मुंबई : अभिनेत्री अनुष्का शर्मा ही तिच्या अभिनय विश्वातील कारकिर्दीसोबतच आता लक्ष वेधत आहे ते म्हणजे तिच्या खासगी जीवनामुळे. काही दिवसांपूर्वीच अनुष्कानं एका मुलीला जन्म दिला. आपल्या कुटुंबाला प्राधान्य देत असतानाच ही अभिनेत्री न विसरता करिअरच्या बाबतीतही महत्त्वाकांक्षी दिसत आहे. अशा या अभिनेत्रीच्या नावे अनेक यशस्वी चित्रपटांची नोंद आहे. किंबहुना सध्या तिच्या एका ऑडिशनचा व्हिडीओ व्हायरल होत आहे, जो चित्रपट तिला मिळाला असता तर तिच्या शिरपेचात आणखी एक तुरा खोवला जाणार होता.
व्हायरल झालेल्या या व्हिडीओमध्ये अनुष्का 'मुन्नाभाई एमबीबीएस' या चित्रपटातील संवाद बोलताना दिसत आहे. ग्रेसी सिंह हिच्यावर चित्रीत करण्यात आलेलं दृश्य अनुष्कानं त्या ऑडिशनसाठी निवडलं होतं. या ऑडिशननंतर अनुष्काची ज्या चित्रपटासाठी निवड होऊ शकली नाही, तो चित्रपट म्हणजे '3 इडियट्स'.
आमिर खान, शरमन जोशी, आर. माधवन, बोमन इराणी, करिना कपूर यांच्या मुख्य भूमिका असणाऱ्या या चित्रपटासाठी अनुष्काची निवड होऊ शकली नाही असं म्हटलं जातं. असं असलं तरीही जवळपास 5 वर्षांनंतर राजकुमार हिरानी यांनी 'पीके' या चित्रपटासाठी अनुष्काची निवड केली होती. यातही आमिर खान मुख्य भूमिकेत झळकला होता. या चित्रपटात ती एका पत्रकाराच्या भूमिकेत झळकली होती.
Randhir Kapoor Corona Positive : ज्येष्ठ अभिनेते रणधीर कपूर यांना कोरोनाची लागण
निर्मिती क्षेत्रातही अनुष्काचं नाव
अभिनय क्षेत्रात नावलौकिक मिळवल्यानंतर अनुष्का शर्मा चित्रपट आणि कलाकृतींच्या निर्मितीकडेही वळली. 'परी' या चित्रपटानंतर तिच्या निर्मितीसंस्थेअंतर्गत 'बुलबूल', 'पाताल लोक'ही वेब सीरिजही साकारण्यात आली होती.