Nana Patekar Last Rites Makarand Anaspure Emotional Video Viral: सच्चा दोस्त, आधारस्तंभ हरपला; नाना पाटेकरांच्या जाण्यानं मकरंद अनासपुरे पुरते कोलमडले, डोळ्यांच्या कडा पाणावरा 'तो' क्षण, VIDEO

Sai Paranjpye: ज्येष्ठ नाटककार, लेखिका आणि दिग्दर्शिका सई परांजपे यांना यंदाचा विष्णुदास भावे गौरव पदक पुरस्कार जाहीर

जयदीप मेढे — Fri, 9 Oct 2026 16:40:37 +0530

Sai Paranjpye: ज्येष्ठ नाटककार, लेखिका आणि दिग्दर्शिका सई परांजपे यांना यंदाचा विष्णुदास भावे गौरव पदक पुरस्कार जाहीर झाला आहे. नाट्य क्षेत्रातील मानाच्या पुरस्काराचे वितरण पाच नोव्हेंबर रोजी रंगभूमी दिनी नाट्य संमेलनाचे अध्यक्ष मोहन जोशी यांच्या हस्ते करण्यात येणार आहे. गौरव पदक, ३० हजार रुपये रोख, स्मृतिचिन्ह, शाल आणि श्रीफळ असे पुरस्काराचे स्वरूप आहे अशी माहिती अखिल महाराष्ट्र नाट्य विद्यामंदिर समितीचे अध्यक्ष डॉ. शरद कराळे यांनी शुक्रवारी पत्रकार परिषदेत सांगितले. सई परांजपे यांनी बालनाट्य, प्रौढ नाटके, नाट्यलेखन, दिग्दर्शन आणि अनुवाद अशा विविध क्षेत्रांत योगदान दिले आहे. वयाच्या आठव्या वर्षी त्यांचा ‘मुलांचा मेवा’ हा पहिला ग्रंथ प्रकाशित झाला. आई शकुंतला परांजपे आणि आजोबा रघुनाथ पुरुषोत्तम परांजपे यांच्या प्रोत्साहनातून त्यांच्या कलात्मक प्रवासाला दिशा मिळाली.

बालनाट्यांपासून प्रौढ रंगभूमीपर्यंत

परांजपे यांनी मुलांसाठी नऊ नाटके लिहिली. ‘पक्ष्यांचे कवीसंमेलन’, ‘पत्ते नगरीत’, ‘झाली काय गंमत’, ‘जादूचा शंख’ आणि ‘शेपटीचा शाप’ ही त्यांपैकी काही नाटके. ‘झाली काय गंमत’ आणि ‘शेपटीचा शाप’ या पुस्तकांना राष्ट्रीय स्तरावरील सर्वोत्कृष्ट पुस्तकांचे पुरस्कार मिळाले. त्यांची बालनाटके आजही शालेय स्तरावर सादर केली जातात. ‘नांदा सौख्यभरे’, ‘सख्खे शेजारी’, ‘जास्वंदी’, ‘सोयरीक’, ‘माझा खेळ मांडू दे’ आणि ‘मोगरा फुलला’ या नाटकांतून त्यांनी प्रौढ रंगभूमीवरही आपला ठसा उमटविला. ‘जास्वंदी’ या नाटकाला १९७८ मध्ये महाराष्ट्र शासनाचा उत्कृष्ट नाट्यनिर्मितीचा पुरस्कार मिळाला. ‘सोयरीक’ या नाटकाचाही उत्कृष्ट निर्मितीसाठी गौरव करण्यात आला.

तमाशा हिंदी रंगभूमीवर

महाराष्ट्राची लोककला असलेला तमाशा हिंदी रंगभूमीवर नेण्याचे कामही परांजपे यांनी केले. दिल्लीत असताना त्यांनी ‘एक तमाशा अच्छा खासा’ आणि ‘धिक् ताम’ या तमाशाप्रधान नाटकांचे लेखन व निर्मिती केली. पती अरुण जोगळेकर यांच्यासह ‘नाट्यद्वयी’ या संस्थेच्या माध्यमातून त्यांनी नाट्यनिर्मिती केली. परांजपे यांनी अनेक परभाषिक नाटकांचे मराठी आणि हिंदी अनुवाद केले. नोएल कॉवर्ड यांच्या ‘ब्लाइथ स्पिरिट’चे ‘इडा पिडा टळो’ आणि नील सायमन यांच्या ‘द ऑड कपल’चे ‘तुझी माझी जोडी जमली रे’ ही त्यांची मराठी रूपांतरे आहेत. विजय तेंडुलकर यांच्या ‘गिधाडे’ या नाटकाचे ‘गिद्ध’ हे हिंदी रूपांतरही त्यांनी दिग्दर्शित केले.

कला क्षेत्रातील योगदानाबद्दल भारत सरकारने २००६ मध्ये परांजपे यांना पद्मभूषण सन्मानाने गौरविले. २०२५ मध्ये त्यांना ‘झी नाट्य गौरव पुरस्कार’ मिळाला. आता विष्णुदास भावे गौरव पदकाच्या माध्यमातून त्यांच्या नाट्यविषयक योगदानाचा सन्मान होणार आहे.

इतर महत्वाच्या बातम्या

Nana Patekar Death: नाना पाटेकर मृत्यू प्रकरणात गोव्यात केस दाखल; शवविच्छेदन अहवाल आणि कुटुंबीयांच्या जबाबांची तपासणी होणार, पोलिसांनी निर्णय का घेतला?

Vijay Deverakonda : अभिनेता विजय देवरकोंडा बनला 'रामराज कॉटन'चा ब्रँड ॲम्बेसेडर; खास वेडिंग कलेक्शनचा चेहरा

एबीपी माझा एंटरटेनमेंट डेस्क — Fri, 9 Oct 2026 15:42:03 +0530

Vijay Deverakonda Brand Ambassador Ramraj Cotton : पारंपरिक भारतीय वस्त्रांसाठी प्रसिद्ध असलेल्या रामराज कॉटन या ब्रँडने लोकप्रिय अभिनेता विजय देवरकोंडा याची ब्रँड ॲम्बेसेडर म्हणून निवड केली आहे. विवाहसोहळे आणि शुभ प्रसंगांसाठी खास तयार करण्यात आलेल्या कंपनीच्या लग्न या वेडिंग कलेक्शनसाठी विजय देवरकोंडा ब्रँडचा चेहरा असणार आहे. या भागीदारीच्या माध्यमातून भारतीय पारंपरिक वस्त्रांचा वारसा आधुनिक पिढीपर्यंत पोहोचवण्याचा कंपनीचा प्रयत्न आहे.

पारंपरिक लूकला आधुनिक स्टाइलची जोड

विजय देवरकोंडा याची लोकप्रियता, आत्मविश्वासपूर्ण व्यक्तिमत्त्व आणि हटके स्टाइल यामुळे रामराज कॉटनच्या वेडिंग कलेक्शनला नवी ओळख मिळण्याची अपेक्षा आहे. भारतीय संस्कृतीशी नाते जपत आधुनिक फॅशनचा अनुभव देणाऱ्या या कलेक्शनमध्ये शुद्ध रेशमाचा अभिजातपणा आणि आकर्षक डिझाइन्स यांचा संगम पाहायला मिळतो. रामराज कॉटनच्या लग्न वेडिंग कलेक्शनमध्ये शुद्ध रेशमी धोतर, सिल्क शर्ट्स, अंगवस्त्रे आणि विवाहसोहळ्यांसह विविध सण-समारंभांसाठी उपयुक्त असलेल्या वस्त्रांचा समावेश आहे. पारंपरिक भारतीय पोशाखांना आधुनिक शैलीत सादर करणे, हे या कलेक्शनचे वैशिष्ट्य आहे.

'भारतीय परंपरा आणि तरुणाईच्या स्टाइलचा संगम'

रामराज कॉटनचे संस्थापक आणि अध्यक्ष के. आर. नागराजन यांनी या भागीदारीबद्दल आनंद व्यक्त केला. ते म्हणाले की, भारतीय विवाहसोहळ्यांमध्ये शुद्ध रेशमी वस्त्रांना नेहमीच विशेष महत्त्व राहिले आहे. पिढ्यानपिढ्या जपली गेलेली ही परंपरा आणि आजच्या तरुण पिढीची आवड यांची सांगड घालण्याचा कंपनीचा प्रयत्न आहे. विजय देवरकोंडा याच्यात आत्मविश्वास, वेगळेपणा आणि आधुनिक शैली हे गुण दिसून येतात. त्यामुळे तरुण पिढीपर्यंत भारतीय पारंपरिक वस्त्रांची ओळख पोहोचवण्यासाठी तो योग्य चेहरा असल्याचे नागराजन यांनी सांगितले.

धोतराची परंपरा देशभर पोहोचवण्याचे उद्दिष्ट

रामराज कॉटनचे व्यवस्थापकीय संचालक बी. आर. अरुण ईश्वर यांनीही विजय देवरकोंडा याचे ब्रँडमध्ये स्वागत केले. कंपनीची स्थापना करताना हजारो विणकरांचे जीवनमान उंचावणे आणि धोतर परिधान करण्याची परंपरा संपूर्ण भारतात पोहोचवणे, ही दोन प्रमुख उद्दिष्टे ठेवण्यात आली होती, असे त्यांनी स्पष्ट केले. दक्षिण भारतात भक्कम स्थान निर्माण केल्यानंतर आता भारतीय संस्कृती आणि पारंपरिक वस्त्रांचा वारसा देशाच्या कानाकोपऱ्यात पोहोचवण्याचे कंपनीचे ध्येय आहे. आजच्या तरुणांमधील ऊर्जा, आत्मविश्वास आणि उत्साहाचे प्रतिनिधित्व करण्यासाठी विजय देवरकोंडा योग्य पर्याय असल्याचेही अरुण ईश्वर यांनी नमूद केले.

कुठे मिळणार 'लग्न' वेडिंग कलेक्शन?

रामराज कॉटनचे हे खास वेडिंग कलेक्शन कंपनीच्या अधिकृत स्टोअर्समध्ये, प्रमुख कापड विक्रेत्यांकडे आणि www.ramrajcotton.in या अधिकृत वेबसाइटवर उपलब्ध आहे. शुद्ध रेशमी धोतर, शर्ट्स, अंगवस्त्रे आणि लग्नसमारंभांसाठीचे इतर पारंपरिक पोशाख या कलेक्शनमध्ये खरेदी करता येतील.

Nana Patekar Death: नाना पाटेकर मृत्यू प्रकरणात गोव्यात केस दाखल; शवविच्छेदन अहवाल आणि कुटुंबीयांच्या जबाबांची तपासणी होणार, पोलिसांनी निर्णय का घेतला?

जयदीप मेढे — Fri, 9 Oct 2026 15:22:53 +0530

Nana Patekar Death: अभिनेते नाना पाटेकर यांच्या मृत्यू प्रकरणी गोवा पोलिसांनी 'अनैसर्गिक मृत्यू'ची वैद्यकीय-कायदेशीर तक्रार दाखल केली आहे. मृत्यूचे नेमके कारण निश्चित करण्यासाठी पोलीस शवविच्छेदन अहवाल आणि कुटुंबीयांच्या जबाबांची तपासणी करतील. आयएएनएस या वृत्तसंस्थेनुसार, गोवा पोलिसांनी भारतीय दंड संहितेच्या कलम 194 अंतर्गत गुन्हा दाखल केला आहे. पीएसआय नितीन नाईक या प्रकरणाचा तपास करत आहेत.

हृदयविकाराच्या झटक्याचा संशय

पणजीमध्ये दाखल केलेल्या गुन्ह्यानुसार, नाना पाटेकर यांना गुरुवारी सकाळी गोव्यातील डोना पौला येथील ओशन पार्कमधून बांबोलीम येथील मणिपाल रुग्णालयात आणण्यात आले होते, जिथे डॉक्टरांनी त्यांना मृत घोषित केले. काल रात्री उशिरा पुण्यातील त्यांच्या फार्महाऊसवर पार्थिवावर अंत्यसंस्कार करण्यात आले. मणिपाल रुग्णालयातील ऑन्कोलॉजी विभागाचे प्रमुख डॉ. शेखर साळकर यांनी सांगितले की, नाना पाटेकर यांना रुग्णालयात मृत अवस्थेत आणण्यात आले होते. त्यामुळेच पोलिसात गुन्हा दाखल करण्यात आला आणि मृतदेह शवविच्छेदनासाठी गोवा मेडिकल कॉलेजच्या शवागारात पाठवण्यात आला. डॉक्टरांच्या मते, प्राथमिकदृष्ट्या हे हृदयविकाराच्या झटक्याचे प्रकरण असल्याचे दिसते. त्यांनी पुढे सांगितले की, नाना पाटेकर यांना आधीपासूनच हृदयाचा आजार होता आणि त्यांच्यावर उपचार सुरू होते.

उशिरा अंत्यसंस्कार करण्यामागचे कारण सांगितले

एएनआय या वृत्तसंस्थेशी बोलताना, नानांचे पुत्र मल्हार पाटेकर यांनी रात्री उशिरा अंत्यसंस्कार करण्यामागचे कारण स्पष्ट केले. मल्हारने सांगितले की, कुटुंब गोव्यात होते आणि पार्थिव पुण्यातील त्यांच्या गावातील फार्महाऊसवर आणायला वेळ लागला. मृत्यू पहाटे झाल्यामुळे आणि बराच वेळ निघून गेल्यामुळे, कुटुंबाने गुरुवारी अंत्यसंस्कार करण्याचा निर्णय घेतला.

नाम फाउंडेशन'चे कार्य सुरूच राहील

मल्हार म्हणाला की, नानासाहेबांसारखी माणसे त्यांच्या कर्तृत्वाने अमर राहतात. त्याने सांगितले की, मराठवाड्यात 'नाम फाउंडेशन'च्या माध्यमातून सुरू असलेले समाजकार्य थांबणार नाही. सीईओ गणेश थोरात यांच्या देखरेखीखाली हे कार्य वेगाने पुढे नेले जाईल. गुरुवारी रात्री पुण्यातील डोणजे गावातील फार्महाऊसवर नाना पाटेकर यांच्यावर शासकीय इतमामात अंत्यसंस्कार करण्यात आले. पोलीस दलाने त्यांना तीन तोफांची सलामी दिली.

इतर महत्वाच्या बातम्या

पोटच्या लेकराचा दुसऱ्या वर्षीचं मृत्यू, मुंबई बाॅम्बस्फोटात भावाला गमावलं, दिग्दर्शकाला शिवीगाळ, आगीत भाजले ते शाळेत मास्तरांचा दररोजचा मार; नाना पाटेकरांच्या न विसरता येणाऱ्या 10 आठवणी

Devendra Fadnavis Nana Patekar : प्रोटोकॉल बाजूला ठेवला, नानांची शवपेटी उचलली...

abp majha web team — Fri, 9 Oct 2026 14:54:43 +0530

Devendra Fadnavis Nana Patekar : प्रोटोकॉल बाजूला ठेवला, नानांची शवपेटी उचलली...

Nana Patekar Salaam Bombay Movie: नाना आणि सलाम बॉम्बे!

समीर गायकवाड — Fri, 9 Oct 2026 14:52:06 +0530

Nana Patekar Salaam Bombay Movie: मीरा नायरचा (Mira Nair) 'सलाम बॉम्बे' (Salaam Bombay) अजुनही फ्रेम टू फ्रेम तोंडपाठ आहे. त्यातला बाबा गुलाब (नाना पाटेकर) हा रेड लाइट एरियातला एक नामचीन भडवा आणि ड्रग पेडलर असतो.

एका सीनमध्ये त्याला भेटायला एक विदेशी पत्रकार इयन (संजना कपूर) आलेली असते, तिच्या सोबत हिंदी अनुवादक असतो, जो बाबाचा परिचित असतो.

बाबा त्याला सांगतो की, त्याने रेखाला (अनिता कंवर) जगाच्या उकिरड्यातून बाहेर काढलंय आणि तिला तो आता आपली घरवाली समजतो.
तिच्यापासून झालेल्या 'मंजू'ला (हंसा विठ्ठल) त्याने मुलीचा दर्जा दिलाय.

बोलता बोलता तो सवयीप्रमाणे घसरतो आणि ती पत्रकार देखील मस्त चिकणा माल आहे, हे तिला सांग असं त्याला सुनावतो. अनुवादक चिडतो आणि असलं काहीही तिला सांगणार नाही असं उत्तर देतो!
त्यांच्या बाचाबाचीवर ती पत्रकार विचारते की, 'बाबा काय म्हणतोय?"
यावर तो खोटंच सांगतो की, "तो विचारतोय की, चहा घेणार का?"

पुढच्याच सीनमध्ये बाबाच्या हाताखाली गर्द विकणाऱ्या टोळीतला हरकाम्या चिलीम (रघुवीर यादव) दोन कळकटलेल्या ग्लासमध्ये चहा घेऊन येतो.
त्याला तिथं आलेलं पाहताच विकृत असलेल्या बाबाच्या डोक्यात बीभत्स कल्पना येते.
तो म्हणतो, "थांबा तुम्हाला मी गंमत दाखवतो, खूप मजा येईल!"

बाबा आपल्या कंबरेचा चामडी पट्टा काढतो आणि एकेक करून गंमत म्हणून चिलीमच्या पायाखाली फटके मारू लागतो.
सुरुवातीला हाफ चड्डीमधला चिलीम बरोबर उड्या मारून ते चुकवतो.
त्या गडबडीत त्याच्या खिशातून 555चे सिगारेट्सचं सोनेरी पाकीट पडतं, चहाचे ग्लास पडतात. फुटतात.
त्याच्या पिंडरीवर पट्ट्याचे मजबूत वळ उमटतात.

माराच्या वेदनेने चिलीम विव्हळू लागतो आणि अखेरीस पेकाटात लाथ बसल्यागत खाली बसतो!
पस्तिशीच्या वयाचा, मळकटलेल्या देहाचा नि काळवंडलेल्या चेहऱ्याचा काटकुळा रोगट चिलीम कुत्र्यागत ओरडू लागतो!

बाबाच्या चेहऱ्यावर विकृत हास्य विलसत राहतं.
चिलीमच्या वेदना नि बाबाची विकृती सहन न झालेली पत्रकार अनुवादकाला सोबत घेऊन तडकाफडकी निघून जाते.

एका मिनिटात तिथला नूर बदलतो.

बाबा भानावर येतो आणि इतक्या वेळ वेदनेने कळवळणारा चिलीम चक्क हसू लागतो. चिडिया उड गयी म्हणून बाबाला खिजवतो!

बाबाच्या तळपायाची आग मस्तकाला जाते आणि जुन्या हिशोबाचे कारण देऊन तो चिलीमला आपल्या टोळीतून बेदखल करतो.
चित्रपटात चिलीम बाबाला पुरून उरत नाही मात्र त्या क्षणी तर तो त्याच्यापुढे झुकत नाही.
तो देखील तावातावाने निघून जातो आणि जाताना अकस्मातपणे बाबाला हाताने इशारा करतो 'घे चढवून'चा !

नशेड्या बकाल एकाकी चिलीमच्या आयुष्याचा पाया घृणा, तिरस्कार, दारिद्र्य, भणंग भयाण दुःखांवर आधारलेला असल्याने पट्ट्याचा मार त्याच्यासाठी अगदी किरकोळ असतो. त्याच्या आयुष्यात याहून भयंकर दुःखे असतात!

'सलाम बॉम्बे'च्या हरेक फ्रेममध्ये एक कविता दडलीय आणि हरेक सीनमध्ये एक कथा आहे.
या दोन सीन्सच्या आधी आणि नंतर जे सिक्वेन्स आहेत ते अगदी सुन्न करणारे आहेत.

यात एक सीन असाही होता ज्यात रेखा बाहेरची नाईट स्वीकारते. साठी पार केलेल्या त्या कस्टमरकडे जाताना आपल्या सोबत मंजूला देखील घेऊन जाते. आई आत एका खोलीमध्ये सौदा पुरा करत असते आणि बाहेर दिवाणखान्यात असलेली मंजू तिथल्या वस्तूंनी हरखून गेलेली असते. तिथून परतल्यानंतरच्या दुसऱ्या दिवशी बाबा रेखाशी संग करू इच्च्छितो. मंजूला खोलीबाहेर सज्जात झोपायला पाठवतो. रेखा त्याला टोकदार सवाल करते! धुमसते, घुसमटते. बाबा तिला सणसणीत थोबाडीत मारतो. ती मुकाट शांत होते. तिच्या खांद्यावरून हात फिरवत बाबा तिला शांत करू पाहतो. यावर ती मौन राहते. इथे नानाच्या तोंडी एक वाक्य आहे - "मलबार हिल से वापस आयी तो भाव खा रही है रंडी बाबा से!"
त्याच्या रासवट वागण्यास उद्देशून ती म्हणते, "एकदम कस्टमर के माफीक!"
पुढे एकदम सुन्न स्पेस उरते...

एकदा प्रेमाच्या असोशीने तो तिला म्हणतो, "चल, खल्लास कर डाल मेरी मीनाकुमारी!" पण तिचा थंडा प्रतिसाद पाहून पुढे तो अगदी निर्लज्ज होऊन म्हणतो, "चल मिट्टी डाल दे!"

क्षणात सेंटीमेंटल तर क्षणात निर्विकार होणारा नाना हा आपल्या सर्वांच्या खऱ्या मानसिकतेचे प्रतिनिधित्व करतो. आपण किती दुष्ट आहोत हे आपल्याला एकट्याला माहिती असतं! आपण एकांतात एकटे असताना जसे असतो तसे आपण बाह्यजगात नसतो! आपण अट्टल मुखवटेबाज असतो!...

गर्दच्या आहारी गेलेला चिलीम मरणासन्न अवस्थेत पोहोचतो, तेव्हा सिनेमागृहातला पडदा असह्य होतो. भडभडून येतं. तो अखेरच्या 'कश'साठी तडफडत असतो. तो काही केल्या त्याला नसीब होत नाही. अखेर त्याची तडफड थांबते. मरण्याआधी त्याने आपल्याला कफल्लक केलंय हे निष्पाप किशोरवयीन 'चायपाव'च्या (शफीक सय्यद) लक्षात येतं तेव्हा तो ऊन्मळून पडतो! त्याचं दुःख पाहवत नाही. त्याला त्याच्या घरी परत जायचं असतं पण पैशांवर हात साफ केला गेल्याने त्याचे ते स्वप्न मुंबईच्या मायानगरीत विरून जातं!

इथल्या कुठल्याच माणसाची नावे खरी नसतात. त्या दुनियेचा अंश झाल्याशिवाय तिथली सत्यता उमगत नाही, तोवर जे जाणवतं ते एकेक सालपट असतं. कुणाच्या आयुष्याचं, तर कुणाच्या छिलून निघालेल्या रात्रींचं! चिलीम, चायपाव, सोला साल, मंजू, रेखा आणि बाबा तिथं पावलोपावली भेटतात. मात्र त्यांचं सत्व समजताना आपल्या संयमाचा अंत होतो...

माणसाच्या हाती काहीच नसलं आणि पुढ्यात बकाल भयाण उदास अंधारं आयुष्य असलं की त्याला वेदनेची, दुःखाची नशा चढते.
त्याशिवाय त्यांना काही पर्यायही नसतो.
किंबहुना दुःख हाच त्यांच्या आयुष्याचा पाया बनून जातो. दुःख नसलं तर ही माणसं अधिक सैरभैर होतात, उध्वस्त होतात आणि बेफाम होतात.

अंधेऱ्या दुनियेतल्या स्त्रियांच्या विलक्षण अस्वस्थ करून सोडणाऱ्या कथा यंदाच्या काही दिवाळी अंकात लिहिल्या आहेत.
बदनाम गल्ल्यातले दुःख, वेदना यांचे कढ शब्दातीत भयंकर आहेत. जगण्याच्या शिक्षेचे याहून टोकदार सल मी पाहिले नाहीत!

काही नोंदी - 'सलाम बॉम्बे'चे सत्व मुंबईच्या भकास गल्ल्यांत, रस्त्यांत आहे.
यातला कॅमेरा स्टँडी असला वा रोलींग असला तरी तो केवळ तगमग टिपतो.
तरीही सिनेमा कुठलेही भाष्य करायचे टाळतो, इव्हन यातलं कुठलंही पात्र दिग्दर्शिकेस काय सांगायचेय यावर बोलत नाही.

यातील महत्वाच्या दृश्यांत संवाद कमी वापरलेत. बहुतांश संवाद कमी शब्दांचे आणि छोट्या वाक्यांच्या तुकड्यांचे आहेत.
'मुंबई स्पिरि'ट वगैरे काही नसतं, इथल्या माणसांची जगण्याची नि मरण्याची जिद्दच अफाट असते हे पावलोपावली जाणवतं.

विलक्षण कोरडं वाटणारं हे जग मायेच्या ओलाव्यासाठी अफाट आसुसलेलं आहे मात्र इथे तो ओलावा मिळणार नाही कारण या शहराला केवळ ठाऊक आहे ती गती, जी 'सलाम बॉम्बे'त असोशीने जाणवतं!
ही गती कशाची तर घड्याळाच्या काट्यावर बसून पुढे जाण्याची.

1988 साली आलेल्या 'सलाम बॉम्बे'मधली पात्रं अजूनही 2026 सालच्या मुंबईत दिसतात कारण माणसं बदलली तरी रस्ते, लोकल ट्रेन्स सारा भवतालही तोच आहे.
जोवर मुंबईचं अस्तित्व असेल तोवर यातली पात्रं मुंबईत गवसतील.
म्हणून सलाम बॉम्बे!

बाकी 'मुंबई स्पिरिट' ही एक 'उदात्त थाप' आहे जी इथल्या माणसांना बा. सी. मर्ढेकरांच्या 'पिपात पडले ओले उंदीर' या कवितेतल्या उंदरासारखी लाईफ बहाल करूनही आनंदात राहायला शिकवते...

'सलाम बॉम्बे'मध्ये नाना पाटेकर यांनी साकारलेली 'बाबा गुलाब' दलाल ही भूमिका पूर्णपणे काल्पनिक नव्हती, तर ती मुंबईच्या रेड लाईट एरियातील खऱ्या पात्रांवर आणि वास्तवतेवर आधारित होती. दिग्दर्शिका मीरा नायर आणि पटकथा लेखिका सोनी तारापोरवाला यांनी मुंबईच्या कामाठीपुरा आणि रेड लाईट एरियात प्रत्यक्ष जाऊन केलेल्या सखोल अभ्यासातून हे कॅरेक्टर आकारास आले होते.

ग्रॅण्ट रोड, फॉकलंड रोड, कामाठीपुरा भागात त्या काळात नशेच्या पदार्थांची त स्करी करणारे आणि धंदा करणाऱ्या महिलांचे शोषण करणारे अनेक दलाल सक्रिय होते. चित्रपटाची कथा लिहिण्यापूर्वी मीरा नायर यांनी 1984 मध्ये 'इंडिया कॅबरे' नावाचा एक माहितीपट बनवला होता. त्यादरम्यान त्यांनी मुंबईच्या अंडर वर्ल्ड, नाईट क्लब आणि रेड लाईट परिसरातील अशा अनेक खऱ्याखुऱ्या 'बाबां'चा जवळून अभ्यास केला होता, जे लहान मुलांना ड्र ग्जच्या आहारी लावून त्यांच्याकडून ड्र ग्ज विकून घ्यायचे.

नाना, त्यांच्या अभिनयातील नैसर्गिकतेसाठी आणि इंटेन्स इन्स्टिंक्टसाठी ओळखले जायचे. या चित्रपटाची खासियत अशी होती की यात बहुतांश कलाकार हे खऱ्याखुऱ्या मोकाट आणि रस्त्यावर राहणाऱ्या मुलांमधून निवडले होते. नानांनी सेटवर जाण्यापूर्वी आणि शूटिंग दरम्यान त्यांचे प्रत्यक्ष निरीक्षण केले.

बाबा गुलाब हे पात्र पडद्यावर जितके क्रू र आणि हिं सक दिसते, तितकेच ते तिथल्या वातावरणात स्वाभाविक वाटावे यासाठी नानांनी कित्येक दिवस कामाठीपुऱ्यातील त्या काळोख्या आणि गजबजलेल्या गल्ल्यांमध्ये घालवून तिथली 'अंडर वर्ल्ड'ची, मुंबईच्या रस्त्यांवरील लोकांची, आणि रेड लाईट एरियातील भाषा, तिथल्या लोकांची देहबोली आणि क्रू रता त्यांनी आत्मसात केली.

सिनेमात काम करणाऱ्या लहान मुलांसोबत मीरा नायर यांनी, नानांसह वर्कशॉप केले. मुख्य भूमिकेतील मुलांसोबत, जसे की शफिक सय्यद (चायपाव) आदींसोबत समरस होण्यासाठी नानांनी बराच वेळ घालवला, जेणेकरून त्यांच्यासोबत अभिनय करताना ती भीती आणि क्रूरता नैसर्गिक वाटेल.

मीरा नायर यांनी एका मुलाखतीत आठवण सांगितलीय की, 'सलाम बॉम्बे' हा नाना पाटेकर यांच्या सुरुवातीच्या मोठ्या चित्रपटांपैकी एक होता. त्यांना एका अशा अभिनेत्याची गरज होती जो अत्यंत क्रूर 'बाबा गुलाब' साकारू शकेल, पण तरीही त्याच्यात एक मानवी छटा असेल. नानांनी ती भूमिका अप्रतिमपणे जिवंत केली.

मीरांच्या मते, नाना पाटेकर यांच्यासारख्या कसलेल्या अभिनेत्याला अशा मुलांसोबत काम करायचे होते ज्यांनी आयुष्यात कधीच कॅमेरा पाहिला नव्हता. नानांनी स्वतःला अशा प्रकारे रुजवले की ते रस्त्यावरील खऱ्याखुऱ्या जगाचाच एक भाग वाटले.

चित्रपटातील एका दृश्याबाबत सोशल मीडियावर आणि सिनेवर्तुळात अनेकदा चर्चा होते. चित्रपटात एका प्रसंगात बाबा (नाना पाटेकर) आपल्या लहान मुलीला (मंजू - हंसा विठ्ठल) रागाच्या भरात हाताला धरून हवेत उचलतात. हा प्रसंग आधीपासून स्क्रिप्टेड नव्हता, तर सीन करत असताना नाना पाटेकर त्या पात्रात इतके समरसून गेले होते की, त्या पात्रातील क्रूरता नैसर्गिकपणे बाहेर आली आणि त्यांनी अचानक मुलीला उचलले. यामुळे त्या लहान मुलीच्या चेहऱ्यावर आलेली भीती पूर्णपणे खरी होती.

'सलाम बॉम्बे' चित्रपटाचे सर्वात मोठे वैशिष्ट्य म्हणजे त्यातील बऱ्याच सीन्सचे शूटिंग कोणत्याही स्टुडिओमध्ये किंवा सेटवर न होता, मुंबईच्या खऱ्याखुऱ्या कामाठीपुऱ्यातआणि रेड लाईट एरियात प्रत्यक्ष लोकेशन्सवर झाले होते.

प्रियदर्शिनी इंदलकरच्या फॅशन स्टेटमेंटची चर्चा; अभिनयासोबतच स्टाइलमध्येही वेगळी ओळख: PHOTOS

एबीपी माझा एंटरटेनमेंट डेस्क — Fri, 9 Oct 2026 13:31:09 +0530

प्रियदर्शिनी इंदलकरच्या फॅशन स्टेटमेंटची चर्चा; अभिनयासोबतच स्टाइलमध्येही वेगळी ओळख: PHOTOS

Pakistan Cricketer at Nana Patekar Death : नाना पाटेकर यांचं निधन; पाकिस्तानचा क्रिकेटर ढसाढसा रडला, नानांनी केलेली ती मदत सांगून भरभरुन बोलला!

किरण महानवर — Fri, 9 Oct 2026 13:01:30 +0530

Pakistan Cricketer Basit Ali At Nana Patekar Funeral : ज्येष्ठ अभिनेते नाना पाटेकर (Nana Patekar Death) यांच्या निधनाच्या बातमीने चित्रपटसृष्टीसह क्रीडा क्षेत्रातूनही शोक व्यक्त केला जात आहे. पाकिस्तानचे माजी क्रिकेटपटू बासित अली यांनाही नानांच्या निधनाने मोठा धक्का बसला. त्यांनी सोशल मीडियावर व्हिडीओ शेअर करत नाना पाटेकर यांच्यासोबतच्या जुन्या आठवणींना उजाळा दिला. 1994 मध्ये झालेल्या पहिल्या भेटीपासून ते कठीण काळात मिळालेल्या भावनिक आधारापर्यंतच्या आठवणी सांगताना बासित अली भावुक झाले. बासित अली यांनी सांगितले की, नाना पाटेकर हे केवळ उत्तम अभिनेते नव्हते, तर खऱ्या आयुष्यातही तितकेच प्रेमळ आणि दिलदार व्यक्ती होते. पडद्यावर त्यांनी साकारलेली पात्रे आणि त्यांचे वास्तविक व्यक्तिमत्त्व यामध्ये विलक्षण साम्य होते.

1994 मध्ये झाली पहिली भेट

बासित अली म्हणाले, "आज सकाळी मला बातमी मिळाली की माझे प्रिय बंधू, मित्र आणि जिवंत दंतकथा नाना पाटेकर आता आपल्यात नाहीत. ते एक अद्भुत व्यक्ती होते. चित्रपटांमध्ये त्यांनी साकारलेली पात्रे त्यांच्या खऱ्या आयुष्यातील व्यक्तिमत्त्वासारखीच होती." नाना पाटेकर यांच्यामुळेच पाकिस्तानचा माजी क्रिकेटपटू रशीद लतीफ याला नाना हे टोपणनाव मिळाल्याचेही बासित अली यांनी सांगितले. नाना पाटेकर यांच्यासोबतची त्यांची पहिली भेट 1994 मध्ये झाली होती.

Former Pakistan cricketer Basit Ali’s emotional tribute to Nana Patekar is a beautiful reminder of a friendship that transcended borders. He recalled how the Bollywood legend stayed in touch for decades, checked on his mother during her illness, and reached out after Basit’s own heart surgery. Beyond the screen, Basit remembered Nana as a warm, caring and genuinely good human being. His words also showed just how deeply Nana Patekar was admired in Pakistan. Some artists belong to everyone. Nana Patekar was loved equally on both sides of the border. 🇮🇳❤️🇵🇰
— Brutal Truth (@sarkarstix) October 8, 2026

आई रुग्णालयात असताना नानांचा फोन

नाना पाटेकर यांच्यासोबतच्या आठवणी सांगताना बासित अली यांनी त्यांच्या संवेदनशील स्वभावाचाही उल्लेख केला. ते म्हणाले की, नाना पाटेकर यांच्याशी महिन्यातून एक-दोन वेळा संवाद व्हायचा. बासित अली यांच्या आई रुग्णालयात दाखल असताना नाना दर आठवड्याला त्यांना फोन करायचे. त्यांच्या आईशी बराच वेळ बोलायचे आणि त्यांना वेगवेगळ्या गोष्टी सांगून धीर द्यायचे. बासित अली यांना हृदयाशी संबंधित त्रास सुरू झाला होता, तेव्हाही नाना पाटेकर यांनी त्यांच्या प्रकृतीची विचारपूस केली होती. त्यांनी संदेश पाठवून तसेच फोन करून बासित अली यांच्या तब्येतीची माहिती घेतली होती. या आठवणी सांगताना बासित अली यांनी नानांबद्दलचा आदर आणि प्रेम व्यक्त केले.

नानांना म्हणायचे 'तरुण'

बासित अली यांनी नाना पाटेकर यांच्यासोबतच्या आणखी एका खास आठवणीचाही उल्लेख केला. ते नाना पाटेकर यांना 'तरुण' म्हणायचे, कारण ते आपल्या वयापेक्षा खूपच तरुण दिसत असल्याचे त्यांना वाटायचे. मात्र, यावर नाना पाटेकर गंमतीने उत्तर द्यायचे, "अरे, तरुण राहून काय फायदा? तू म्हातारा आहेस आणि मीसुद्धा म्हातारा आहे."

हे ही वाचा -

Tukaram Mundhe At Nana Patekar Funeral: पहिले भावूक पोस्ट, मग तुकाराम मुंढे नाना पाटेकरांच्या अंत्यविधीला पोहोचले अन्..., नेमकं काय घडलं?, VIDEO

Hanere De Panchi Punjabi Film Review: हनैरे दे पंच्छी: पंजाबच्या गावातली किचकट गोष्ट

नरेंद्र बंडबे — Fri, 9 Oct 2026 12:56:15 +0530

Hanere De Panchi Punjabi Film Review: हनैरे दे पंच्छी (2026) या पंजाबी सिनेमाची सुरुवात जंगलातून होते. पोलीसांचा खबरी जगतर, अमीर या काश्मिरी युवकाला पकडतो. आता त्याला पटियाला पोलीसांकडे सुपूर्द करायचंय. पण घडत भलतंच जंगलातून शहराच्या प्रवासात जगतर आमीरला मध्येच सोडून देतो आणि आपल्या गावाकडे येतो. या गावात एक वेगळीच समस्या त्याची वाट पाहतेय. गावात सवर्ण जमीनदार आणि दलित कामगारांमध्ये संघर्ष सुरुय. जगतर दलित आहे. त्याची जमीन गहाण होती ती नंतर हडपली गेली. गावातल्या सर्वच दलित मजुरांची गोष्ट सारखीचय. हक्काची सरकारी जमीनही मिळालेली नाही. याविरोधात आता दलित शेतमजूरांनी एल्गार केलाय. जगतर या सर्व आंदोलनाचा साक्षीदार बनतो. काही दिवसांनी आमीर त्याला शोधत या गावात येतो. आता दोघं मिळून या आंदोलनात सहभागी होतात. पुढे अनेक अनपेक्षित घडामोडी त्यांची वाट पाहत असतात.

दक्षिण कोरियातल्या 31 व्या बुसान इंटरनॅशनल फिल्म फेस्टिव्हलमध्ये दिग्दर्शक शशांक वालियाचा हनैरे दे पंच्छी (2026) सिनेमाचा वर्ड प्रिमियर झाला. त्याद्वारे पंजाबच्या छोट्या गावातल्या आंदोलनाची ही गोष्ट जागतिक पातळीवर आलीय. आजवर सिनेमात पंजाबबद्दल स्वतंत्र खलिस्तानचा तिढा, ड्रग्स, पोलीस अट्रॉसिटी अश्या गोष्टी दाखवण्यात आल्या. शशांक वालिया प्रेक्षकांना पंजाबच्या आत गावात घेऊन जातो. तिथली सामाजिक आणि राजकिय परिस्थिती दाखवतो. वर-वर समृद्ध वाटणारा पंजाब आतून अतिशय अस्वस्थ आहे. याची जाणिव हनैरे दे पंच्छी पाहिल्यावर होते.

शशांकची गोष्ट दलित-सवर्ण जमिनदार संघर्षावर आधारित असली तरी तो पंजाबकडे पाहण्याचा एक बर्ड आय व्ह्युव देतो. पंजाबमध्ये दलितांवर होणाऱ्या अत्याचांरांमुळं इथं वाढीला लागलेलं ख्रिस्तीन धर्मांतराची गोष्ट शशांक जास्त प्रकर्षानं अधोरेखित करतो. तिथं पर्यंत पोचण्याआधी जमिनदार आणि शेतमजूरांमधला हा संघर्ष नक्की काय आहे? हे दाखवतो. सुरुवातीला दलितांच्या घरातले डॉ. बाबासाहेब आंबेडकर, ज्योतिबा आणि सावित्रीबाई फुले यांचे लहान फोटो दिसतात. सिनेमा शेवटाला येईपर्यंत बाबासाहेब आणि येशू ख्रिस्ताचा फोटो मोठा झालेला असतो. हे असं का घडतंय? याची सर्व कारण शोधण्याचा प्रयत्न शशांकने केलाय.

शशांकच्या हनैरे दे पंच्छी(2026) सिनेमाचा फेमिनिस्ट स्टडी - स्त्रीवादी अभ्यास करता येऊ शकतो. घरातल्या कर्त्या पुरुषानं नशेला कवटाळलंय. यामुळं घर चालवण्याची जबाबदारी बाईवर आलीय. या पंजाबी बायका गावखेड्यात एक नवा फोर्स म्हणून पुढे आल्या. त्यातल्या अनेकजणी जमिनदाराच्या वासनेचा शिकार बनतात पण त्या पुरुषांना पुरुत उरतात. घरच्या पुरुषांनी स्थलांतर केलं तरी त्या जमिन सोडत नाही अशी कणखर पंजाबी महिला प्रेक्षकांना शशांकच्या सिनेमात भेटते.

शशांकनं हा सिनेमा ब्लॅक एन्ड व्हाईट मध्ये केलाय. तो स्वतः सिनेमॅटोग्राफर आहे. "रंग अनेकदा सिनेमाचा पोत बदलवतात. माझ्या सिनेमातली सर्व पात्र आपआपल्या पातळीवर संघर्ष करतायत. त्याचं आयुष्य रंगीत नाही तर सफेद आणि काळं आहे. ते स्वतःही पूर्ण चूक किंवा पूर्ण बरोबर नाहीत. म्हणून आधीपासूनच सिनेमा ब्लॅक अँड व्हाईट करायचं ठरलं होतं", असं शशांक सांगतो.

सिमेनाच्या माध्यमातून काश्मीर आणि पंजाबच्या समस्यांकडे एकत्रित पाहण्याचा दृष्टीकोन शशांकनं दिलाय. जगतरला शोधत गावात आलेला काश्मीरी आमीरला तिथं काश्मिर मध्ये झपाट्यानं होत असलेल्या रस्ते आणि टनलमुळं होणाऱ्या प्रगतीबद्दल विचारलं जातं. या बांधकामामुळं पृथ्वीवरचा हा स्वर्ग आणखी चांगला झाला असेल ना? असा हा प्रश्न ही. यावर आमीर म्हणतो, रस्ते, टनेल, उंच इमारती यामुळं स्वर्गाचा मार्ग सोपा झाला असता तर अमेरिकेताही 'फिरदौस' झाला असता. शशांकनं आपल्या सिनेमातून पंजाब आणि काश्मीर या दोन वादग्रस्त प्रदेशांकडे जगाचा लक्ष वेधण्याचा प्रयत्न केला.

Tanushree Dutta : 'माझ्याविरोधात बोलण्यासाठी नाना पाटेकरांनी राखी सावंतला पैसे दिले होते'; तनुश्री दत्ताचा मोठा दावा, अडीच तासांचा व्हिडीओ शेअर केला, नेमकं काय-काय म्हणाली?

जयदीप मेढे — Fri, 9 Oct 2026 12:53:10 +0530

Nana Patekar Death Tanushree Dutta Reaction: नाना पाटेकर (Nana Patekar) यांच्या निधनानंतर संपू्र्ण सिनेसृष्टीत (Bollywood) दु:खाचा डोंगर कोसळला. नाना पाटेकरांनी प्रदीर्घ कारकि‍र्दीत बऱ्याच सिनेमांमध्ये उल्लेखनीय भूमिका साकारुन प्रेक्षकांच्या मनात अढळ स्थान निर्माण केलं. तर काही वर्षांपूर्वी नाना पाटेकर आणि तनुश्री दत्ता (Tanushree Dutta) यांचं नाव एका मोठ्या वादामुळे चर्चेत आलं होतं. तनुश्री दत्ताने नाना पाटेकरांवर गंभीर आरोप केले होते. दरम्यान, तनुश्री दत्ताने काल (गुरूवारी, ता 8) नाना पाटेकर यांच्या निधनाची बातमी ऐकल्याचं सांगितलं, त्यांच्या कुटुंबाप्रति आपल्या संवेदना व्यक्त केल्या होत्या, त्याचबरोबर 'इव्हिल डेड Evil Dead' असा उल्लेखही तिने केला होता, त्यानंतर उशीरा तिने सोशल मिडीयावरती लाईव्ह येऊन अनेक गोष्टींवरती भाष्य केलं आहे, यामध्ये तिने राखी सावंतने माझ्यावर जे अत्यंत घाणेरडे आरोप केले होते, त्यासाठी तिला नाना पाटेकर यांच्याकडून पैसे मिळाले होते, असा दावा देखील केला आहे.

View this post on Instagram

A post shared by Tanushree Dutta Miss India Universe (@iamtanushreeduttaofficial)

Tanushree Dutta : तनुश्री दत्ताचा व्हिडिओद्वारे गौप्यस्फोट

तनुश्री दत्ताने तिच्या इन्स्टाग्राम अकाऊंटवर एक व्हिडिओ शेअर करत म्हटले, "राखी सावंतने पत्रकार परिषदेत माझ्यावर जे अत्यंत घाणेरडे आरोप केले होते, त्यासाठी तिला नाना पाटेकर यांच्याकडून पैसे मिळाले होते. हे मी स्वतःहून सांगत नसून राखीची सर्वात चांगली मैत्रीण असलेली राजश्री मोरे हिने ही माहिती दिली आहे. पत्रकार परिषदेच्या दोन दिवस आधी राखीने राजश्रीच्याच गाडीत जाऊन नाना पाटेकर यांच्या घरातून 2 ते अडीच लाख रुपये आणले होते. ही गोष्ट राजश्री मोरे हिने किमान 5 लोकांसमोर सांगितली होती."

नाना पाटेकर यांच्या निधनावर प्रतिक्रिया देताना तिने त्यांना 'ईविल डेड' (Evil Dead) म्हटले होते. आता तनुश्रीने सोशल मीडियावर एक व्हिडिओ शेअर करत आणखी एक खळबळजनक दावा केला आहे. नाना पाटेकर यांनी राखी सावंतला माझ्याविरोधात बोलण्यासाठी पैसे दिले होते, असा आरोप तिने केला आहे.

Tanushree Dutta : 'नाना पाटेकर पैसे देऊन काम करून घ्यायचे'

तनुश्री पुढे म्हणाली, "राखीला या कामासाठी पैसे मिळाले होते हे मलाही आधी माहीत नव्हते. पण माझ्याविरोधात घाणेरडे बोलण्यासाठी तिने नाना पाटेकर यांच्या घरातून पैसे घेतले होते. 'मी टू' (Me Too) मोहिमेच्या वेळी राखीने १५ पत्रकार परिषदा घेतल्या होत्या. त्यानंतर मला मानसिक त्रास झाला आणि नाना पाटेकरांची माणसे मला त्रास देत होती. तुम्ही जाऊन राजश्री मोरेला विचारा, माझीही तिच्याशी चांगली ओळख आहे, ती नकार देणार नाही. तिने स्वतः मला सांगितले होते की ती गाडीतच बसली होती."

आपल्या व्हिडिओच्या शेवटी तनुश्रीने म्हटले, "म्हणूनच मी त्यांना 'ईविल' (वाईट व्यक्ती) म्हणत होते. ते स्वतः काही करायचे नाहीत, तर पैसे देऊन दुसऱ्यांकडून करून घ्यायचे आणि स्वतः मात्र काहीच करत नसल्याचा आव आणून आपली प्रतिमा चांगली ठेवण्याचा प्रयत्न करायचे."

Nana Patekar Last Rites Makarand Anaspure Emotional Video Viral: सच्चा दोस्त, आधारस्तंभ हरपला; नाना पाटेकरांच्या जाण्यानं मकरंद अनासपुरे पुरते कोलमडले, डोळ्यांच्या कडा पाणावरा 'तो' क्षण, VIDEO

एबीपी माझा एंटरटेनमेंट डेस्क — Fri, 9 Oct 2026 12:25:49 +0530

Nana Patekar Last Rites Makarand Anaspure Emotional Video Viral: आपली प्रत्येक भूमिका दमदार अभिनय कौशल्याच्या जीवावर फुलवणारा अभिनेता म्हणजे, नाना पाटेकर (Nana Patekar). दिग्गज अभिनेत्याचं असं अचानक निरोप घेणं, प्रत्येकाच्याच मनाला चटका लावणारं ठरलंय. नाना पाटेकरांचं गोव्यात हृदयविकाराच्या झटक्यानं निधन (Nana Patekar Passes Away Goa Following Heart Attack.) झालं असून वयाच्या 75 व्या वर्षी त्यांनी अखेरचा श्वास घेतला. नानांच्या पार्थिवावर (Nana Patekar Funeral) त्यांच्या पुण्यातील (Pune News) डोणजे गावी रात्री उशीरा अंत्यसंस्कार करण्यात आले. त्यांचा मुलगा मल्हार पाटेकर आणि पत्नी नीलकांती पाटेकर यांनी नानांच्या अंत्यविधी पार पाडून त्यांना मुखाग्नी दिला. नानांना अखेरचा निरोप देण्यासाठी राजकीय वर्तुळातील मान्यवर आणि सिनेसृष्टीतील दिग्गज उपस्थित होते. याव्यतिरिक्त सर्वसामान्य आणि चाहत्यांनीही नानांच्या अंत्यसंस्काराला गर्दी केली होती. नानांना अखेरचा निरोप देताना सर्वांचेच डोळे पाणावलेले. या गर्दीत साऱ्यांच्या नजरा खिळल्या त्या मराठी सिनेसृष्टीतील दिग्गज अभिनेते मकरंद अनासपुरे (Marathi Acotr Makarand Anaspure) यांच्यावर. नानांच्या जाण्याचं दुःख त्यांच्या चेहऱ्यावर स्पष्ट दिसत होतं. नानांचं अंत्यदर्शन घेताना तर मकरंद अनासपुरे (Makarand Anaspure) यांच्या अश्रुंचा बांध फुटला.

नाना पाटेकर जेवढे संवेदनशील अभिनेते होते, तेवढेच ते समाजिक जाण असणारेही होते. आपण समाजाचं देणं लागतो, असं ते नेहमीच बोलायचे. त्यांनी स्वतःला समाजासाठी वाहून घेतलेलं. नाना पाटेकर आणि मकरंद अनासपुरे गेली अनेक वर्षे एकत्र काम करत होते. 2015 मध्ये दोघांनी मिळून 'नाम फाउंडेशन'ची स्थापना केलेली. या संस्थेअंतर्गत महाराष्ट्रातील दुष्काळी भागातील शेतकऱ्यांना आणि विशेषतः आत्महत्याग्रस्त शेतकऱ्यांच्या कुटुंबीयांना मदत केली जाते. नानांच्या निधनानंतर मकरंद अनासपुरे यांनी एक भाऊ, मार्गदर्शक आणि सामाजिक लढ्यातील त्यांचा सर्वात खंबीर आधारस्तंभ गमावला आहे. नुकतीच 15 सप्टेंबरला त्यांच्या 'नाम फाउंडेशन'ला 11 वर्ष पूर्ण झाली. पण, त्याच्या वर्धापन दिनाचा कार्यक्रम करण्यास नानांनी नकार दिला, कारण राज्यातील बळीराजावर ओढावलेलं दुष्काळाचं संकट.

नाना पाटकेरांसोबत सामाजिक कार्यात अगदी सावलीसारखे वावरणारे मकरंद अनासपुरेही मित्राचं अंत्यदर्शन घेताना कोलमडून गेल्याचं पाहायला मिळालं. मकरंद अनासपुरे 'नाम फाउंडेशन'चे सीईओ गणेश थोरात यांना घट्ट मिठी मारुन धायमोकलून रडताना दिसले. दोघांनाही आपल्या अश्रुंना आवर घालणं कठीण झालेलं. आपला आधारस्तंभ, मोठा भाऊ आणि सच्चा दोस्त गेल्याचं दुःख त्यांना आभाळापेक्षाही मोठं होतं. मकरंद अनासपुरे शोकाकूल झाल्याचं पाहायला मिळालं.

दरम्यान, ज्येष्ठ अभिनेते नाना पाटेकर यांचं वयाच्या 75 व्या वर्षी निधन झालंय. गोव्यातील राहत्या घरात नानांना हृदयविकाराचा झटका आला. दिग्गज अभिनेत्याच्या अशा अचानक जाण्यानं फक्त मनोरंजन विश्वच नाहीतर, अख्खा देश शोकाकूल झालाय. पुण्यातील त्यांच्या डोणजे गावी नाना पाटेकरांवर अंत्यसंस्कार करण्यात आले. त्यावेळी राजकारणातील मान्यवर, सिनेविश्वातील दिग्गज उपस्थित होते.

पाहा व्हिडीओ : Makrand Anaspure Cry : सच्चा दोस्त सोडून गेला, मकरंद अनासपुरे ढसढसा रडले...

महत्त्वाच्या इतर बातम्या :

Nana Patekar Last Rite Performed At Midnight: नाना पाटेकरांचे अंत्यविधी कुटुंबीयांनी सूर्यास्तानंतर, रात्री उशीरा का उरकले? थोरल्या लेकानं सांगितलं मोठं कारण