Tanvi Kolte Instagram Account Deactivate: 'बिग बॉस मराठी'ची (Bigg Boss Marathi) स्पर्धा ऐन रंगात आली आहे. घरातील स्पर्धकांमध्ये आता चांगलीच चुरस रंगल्याचं पाहायला मिळतंय. एकीकडे टोळी, तर दुसरीकडे काँटा गँगमध्ये जोरदार जुंपली आहे. त्यात वाईल्ड कार्ड एन्ट्री घेतलेल्या राखी सावंतनं (Rakhi Sawant) घरातील प्रत्येकाच्याच नाकी नऊ आणलेत. अशातच सध्या राखी सावंत तन्वी कोलतेच्या (Tanvi Kolte) हात धुवून मागे लागलीय असं म्हटलं तरी चालेल. आठवडाभरापूर्वीच तन्वी घराची कॅप्टन झाली होती, अशातच त्यावेळी राखी सावंतनं आणि त्यासोबतच टोळीनं तन्वीला सळो की पळो करुन सोडलेलं. पण, तन्वीसुद्धा सर्वांना पुरून उरली. पण, घरात सर्वांच्या टार्गेटवर येऊनही आपला वेगळेपणा सिद्ध करणाऱ्या तन्वी कोलतेला आता मोठा धक्का बसला आहे.
'बिग बॉस मराठी'ची स्पर्धक तन्वी कोलतेचं इन्स्टाग्राम अकाउंट अचानक गायब झालं आहे. त्यामुळे तन्वीचे चाहते पुरते संभ्रमात पडले आहेत. तन्वी 'बिग बॉस'च्या घरात आल्यापासूनच तिची जोरदार चर्चा रंगलेली. तिच्या फॉलोअर्समध्येही मोठी वाढ झालेली. पण, आता तिचं इन्स्टाग्राम अकाउंट बंद पडल्यानं तिच्या चाहत्यांनाही काही कळेना झालंय. अशातच सीझन ऐन रंगात आलेला असताना आता इन्स्टाग्राम अकाउंट बंद पडल्याची किंमत तन्वीला मोजावी लागणार का? हे पाहणं महत्त्वाचं ठरणार आहे.
'बिग बॉस मराठी'च्या घरात तन्वी भारी खेळताना दिसतेय. तिचे गेम प्लान आणि तिच्या भूमिका यामुळे ती नेहमीच चर्चेत असते. भाऊच्या धक्कावर रितेश देशमुखनं अनेकदा तन्वीचं कौतुकही केलंय. अशातच आता तिचं इन्स्टाग्राम अकाउंट अचानक गायब झाल्यामुळे नेमकं झालंय काय? असा प्रश्न तिच्या चाहत्यांना पडलाय.
काही दिवसांपूर्वी प्रसिद्ध सोशल मीडिया इन्फ्लुएन्सर प्रसाद वेदपाठक आणि दीपिका वेदपाठक यांचे एक, दोन नव्हे तर तब्बल पाच सोशल मीडिया अकाउंट मेटाकडून सस्पेंड करण्यात आलेले, त्यापैकी एक अकाउंट दहा दिवसांनी सुरू झाल्याची माहिती प्रसिकानं दिलेली. अशातच आता तन्वीचं अकाउंट अचानक गायब झाल्यामुळे चाहत्यांना तिचंही अकाउंट सस्पेंड तर झालं नाही ना? असा प्रश्न पडलाय. दरम्यान, तन्वीच्या कामाबद्दल बोलायचं झालं तर, 'लक्ष्मी निवास' मालिकेतून तन्वी कोलतेला घराघरांत पोहोचली.
महत्त्वाच्या इतर बातम्या :