लोकप्रिय बॉलिवूड अभिनेत्रीला गँगस्टरकडून 10 कोटींच्या खंडणीची धमकी, मनोरंजन विश्वात खळबळ
सध्या पोलिसांनी या प्रकरणाचा तपास सुरू केला असून ई-मेल आणि व्हॉइस मेसेजचा स्रोत शोधण्याचे काम सुरू आहे.
Gangster extortion threat: मनोरंजन विश्वात सध्या भीतीचं वातावरण तयार झालं आहे. अनेक बॉलिवूड कलाकारांना गँगस्टरकडून धमक्या येताना दिसत असताना आणखी एक धक्कादायक प्रकार समोर आला आहे. पंजाबी अभिनेत्री हिमांशी खुराना (Himanshi Khurana) हिने मोहाली पोलिसांकडे तक्रार दाखल करत परदेशात बसलेल्या एका गँगस्टरकडून 10 कोटी रुपयांच्या खंडणीची धमकी मिळाल्याचा आरोप केला आहे. या प्रकरणामुळे मनोरंजन विश्वात खळबळ उडाली आहे.
नेमकं प्रकरण काय?
पोलिसांनी दिलेल्या माहितीनुसार, अभिनेत्रीने दिलेल्या तक्रारीवरून एफआयआर नोंदवण्यात आला आहे. हिमांशीने पोलिसांना सांगितले की, तिच्या अधिकृत ई-मेल आयडीवर खंडणीची मागणी करणारा ई-मेल आला होता. या ई-मेलमुळे तिने तत्काळ पोलिसांत धाव घेतली.
तक्रारीवर कारवाई करत पोलिसांनी शनिवारी सोहाना पोलीस ठाण्यात भारतीय न्याय संहिता (BNS) च्या कलम 308(4) (खंडणी) आणि 351(3) अंतर्गत गुन्हा नोंदवला आहे. पोलिस अधीक्षक (तपास) Saurav Jindal यांनी सांगितले की, “तक्रारीनुसार संबंधित ई-मेलमध्ये परदेशात असलेल्या गँगस्टरने पाठविल्याचा दावा असलेला व्हॉइस नोट होता, ज्यामध्ये 10 कोटी रुपयांची खंडणी मागण्यात आली आहे.”
सध्या पोलिसांनी या प्रकरणाचा तपास सुरू केला असून ई-मेल आणि व्हॉइस मेसेजचा स्रोत शोधण्याचे काम सुरू आहे. पुढील कारवाई कायद्यानुसार केली जाईल, असे अधिकाऱ्यांनी स्पष्ट केले.
कोण आहे हिमांशी खुराना?
हिमांशी खुराना ही अभिनेत्री आणि मॉडेल असून ती 2013 मधील पंजाबी चित्रपट Sadda Haq मधील भूमिकेमुळे ओळखली जाते. तिने अनेक म्युझिक व्हिडिओंमध्ये काम केले आहे तसेच ती Bigg Boss च्या तेराव्या पर्वातही सहभागी झाली होती.
दरम्यान, काही आठवड्यांपूर्वी पंजाबी गायक Dilnoor यानेही मोहाली पोलिसांकडे तक्रार करत 10 कोटी रुपयांची मागणी करणारा धमकीचा फोन आल्याचा आरोप केला होता. त्या कॉलमध्ये लोकप्रिय गायक B Praak याचा उल्लेख करण्यात आल्याचेही सांगितले गेले होते.
अलीकडेच बॉलिवूडमधील प्रसिद्ध दिग्दर्शक-निर्माते रोहित शेट्टीच्या मुंबईतील जुहू येथील घराबाहेर मंगळवारी मध्यरात्री गोळीबार झाल्याने एकच खळबळ उडाली आहे. या प्रकरणाची जबाबदारी कुख्यात लॉरेन्स बिश्नोई गँगने घेतली असून, सोशल मीडियावरून थेट जीवे मारण्याची धमकी देण्यात आली. त्यामुळे खळबळ उडाली होती.
महत्त्वाच्या बातम्या
