Sonali Bendre on Cancer Journey: 2018साली बॉलिवूड अभिनेत्री सोनाली बेंद्रेच्या (Sonali Bendre) आयुष्यात कलाटणी देणारा प्रसंग घडला, ज्यामुळे तिचं आयुष्य पूर्णपणे 360 डिग्रीनं फिरलं. सोनालीला कॅन्सरचं (Cancer) निदान झालं. तिने सोशल मीडियातून हाय ग्रेड मेटास्टॅटिक कॅन्सर (चौथा टप्पा) झाल्याची माहिती दिली. न्यू यॉर्कमध्ये तिने कीमोथेरपी (Chemotherapy) घेतली. अलिकडेच अभिनेत्रीने सौमित्र पोटेंच्या 'मित्र म्हणे'ला मुलाखत दिली होती. या मुलाखतीत अभिनेत्रीने विविध विषयांवर चर्चा केली. यावेळी तिने कॅन्सरवर चर्चा केली. कॅन्सरचं निदान झाल्यानंतर स्वत:ला कसं सावरलं? लूक्समध्ये बदल, यावर तिने चर्चा केली.
कॅन्सर निदान झाल्यानंतर सोनाली बेंद्रेने सांगितला अनुभव (Sonali Bendre open up about Cancer journey)
सोनाली बेंद्रे म्हणाली की, 'प्रत्येकाच्या आयुष्यात लूक्स महत्त्वाचे असतात. आपली सोसायटीच तशी आहे. पहिल्या भेटीत आपण जज करतो, आणि माझ्याबाबतीत माझी ओळख माझ्या दिसण्यावर अवलंबून होती. मला असं वाटलं हा माझ्यासाठी धडा आहे. आई म्हणायची सौंदर्य माणसाच्या आत असतं. सौंदर्य आज आहे, उद्या कधीही जाऊ शकतं, आणि ही सत्य परिस्थिती आहे. जेव्हा केस गळायला लागले. औषधांमुळे जेव्हा शरीर सुजतं. त्यावेळी असं वाटलं की, हे शरीर आहे, कोणत्याही क्षणी बदलू शकतं. उद्या अपघात झाला किंवा काय... आपल्याला आई - वडील सांगतात, आपण पुस्तकात वाचतो'.
'जेव्हा होईल तेव्हा बघू आपण असा विचार करतो. पण आपल्या आयुष्यात अशा प्रकारचे प्रसंग घडतात, तेव्हा खऱ्या अर्थाने याची जाणीव होते. जाणीव झाल्यानंतर ही बाब तुम्ही कसं स्वीकारता, हे तुमच्या हातात आहे. स्वीकार करणं शक्य नाही, पण त्यावर उपाय काय? आपण आतल्या आत उगाच कुढत राहणार', असं सोनाली बेंद्रे म्हणाली.
'वास्तव स्वीकारणं खूप कठीण आहे. आपण स्वत:शी खूप खोटं बोलतो. त्रास नको असल्यामुळे आपण काही गोष्टी दुर्लक्षित करतो. पण तुम्हाला या गोष्टींना सामोरं जाणं गरजेंच आहे. सामोरे गेलात तरच, त्याच्या पुढे जाल. पुढे गेलात तर, नवीन जग तुमच्या स्वागतासाठी उभं असतं', असं अभिनेत्री म्हणाली. 'अशा काळात तुम्हाला मदत लागू शकते. मी थेरेपी घेतली. अशावेळी सपोर्ट सिस्टम गरजेचं असतं. काहींकडे सपोर्ट सिस्टम नसतो. सपोर्ट सिस्टम लवकर नाही बनत, नाती तयार व्हायला वेळ लागतो', असं अभिनेत्री म्हणाली.
'तेव्हा केस खूप गळाले होते. काही चॉईस नव्हता. मी केसांचे विग्स बनवले होते. पण त्या विग्समुळे खूप त्रास झाला, खूप घाम यायचा. तेव्हा मला खरंच जाणवलं की, सौंदर्य काही सेकंदात जाऊ शकतं. मग त्याच्यापुढे काय? असं नाही की सौंदर्य गेलं म्हणजे आयुष्य संपलं. तुम्हाला हे स्वीकारणं गरजेचं आहे. मला तेव्हा कळालं की, आपल्या हक्काची लोकं किती आहेत, आणि आपल्यावर किती प्रेम करतात. प्रत्येक दिवस तुमच्यासाठी बोनस आहे, ही गोष्ट तेव्हा जाणवली'.
कॅन्सर निदान झाल्यानंतर सोनाली बेंद्रेच्या आयुष्यात कोणते बदल झाले?
'सर्वात मोठे बदल, सर्वात छोट्या गोष्टींपासून होतात. मुख्य म्हणजे, रोजच्या दिवसाकडे बघण्याचा दृष्टीकोन जेव्हा बदलतो, तेव्हा आयुष्यच बदलतं', असं अभिनेत्री म्हणाली.
महत्त्वाच्या इतर बातम्या: