Apurva Nemlekar : 'रावरंभा' (Raavrambha) हा सिनेमा लवकरच प्रेक्षकांच्या भेटीला येणार आहे. आता या सिनेमासंदर्भात एक महत्त्वाची अपडेट समोर आली आहे. आपल्या अभिनयाने आणि बिनधास्त स्वभावावाने कायम चर्चेत असणारी अण्णांची शेवंता 'रावरंभा' या सिनेमात शाहीनआपाच्या भूमिकेत दिसणार आहे.
अपूर्वाने शाहीनआपाचा लुक सोशल मीडियावर शेअर केला आहे. फोटो शेअर करत तिने लिहिलं आहे,"आतापर्यंत माझ्या वेगवेगळ्या भूमिकांवर तुम्ही अतोनात प्रेम केलं आहे. अशीच एक वेगळी भूमिका आता मी साकारली आहे. शाहीनआपा येतेय येत्या 12 मे ला प्रदर्शित होणाऱ्या 'रावरंभा' या सिनेमाच्या माध्यमातून".
शेवंताच्या भूमिकेतून घराघरात पोहोचलेली अपूर्वा आता एका अनोख्या अंदाजात दिसणार आहे. आरस्पानी सौंदर्य आणि धारदार नजर यांचा सुरेख मिलाप असणारी करारी बाण्याची 'शाहीन आपा' ही भूमिका अपूर्वा लवकरच प्रदर्शित होणाऱ्या 'रावरंभा' या सिनेमात साकारणार आहे.
शाहीनआपाच्या भूमिकेबद्दल अपूर्वा नेमळेकर म्हणाली...
शाहीनआपाबद्दल बोलताना अपूर्वा म्हणाली,"शिवछत्रपतींच्या कार्याला छुपी मदत करणारी 'शाहीन आपा' ही अतिशय महत्त्वपूर्ण ऐतिहासिक सिनेमात महत्त्वपूर्ण भूमिका करण्याचा योग जुळून आला असून या भूमिकेसाठी मी तितकीच उत्सुक होते. माझी ही भूमिका प्रेक्षकांना नक्कीच आवडेल. मला स्वत:लाही काही वेगळं केल्याचं समाधान या भूमिकेने दिलं आहे".
'रावरंभा' कधी होणार प्रदर्शित? (Raavrambha Release Date)
'रावरंभा' हा सिनेमा येत्या 12 मेला प्रेक्षकांच्या भेटीला येणार आहे. अनुप जगदाळे यांनी या सिनेमाच्या दिग्दर्शनाची धुरा सांभाळली आहे. या सिनेमात छत्रपतींच्या भूमिकेत शंतनू मोघे तर प्रतापराव गुजर यांच्या भूमिकेत अशोक समर्थ दिसणार आहे. या सिनेमातील गाणी गुरु ठाकूर आणि क्षितीज पटवर्धनने लिहली आहेत. आपल्या दमदार अभिनयाने प्रेक्षकांची मने जिंकणारा ओम भूतकर (Om Bhutkar) आणि सौंदर्यासोबत आपल्या अभिनयाने प्रेक्षकांवर छाप सोडणारी मोनालिसा बागल (Monalisa Bagal) या सिनेमाच्या माध्यमातून रुपेरी पडद्यावर झळकणार आहे.
गुरु ठाकूर आणि क्षितीज पटवर्धनने 'रावरंभा' या सिनेमातील गाणी लिहिली आहेत. गेल्या काही दिवसांपासून अनेक ऐतिहासिक सिनेमे प्रदर्शित झाले असून हे सिनेमे प्रेक्षकांच्या पसंतीस उतरले आहेत. आता 'रावरंभा' या सिनेमाची प्रेक्षकांना उत्सुकता आहे.
संबंधित बातम्या