Comedian Bharti Singh: स्टार कॉमेडियन भारती सिंह आपल्या विनोदी शैलीसाठी ओळखली जाते. तिचा चाहतावर्ग खूप मोठा आहे. ती सोशल मीडियावर कायम चर्चेत असते. दैनंदिन घडणाऱ्या गोष्टी ती व्लॉगद्वारे चाहत्यांसोबत शेअर करत असते. अलिकडेच तिनं सोशल मीडियावर एका स्कॅमबाबत माहिती शेअर केली आहे. भारतीनं सांगितलं की, एआयद्वारे तिच्या आवाजाचा वापर करुन, ऑनलाइन स्लिमिंग प्रॉडक्ट्स विकले जात असल्याची माहिती दिली. यामुळे सोशल मीडियात खळबळ उडाली आहे. तिनं आपला संताप व्यक्त केला.
कॉमेडिअन भारती सिंग सध्या एका नवीन प्रकारच्या ऑनलाइन घोटाळ्यामुळे चर्चेत आहे. काही स्कॅमर्स एआयद्वारे तिच्या आवाजाचा वापर करुन स्लिमिंग प्रॉडक्ट्स विकण्याचा प्रयत्न करत आहेत. अनेकांनी या बनावट जाहिरातीवर विश्वास ठेवला. दरम्यान, भारतीला या माहिती मिळताच तिनं आपल्या चाहत्यांना सावध केले आहे. तिनं व्हिडिओ शेअर करत ही जाहिरात फेक असल्याचं सांगितलं.
भारतीनं व्हिडिओत सांगितलं की, 'माझ्या नावाचा वापर करुन स्कॅम केला जात आहे. चाहते आणि इतर नातेवाईक ही जाहिरात मला शेअर करुन, खरं आहे का? असा प्रश्न उपस्थितीत करतात. या उत्पादनाचा वापर करुन खरंच वजन कमी होतं का? असेही प्रश्न विचारले जातात. तु्म्ही हा प्रॉडक्ट वापरता का? या कंपनीला तुम्ही ओळखता का? असे अनेक प्रश्न विचारतात', असं भारती सिंह म्हणाली.
या जाहिरातीबाबत भारती म्हणाली, 'मी तुम्हाला सांगू इच्छिते, मी या कंपनीला अजिबात ओळखत नाही. माझ्यासाठी ही फसवणूक आहे. मला न विचारता, माझ्या परवानगीशिवाय, ते माझ्या नावाचा वापर करुन, एआयद्वारे माझा आवाज बदलून आपले प्रॉडक्ट विकत आहेत. जेव्हा मला लोकांनी हा व्हिडिओ पाठवला, तेव्हा हे प्रकरण उघड झालं', असं भारती सिंह आपल्या व्हिडिओत म्हणाली.
'लोक माझ्यावर खूप विश्वास ठेवतात. हा प्रॉडक्ट खरा आहे की नाही, खरेदी करावे की नाही? याबाबत विचारतात. मला माहित नाही, हा स्कॅम नेमकं कोणते लोक करत आहेत. जाहिरातीमध्ये वापरलेला आवाज माझा जरी वाटत असला तरी, तो माझा आवाज नाही. या स्कॅमला बळी पडू नका', असे आवाहन यावेळी भारतीने केले.
'माझा चेहरा तिथे वापरला गेला असेल, पण हा माझा आवाज नाही. हा जाहिरातीचा व्हिडिओ माझ्या आईनेही पाठवला होता. हे खरे आहे की नाही? हे देखील तिनं विचारलं होतं. ते खोटे आहे', असं अभिनेत्रीनं स्पष्ट केलं. तिनं आपला कंपनीशी आणि ऑनलाइन विकल्या जाणाऱ्या उत्पादनांशी काहीही संबंध नसल्याचंही स्पष्ट केलं.