मुंबई : सोशल मीडियामुळं जग, कलाकार- चाहते कितीही एकमेकांच्या जवळ आले असले तरीही याचे काही तोटेही होत असल्याचं पाहायला मिळत आहे. इंटरनेटचा वाढता वापर पाहता मागील काही काळात हॅकर्सचा सुळसुळाट झाल्याचं पाहायला मिळत आहे. अनेकांच्या सोशल मीडिया अकाऊंटवर, इंटरनेटच्या माध्यमातून चालणाऱ्या व्यवहारांवर या हॅकर्सची नजर आहे. याचाच फटका आता अभिनेत्री तब्बू हिलाही बसला आहे.
फराह खान, ईशा देओल, विक्रांत मेस्सी यांच्यामागोमाग तब्बूही सायबर हल्ल्याची शिकार झाली आहे. अकाऊंटशी छेडछाड झाली असली तरीही तब्बू तिच्या अकाऊंटवरुन फॉलोअर्सना सावध करण्यासाठी मेसेज शेअर करु शकत आहे. किंबहुना तिनं याच धर्तीवर एक मेसेज शेअर करत म्हटलंय, 'हॅक अलर्ट... माझं अकाऊंट हॅक झालं आहे. कृपया माझ्या अकाऊंटवरील कोणतीही लिंक क्लिक करु नका.' इन्स्टाग्राम स्टोरीच्या माध्यमातून तिनं हा मेसेज शेअर केला.
सेलिब्रिटींच्या मुलांच्या अकांटवरही हॅकर्सची नजर
फक्त सेलिब्रिटीच नव्हे, तर त्यांच्या मुलांच्या सोशल मीडिया अकाऊंटवरही हॅकर्सची नजर आहे. काही दिवसांपूर्वीच अभिनेत्री सुष्मिता सेन हिनं आपली मुलगी रेनेचं अकाऊंट हॅक झाल्याची माहिती दिली होती. ज्यानंतर रेनेनं पुन्हा एकदा तिचं अकाऊंट रिकव्हर केलं होतं.
सोशल मीडियाच्या वाढत्या वापराचे परिणाम अकाऊंट हॅक होण्याच्या घटनांमध्ये दिसून येऊ लागले आहेत. त्यामुळं वारंवार सोशल मीडिया अकाऊंटबाबत दिले जाणारे सावधगिरीचे इशारे आणि त्यासाठीची काही तंत्र यावर युजर्सनी लक्ष द्यावं असं आवाहन तज्ज्ञ करतात.