Jai Jai Swami Samrth Marathi Serial Track: कलर्स मराठीवरील (Colours Marathi) 'जय जय स्वामी समर्थ' (Jai Jai Swami Samrth) मालिकेत गंगाच्या आयुष्यातील सर्वात मोठी परीक्षा आता सुरु झाली आहे. स्वामींच्या नावाच्या ओढीने भारावलेली गंगा अक्कलकोटकडे जाण्याचा निर्धार करते, मात्र तिच्या या निर्णयाला तिच्याच आई-वडिलांचा तीव्र विरोध आहे. 'अक्कलकोट' हे नाव ऐकताच राधा आणि माधव अस्वस्थ होतात, तर गंगाच्या स्वप्नांमागचं गूढ दिवसेंदिवस अधिक गडद होत जातं. गंगा अखेर घर सोडून अक्कलकोटच्या दिशेने पाऊल टाकणार का, आणि तिच्या मार्गात येणाऱ्या संकटांमधून स्वामी तिला सुरक्षितपणे मार्ग दाखवणार का, याची उत्सुकता आता शिगेला पोहोचली आहे.
आगामी भागात प्रेक्षक पाहतील की, स्वामी 'कर्म' आणि 'न्याय' यांचं गूढ उलगडत सेवेकऱ्यांना जीवनाचा खरा अर्थ समजावून सांगतात. दरम्यान, गंगाला सतत “अक्कलकोट” या नावाची ओढ जाणवत असते. एका रहस्यमय पुस्तकातून तिला तिच्या स्वप्नांमध्ये दिसणाऱ्या खंडोबा मंदिराचा आणि वटवृक्षाचा अक्कलकोटशी संबंध असल्याचं समजतं. त्यामुळे गंगाचा विश्वास अधिक दृढ होतो की तिच्या सर्व प्रश्नांची उत्तरं अक्कलकोटमध्येच दडलेली आहेत. पण हे समजताच राधा आणि माधव घाबरून जातात आणि तिला कोणत्याही परिस्थितीत अक्कलकोटला जाऊ देणार नाहीत, असा निर्धार करतात.
गंगासाठी ही केवळ एका गावापर्यंतची वाटचाल नसून तिच्या अस्तित्वाचा, भूतकाळाचा आणि नियतीचा शोध आहे. आई-वडिलांचा विरोध, घरातील तणाव, सततची भीती आणि स्वतःच्या मनात निर्माण झालेला संभ्रम या सगळ्यांमध्ये गंगा पूर्णपणे तुटून जाते. तरीही तिच्या मनात स्वामींच्या नावाचा जप अधिक तीव्र होत जातो.
एका बाजूला तिच्यावर प्रेम करणारे आई-वडील तिला थांबवण्याचा प्रयत्न करत आहेत, तर दुसऱ्या बाजूला नियती तिला अक्कलकोटकडे खेचत आहे.
आता गंगेची खरी परीक्षा सुरु झाली आहे. घरातून बाहेर पडल्यावर तिच्या मार्गात अनेक अडचणी, संकटं आणि अनोळखी प्रवास उभा राहणार आहे. मात्र, स्वामींचा अदृश्य हात तिच्या पाठीशी असेल का? की गंगालाच स्वतःच्या श्रद्धा आणि धैर्याच्या जोरावर ही अग्निपरीक्षा पार करावी लागणार? “गंगेची परीक्षा” हा भावनिक आणि थरारक प्रवास प्रेक्षकांना एका नव्या वळणावर घेऊन जाणार आहे.
महत्त्वाच्या इतर बातम्या :