Gram Chikitsalaya Season 2 Trailer : ओटीटी (OTT) वरील लोकप्रिय आणि प्रेक्षकांच्या पसंतीस उतरलेल्या मालिकांपैकी एक असलेल्या 'ग्राम चिकित्सालय' (Gram Chikitsalaya) या कॉमेडी ड्रामा सिरीजच्या दुसऱ्या सीझनचा धमाकेदार ट्रेलर 'प्राइम व्हिडिओ'ने (Prime Video) प्रदर्शित केला आहे. 'द वायरल फीवर' (TVF) निर्मित या सिरीजचा पहिला सीझन प्रचंड गाजला होता. त्यामुळे आता दुसऱ्या सीझनबाबत प्रेक्षकांमध्ये कमालीची उत्सुकता आहे.
ललितम तिवारी दिग्दर्शित आणि दीपक कुमार मिश्रा व अरुणाभ कुमार कृत या सिरीजचे लेखन वैभव सुमन आणि श्रेया श्रीवास्तव यांनी केले आहे. या नव्या सीझनमध्ये भाथकंडी गावातील प्राथमिक आरोग्य सेवा केंद्राचे (PHC) पुनरुज्जीवन करण्यासाठी डॉ. प्रभात यांचा नवा संघर्ष पाहायला मिळणार आहे.
'आदर्श पीएचसी' दर्जा मिळवण्यासाठी धडपड
ट्रेलरमध्ये दाखवल्यानुसार, डॉ. प्रभात (अमोल पराशर) हे भाथकंडी येथील अपयशी ठरलेल्या आरोग्य केंद्राची स्थिती सुधारण्यासाठी जीवाचं रान करताना दिसत आहेत. गावकऱ्यांचा विश्वास संपादन केला असं वाटत असतानाच, त्यांच्यासमोर आव्हानांचा एक नवीन डोंगर उभा राहतो.
आपल्या आरोग्य केंद्राला 'आदर्श पीएचसी' ही अधिकृत पदवी मिळवून देणे हेच सर्व समस्यांवरील उत्तर आहे, याची डॉ. प्रभात यांना खात्री पटते. मात्र, हा दर्जा मिळवण्यासाठी केवळ वैद्यकीय कौशल्य पुरेसे नसून स्थानिक राजकारण आणि अंतर्गत व्यवस्था सांभाळणे किती गरजेचे आहे, हे त्यांना समजते.
विचित्र गावकरी, खोडकर स्थानिक राजकारण, खोलवर रुजलेला संशय आणि संसाधनांची कमतरता या सर्वांशी लढा देत डॉ. प्रभात या समस्येवर कसा उपाय शोधतात, याची हलकी-फुलकी आणि भावनिक कथा या सीझनमध्ये पाहायला मिळेल.
अमोल पराशरसह 'निरहुआ'ची एन्ट्री!
या सिरीजमध्ये जुन्या कलाकारांसोबतच काही नवीन चेहरेही महत्त्वाच्या भूमिकेत दिसणार आहेत. अमोल पराशर, आकाश मखिजा, आनंदेश्वर द्विवेदी, विनय पाठक, आकांक्षा रंजन कपूर आणि गरिमा विक्रांत सिंग हे मुख्य भूमिकेत पुन्हा परतणार आहेत. भोजपुरी सिनेसृष्टीतील प्रसिद्ध अभिनेते दिनेश लाल यादव (निरहुआ) हे या सीझनमध्ये 'बाबू साहेब' ही महत्त्वपूर्ण व्यक्तिरेखा साकारताना दिसणार आहेत.
23 जून रोजी होणार रिलीज
'ग्राम चिकित्सालय सीझन 2' चा प्रीमियर 23 जून 2026 रोजी संपूर्ण भारत तसेच जगभरातील 240 हून अधिक देश आणि प्रदेशांमध्ये केवळ 'अॅमेझॉन प्राइम व्हिडिओ'वर हिंदी भाषेमध्ये होईल. अॅमेझॉन प्राइम डेच्या (Amazon Prime Day) 10 व्या आवृत्तीच्या पार्श्वभूमीवर हा शो ब्लॉकबस्टर एंटरटेनमेंट म्हणून सादर केला जात आहे.
ही बातमी वाचा: