Famous Youtuber Found Dead In Georgia: प्रसिद्ध युट्यूबरच्या (Youtuber) निधनानं सध्या खळबळ माजली आहे. प्रसिद्ध थाई युट्युबर (Famous Thai YouTuber) 'ह्लुन सोलो' (Hlun Solo) यांचं वयाच्या 27 व्या वर्षी निधन झालंय. व्हिडीओ कंटेंटच्या शुटिंगसाठी सोलो जॉर्जियाला गेला होता. यावेळी तो सतत कुटुंबीयांच्या संपर्कात होता, पण अचानक एक दिवस त्याचा त्याच्या कुटुंबीयांशी संपर्क तुटला आणि त्यानंतर त्याच्या निधनाची बातमी समोर आली. त्याच्या निधनाबाबत सांगताना कुटुंबीयांनी सांगितलं की, 30 जुलै रोजी त्याचं निधन झालंय.
30 जुलै रोजी निधन (Youtuber Hlun Solo Found Dead)
ह्लुन याचं खरं नाव 'बोवोर्नथॅट पेंगसुक' (Bovornthat Pengsuk) होतं. ते 'ट्रॅव्हल कंटेंट क्रिएटर' होते. 13 जुलैपासून त्याचा त्याच्या कुटुंबाशी संपर्क होत नव्हता. त्यानंतर, त्याना शोधण्यासाठी कुटुंबानं सोशल मीडियावर मदतीचं आवाहन केलेलं. अनेक दिवस कोणतीही माहिती मिळाली नसल्यानं त्याचे फॉलोअर्स सतत विचारणा करत होते, अखेर त्याच्या कुटुंबानं त्याच्या निधनाचं वृत्त जाहीर केलं.
युट्यूबरचा मृतदेह परत आणण्यासाठी तयारी सुरू
थायलंडच्या परराष्ट्र मंत्रालयानं सांगितलं की, मृतदेह परत आणण्यासाठी आवश्यक प्रक्रिया पूर्ण करण्याकरता ते अंकारा (तुर्की) येथील रॉयल थाई दूतावास आणि जॉर्जियामधील स्थानिक प्रशासनासोबत चर्चा करत आहेत. याव्यतिरिक्त, प्रसिद्ध युट्यूबरच्या मृत्यूचं कारण शोधण्यासाठी थाई अधिकारी जॉर्जियाच्या अधिकाऱ्यांच्या संपर्कात आहेत. माहिती विभागाचे महासंचालक आणि प्रवक्ते जतेचाई अपकर्नीतिकसेत यांनी सांगितलं की, अंकारा येथील रॉयल थाई दूतावासातील अधिकारी स्थानिक अधिकाऱ्यांची भेट घेण्यासाठी जॉर्जियाला गेले होते आणि तिथेच या मृत्यूची पुष्टी झाली.
निधनाच्या वृत्ताला कुटुंबीयांकडून दुजोरा
माध्यमांशी बोलताना हलुनची 82 वर्षीय आजी, सोम प्लेंगसुक यांनी सांगितलं की, त्यांना आशा होती की, तिचा नातू सुखरूप असेल आणि पूर्वीच्या प्रवासांप्रमाणेच लवकरच घरी परत येईल. त्यांनी सांगितलं की, त्या आदल्या दिवशी आणि रात्री सतत त्याच्याबद्दल चिंतेत होत्या आणि त्याच्याविषयीच्या बातम्यांची वाट पाहत होत्या. जॉर्जियाची राजधानी तिबिलिसी इथल्या एका हॉटेलमध्ये त्यानं आत्महत्या केल्याचा जो दावा सध्या सोशल मीडियावर केला जातोय, तो हलुनच्या आजींनी फेटाळून लावला. त्याच्या मृत्यूच्या नेमक्या परिस्थितीबद्दल स्पष्ट माहिती मिळावी, अशी मागणी त्यांनी केली आहे.
दरम्यान, त्या युट्युबरचा भाऊ सोमसाक वुत्सारी यानं सांगितलं की, आदल्या रात्री अनेक सोशल मीडिया युजर्सकडून त्याला हलुनच्या मृत्यूबाबतचे संदेश मिळाले होते. दरम्यान, कुटुंब सध्या कॉन्सुलर कागदपत्रांची वाट पाहत आहे, ती मिळाल्यावर पुढील आवश्यक कायदेशीर प्रक्रिया पूर्ण केल्या जातील. या कठीण काळात कुटुंबाच्या भावनेचा आणि गोपनीयतेचा आदर करावा, तसेच लोकांनी पडताळणी न केलेली माहिती पसरवू नये किंवा तर्क-वितर्क करू नयेत, असं आवाहन कुटुंबानं केलं आहे.