Charusheela Sable On Kedar Shinde: मराठी इंडस्ट्रीतील (Marathi Industry) आघाडीच्या दिग्दर्शकांमध्ये आवर्जुन समाविष्ठ केलं जाणारं नाव म्हणजे, दिग्दर्शक केदार शिंदे (Kedar Shinde). अनेक लोकप्रिय नाटकं, मालिका आणि चित्रपट केदार शिंदे यांनी दिग्दर्शित केले आहेत. केदार शिंदे म्हणजे, शाहीर साबळे यांचे नातू. कलापरंपरेचे संस्कारांतच केदार शिंदेंची जडणघडण झाली, असं म्हटलं तरी वावगं ठरणार नाही. आजा मराठी इंडस्ट्रीतील दिग्गजांमध्ये केदार शिंदेंचं नाव आवर्जुन घेतलं जातं, पण याच केदार शिंदेंबाबत त्यांची सख्खी मावशी चारुशीला साबळे यांनी खंत व्यक्त केली आहे. चारुशीला साबळे वच्छानी (Charusheela Sable Vachhani) म्हणजेच, एकेकाळच्या मराठीतील आघाडीच्या अभिनेत्री आणि शाहीर साबळे (Shahir Sable) यांची मुलगी. चारुशीला यांनी अनेक मराठी चित्रपटांमध्ये काम केलंय. केदारनं इतरांना संधी दिली पण मला कधीच दिली नाही, अशी खंत चारुशीला साबळेंनी आपला भाचा दिग्दर्शक केदार शिंदेंबाबत व्यक्त केली आहे.
चारुशीला साबळे वच्छानी यांनी नुकतीच इट्स मज्जाला मुलाखत दिली. या मुलाखतीदरम्यान त्यांनी वेगवेगळ्या मुद्द्यांवर भाष्य केलं. तसेच, केदार शिंदे यांच्या बालपणीच्या काही आठवणीही त्यांनी सांगितल्या. त्या म्हणाल्या की, "केदार हा माझा विद्यार्थी आहे. मी 'लोकधारा' करत असताना तो फक्त 10 वर्षांचा होता. त्याचं संपूर्ण बालपण मी पाहिलं आहे. माझ्या बहिणीचा तो मुलगा असून तो लाडात वाढला. त्याच्यासाठी खास जरदाळूचं वेगळं पाकीट ठेवलं जायचं आणि आम्हाला त्याला हातही लावू दिला जात नव्हता."
चांदीचा चमचा घेऊनच जन्माला आला : चारुशीला साबळे
आजवर केदार शिंदे यांच्या कोणत्याच सिनेमात चारुशीला साबळे दिसल्या नाहीत. याबाबत त्यांना मुलाखतीत विचारलं असता त्या म्हणाल्या की, "हा प्रश्न मला अनेकजण विचारतात आणि मी उत्तर द्यायचं टाळते. ही खूप अभिमानाची गोष्ट आहे की, आमच्या घरातील एवढा चांगला मुलगा तो. तो माझा विद्यार्थीही आहे. कारण जेव्हा मी लोकधारा केलं तेव्हा मी 25 वर्षांची होते आणि केदार दहा वर्षांचा होता. ज्यावेळी मी लोकधारासाठी मुलांना शिकवत होते, त्यांना गोळा करत होते हे सगळं केदारनं बघितलं आहे. तो शाहीर साबळेंचा नातू. आमच्या घरातला पहिला नातू. माझ्या बहिणीचा मोठा मुलगा. त्याचं बालपण अत्यंत लाडाकोडात गेलं. त्याच्यासाठी जर्दाळूची पाकिटं वेगळी आणून ठेवली जायची. त्या काळात आणि आम्हाला त्याला हात लावू दिला जायचा नाही. तो चांदीचा चमचा घेऊनच जन्माला आला. आम्हाला खूप अभिमान आहे की, तो खूप मोठा दिग्दर्शक झाला."
केदार उद्धार करणारा माणूस : चारुशीला साबळे
पुढे बोलताना चारुशीला साबळे वच्छानी म्हणाल्या की, "केदार हा उद्धार करणारा माणूस. यासंदर्भातल्या माझ्याच मैत्रिणींबाबत अनेक आठवणी आहेत. मोहन गोखले वारले त्यावेळी... तो माझा आणि अजितचा खूप चांगला मित्र... त्यानंतर केदारनं शुभांगीला इतकी सुंदर सिरीयल दिली. तिचं करिअर गेलं ना पुढे... एक अभिनेत्री म्हणून तिला ओळख मिळाली. त्यानंतर अजितचं निधन झालं, मला वाटलं आता तो माझा उद्धार करेल पण तसं काही घडलं नाही. मग लक्ष्मीकांत वारला... तो ही माझा खूप चांगला मित्र... केदारनं त्याच्या पत्नीला, प्रियाला जत्रासारखा सिनेमा दिला. त्यानं फक्त त्यांनाच नाही तर सिद्धार्थ जाधव, अंकुश यांनाही पुढे आणलं..."
त्यानंच सांगावं, त्यानं मला सिनेमा का दिला नाही? : चारुशीला साबळे
"खरंतर हे सगळे इंडस्ट्रीत येण्यात माझा मोठा वाटा आहे. बेसिक शिक्षण त्याने माझ्याकडे आणि बाबांकडे घेतलं आहे. आता त्यानेच सांगावं की, त्याने मला का सिनेमा दिला नाही. कारण मी त्याला या आधी कधी याबद्दल बोलले नाही. आमच्यात कधी बोलणं झालं नाही. त्याने बायकांवर आधारित अनेक सिनेमे केले. अनेक छोट्या भूमिका असलेले सिनेमेही केले. पण त्याने कधीच मला विचारलं नाही.", असं चारुशीला म्हणाल्या.
एका वेळी भूमिका देणार होता, पण… : चारुशीला साबळे वच्छानी
"एकदा एका सिनेमासाठी माझी निवड होणार होती, पण शेवटी ती भूमिका दुसऱ्यालाच दिली गेली. मग मी महेश कोठारेला फोन केला आणि त्यांच्या मालिकेत काम मिळवलं. तेही वर्षभर केलं, नशिबाचाही भाग असतो हा...", असं चारुशीला साबळे म्हणाल्या.
दरम्यान, चारुशीला साबळे वच्छानी या मराठी कलाविश्वातील एकेकाळच्या आघाडीच्या अभिनेत्री आणि नृत्यांगना होत्या. चारुशीला यांनी अनेक सिनेमांमध्ये काम केलं असून त्यांनी अजित वच्छानी यांच्यासोबत लग्न केलं. लग्नानंतर चारुशीला रुपेरी पडद्यापासून दुरावल्या.पती अजित यांच्या मृत्यूनंतर चारुशीला यांनी पुन्हा इंडस्ट्रीतून पुनरागमन केलं. त्या अनेक मालिकांमध्ये झळकल्या, पण त्या कधीच भाचा केदार शिंदे यांच्या सिनेमात झळकल्या नाहीत. यामागचं कारण आणि मनातली खंत चारुशीला यांनी व्यक्त केली आहे.
महत्त्वाच्या इतर बातम्या :