Jennifer Winget Future Husband William Ishmael: चाईल्ड अॅक्ट्रेस म्हणून इंडस्ट्रीत पाऊल ठेवणाऱ्या जेनिफर विंगेट (Jennifer Winget) हिनं पुढे टेलिव्हिजन इंडस्ट्रीमध्ये (Television Industry) आपला चांगला जम बसवला. तिनं 'कसौटी जिंदगी की' (Kasautii Zindagi Kay) या गाजलेल्या मालिकेत श्वेता तिवारीच्या मुलीची भूमिका साकारली होती. त्यानंतर तिनं 'दिल मिल गये', 'बेहद', 'बेपनाह' आणि 'सरस्वतीचंद्र' यांसारख्या मालिकांमध्ये काम केलं. सध्या टीव्हीची ही लोकप्रिय अभिनेत्री वैयक्तिक आयुष्यामुळे चर्चेत आहे. टेलिव्हिजन विश्वात लवकरच सनई-चौघड्यांचे सूर घुमणार असून टेलिव्हिजनची सुपरस्टार अभिनेत्री वयाच्या 41 व्या वर्षी दुसऱ्यांदा लग्नगाठ बांधणार आहे.
मीडिया रिपोर्टनुसार, सिंगापूरस्थित कोट्याधीश बिझनेसमन असलेला तिचा प्रियकर विल्यम इस्माईल याच्याशी लग्न करून ती तिच्या आयुष्यातल्या एका नव्या पर्वाची सुरुवात करणार आहे. हा विवाह ख्रिश्चन परंपरेनुसार, पार पडणार आहे. जेनिफरचं हे दुसरं लग्न असणार आहे. जेनिफर विंगेटचं पहिलं लग्न प्रसिद्ध टीव्ही अभिनेता करण सिंह ग्रोवर (TV actor Karan Singh Grover) यांच्यासोबत झालं होतं. पण, काही वर्षांतच दोघांच्या संसारात मिठाचा खडा पडला आणि दोघांचा घटस्फोट झाला.
जेनिफरचा होणारा नवरा कोण? (Who Is Jennifer Winget Husband?)
जेनिफरच्या दुसऱ्या लग्नाची बातमी सगळीकडे चर्चेचा विषय ठरतोय. तिच्या लग्नाच्या बातमीनं चाहते भलतेच आनंदी झाले आहेत आणि तिला पुन्हा एकदा संसारात स्थिरावताना पाहण्यासाठी ते प्रचंड उत्सुक आहेत. मात्र, तिचा होणारा जोडीदार नक्की कोण आहे, हे जाणून घेण्याची अनेकांना उत्सुकता आहे.
हिंदुस्थान टाईम्सनं दिलेल्या वृत्तानुसार, जेनिफर विंगेट गेल्या काही काळापासून सिंगापूरस्थित व्यावसायिक विल्यम इस्माईलला गुपचूप डेट करत आहे. विल्यम इस्माईल व्यावसायिक क्षेत्रात कार्यरत असला तरी त्याचा मनोरंजन क्षेत्राशी कोणताही संबंध नाही. तो फायनांशियल सेक्टरमध्ये कार्यरत आहे. त्याला डिजिटल ॲसेट्स (Digital Assets), प्रशिक्षण आणि परकीय चलन बाजार (Foreign Exchange Markets) या क्षेत्रांचा अनुभव असल्याचं समजतंय. विल्यम प्रसिद्धीच्या झोतात राहणं किंवा माध्यमांच्या नजरेत येणं टाळतो. जेनिफर त्याला भेटण्यासाठी वारंवार सिंगापूरला जाते आणि तिथे ही जोडी कॅमेऱ्यांपासून दूर निवांत वेळ घालवते. अशाच एका भेटीदरम्यान विल्यमनं जेनिफरला लग्नासाठी प्रपोज केलं आणि तिनं त्याचं प्रपोजल स्वीकारलं. आता ही जोडी लग्नाच्या तयारीत व्यस्त असून लवकरच लग्नगाठ बांधणार आहे.
जेनेफर विंगेटचं लग्न कधी? (Jennifer Winget Marry Second Time)
इनसाइडरनं दिलेल्या रिपोर्टनुसार, जेनिफर आणि विल्यम एकत्र खूप आनंदी आहेत. त्यांना आणि त्यांच्या सुंदर नात्याला पाहणं खरोखरंच आनंददायी आहे. व्हेकेशनवेळी विल्यमनं जेनिफरला लग्नासाठी मागणी घातली आणि तिनंही होकार दिला. सध्या दोघेही लग्नाच्या तयारीत व्यस्त आहेत. मीडिया रिपोर्टनुसार, हे लग्न या वर्षीच होणार असलं तरी लग्नाची तारीख अद्याप निश्चित झालेली नाही.
दरम्यान, जेनिफरनं आपल्या लग्नाबाबतच्या या चर्चांना अद्याप दुजोरा दिलेला नाही. उल्लेखनीय बाब म्हणजे, जेनिफरचे यापूर्वी 2012 मध्ये अभिनेता करण सिंह ग्रोव्हरसोबत लग्न झालं होतं, पण दोन वर्षांनंतर, म्हणजेच 2014 मध्ये त्यांचा घटस्फोट झाला आणि ते वेगळे झाले. आता जेनिफरच्या दुसऱ्या लग्नाबाबत अनेक तर्क-वितर्क लावले जात आहेत.
महत्त्वाच्या इतर बातम्या :
ABP Majha च्या बातम्या LIVE: