Deool Band 2 Pravin Tarde: मराठी मनोरंजनसृष्टीत सध्या 'देऊळ बंद 2' (Deool Band 2) चित्रपटाची प्रचंड चर्चा सुरू आहे. बॉक्स ऑफिसवर महिन्याभरातच या चित्रपटाने 90 कोटींचा टप्पा पार केला असून 100 कोटींच्या कलेक्शनपासून शेवटच्या टप्प्यावर हा चित्रपट उभा आहे. दुसरीकडे मराठी सिनेमाच्या इतिहासात लवकरच 'देऊळ बंद 2' नवा इतिहास रचेल. मात्र, 'या सिनेमाने राजा शिवाजीचा रेकॉर्ड मोडू नये ' असं देऊळ बंद चे दिग्दर्शक प्रवीण तरडे यांनी म्हटलं. असं म्हणण्यामागचं कारणही त्यांनी सांगितलं. 'देऊळ बंद 2 ' चित्रपट पुढे जातोय हे कळल्यानंतर अभिनेते व दिग्दर्शक रितेश देशमुख यांचा आवर्जून फोन आल्याचेही प्रवीण तरडे यांनी सांगितलं. या फोन कॉलची सध्या सगळीकडे एकच चर्चा आहे.
काय म्हणाले प्रवीण तरडे ?
प्रवीण तरडे म्हणाले " माझा सिनेमा कितीही मोठा झाला तरी या सिनेमानं 'राजा शिवाजी' चा रेकॉर्ड मोडू नये असं मला वाटतं. कारण तो छत्रपती शिवाजी महाराजांवरचा सिनेमा आहे.रितेश खूप चांगला माणूस आहे.रितेश आणि जेनेलिया किती सुंदर कपल आहे हे सगळ्यांनाच माहिती.मराठी माणसाचा झेंडा त्यांनी रोवला आहे.या दोघांचंही मी कौतुक सांगतो. 'राजा शिवाजी' सिनेमा हाउसफुल सुरू होता. आणि त्यातच 'देऊळ बंद 2 ' सिनेमा आला. 'देऊळ बंद 2' ने आठवड्याभरातच धडाधड थिएटर कॅप्चर केले. 11 दिवसातच आपण 50 कोटी कमावले. पण पहिला फोन मला रितेश देशमुख सरांचा आला." असं प्रवीण तरडे यांनी सांगितलं. 'प्लॅनेट मराठी'शी ते बोलत होते.
ते पुढे म्हणाले, "त्यांनी माझं खास अभिनंदन केलं. ते म्हणाले 'की मला खूप बरं वाटतंय. एक मराठी सिनेमा दुसऱ्या मराठी सिनेमाला मागे टाकून पुढे चालला आहे. तुम्ही माझ्या पुढे जा.दोन आठवड्यांनी तुमच्यापुढे कोणीतरी जाईल.मग त्याच्यापुढे कोणीतरी जाईल.आपण एकमेकांमध्ये स्पर्धा करू आणि मराठी सिनेमा मोठा करू .' ही किती सुंदर भावना आहे.त्यामुळे रितेश देशमुख असो नागराज मंजुळे असो किंवा प्रवीण तरडे.मराठी सिनेमा मोठा झाला पाहिजे.फक्त देऊळ बंद 2 चित्रपटाविषयी मला एक गोष्ट सांगावीशी वाटते की, राजा शिवाजी किंवा सैराट सिनेमाच्या मागे चॅनल होतं. मार्केटिंग टीम होती. 'देऊळ बंद 2' च्या मागे कोणीही नव्हतं. असं प्रवीण तरडे यांनी सांगितलं.
'देऊळ बंद 2' चित्रपटाचं बॉक्स ऑफिस कलेक्शन
'देऊळ बंद 2' या चित्रपटाने जगभरातून 84.94 कोटी रुपयांचं कलेक्शन करत बॉक्स ऑफिस हादरवून टाकलं आहे. फक्त 32 दिवसात या चित्रपटाचं बॉक्स ऑफिस परदेशातील कलेक्शन तसेच तंबूशोमधून मिळालेले कलेक्शन 93.50 कोटी रुपये झाले आहे. दोन दिवसांपूर्वी, दिग्दर्शक व लेखक प्रवीण तरडे यांनी चित्रपटाच्या बॉक्स ऑफिस कलेक्शन विषयीची एक पोस्ट केली होती. यात त्यांनी म्हटलेलं 'मित्रांनो नागराज च्या सैराटने घडलेल्या रस्त्यावरून रितेश राजा शिवाजी घेऊन डौलात निघाला.त्याच्या मागोमाग आपला देऊळ बंद २ घेऊन मी १०० च्या शेवटच्या टप्प्यावर आलोय. खूप अवघड होतं सगळं, पण तुमच्या आणि स्वामींच्या जीवावर शक्य झालं.मराठी सिनेमा मोठा होतोय.लवकरच मराठी सिनेमाचं तिसरं शतक साजरं करू' असं त्यांनी म्हटलेलं.