टेलरचं काम करायचे, वयाच्या 52 व्या वर्षी सिनेक्षेत्रात पदार्पण, 225 सिनेमात काम; कराचीच्या तुरुंगात देशासाठी तुरुंगवासही भोगला
AK Hangal : दिवंगत अभिनेते ए.के. हंगल यांनी वयाच्या 52 वर्षी सिनेक्षेत्रात पदार्पण केलं होतं. शोले सिनेमामुळे ते देशात फेमस झाले होते. त्यांनी जवळपास 225 सिनेमांमध्ये काम केलंय.
AK Hangal : शोले सिनेमातील 'रहीम चाचा' असोत किंवा 'लगानमधील शंभू काका' या पात्रांबद्दल बोललं की डोळ्यांसमोर एका वृद्ध व्यक्तीची प्रतिमा उभी राहते. ही भूमिका साकारली होती ज्येष्ठ अभिनेते अवतार किशन हंगल ऊर्फ ए. के. हंगल यांनी. त्यांच्या अभिनयात अशी ताकद होती प्रेक्षक त्यांचे चाहते व्हायचे. शोले चित्रपटातील रहीम चाचांचा “इतना सन्नाटा क्यों है भाई…” हा डायलॉग याचं उत्तम उदाहरण आहे. ए. के. हंगल यांनी 52 व्या वर्षी हिंदी चित्रपटसृष्टीत पाऊल ठेवलं. आपल्या कारकिर्दीत त्यांनी मोठा भाऊ, वडील किंवा वृद्ध माणसाच्या भूमिका साकारल्या. पण जेव्हा जेव्हा ते रुपेरी पडद्यावर झळकले, तेव्हा आपल्या अभिनयाने त्यांनी प्रेक्षकांचं मन जिंकलं.
ए. के. हंगल यांची आत्मकथा 'लाईफ अँड टाइम्स ऑफ ए. के. हंगल' मध्ये त्यांच्या आयुष्यातील अनेक अज्ञात पैलूंवर प्रकाश टाकण्यात आला आहे. या पुस्तकानुसार, ए. के. हंगल यांच्या वडिलांचे एक जवळचे मित्र होते, त्यांनी हंगल यांना टेलर बनण्याचा सल्ला दिला होता. त्यानंतर त्यांनी इंग्लंडमधील एका टेलरकडून हे काम शिकून घेतलं.
1 फेब्रुवारी 1914 रोजी सियालकोटमध्ये जन्मलेले अवतार किशन हंगल हे चित्रपटात येण्यापूर्वी एक स्वातंत्र्यसैनिक होते. सुरुवातीच्या काळात ते टेलर म्हणून काम करत होते. पण 1929 ते 1947 या दरम्यान त्यांनी भारताच्या स्वातंत्र्यलढ्यात सक्रिय सहभाग घेतला. या कारणाने त्यांना कराचीच्या तुरुंगात तीन वर्षं कैद भोगावी लागली. सुटकेनंतर ते भारतात आले. 1949 ते 1965 या काळात त्यांनी भारतीय रंगमंचावर अनेक नाटकांमध्ये अभिनय केला. जेव्हा त्यांचे वय 52 वर्षे होते, तेव्हा 1966 मध्ये बासू भट्टाचार्य यांच्या 'तीसरी कसम' या चित्रपटातून त्यांनी चित्रपटसृष्टीत पदार्पण केलं.
1970 ते 1990 हा कालखंड ए. के. हंगल यांच्या कारकिर्दीसाठी अत्यंत संस्मरणीय ठरला. या काळात त्यांनी हीर रांझा, नमक हराम, शौकीन, शोले, आइना, अवतार, अर्जुन, आंधी, तपस्या, कोरा कागज आणि बावर्ची यांसारख्या गाजलेल्या चित्रपटांत महत्त्वाच्या भूमिका केल्या. सांगितलं जातं की त्यांनी राजेश खन्ना यांच्यासोबत सुमारे 16 चित्रपटांत काम केलं. इतकंच नव्हे, तर हंगल यांनी मुंबईत झालेल्या एका फॅशन शोमध्ये व्हीलचेअरवर रॅम्प वॉक देखील केला होता. 'पहेली' हा त्यांचा शेवटचा चित्रपट होता, तर ते अखेरचं 'मधुबाला' या टीव्ही शोमध्ये दिसले होते.
ए. के. हंगल यांनी आपल्या चार दशकांच्या चित्रपट कारकिर्दीत तब्बल 225 चित्रपटांमध्ये काम केलं. वय वाढत राहिलं तरी चित्रपटात काम करण्याचा त्यांचा उत्साह कायम राहिला. भारताचे तत्कालीन राष्ट्रपती ए. पी. जे. अब्दुल कलाम यांनी 2006 मध्ये त्यांना पद्म भूषण पुरस्काराने सन्मानित केलं. 26 ऑगस्ट 2012 रोजी ए. के. हंगल यांचं निधन झालं.
इतर महत्त्वाच्या बातम्या
महत्त्वाच्या बातम्या
