गोळीबार झाल्याची माहिती समोर आलीये. त्यानंतर त्याला धमकी देखील देण्यात आलीये. सोशल मीडियावर काही गँगस्टरांनी एक पोस्ट टाकून या गोळीबाराची जबाबदारी स्वीकारली आहे. मुंबई पोलिस आणि सुरक्षा यंत्रणा या बातमीची पडताळणी करत आहेत. माहितीनुसार, कॅनडातील Surrey येथे कपिल शर्माचे Kaps Cafe आहे. या कॅफेवर पुन्हा एकदा गोळीबार झाल्याची माहिती समोर आली आहे. या गोळीबाराची जबाबदारी गोल्डी ढिल्लों आणि लॉरेन्स बिश्नोई गँगने घेतली आहे.
गोळीबाराची ही माहिती सोशल मीडियाच्या माध्यमातून समोर आली आहे. मात्र पोलिस त्याची पडताळणी करत आहेत. गोळीबाराचा एक व्हिडिओदेखील समोर आला आहे. कपिल शर्माच्या कॅफेवर झालेल्या गोळीबाराचा 9 सेकंदांचा व्हिडिओ आहे, ज्यात वारंवार गोळीबाराच्या आवाजाचे स्पष्ट ऐकू येते.
सोशल मीडिया पोस्टमध्ये लिहिले आहे – "जय श्रीराम, सत श्रीअकाल. राम राम सर्व भावांना. आज कपिल शर्माच्या 'कॅप्स कॅफे' (Kaps Cafe), सुरे (Surrey) येथे झालेल्या गोळीबाराची जबाबदारी गोल्डी ढिल्लों आणि लॉरेन्स बिश्नोई गँग स्वीकारते. आम्ही याला फोन केला होता, पण याला रिंग ऐकू आली नाही, म्हणून कारवाई करावी लागली. आता देखील रिंग ऐकू आली नाही तर पुढील कारवाई लवकरच मुंबईत करू."
कपिल शर्माच्या कॅफेवर 6 फेऱ्या गोळीबार
आज कपिल शर्माच्या कॅफेवर 6 फेऱ्या गोळीबार झाल्या, म्हणजेच एकूण 6 गोळ्या झाडल्या गेल्या. सुदैवाने या घटनेत कोणीही जखमी झालेले नाही. Surrey पोलिस तपास करत आहेत. एका महिन्यात दुसऱ्यांदा गोळीबाराची घटना घडली आहे. याआधी 11 जुलै रोजीदेखील येथे गोळीबार झाला होता. त्या प्रकरणातही कॅनडातील सुरे पोलिसांना कुणालाही अटक करता आलेली नाही.
इतर महत्त्वाच्या बातम्या