Janhvi Kapoor South OTT Debut: बॉलिवूड अभिनेत्री जान्हवी कपूर सध्या साऊथ इंडस्ट्रीतही आपली छाप पाडताना दिसत आहे. ‘देवरा: पार्ट 1’नंतर राम चरणसोबत ‘पेद्दी’मध्ये झळकलेल्या जान्हवीकडे आता आणखी एका साऊथ प्रोजेक्टची चर्चा आहे. विशेष म्हणजे, या प्रोजेक्टच्या माध्यमातून जान्हवी साऊथच्या OTT विश्वात पदार्पण करणार असल्याचं म्हटलं जात आहे. ‘कुरथी’ या तमिळ वेब सीरिजमध्ये ती दिसणार असल्याची माहिती समोर आली आहे. ही सीरिज Netflix वर प्रदर्शित होण्याची शक्यता असून, दिग्दर्शनाची जबाबदारी सरकुनम यांच्याकडे असल्याचं रिपोर्ट्समध्ये सांगण्यात आलं आहे.
जान्हवी कपूरचा साऊथ OTTवर डेब्यू?
जान्हवी कपूरने 2018 मध्ये ‘धडक’ या चित्रपटातून बॉलिवूडमध्ये पदार्पण केलं. त्यानंतर तिने हिंदी सिनेमात स्वतःची वेगळी ओळख निर्माण केली. मात्र, गेल्या काही काळापासून जान्हवीचा फोकस साऊथ इंडस्ट्रीकडेही वाढला आहे. तिने ज्युनियर एनटीआरसोबत ‘देवरा: पार्ट 1’मध्ये काम केलं, तर त्यानंतर राम चरणसोबत ‘पेद्दी’मध्ये ती दिसली. आता Telugu 123च्या रिपोर्टनुसार, जान्हवी ‘कुरथी’ या तमिळ वेब सीरिजमध्ये काम करणार असल्याची चर्चा आहे. या प्रोजेक्टद्वारे ती साऊथच्या OTT विश्वात पदार्पण करणार असल्याचं म्हटलं जात आहे. ही सीरिज Netflix वर प्रदर्शित होणार असल्याची माहिती आहे. मात्र, प्रोजेक्टची अधिकृत घोषणा आणि जान्हवीच्या भूमिकेबाबत सविस्तर माहिती अद्याप समोर आलेली नाही.
‘पेद्दी’मध्ये राम चरणसोबत दिसली होती जान्हवी
जान्हवी कपूर नुकतीच राम चरणसोबत ‘पेद्दी’ या अॅक्शन-स्पोर्ट्स चित्रपटात दिसली. बुच्ची बाबू सना दिग्दर्शित हा चित्रपट 4 जून 2026 रोजी थिएटरमध्ये प्रदर्शित झाला. चित्रपटात राम चरणने ‘पेद्दी’ची भूमिका साकारली होती, तर जान्हवी कपूर ‘अचियम्मा’च्या भूमिकेत दिसली. चित्रपटाचं बजेट मोठं असल्याने त्याच्या कमाईकडे सर्वांचं लक्ष होतं. रिपोर्ट्सनुसार, चित्रपटाने जगभरात 350 कोटी रुपयांपेक्षा अधिक कमाई केली. मात्र, मोठं बजेट लक्षात घेता चित्रपटाला अपेक्षित यश मिळालं नसल्याचं म्हटलं गेलं.
जान्हवीच्या आगामी प्रोजेक्ट्सचीही चर्चा
‘कुरथी’व्यतिरिक्त जान्हवी कपूरच्या आगामी प्रोजेक्ट्सचीही प्रेक्षकांमध्ये उत्सुकता आहे. तिच्या आगामी चित्रपटांमध्ये ‘दोस्ताना 2’ आणि ‘लग जा गले’ यांचा समावेश असल्याचं सांगितलं जात आहे. तसंच ज्युनियर एनटीआरसोबत ‘देवरा: पार्ट 1’नंतर ती ‘देवरा: पार्ट 2’मध्येही दिसणार असल्याची चर्चा आहे.याशिवाय जान्हवी एका नाव न ठरलेल्या हॉरर चित्रपटातही दिसणार असल्याचं म्हटलं जात आहे. त्यामुळे बॉलिवूडसोबतच साऊथ इंडस्ट्रीतही जान्हवी कपूरची व्यस्तता वाढताना दिसत आहे. आता ‘कुरथी’च्या माध्यमातून तिचं OTT पदार्पण खरंच होतं का, याकडे चाहत्यांचं लक्ष लागलं आहे.