Crime Patrol New Season : छोट्या पडद्यावरील लोकप्रिय क्राईम शो ‘क्राइम पेट्रोल’( Crime Petrol) पुन्हा एकदा नव्या अंदाजात प्रेक्षकांच्या भेटीला येणार आहे. मात्र यावेळी शोमध्ये एक मोठा बदल पाहायला मिळणार आहे. अनेक वर्षं आपल्या दमदार आवाजातून आणि ‘सावधान, सतर्क राहा’ या अंदाजातून प्रेक्षकांना गुन्हेगारीच्या घटनांची माहिती देणारे अनूप सोनी (Anup Soni) आता या शोमध्ये दिसणार नाहीत. त्यांच्या जागी बॉलिवूडचा सिंघम अर्थात अजय देवगण (Ajay Devgan) सूत्रसंचालकाच्या भूमिकेत दिसणार आहे. अलीकडेच सोनी मराठीवर 'कोण होणार मराठी करोडपती' या शोच सूत्रसंचालन करण्यासाठी माधुरी दीक्षित उतरली आहे. दुसरीकडे 'क्राइम पेट्रोल' या लोकप्रिय टीव्ही शोचा अनेक वर्ष चेहरा असणाऱ्या अनुप सोनी यांच्या जागी अभिनेता अजय देवगन दिसणार आहे. TRP च्या स्पर्धेत सोनी TVने आता थेट लोकप्रिय चेहरे उतरल्यामुळे एकच चर्चा रंगली आहे.
अजय देवगणच्या आवाजात ऐकायला मिळणार गुन्ह्यांच्या धक्कादायक कहाण्या
सोनी टीव्हीचा लोकप्रिय शो ‘क्राइम पेट्रोल’ आता ‘क्राइम पेट्रोल: क्राइम का करेंट’ या नव्या पर्वासह प्रेक्षकांच्या भेटीला येत आहे. या नव्या सीझनमध्ये केवळ गुन्ह्यांच्या कहाण्यांची मांडणीच नाही, तर त्यांचा सादरीकरणाचा अंदाजही बदलणार आहे. शोचा नवा प्रोमो नुकताच समोर आला असून, यात अजय देवगण समाजातील गुन्हेगारीच्या वाढत्या घटनांवर भाष्य करताना दिसत आहे. विशेष म्हणजे, गुन्हे करणारे नेहमीच अनोळखी नसतात, तर अनेकदा आपल्या आसपासचे आणि अगदी जवळचे लोकच असू शकतात, याकडे अजय देवगण लक्ष वेधताना दिसतोय. लहानपणी अनोळखी व्यक्तींपासून सावध राहण्याचा सल्ला दिला जायचा. रात्री घराला कुलूप लावण्यापासून ते अनोळखी व्यक्तींपासून अंतर ठेवण्यापर्यंत अनेक गोष्टी सांगितल्या जायच्या. मात्र आजच्या काळात गुन्ह्यांचं स्वरूपच बदललं आहे. अनेक प्रकरणांमध्ये आरोपी हा पीडिताच्या ओळखीचा, घरचा किंवा जवळचा व्यक्ती असल्याचं समोर येतं. अशाच धक्कादायक वास्तवावर नव्या पर्वातून प्रकाश टाकला जाणार आहे.
‘या वेळी मी असेल तुमच्या सोबत...’
प्रोमोमध्ये अजय देवगण म्हणतो, या वेळी ‘क्राइम पेट्रोल’मध्ये देशाला हादरवून टाकणाऱ्या काही घटनांची कहाणी समोर आणली जाणार आहे. मात्र या घटना पाहताना केवळ घाबरून जाण्याऐवजी त्यातून समजून घेणं आणि सावध होणं महत्त्वाचं आहे, असा संदेशही तो देताना दिसतोय. “या वेळी मी असेल तुमच्या सोबत,” अशा आशयाचं कॅप्शन देत निर्मात्यांनी अजय देवगणचा प्रोमो शेअर केला आहे. त्यामुळे ‘सिंघम’नंतर आता अजय देवगण छोट्या पडद्यावरही प्रेक्षकांना गुन्हेगारीच्या विश्वाची थरारक सफर घडवताना दिसणार आहे.
31 ऑगस्टपासून सुरू होणार नवं पर्व
‘क्राइम पेट्रोल: क्राइम का करेंट’ हा शो 31 ऑगस्ट 2026 पासून Sony Entertainment Television वर प्रसारित होणार आहे. तसेच प्रेक्षकांना हा शो SonyLIV वरही पाहता येणार आहे. रिपोर्ट्सनुसार, शोच्या पहिल्या 15 भागांचं शूटिंग पूर्ण झालं आहे. या नव्या पर्वामुळे अजय देवगणचं छोट्या पडद्यावरील सूत्रसंचालन क्षेत्रात पदार्पण होणार आहे. त्यामुळे त्याचा हा नवा अंदाज पाहण्यासाठी चाहत्यांमध्येही उत्सुकता निर्माण झाली आहे.
‘क्राइम पेट्रोल’ म्हटलं की सर्वात आधी आठवतात ते अनूप सोनी. अनेक वर्षं त्यांनी या कार्यक्रमाचं सूत्रसंचालन केलं. 2010 ते 2018 या काळात त्यांनी शोची धुरा सांभाळली आणि त्यांच्या विशिष्ट शैलीमुळे ‘क्राइम पेट्रोल’ला वेगळी ओळख मिळाली. अनूप सोनी यांच्या निवेदनाचा अंदाज आणि त्यांचा ‘सावधान, सतर्क राहा’ हा डायलॉग आजही प्रेक्षकांच्या लक्षात आहे. आता अनेक वर्षांनंतर त्यांच्या जागी अजय देवगण दिसणार असल्याने ‘क्राइम पेट्रोल’चं हे नवं पर्व प्रेक्षकांसाठी किती वेगळं ठरतं, हे पाहणं उत्सुकतेचं ठरणार आहे.