Dharmaveer : 'धर्मवीर मुक्काम पोस्ट ठाणे' (Dharmaveer Mukkam Post Thane) या सिनेमाने बॉक्स ऑफिसवर धुमाकूळ घातला असून आता या सिनेमाचा टॉकीज प्रिमिअर होणार आहे. त्यामुळे मराठी सिनेसृष्टीला सुगीचे दिवस दाखवणारा सिनेमा प्रेक्षकांना आता घरबसल्या पाहायला मिळणार आहे.
'धर्मवीर मुक्काम पोस्ट ठाणे' या सिनेमाने सिनेमागृहाबाहेर हाऊसफुल्लचे बोर्ड झळकवले होते. त्यानंतर हा सिनेमा 'झी 5' या ओटीटी प्लॅटफॉर्मवरदेखील रिलीज झाला. सिनेमा प्रदर्शित होऊन अनेक महिने झाले असले तरी आजही हा सिनेमा प्रेक्षकांच्या पसंतीस उतरतो आहे.
हिंदी सिनेमांना गर्दी करणारे प्रेक्षक मराठी चित्रपटांकडे दुर्लक्ष करत असल्याचं बोललं जातं पण 'धर्मवीर'ने बॉक्सऑफिसवरच्या घवघवीत यशाने प्रेक्षक पुन्हा मराठी चित्रपटाकडे येऊ लागल्याचं सुखद चित्र दिसून आलं. अभिनेते प्रसाद ओक यांनी साकारलेल्या आनंद दिघे यांच्या भूमिकेवर प्रेक्षकांनी आपल्या पसंतीची ठसठशीत मोहोर उमटवली आहे.
प्रविण तरडे यांच्या दमदार लेखन आणि कौशल्यपूर्ण दिग्दर्शनाने सजलेला, झी स्टुडिओज, मंगेश देसाई यांच्या साहिल मोशन आर्ट्सची निर्मिती असलेला ‘धर्मवीर मु.पो. ठाणे’ हा सिनेमा सध्या चांगलाच चर्चेत आहे. या सिनेमात अभिनेता प्रसाद ओकने आनंद दिघे यांची भूमिका साकारली आहे. आता या सिनेमाचा टॉकीज प्रीमिअर 25 सप्टेंबरला दुपारी 12 वा. आणि सायंकाळी 6 वाजता झी टॉकीजवर होणार आहे.
संबंधित बातम्या