मुंबई : अभिनेत्री तनुश्री दत्ताने अभिनेते नाना पाटेकर यांच्यावर आपल्यासोबत गैरवर्तन केल्याचा आरोप केला आहे. तनुश्रीच्या आरोपांनंतर बॉलिवूडमधील अनेक कलाकार तिच्या बाजूने सरसावले. तर अनेकांनी तनुश्रीच्या आरोपांना चुकीचं ठरवलं. मात्र बिग बी अर्थात अमिताभ बच्चन यांनी याप्रकरणी कोणाच्याही बाजूने उभं न राहण्याचा निर्णय घेतला आहे.
'ठग्स ऑफ हिंदोस्तान'च्या ट्रेलर रिलीजच्या निमित्ताने आमिर खान आणि अमिताभ बच्चन एकत्र आले होते. त्यावेळी बिग बी यांना तनुश्री दत्ताने नाना पाटेकर यांच्यावर केलेल्या आरोपांबाबत त्यांची प्रतिक्रिया विचारली. त्यावर बिग बी म्हणाले की, 'मी नाना पाटेकर नाही किंवा मी तनुश्री दत्ता नाही.'
अमिताभ बच्चन यांच्या प्रतिक्रियेबद्दल तनुश्री दत्ताने दु:ख व्यक्त केलं आहे. तनुश्रीने पुढे म्हटलं की, "मी दु:खी आहे. जे लोक सामाजिक समस्यांवर आधारित सिनेमांमध्ये काम करतात, मात्र खऱ्या आयुष्यात ज्यावेळी योग्य भूमिका घेण्याची वेळ येते, त्यावेळी हे लोक अशी प्रतिक्रिया देतात."
तनुश्रीच्या आरोपांनंतर तिच्या समर्थनार्थ आणि विरोधातील असे दोन गट पडले असले तरी, अनेक बड्या कलाकारांनी याप्रकरणी आपली प्रतिक्रिया देणं टाळलं आहे. सलमान खान, आमिर खान, शाहरुख खान आणि अमिताभ बच्चन याप्रकरणी कोणाच्याही बाजुन उभं न राहण्याच निर्णय घेतला आहे.
काय आहे प्रकरण?
बॉलिवूडपासून दूर गेलेली अभिनेत्री तनुश्री दत्ताने आपल्यासोबत गैरवर्तन झाल्याची आठवण सांगितली. 2008 साली 'हॉर्न ओके प्लीज' चित्रपटाच्या सेटवर अभिनेते नाना पाटेकर यांनी गैरवर्तन केल्याचा आरोप तनुश्रीने केला.
'हॉर्न ओके..' सिनेमाच्या एका स्पेशल गाण्याचं शूटिंग सुरु होतं. त्यावेळी नाना पाटेकरांनी मला बाहुपाशात घेतलं. कोरिओग्राफर्सना दूर व्हायला सांगून डान्स कसा करावा, हे ते दाखवत होते, असं तनुश्रीने सांगितलं. 'झूम टीव्ही'ला दिलेल्या मुलाखतीत तनुश्रीने हा आरोप केला होता.
तो 'सोलो' डान्स असल्याचं काँट्रॅक्टमध्ये स्पष्ट लिहिलेलं असतानाही त्यांना माझ्यासोबत इन्टिमेट सीन करायचा होता. मी इतकी अनकम्फर्टेबल झाले, की अखेर मी ते गाणं न करण्याचा निर्णय घेतला. तो अनुभव आठवून मी आजही दचकते, असं तनुश्री सांगते.
संबधित बातम्या
नाना पाटेकरांकडून गैरवर्तन, अभिनेत्री तनुश्री दत्ताचा आरोप